Ni atail wia kadaudoken tepin ohlo Adam, kitail koaros wia peneinei ehu. Mendahki tohn peneinei ehu arail kin kasik limpoak oh wahu ong emenemen, rahnpwukat e kin apwal en diarada soangen limpoak wet. Kaidehn soangen limpoak wet me atail Koht limpoako ketin kupwurki.

“Ke en poakohng mehn mpomw duwehte omw kin poakohng pein uhk.”​—LIPAI 19:18.

“Kumwail poakohng amwail imwintihti kan.”​—MADIU 5:44.

Tehk ia duwen Koht eh ketin kawehwehda limpoak nan sapwellime mahsen nan 1 Korint 13:4-7:

“Limpoak kin kanengamah oh kadek.”

Medewehla: Ia omw pepehm ni meteikan arail kin kanengamah oh kadek ong uhk oh sohte kin mwehlkihda sapwung kan me ke kin wiahda?

“Limpoak sohte kin peirin.”

Medewehla: Ia omw pepehm ni meteikan arail sohte kin kamehleleiuk de peirinionguhk?

Limpoak “sohte kin rapahki pein kamwahupe.”

Medewehla: Ia omw pepehm ni meteikan arail pahn kin wauneki omw madamadau kan oh sohte kin kalapw ngidingidki pein arail madamadau?

Limpoak “sohte kin kolokol lingeringer.”

Medewehla: Koht kin ketin kupwurki aramas me wiahda dihp oh mwuri koluhla. “E sohte kin kapwung aramas ahnsou koaros; e sohte kin engieng kohkohlahte.” (Melkahka 103:9) Kitail kin kalahnganki ni emen me kitail kin kansensuwedihala eh kin mahkohng kitail. Kahrehda kitail pil anahne kin mahkohng meteikan ni arail kin kansensuwedihkitailla.​—Melkahka 86:5.

Limpoak “sohte kin perenkihda me suwed.”

Medewehla: Ni mehkot suwed eh kin wiawihong kitail, kitail sohte men meteikan en kin perenki dahme wiawihong kitail. Ihme kahrehda kitail sohte kin perenki ni meteikan ar kin lokolongki apwal, mehnda ma re kin wiakauwe kitail.

Pwehn alehdi sapwellimen Koht kapai, kitail anahne poakohng meteikan ni ahl pwukat sohte lipilipil ihs irail. Ehu ahl mwahu me kitail kak wia met iei sang atail kin sewese irail me anahne sawas.