Ei pahpao kohsang Germany kohla Australia nan pahr 1949. E kohla rapahki doadoahk nan wasahn rapahki soahng kan ong pelien lioal oh kousoanla wasa ehu me dohsang kahnimw nan Victoria. Wasao me e pwoudikihda ei nohno, oh I ipwidi nan pahr 1953.

Sounpar kei mwuri, ei nohno tepida onop Paipel rehn Sounkadehdehn Siohwa kan, eri I tikida ese padahk en Paipel kan. Ahpw, ei pahpao sohte kin pwungki pelien lamalam kan. E kin tepida wia tiahk lemei oh kamasak meteikan, oh ei nohno uhdahn kin masak ih. Ei nohno kin pousehla onop Paipel ni rir oh tepida poakohngala padahk en Paipel kan. Ni ahnsou me at pahpao sohte kin mie, nohno kin ehukihong riei serepein tikitiko oh ngehi dahme e sukuhlkihdi. E padahkihong kiht duwen paradais nin sampah ni ahnsou kohkohdo oh ia duwen at kak nsenamwahu ma se kin idawehn kaweid en Paipel kan me pid duwen tiahk mwahu.​—Melkahka 37:10, 29; Aiseia 48:17.

Ni ei sounpar 18, I pehm me I anahne kohkohlahsang imwato pwehki en ei pahpao tiahk lemei kan. Mendahki I kamehlele dahme nohno kin padahkihong ie sang nan Paipel, I sohte kin kalahnganki kesempwalpen Paipel. Eri I sohte kin mourki kaweid kan loale. I tepida doadoahk nin duwen soun wia lioal nan wasahn weir takai toantoal kan. I pwopwoudida ni ahnsou me I sounpar 20. Nait tepin serepeino ipwidi sounpar siluh mwuri, oh I pwurehng medewe dahme kesempwal nan ei mour. I ese me Paipel kak sewese at peneinei, eri I tepida onop Paipel rehn emen Sounkadehdehn Siohwa. Ahpw ei pwoudo uhdahn uhwong Sounkadehde kan. Ni ahnsou me I iang towehda ehu arail mihting kan, e padahkihong ie en wiahda ei pilipil ma I pahn pilada en uhdihsang ei onop Paipel de kohkohlahsang peneinei. Sang ei pepehm luwet, I dukula pah oh sohla tuhwong Sounkadehde kan. Mwuhr I koluhkihla ei sohte wia dahme I ese me pwung.

Ehu rahno, iengei tohndoadoahk kan kasalehiong ie kilel suwed. E kaperen oh pil ni ahnsowohte kasaut, oh e kahrehiong ie en ahneki pepehm en namenengki dahme I wiahdao. Ni ei tamanda dahme I sukuhlkihsang nan Paipel, I uhdahn kamehlele me Koht pahn ketin kaloke ie. Ahpw ni ei kin katohtohwehla ahnsou en kilang kilel suwed kan, ei madamadau ong kilang kilel suwed wekila. Sohte pwand, I perenkihla kilang.

Erein sounpar 20, I ekisekis sohla taman kaweid kan me ei nohno  kin song en padahkihong ie mahso. Ei wiewia kan sansaldahsang dahme I kin audehkihda ei madamadau. Ei koasoi kan kin samin, oh I kin perenki kamwan suwed. I tepida kakairada madamadau sapwung ong wia nsenen pwopwoud. Mendahki I mihmihte rehn ei pwoud, I iangadahr ekei lih. Ehu rahno I irongen nan kilahs oh medewe, ‘I sohte pwungkin uhk.’ I sohla wauneki ie I ahpw uhd kadongodongkinie.

I sohla pwopwoud, oh ei mour uhdahn ohla. Ngehi eri kapakapohng Siohwa nan ei mohngiong unsek. I pwurehng onopki Paipel mendahki sounparehr rieisek I uhdihsang onop. Ni ahnsowo ei pahpao melahr, oh ei nohno papidaislahr nin duwen emen Sounkadehdehn Siohwa.

Mwomwen ei mour uhdahn weksang oh dohsang kosonned ile kan en Paipel. Ahpw met I koasoanehdier en alehdi soan en lamalam me Paipel inoukihda. I akadeiong kamwahwihala audepen ei koasoi kan oh kameleileiehdi sang keh lingeringer. I pil koasoanehdi en kesehla ei mour samin, uhdihsang pilein mwohni, kamamsakau, oh uhdihsang pirap ni ei wasahn doadoahk.

Iengei kan ni wasahn ei doadoahko sohte kak wehwehki kahrepen ei men wiahda soangen wekidekla laud pwukat. Erein sounpar siluh, re kalapw lidereie en kin pwuralahng ei tiahk en mahs ko. Ma I kin kisin sapwungalahte oh mwehlda oh peined, re kin peren werki: “Io, eri iahu! Ih uhdahn Joe met.” Udahno I kin medengkihla ar kin nda met! I kin pehm me ngehi aramas me sohte kak pweida.

Ei wasahn doadoahk diren kilel suwed kan nan pwuhk de nan computer. Iengei tohndoadoahk kan kin ahnsou koaros kadarpeseng nan computer kan kilel suwed akan, duwehte me I pil kin wia mahso. I kin nantihong kesehla tiahk wet me I tengla loale, ahpw iengei kan kin nannanti pwe I en pwupwudiong pahn kasongosong. I peki sawas rehn me kin onop Paipel rehi pwehn kakehle oh kangoange ie. Ni kanengamah e kin rong ei wehkohng audepen loalei. E kasalehda ekei iren Paipel kan pwehn sewesekin ie mwomwen ei pahn powehdi tiahk me I tengla loale oh e kangoange ie en kin pekipeki sapwellimen Siohwa sawas ni kapakap ngidingid.​—Melkahka 119:37.

Ehu rahno I ekerpene iengei tohndoadoahk kan. Ni ahnsou me re kohpene, I padahkihong irail en kihong mahs pihru riau rehn ohl riemeno me wehkada ara kahpwal en kamamsakau. Pwihno wiahkintehieu werki ar sapwungki met, ndinda: “Sohte me kak wia soangen! Ira riemenet nannanti en powehdi kahpwal en!” Ngehi eri nda: “Mehlel, pil duwehte ngehi.” Sang rahno kohdo, ohlo ako wehwehkihda ei kin nannanti en powehdi luwet en kilang kilel suwed oh sohla kin idingkihong ie en pwuralahng ei mour suwed en mahso.

Ahnsou dower powe oh sawas tohto sang rehn Siohwa, I ahpw kalowehdi ei luwet en kilikilang kilel suwed. Nan 1999, I papidaisla nin duwen emen Sounkadehdehn Siohwa, I uhdahn kalahnganki ei pil kak pwurehng ahneki soangen mour me mwakelekel oh peren.

Met I wehwehkihda dahme kahrehda Siohwa kin ketin kalahdeki soahng kan me I kin poakohng ahnsou reirei. Nin duwen Sahm limpoak men, e kin ketin kupwurki pereiiesang kahpwal me imwikihla kilikilang kilel suwed. Uhdahn mehlel kaweid kan en Lepin Padahk 3:5, 6! Ire wet mahsanih: “Likih KAUN-O ni mohngiongomw unsek. Dehr koapworopworki mehkan me ke pein lemeleme me ke ese. Tamanda KAUN-O ni omw wiewia kan koaros, oh e pahn ketin kasalehiong uhk ahl me pwung.” Koasoandi kan en Paipel sohte kin ihte pereikitailla ahpw e pil kin kamehlelehiong kitail me ahnsou koaros kitail pahn pweida ma kitail kapwaiada koasoandien Paipel.​—Melkahka 1:1-3.

Mahso, I kin tateki mwomwen ei mour, ahpw met mie wahu oh popohl loalei. I kin mour mwakelekel oh pehm sapwellimen Siohwa mahk oh sawas. Nan pahr 2000, I pwoudikihda Karolin, emen lih Kristian me pil duwe ie poakohng Siohwa laud. Imwat kin wia wasa ehu me diren popohl. Se kin uhdahn kalahnganki at pil iang kisehn pirien en Kristian limpoak oh min me kapil sampah pwon.