Lelepek Kin Imwikihla Koht Eh Kupwurkin Kitail
“Kumwail alasang irail kan me kin pwoson oh kanengamah re lao lel dahme Koht ketin inoukihong irail.”—IPRU 6:12.
KOUL KAN: 3, 54
1, 2. Kahpwal dah me Sepda oh nah serepeino lelohng?
PEINAKAPWO tang kohieila pwehn kasamwo eh pahpao. E inenen perenkihda kilang eh pahpao pwurasang mahwen mwamwahute. Eh pahpao eh kana nan mahweno kahrehiong ih en koul oh kahlek. Ahpw ele e pwuriamweikihla dahme eh pahpao wia oh nda. Eh pahpao tehrasang eh likoun mahwen ko oh nda: “Samwa! Ke kauwelahr mohngiongi!” Pahpao eri ndaiong nah serepeino me e wiahdahr inou ehu ong Siohwa me pahn wekidala mouren serepeino. Eh inowo pahn kahrehiong serepeino en sohte kak pwopwoudida oh naineki seri. Ahpw serepeino mwadangete sapengki lokaia mwahu oh kangoange eh pahpao en kapwaiada dahme e inoukihong Siohwa. Dahme e sapengki kasalehda me e uhdahn likih me sohte lipilipil dahme Siohwa ketin kupwurki sang ih pahn keieu mwahu ong ih. (Sounkopwung 11:34-37) Ni eh pahpao kilang duwen eh pwoson, e inenen pohlkihda nah serepeino pwehki e ese me en serepeino eh men utungada eh pilipilo pahn uhdahn kaperenda Siohwa.
2 Sepda oh nah serepeino uhdahn likih oh kamehlele Siohwa oh pil sapwellime ahl akan. Ira lelepek mehnda ma e apwal ong ira. Ira men Siohwa en ketin kupwurkin ira, oh met kesempwalsang soangen meirong koaros.
3. Dahme kahrehda mehn kahlemeng en Sepda oh nah serepeino kak sewese kitail rahnwet?
3 E sohte kin ahnsou koaros mengei en kolokolte atail lelepek ong Siohwa. Kitail anahne “kehlail nan mouren pwoson.” (Sud 3) Pwehn sewese kitail en wia met, kitail en koasoiapene ia duwen Sepda oh nah serepeino ara kin dadaur pahn kahpwal kan nan ara mour. Ia duwen ara kolokol ara lelepek ong Siohwa?
LELEPEKTE MENDAHKI KASONGOSONG KAN SANG SAMPAH
4, 5. (a) Kehkehlik dahieu me Siohwa ketikihong mehn Israel ko ni arail pedolong nan Sapwen Inowo? (b) Nin duwen me Melkahka 106 kasalehda, dahme lelohng mehn Israel ko pwehki arail sapeik?
4 Rahn koaros, Sepda oh nah serepeino ele ale mehn kataman duwen imwila suwed en mehn Israel ko me sapeikiong Siohwa. Kereniong sounpar 300 mwowe, Koht ketin kehkehlingkihong mehn Israel ko ren kemehla tohn kaudok likamw koaros nan Sapwen Inowo, ahpw re sohte peikiong. (Deud. 7:1-4) Mehn Israel tohto tepida alasang mehn Kenan ko me kin kaudokiong koht likamw kan oh wiewia tiahk samin.—Wadek Melkahka 106:34-39.
5 Pwehki mehn Israel ko sapeik, Siohwa sohte ketin pere irail sang arail imwintihti kan. (Sounkopwung 2:1-3, 11-15; Mel. 106:40-43) Ele met uhdahn apwal ong peneinei ko me kin poakohng Siohwa oh kolokolte arail lelepek erein ahnsou apwal ako. Ahpw Paipel kasalehda duwen irail kan me kin lelepek, duwehte Sepda oh nah serepeino, Elkana oh Ana, oh pil Samuel. Irail koasoanehdi teng en kaperenda Koht.—1 Sam. 1:20-28; 2:26.
6. Soangen madamadau oh wiewia dah me mie rahnwet, oh dahme kitail anahne wia?
6 Madamadau oh wiewiahn aramas akan nan atail ahnsou kin duwehte ahn mehn Kenan ko mahs. Irail kin mouren tiahk samin me pid wia nsenen pwopwoud, tiahk lemei oh pil naineki mwohni. Ahpw Siohwa ketikihong kitail mehn kataman kan. E ketin kupwurki pere kitail duwehte eh ketin kupwurki pere mehn Israel ko sang soangen madamadau oh wiewia suwed pwukat. Ia duwe, kitail pahn kak sukuhlki mehkot sang arail sapwung ko? (1 Kor. 10:6-11) Kitail en wia uwen atail kak en soikala madamadau en sampah. (Rom 12:2) Ia duwe, kitail pahn song uwen atail kak pwehn wia met?
SEPDA LELEPEKTE MENDAHKI EH NSENSUWEDLA
7. (a) Dahme tohn en Sepda wasao wiahiong ih? (b) Ia duwen Sepda eh mwekidki met?
7 Ni mwehin Sepda, mehn Israel ko kin mi nan lokolok pahn mehn Pilisdia oh Ammon kan pwehki ar sapeikiong Siohwa. (Sounkopwung 10:7, 8) Patehng wehi teiko wia arail imwintihti, Sepda pil ahneki kahpwal sang pein rie ohl ako oh pil kaun en mehn Israel ko. Re peirinki oh kailongki Sepda oh kausasang ih nan sahpw me e uhdahn sapweniki nin duwen kosonnedo. (Sounkopwung 11:1-3) Ahpw Sepda sohte mweidohng arail tiahk lemei en kaunda eh madamadau. Ia duwen atail ese met? Pwehki ni me mah ko en Israel ar peki reh en sewese irail, e mwadangete wia met. (Sounkopwung 11:4-11) Dahme kamwakid Sepda en mwekid ni ahl wet?
8, 9. (a) Kaweid dah kan me mi nan Kosonned en Moseso me ele sewese Sepda? (b) Dahme keieu kesempwal ong Sepda?
8 Sepda wia sounpei kehlail men oh e esehla mwahu poadopoad en mehn Israel ko oh pil Kosonned en Moseso. Sapwellimen Siohwa wiewia kan ong sapwellime aramas ako padahkihong Sepda duwen sapwellime koasoandi kan ong dahme pwung oh dahme sapwung. (Sounkopwung 11:12-27) Sepda doadoahngki loalokong wet nan eh mour ni eh kin wiahda pilipil kan. E uhdahn ese ia sapwellimen Koht pepehm ong lingeringer oh dupungki ong emen me suwed, oh ia duwen Koht eh ketin kupwurki sapwellime kan en limpoakpene. Patehng met, Kosonned en Moseso padahkihong ih ia pahn mwomwen eh wiewia ong meteikan, pil irail kan me kin kailongki ih.—Wadek Eksodus 23:5; Lipai 19:17, 18.
9 Mehn kahlemeng en Sosep ele sewese Sepda. E sukuhlki ia duwen Sosep eh mahkohng rie ohl ako mendahki re kailongki. (Sen. 37:4; 45:4, 5) En Sepda eh medemedewe mehn kahlemeng wet ele sewese ih en mwekid ni ahl ehu me kaperenda Siohwa. Dahme rie ohl ako wiahiong ih uhdahn kamedek. Ahpw eh mahwenki mwaren Siohwa oh pil sapwellime kan kin kesempwalsang eh nsensuwedla. (Sounkopwung 11:9) E koasoanehdier teng me e pahn lelepek ong Siohwa. Soangen madamadau wet imwikihla Siohwa eh ketin kapaiada ih oh pil mehn Israel ko.—Ipru 11:32, 33.
10. Ia duwen atail kak mweidohng kaweid en Paipel en sewese kitail en mwekid nin duwen Kristian kei rahnwet?
10 Ia duwe, kitail pahn kak sukuhlkihsang mehn kahlemeng en Sepda? Dahme kitail pahn wia ma riatail Kristian men kansensuwedihala kitail de kitail pehm me arail wiewia ong kitail sohte mwahu? Kitail en dehr mweidohng atail nsensuwed en kauhkitaildihsang papah Siohwa. Kitail en dehpa uhdihsang towehda mihting kan de sohla ieiang mwomwohdiso. Kitail alasang Sepda oh peikiong Siohwa. Met pahn sewese kitail en powehdi irair apwal akan pwe kitail en pil kak wia mehn kahlemeng mwahu duwehte Sepda.—Rom 12:20, 21; Kol. 3:13.
ATAIL MEN WIAHDA TOUNMETEI KAN KIN KASALEHDA ATAIL PWOSON
11, 12. Inou dahieu me Sepda wiahda, oh dahme met pidada?
11 Sepda ese me e anahne sapwellimen Koht sawas pwehn kapitala mehn Israel ko sang mehn Ammon ko. E inoukihong Siohwa me ma Siohwa ketin sewese ih en kana, e pahn meirongkihong Ih mehmen me pahn tepin pedoisang nan imweo ahnsou me e pahn pwurasang mahwen. Met pahn wia “meirong isihs ehu.” (Sounkopwung 11:30, 31, NW) Ia wehwehn met?
12 Siohwa kin ketin kalahdeki isihslahn aramas nin duwen meirong ehu, eri kitail ese me Sepda sohte pahn wiahda soangen meirong wet. (Deud. 18:9, 10) Kosonned en Moseso kasalehda me meirong isihs kin wia kisakis tohrohr ehu me emen kin patohwanohng Siohwa ni unsek. Eri dahme Sepda ndao wehwehki me mehmeno me e pahn patohwanohng Siohwa pahn kin papah ni impwal sarawio erein eh mour. Siohwa ketin karonge Sepda oh ketin sewese ih en uhdahn kana nan mahweno. (Sounkopwung 11:32, 33) Ahpw ihs me Sepda pahn patohwanohng Siohwa?
13, 14. Dahme ahn Sepda koasoi me kileldi nan Sounkopwung 11:35 kasalehda duwen eh pwoson?
13 Tamanda dahme kitail koasoiapene ni tepin iren onop wet. Ahnsou me Sepda pwurasang mahwen, me tepin kohieila pwehn tuhwong ih iei nah serepeino me e uhdahn poakepoake, nah iehroso! Ia duwe, e pahn kapwaiadahte eh inowo? E pahn patohwanohng Siohwa nah serepeino pwehn papah nan impwal sarawio erein eh mour?
14 Kaweid kan me mi nan sapwellimen Koht Kosonnedo pwurehng sewese Sepda en wiahda pilipil pwung. Ele e tamanda dahme kileldi nan Eksodus 23:19, me mahsanihong sapwellimen Koht aramas akan ren kin inengieng patohwanohng Siohwa dahme keieu mwahu. Kosonnedo pil mahsanih me ni emen eh wiadahr inou ehu ong Siohwa, “e sohte pahn kauwehla eh inowo, ahpw e pahn kapwaiada mehkot me e inoukidahr.” (Nemp. 30:2) Duwehte Ana me lelepek, me ele pil momour ni ahnsowo, Sepda anahne kapwaiada eh inowo mendahki e ese dahme met kak wiahiong nah serepeino oh pil ih. Pwehki nah serepeino pahn papah ni impwal sarawio, serepeino sohte pahn naineki seri. Eri sohte me pahn sohsohki sapwen Sepdao oh pil kolokolte edeo. (Sounkopwung 11:34) Ahpw mendahki met, ni lelepek Sepda nda: “I wiadahr inou ehu ong KAUN-O, eri I sohte kak pwurehng kasohrehla!” (Sounkopwung 11:35) Siohwa ketin kupwurki ahn Sepda tounmetei laudo oh ketin kapaiada ih. Ia duwe, ke pahn lelepek duwehte Sepda eh lelepek?
15. Inou dahieu me tohtohn kitail wiahda, oh ia duwen atail kak kadehdehda me kitail lelepek?
15 Ni ahnsou me kitail inoukihong Siohwa atail mour, kitail kin inoukihda me kitail pahn wia kupwure sohte lipilipil dahme kitail lelohng. Kitail ese me e sohte pahn kin ahnsou koaros mengei en kapwaiada inou wet. Ahpw ma E ketin padahkihong kitail en wia mehkot me kitail sohte perenki, ia duwen atail pahn mwekidki met? Ma kitail powehdi atail pepehm en masak oh kin peikiong atail Koht, kitail kadehdehda me kitail kin lelepek ong atail inou. Atail tounmetei kan ele pahn apwal de kamedek ong kitail, ahpw sapwellimen Siohwa kapai kan kin ahnsou koaros mwahusang kowahlap. (Mal. 3:10) Ahpw ia duwen nein Sepda serepeino? Ia duwen eh mwekidki inou me eh pahpao wiahda?
Ia duwen atail kak kasalehda pwoson duwehte Sepda oh nah serepeino? (Menlau kilang parakrap 16, 17)
16. Ia duwen nein Sepda serepeino eh mwekidki ahn eh pahpao inowo? (Menlau kilang tepin kilel.)
16 Ahn Sepda inowo weksang ahn Anao. Ana inoukihda me e pahn wahla nah pwutako Samuel pwehn papah nan impwal sarawio nin duwen Nasaraid men. (1 Sam. 1:11) Nasaraid men kak ale mweimwei en pwopwoudida oh ahneki peneinei ehu. Ahpw nein Sepda serepeino meirongala nin duwen “meirong isihs ehu,” eri e sohte pahn kak ahneki pai en wiahla lih pwopwoud men oh nohno men. (Sounkopwung 11:37-40) Nna medewehla! E kakete pwoudikihda emen ohl me keieu mwahu nan sahpwo pwehki eh pahpao wia kaun emen nan Israel. Ahpw ahnsowo e pahn anahne wiahla ladu tikitik men nan impwal sarawio. Ia duwen peinakapw menet eh mwekidki met? E kasalehda me e kin mwohneki mahs eh papah Siohwa ni eh ndaiong eh pahpao: “Ma ke wiadahr inou ehu ong KAUN-O, eri, kapwaiada audepen inou en.” (Sounkopwung 11:36) E tounmeteikihla eh men pwopwoudida oh naineki seri pwehn papah Siohwa. Ia duwen atail kak alasang eh madamadau en tounmetei?
17. (a) Ia duwen atail kak alasang pwoson me Sepda oh nah serepeino ahneki? (b) Ia duwen Ipru 6:10-12 eh kangoange iuk ken tounmeteiki pein uhk?
17 Kristian pwulopwul kid kid kei, ohl oh lih, tounmeteikihla arail en pwopwoudida de re piladahr en dehr naineki seri, ele ong ahnsou wet. Dahme kahrehda? Pwehki re men medemedewehte arail en kalaudehla arail papah Siohwa. Patehng met, riatail me mah tohto kin tounmeteikihla arail ahnsou en mi rehn neirail kan oh nein neirail kan. Re kin patohwan meirongkihong Siohwa arail ahnsou oh kehl. Ekei irail kin iang doadoahk en kauwada Wasahn Kaudok kan de pil iang Sukuhl ong Sounkalohki Wehio kan oh keseula nan mwomwohdiso ehu me mie anahn laud ong sounkalohk. Ekei kin wiahda koasoandi kan pwehn kalaudehla arail papah Siohwa erein sounpwong kan en Katamano. Siohwa sohte pahn ketin meliehla ahn me lelepek pwukat koaros arail limpoak oh tounmetei. (Wadek Ipru 6:10-12.) A ia duwen kowe? Ke pil kak kalaudehla omw tounmetei pwehn papah Siohwa ni uwen omw kak?
DAHME KITAIL SUKUHLKI?
18, 19. Dahme kitail sukuhlkihsang nan Paipel duwen koasoipen Sepda oh nah serepeino, oh ia duwen atail kak alasang ira?
18 Dahme sewese Sepda en powehdi eh kahpwal tohto kan? E mweidohng Siohwa en ketin kaweid eh pilipil kan nan mour. E pilada en dehr mwekidki wiewiahn aramas en eh wasao. Sepda kolokolte eh lelepek pil ahnsou kan me meteikan kansensuwedihala ih. Siohwa ketin kapaiada Sepda oh nah serepeino pwehki ara men wiahda tounmetei kan, oh E ketin doadoahngki ira koaros en utungada kaudok mehlel. Pil ni meteikan ar uhdihsang wia dahme pwung, Sepda oh nah serepeino kolokolte ara lelepek ong Siohwa.
19 Paipel mahsanih: “Alasang irail kan me kin pwoson oh kanengamah re lao lel dahme Koht ketin inoukihong irail.” (Ipru 6:12) Kitail en alasang Sepda oh nah serepeino oh ese me ni atail kin kolokolte atail lelepek, Siohwa pahn ketin kapaiakitailda.