Amwail Dadaurete en Poatopoatete oh Unsekla
“Amwail kanengamah ni ahnsou apwal [“dadaurete,” NW] en poatopoatete oh unsekla, pwe pein kumwail en unsengkihla mehlel oh sohte pahn anahne mehkot.”—SEIMS 1:4.
KOUL KAN: 24, 139
1, 2. (a) Dahme kitail kak sukuhlkihsang Kidion oh nah sounpei 300-o arail dadaurete? (Menlau kilang tepin kilel.) (b) Nin duwen me Luk 21:19 kasalehda, dahme kahrehda en dadaurete kin kesempwal?
SONG en medewehla uwen apwal oh kalok en mahweno ni Sounkopwung Kidion eh kahluwa nah sounpei en Israel ko mahweniong arail imwintihti ko. Kidion oh nah sounpei ko pwakih mehn Midian ko oh iengerail ko pwohng ehu pwon, pwakipwakihete irail mpen mwail 20! Paipel padahkihong kitail dahme wiawi mwuri: “Kidion oh nah sounpei 300-o ahpw lel ni Pillap Sordan oh kotehla pihlo. Re inenen pwangada.” Ahpw re saikinte kana nan mahweno, re anahnehte mahweniong sounpei 15,000. Imwintihti pwukat kin kalokei mehn Israel ko erein sounpar tohto, kahrehda Kidion oh nah sounpei ko sohte kak en uhdi. Irail eri pwakipwakih arail imwintihti ko lao re kalowehdi!—Sounkopwung 7:22; 8:4, 10, 28.
2 Kitail pil mi nan mahwen apwal oh kalok ehu. Atail imwintihti kan kin iangahki Sehdan, eh sampah, oh pein atail soh unsek. Ekei kitail kin mahmahweniong imwintihti pwukat erein sounpar tohto. Pwehki sawas sang rehn Siohwa, kitail kanahier nan mahwen tohto. Ahpw kitail saikinte kana douluhl. Ekei pak kitail ele kin pwangada. De kitail kin pwangahkihda awiawih imwin koasoandi suwed wet en imwisekla. Sises ketin katamankihong kitail me kitail pahn lelohng kahpwal oh kalokolok laud ni imwin rahn akan. Ahpw e pil mahsanih me ma kitail dadaurete, kitail kak kana. (Wadek Luk 21:19.) Ia wehwehn en dadaurete? Dahme pahn sewese kitail en dadaurete? Dahme kitail kak sukuhlkihsang irail kan me kin dadaurete? Oh ia duwen atail dadaurete eh kak unsekla?—Seims 1:4.
IA WEHWEHN EN DADAURETE?
3. Ia wehwehn en dadaurete?
3 Paipel kawehwehda me en dadaurete kin pidada laudsang en ihte kanengamahiong irair apwal ehu. E kin pidada mwomwen atail madamadau oh atail pepehm ong atail kahpwal kan. En dadaurete kin sewese kitail en eimah, lelepek oh kanengamah. Ehu pwuhk koasoia me en dadaurete iei irair ehu me sewese kitail en ahneki koapworopwor laud oh dehr uhdi de pwangada ni atail lelohng kahpwal kan. E kin sewese kitail en kesihnenda teng pil ni ahnsou me kahpwal kan uhdahn laud. Oh e kin sewese kitail en kana nan kahpwal pwukat oh medemedewehte atail mehn akadeio, a kaidehn atail lokolok.
4. Dahme kahrehda kitail kak nda me limpoak iei me kin kamwakid kitail en dadaurete?
4 Limpoak kin kamwakid kitail en dadaurete. (Wadek 1 Korint 13:4, 7.) Ni ahl dah? Limpoak ong Siohwa kin kamwakid kitail en dadaurete pahn kahpwal koaros me e ketin mweidohng kitail en lelohng. (Luk 22:41, 42) Limpoak ong riatail Kristian kan kin sewese kitail en dadaurete pahn arail soh unsek kan. (1 Pit. 4:8) Atail poakohng atail pwoud kin sewese kitail en dadaurete pahn “apwal” kan me pil kin lelohng irail kan me ahneki mouren pwopwoud nsenamwahu. E pil kin sewese kakehlakahda atail mouren pwopwoud.—1 Kor. 7:28.
DAHME PAHN SEWESE KITAIL EN DADAURETE?
5. Dahme kahrehda Siohwa iei me keieu mwahu en sewese kitail en dadaurete?
5 Peki kehl sang rehn Siohwa. Siohwa iei “Koht me tepin kanengamah oh kakehlepen loalatail.” (Rom 15:5) Ih kelehpw me uhdahn ketin wehwehki atail irairo, atail pepehm kan, oh soangen mwomwen mour dah me kitail ahneki. Eri iei Ih me keieu mwahu en sewese kitail en dadaurete. Paipel mahsanih: “E kin ketikihong anahn en irail me kin wauneki; e kin ketin karonge ar likwer, oh kin ketin komourirailla.” (Mel. 145:19) Ahpw ia duwen Koht eh pahn ketin sapengala atail kapakapki kehl pwe kitail en dadaurete?
6. Nin duwen me Paipel inoukihda, ia duwen Siohwa eh ‘ketikihong kitail kehlail’ ni atail lelohng kahpwal kan?
6 Wadek 1 Korint 10:13. Ni atail patohwan peki rehn Siohwa en ketin sewese kitail en dadaurete, e ketin inoukihda en ‘ketikihong kitail kehlail.’ Ia duwen eh ketin wia met? Ekei pak, ele e kin ketikihsang kahpwalo. Ahpw pali laud en ahnsou, e kin ketikihong kitail kehl pwe kitail en “kak uhdahn dadaurete ni kanengamah oh peren.” (Kol. 1:11, NW) Oh pwehki Siohwa ketin mwahngih atail sou itar kan en paliwar, madamadau oh pepehm, e sohte pahn ketin mweidohng irair ehu en nohn apwal me kahrehda kitail sohte kak en kolokol atail lelepek.
7. Menlau karasahda dahme kahrehda kitail anahne padahk mehlel me rasehng mwenge pwehn dadaurete.
7 Mweidohng padahk mehlel me rasehng mwenge en kakehlakahda omw pwoson. Dahme kahrehda padahk mehlel kesempwal? Pwehn karasahda met: Ma emen pahn daur Nahna Everest, e anahne kangala rahn ehu uwen mwenge me uhdahn laud (6,000 calories), uhdahn laudsang dahme aramas emen kin anahne. Pwehn dadaurete oh lel eh mehn akadeio, e anahne mwenge laud ni uwen me e kak. Duwehte met, kitail pil anahne esehla padahk mehlel tohto pwehn kak lel atail mehn akadeio. Kitail anahne koasoanehdi teng en kihong ahnsou ong pein atail onop Paipel oh pil mihting kan. Soahng pwukat pahn kihong kitail dahme kitail anahne pwehn kolokolte atail pwoson en kehlail.—Sohn 6:27.
8, 9. (a) Nin duwen Sohp 2:4, 5 kasalehda, dahieu me kin pwarada ahnsou me kitail kin lelohng kahpwal? (b) Ni ahnsou me ke kin lelohng kahpwal kan, dahme ke kak medewehla?
8 Tamataman omw loalopwoatohng Koht. Ni atail kin ahneki kahpwal kan, kitail kin lokolok. Ahpw kaidehn ihte met. Atail loalopwoatohng Koht pil kin lelohng kasongosong. Mwomwen atail mwekidki kahpwal kan kin kasalehda ma kitail kin kilangwohng Siohwa me iei ih me uhdahn Kaunepen lahng oh sampah de soh. Ia duwen? Sapwellimen Koht imwintihtio Sehdan, me kin uhwong sapwellime kaunda, karaun likamwih Siohwa sang ni eh kose me aramas akan kin papah Koht ihte pwehki kahrepe roporop kan. Sehdan nda: “Aramas kin mweidala mehkoaros me e ahneki pwe en doarehla pein eh mour.” Sehdan eri ndahki Sohp: “Ahpw ma komwi ketin kauwehla paliwere—eri e pahn lahlahwei komwi mwohn silangomwi!” (Sohp 2:4, 5) Ia duwe, Sehdan wekila sang ahnsowo me e ndahla met? Uhdahn soh! Sounpar tohto mwuri, ahnsou me Sehdan piskensang nanleng, e kin karakaraun likamwihte sapwellimen Koht ladu lelepek kan ahnsou koaros. (Kaud. 12:10) Rahnwet, Sehdan pil kosekosehte me aramas akan kin kaudokiong Koht pwehki kahrepe roporop kan. E kin men kitail en soikala sapwellimen Koht pwuhng en kaunda oh uhdihsang papah Ih.
9 Ni omw kin wie lokolongki kahpwal ehu, song en medewehla met. Sehdan oh nah ngehn saut akan mi ehu pali. Irail kilikilang dahme ke pahn wia oh ndinda me ke pahn pwangada oh uhdi. Ahpw ni pali teio, ke kak kilang Siohwa, atail Nanmwarki Sises Krais, me keidi kan me iasadahr, oh pil tohnleng kid kid kei. Re pil kilikilang omw nannanti oh re kin kangoange iuk ken nannantihte! Re uhdahn perenki kilang me ke kak dadaurete oh kolokolte omw loalopwoatohng Siohwa. Ke ahpw rong Siohwa eh mahsanihong uhk: “Samwa, ke en loalokongla, I ahpw pahn kin pereperen; e pahn mie ei pasapeng ong mehmen me pahn kauwei ie.”—Lep. Pad. 27:11.
10. Ia duwen omw kak alasang Sises oh medemedewehte keting kan me ke pahn alehdi pwehki omw dadaurete?
10 Medemedewehte duwen keting kan. Medewehla me ke wie seiseiloak. Ni omw kohkohwei, ke anahne keid nan pwoaren paip reirei ehu. Wasa koaros me ke kilang rotorot. Ahpw ke ese me ma ke pahn pousehlahte ni imwin pwoaren paipo, ke pahn pwurehng kilangada marain. Mour pil kak duwehte seiloak wet. Ele ke anahne lelohng ahnsou kan me inenen apwal oh mwein ke medewe me omw kahpwal kan uhdahn laud. Pil Sises kakete sapwellimanki soangen pepehm wet. Ni eh pwoula ni tuhkehn kalokoloko, e ketin ale kanamenekpen eh pwoula oh pil lelohng medek laud. Ele ahnsowo wie ahnsou me keieu apwal nan eh mour! Dahme sewese ih en ketin dadaurete? Paipel mahsanih me e ketin kilangwohng “peren me e kasikasik.” (Ipru 12:2, 3) Sises ketin medemedewehte keting kan me e pahn alehdi pwehki eh dadaurete, keieu kesempwal iei me e pahn iang kasarawihala mwaren Koht oh utungada sapwellimen Koht pwuhng en kaunda. E mwahngih me apwal me lelohng ih pahn ongete ahnsoukis, oh me ketingpe nanleng pahn poatopoat. Rahnwet, kahpwal kan me ke lelohng ele uhdahn laud oh kamedek, ahpw tamataman me kahpwal pwukat kin ongete ahnsoukis.
IRAIL KAN ME KIN DADAURETE
11. Dahme kahrehda kitail en tehkpene dahme wiawihong irail kan me kin “dadaurete”?
11 Kitail sohte anahne kelehpw ni atail kin dadaurete. Pwehn kangoange Kristian kan ren dadaurete pahn kahpwal tohto sang Sehdan, wahnpoaron Piter ntingihedi: “Kumwail tengeteng ni amwail pwoson oh kehlail ong ih, pwe kumwail ese me riamwail . . . kan wasa koaros nin sampah kin iang kumwail mihla nan soangen lokolok me kumwail kin mihla loale.” (1 Pit. 5:9) Dahme wiawiong irail kan me kin “dadaurete” kin padahkihong kitail ia duwen atail en kolokolte atail lelepek, kamehlelehiong kitail me kitail kak pweida, oh katamankihong kitail me e pahn mie ketingpen atail loalopwoat. (Seims 5:11, NW) Kitail en tehkpene ekei mehn kahlemeng kan. [1]—Menlau kilang ire kan mwuri.
12. Dahme kitail sukuhlkihsang mehn kahlemeng en kerup ko me sinsile Ihden?
12 Kerup kan iei tohnleng kei me ahneki pwukoa laud. Mwurin Adam oh Ihp ara dipada, Siohwa ketikihong kerup kei arail pwukoa kapw nin sampah. Pwukoa wet inenen weksang pwukoa kan me re ahneki nanleng. Arail mehn kahlemeng kak padahkihong kitail ia duwen atail en dadaurete ni atail ahneki pwukoa apwal ehu. Paipel mahsanih me Siohwa “ketikihong ni palimesehn mwetuwel en Ihden kerup kei, oh kedlahs kisiniei pwoat me mpwul sirangarang pali koaros, pwe en silehsang aramas koaros tuhkehn komouro.” [2] (Menlau kilang ire kan mwuri.) (Sen. 3:24) Paipel sohte mahsanih me kerup ko kaulim de pehm me re kesempwalsang arail pwukoa kapwo. Re sohte pwangada de uhdihsang wia arail pwukoao. Ahpw re mihmihte nan arail pwukoao lao arail doadoahko nek, mweinele ni Nohliko, daulih sounpar 1,600 mwuhr!
13. Ia duwen Sohp eh kak dadaurete pahn eh kahpwal kan?
13 Ohl lelepeko Sohp. Ele ekei pak ke kin medekla pwehki kompoakepahmw men de emen nan omw peneineio ndaiong uhk mehkot me kansensuwedih iuk. De mwein ke kohwahki soumwahu laud ehu, de pahtoukihla mehlahn emen me ke poakohng. Ahpw sohte lipilipil dahme wiawi, ke kak diar kamweit sang mehn kahlemeng en Sohp. (Sohp 1:18, 19; 2:7, 9; 19:1-3) Sohp sehse dahme kahrehda e wiahkintehieu lelohng kahpwal tohto, ahpw e sohte uhdi. Dahme sewese ih en dadaurete? Keieu, e poakohng Siohwa oh e perki kansensuwedihada. (Sohp 1:1) Sohp men kaperenda Koht ni ahnsou me mwahu oh pil ni ahnsou apwal. Patehng met, Siohwa ketin sewese Sohp en kilang Sapwellime roson sang ni eh ketin padahkihong duwen ekei soahng kapwuriamwei kan me E ketin kapikada. Met kalaudehla en Sohp eh kamehlele me Siohwa pahn ketikihsang eh kahpwal ko ni ahnsou me konehng. (Sohp 42:1, 2) Oh iei met me wiawi. “KAUN-O ahpw ketin kapaiamwahwihala sapahl Sohp, oh ketikihong uwen tohtohn dipwisou pak riapak me e ahneki mahso.” Sohp eri “mehla ni eh ohl laudlahr mehlel.”—Sohp 42:10, 17.
14. Nin duwen me 2 Korint 1:6 kasalehda, ia duwen en Pohl kin dadaurete eh sewese meteikan?
14 Wahnpoaron Pohl. Ia duwe, ke kin lokolongki uhwong laud de pil kalokolok kan? Kowe emen elder de emen sounapwalih me kin seiloak me pehm me omw pwukoa kan inenen tohto? Ma ei, mehn kahlemeng en Pohl kak sewese iuk. Pohl lelohng kalokolok laud oh e kin ahnsou koaros pwunodki ia iren rie Kristian kan nan mwomwohdiso kan. (2 Kor. 11:23-29) Ahpw e sohte uhdi, oh eh mehn kahlemeng kin kakehlakahda meteikan. (Wadek 2 Korint 1:6.) Omw kin dadaurete pil kak kangoange meteikan ren dadaurete.
OMW DADAURETE PAHN UNSEKLA?
15, 16. (a) Ia duwen atail dadaurete eh kin unsekla? (b) Menlau kihda karasaras kan duwen atail dadaurete eh kak unsekla.
15 Koht ketin doadoahngki wahnpoaron Seims en ntingihedi: “Amwail kanengamah ni ahnsou apwal [“dadaurete,” NW] en poatopoatete oh unsekla, pwe pein kumwail en unsengkihla mehlel oh sohte pahn anahne mehkot.” (Seims 1:4) Ia duwen atail kin dadaurete eh kak unsekla? Ni atail lelohng kahpwal ehu, ele kitail kin tehkada me kitail anahne kalaudehla atail kasalehda kanengamah, kalahngan, de limpoak. Ni atail dadaur pahn kahpwalo, kitail pahn sukuhlki en kalaudehla atail kasalehda irair pwukat, oh ni ahl wet kitail pahn kamwahwihala atail irair kan en Kristian.
Ni atail kin dadaur pahn kahpwal kan, atail irair en Kristian kin unsekla (Menlau kilang parakrap 15, 16)
16 Pwehki atail dadaurete kak kamwahwihala atail irair en Kristian, kitail sohte pahn men kauwehla sapwellimen Siohwa kosonned kan pwehn ihte kauhdi atail kahpwalo. Karasepe, ma ke kin nannanti en powehdi madamadau samin, dehr dukula pahn kasongosong kan! Peki sawas rehn Siohwa pwehn kalekeiuk sang madamadau suwed. Mie emen nan omw peneineio me kin uhwong uhk? Dehr uhdi! Koasoanehdi teng ken pousehlahte papah Siohwa. Imwilahn met, ke pahn kakehlakahda omw koapworopworki Siohwa. Tamataman: Pwehn ale sapwellimen Koht kupwuramwahu, kitail anahne dadaurete.—Rom 5:3-5; Seims 1:12.
17, 18. (a) Menlau karasahda kesempwalpen en dadaurete lao lel imwi. (b) Ni atail kerenlahn imwio, soangen koapworopwor dah me kitail kak ahneki?
17 Kitail anahne dadaurete lao lel ni imwi, kaidehn ongete erein ahnsoukis. Medewehla sohp ehu eh wie kikihrla. Pwehn pitla, pahsinse kan anahne pap kohla lao lel ni oaroahr. Emen me uhdi ni eh tepida pap pahn mwopwula oh kihrla. Pil duwehte, emen me uhdi mwohnte eh lella ni oaroahro pahn pil mwopwula oh kihrla. Ma kitail men mi nan sampah kapwo, kitail anahne dadaurete. Kitail en ahneki soangen madamadauohte me wahnpoaron Pohl ahneki, me nda: “Se sohte kin pwangahkihda.”—2 Kor. 4:1, 16.
18 Duwehte Pohl, kitail uhdahn kamehlele me Siohwa pahn ketin sewese kitail en dadaurete lel ni imwi. Pohl ntingihedi: “Kitail powehdier unsek sang ni manaman en ih me ketin loalloaleikitailehr! Pwe I kin ese ni mehlel me sohte mehkot kak irehdihsang kitail ni sapwellime kupwur limpoak; pil sohte mehla de mour, de tohnleng kan de manaman en nanleng teikan de kaunen nanleng kan, pil sohte mehkot me wiewiawi met de me pahn wiawi mwuhr, pil sohte mehkot pohnangin sampah de pahnangi—mehlel sohte mwahn mehkot nan audepen lahng oh sampah koaros kak irehdihsang kitail ni limpoak en Koht me kitail ahneki rehn Krais Sises atail Kaun.” (Rom 8:37-39) Mehlel me ekei pak kitail pahn pwangada. Ahpw kitail en alasang Kidion oh nah sounpei ko. Re pwangada ahpw re sohte uhdi. “Re pwakipwakihete ar imwintihti ko”!—Sounkopwung 8:4.
^ [1] (parakrap 11) Ke pahn pil diarada mehn kangoang sang ni omw pahn kousapahlih duwen sapwellimen Koht aramas akan nan atail ahnsou ar kin dadaurete. Karasepe, pwuhken pahr (Yearbook) en pahr 1992, 1999, oh 2008 kin koasoia duwen ripoht kangoang kan duwen riatail Kristian kan nan Idiopia, Malawi, oh Russia.
^ [2] (parakrap 12) Paipel sohte mahsanih kerup depe me alehdi pwukoa wet.