I ipwidi nan Ciudad Mante, kousapw kaselel ehu nan wehin Tamaulipas, Mexico. Pali laud en aramas akan nan kahnimwo kin uhdahn kadek. Ahpw e kansensuwed pwehki miniminpenehn pwihnen mwersuwed kan, wasao uhdahn keper.

Ngehi me keriaun laud rehn kiht pwutak pahmen. Ei pahpa nohno kihong ie en papidais nan Imwen Sarawi en Kadolik, oh mwuhr I iang wia kisehn pwihnen koul nan imwen sarawio. I men kaperenda Koht pwehki I uhdahn masak pakadeikda oh isihsla nan ehl kohkohlahte.

Ahnsou me I sounpar limau ei pahpao kohkohlahsang kiht. Met kahrehda I nsensuwed laud oh mwoarosala. I sohte kak wehwehki dahme kahrehda e keseikitailla pwehki se uhdahn poakepoake ih. Ei nohno anahne doadoahngki awa tohto likin ihmw pwehn apwalih kiht pwutak pahmen.

I isanekihla irair me se mi loaleo oh kin tangasang sukuhl pwehn patehng seri laud kan. Irail padahkihong ie lokaia suwed, simoak, pirap, oh pakir. Pwehki I kin men kaunda meteikan, I sukuhlki pakir, poadoar, oh soangen pei me adaneki martial arts, oh pil mwomwen doadoahngki dipwisoun pei kan. I wiahla aramas emen me kin tiahk lemei ni ei pwulopwul. I kin kalapw iang pei doadoahngki kesik, oh ekei pak e kin imwikihla nta ni paliwereiet oh kereniong mehla pohn ahl kan. Ia uwen laud en nsensuwed me I kahrehiong ei nohno ni eh diariehda wasao oh pwekiehda oh tangahkiniehla ni imwen wini!

Ahnsou me I sounpar 16, emen kompoakepahi sang ni ei tikitiko me adaneki Jorge mwemweitla ni imwato. E padahkihong kiht me ih emen Sounkadehdehn Siohwa oh e men ehukihong kiht rohng kesempwal ehu. E tepida kawehwehda soahng kan me e kamehlele oh e doadoahngki Paipel ni eh wia met. Saikinte pak ehu I wadek Paipel, oh I perenki ei sukuhlki duwen mwaren Koht oh kupwure. Ih eri idek ma se men onopki Paipel, kiht eri pwungki.

I uhdahn nsenamwahula ni ei sukuhlki dahme uhdahn mehlel me pid duwen kisiniei nan ehl, me met kaidehn padahk en Paipel. (Melkahka 146:4; Eklesiasdes 9:5) Ahnsou me I sukuhlki met, I sohla ahneki pepehm en masak Koht ni ahl sapwung. Ahpw, I tepida kilengwohng ih nin duwen Sahm limpoak men me kupwurki soahng mwahu kan ong sapwellime seri kan.

 Ni ei wie kekeirda nan ei onop Paipel, I kilangada soangen anahn kan me I anahne wekidala duwen ngehi. I anahne kakairada aktikitik oh uhdihsang wia tiahk lemei. Kaweid me kileldi nan 1 Korint 15:33 sewese ie. E mahsanih: “Werekiong aramas suwed kan e kin kauwehla tiahk mwahu.” I ese me ma I men wekidala mwomwen ei wiewia kan, I anahne uhdihsang werekiong aramas akan me kin kasongekin ie soahng suwed kan. Eri I uhdihsang patehng kompoakepahi en mahso ko oh uhd patehng tohnmwomwohdiso en Kristian mehlel kan, aramas akan me kin kapwungala nanpwung suwed me re ahneki, kaidehn ni mwomwen tiahk lemei ahpw sang ni ar kin doadoahngki kaweid kan en Paipel.

Pil ehu iren Paipel me kamwakid ie iei nan Rom 12:17-19. E mahsanih: “Ma emen pahn wiahiong kumwail me suwed, kumwail dehr dupungkihong me suwed. . . . Kumwail wia uwen amwail kak pwe kumwail en ahneki popohl rehn aramas koaros. . . . Kumwail dehr pein dupuk, . . . Pwe Pwuhk Sarawi mahsanih, ‘“Kaun-o ketin mahsanih, ngehi me pahn dupuk, ngehi me pahn ikih.’” I tepida pwungki me Siohwa me pahn ketin kapwungala wiewia sapahrek nin duwen me e kupwurki oh ahnsou me e kupwurki. Ekisekis I powehdi ei mouren tiahk lemei.

I sohte pahn manokehla ehu pwongo ni ahnsou me I pwurupwurala ni imweio. Pwihn en me pwulopwul kei sang ehu pwihn me kin uhwong kiht mahs peiong ie, oh kaun en pwihn wet wokih nan tihnsewei, oh werki, “Doarehla omw mour!” Ahnsowohte I kapakapohng Siohwa ni mwotomwot, peki en ketin sewese ie dadaur pahn uhwong wet. Mendahki I men pelianda irail, ahpw I nantihong kohkohla. Mwurin rahno I tuhwong kaun en pwihn wet. I tepida lingeringer, men pelianda ih, ahpw I pil pwurehng kapakap ni ngihl soh sansal peki rehn Siohwa en ketin sewese ie en kanengamah. I pil pwuriamweila pwe pwutako kohdo rehi oh nda: “Menlau mahkikihong ie dahme wiawi pwohng. Ni mehlel I men duweiuk. I men onopki Paipel.” Ia uwen ei peren pwe I kakehr kanengamahiong ei lingeringer! I kalahnganki ei kakehr wia met kahrehda se tepida onopki Paipel.

I nsensuwedkihla pwe ei peneinei sohte pousehlahte arail onopki Paipel ni ahnsowo. Ahpw I koasoanehdi teng en wiahda ei pilipil en pousehlahte onopki Paipel oh dehr mweidohng emen de soahng ehu en kauhiehdi. I ese me ni ei pahn kaukaule werekiong sapwellimen Koht aramas akan pahn kamwahwihala nsensuwed loalei oh kihong ie peneinei me I anahne. I pousehlahte kekeirda, oh nan pahr 1991, I papidaisla nin duwen emen Sounkadehdehn Siohwa.

Mahs I kin kalapw lingeringer, kaunda meteikan, oh tiahk lemei. Ahpw Mahsen en Koht uhdahn wekidala ei mour. Ahnsouwet I kin ehukihong meteikan rohng en popohl sang nan Paipel ong koaros me men rong. I ahneki pwais kaselel en doadoahngki pali laud en ei ahnsou ong papah Siohwa erein sounpar 23.

Mie ahnsou ehu me I toukihda ei ahnsou ong doadoahk nan ohpis en Sounkadehdehn Siohwa kan nan Mexico. Erein ei mi mwo, I tuhwong emen sister pwulopwul me inenen pwahtiet, oh se pwopwoudida nan pahr 1999. Ia uwen ei kalahnganki Siohwa eh ketin kapaiahkin ie emen werek loalopwoat!

Se kin papah ni ehu mwomwohdiso me kin doadoahngki peh (sign language) pwehn sewese me salengepon kan en sukuhlki duwen Siohwa. Mwuhr, se ale luhk en kosoula Belize pwehn padahkihong aramas akan en sahpwo Paipel. Mendahki se sohte kin ahneki soahng tohto ni at mi wasao, se kin ahneki soahng koaros me se anahne pwe sen nsenamwahu. Se sohte men wiliankihdi ehu soahng tohrohr.

Mwuhr ei nohno pil pwurehng tepida onop Paipel oh papidaisla. Pil riei pwutak laud oh eh pwoud, oh neira seri kan ahnsouwet wialahr Sounkadehdehn Siohwa kei. Ekei kompoakepahi kan mahs me I kin ehukihong rongamwahu en Wehio pil kin papah Siohwa ahnsou wet.

E kansensuwed pwehki ekei kisehn ei peneinei mehla pwehki re sohte wekidala elen arail mouren tiahk lemei. I medewehla ma I wiewiahte soangen mouro, ele I pahn kakete duwehla irail. I kalahngankihong Siohwa pwehki eh ketin kainangihedo ih rehi oh sapwellime tohnkaudok kan me kin kasukuhlih ie ni kanengamah oh kadek pwehn doadoahngki kaweid kan en Paipel nan ei mour.