Pwe kupwuren Koht en pweida, Paipel kasalehda me ekei pak tohnleng kan kin kihda perepe ong tohnkaudok mehlel kan. (Melkahka 34:7) Karasepe:

• Ni ahnsou me Siohwa ketin kasohrehla kahnimw suwed en Sodom oh Komora, tohnleng kan sewese Lohd ohl pwung men, oh eh peneinei en tang.​—Senesis 19:1, 15-26.

• Ni mwehin Papilon mahso, ni ahnsou me mehn Ipru pwulopwul silimen pahn kamakamala nan kisiniei mwehl ehu, Koht ketin “kadarodo sapwellime tohnleng pwe en kapitala ohl pwukat me kin papah oh pwongih ih.”​—Daniel 3:19-28.

• Mwurin ohl pwung men me adaneki Daniel eh mihmihki pwohng ehu pwon nan pesen laion kei, e kawehwehda me e pitila pwehki “Koht ketin poaronehdo sapwellime tohnleng me kakuhpene ewen laion kat.”​—Daniel 6:16, 22.

Ni mwehin tepin mwomwohdisohn Kristian kan, mie pak me sapwellimen Koht sounkair tohnleng kan kin iang sawas ni ahnsou kan me anahn pwehn kak kapwaiada kupwuren Siohwa. Karasepe:

• Tohnleng men ritingada wenihmw en imweteng ehu oh kahluwahsang wahnpoaron kan me selidi wasao pwe ren kak pousehlahte kalohk nan tehnpaso.​—Wiewia 5:17-21.

• Tohnleng men padahkihong sounkalohki rongamwahu Pilip en kohla nan ahl ehu me kohsang Serusalem kolahng Kasa oh kalohkong ohlen Idiopia men me kohdalahngehr Serusalem pwehn kaudok.​—Wiewia 8:26-33.

• Ni ahnsou me Koht ketin mweidada irail me kaidehn mehn Suhs kan ren wiahla Kristian kei, tohnleng men pwarohng kaunen sounpei en Rom Kornilius nan kaudiahl ehu oh padahkihong ih en lukehdo wahnpoaron Piter ni imweo.​—Wiewia 10:3-5.

• Ni ahnsou me wahnpoaron Piter selidi, tohnleng men pwarohng oh kahrehieisang nan imwetengo.​—Wiewia 12:1-11.

Sohte mehn kadehde me Koht kin ketin doadoahngki tohnleng kan met pwehn sewese aramas ni manaman kapwuriamwei kan duwehte soahng kan me sansalda nan Paipel. Ahpw, me pid duwen atail ahnsou, Sises ketin mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros​—a mwuri, imwin sampah ahpw pahn kohdo.” (Madiu 24:14) Ke ese me sapwellimen Krais tohnpadahk kan kin wiewia doadoahk wet pahn epwelpen tohnleng kan?

Pwuhken Kaudiahl kasalehda me tohnleng kan pahn kin pwerisekiong sewese aramas akan nan sampah pwon ren sukuhlki duwen Siohwa Koht oh kupwure ong aramas. Wahnpoaron Sohn ntingihdi: “I ahpw pil kilangada pil emen tohnleng me pipihr nan wehwe, me weuwa rongamwahu poatopoat ehu me e pahn lohkihong tohn sampah kan, wehi koaros, kadaudok koaros, lokaia koaros, oh sahpw koaros. E ahpw ngihl laudida, nda, ‘Kumwail lemmwiki Koht oh kapinga sapwellime roson lapalahpie! Pwe e lelehr ahnsoun eh pahn ketin kadeikada tohn sampah kan. Kumwail poaridi mwohn silangi oh pwongih me ketin kapikada nanleng, sampah, madau, oh utuhnpihl kan!’” (Kaudiahl 14:6, 7) Tohto soahng kan me kin wiewiawi rahnpwukat kin kadehdehda me tohnleng kan kin utung doadoahk en kalohki Wehio nan sampah pwon. Mehlel, pwe ni ahnsou me emen me dipan kin koluhla oh sohpeiong Siohwa, ‘tohnleng en Koht kan, kin perenkihda.’​—Luk 15:10.

Dahme pahn wiawi ni ahnsou me doadoahk en kalohk pahn imwisekla? Mwurin mwo, “sounpei en nanleng kan” iei tohnleng kan, pahn utung Sises Krais, Nanmwarkien nanmwarki kan, oh pei nan “mahwen me pahn wiawi ni Rahn Lapalap en Koht, Wasa Lapalahpie” nan Armakedon. (Kaudiahl 16:14-16; 19:14-16) Sises pahn ketin doadoahngki tohnleng kehlail kan ren kapwaiada sapwellime kadeik ong aramas oh “kaloke irail kan me . . . sohte kin peikiong Rongamwahu en Kaun Sises.”​—2 Deselonika 1:7, 8.

Ihme kahrehda, ken kamehlele me tohnleng kan kin nsenohkin uhk. Irail uhdahn kin nsenohki laud anahn en irail kan me kin men papah Koht, oh Siohwa kin ketin pwurepwurehng doadoahngkin irail pwehn kakehlaka oh pere sapwellime ladu lelepek kan nin sampah.​—Ipru 1:14.

Eri, emenemen kitail anahne wiahda pilipil kesempwal ehu. Kitail pahn rong oh peikiong rongamwahwo me kin wie lolohkseli sampah pwon? Sounkadehdehn Siohwa kan nan omw wasa pahn perenki seweseiuk en paiekihda sawas limpoak en sapwellimen Koht tohnleng kehlail kan.