ATAIL doadoahk en kalohk kin kesempwal oh katapan. Ahpw kaidehn koaros me kitail padahk ong kin kalahnganki met. Mehnda ma aramas kasalehda arail men rong dahme Paipel mahsanih, ele kaidehn ahnsou koaros re kin kilang kesempwalpen arail onop Mahsen en Koht rehtail.

Met wiawihong Gavin me tepida towehda mihting kan en mwomwohdiso, ahpw e sohte men iang onopki Paipel. E nda: “Ei ese Paipel uhdahn tikitik, oh I sohte men kasalehda me I sehse met. I perki pwe emen de pitiehdi, oh I pil perki wiahda inou.” Ia omw madamadau? Ke pahn medewe me sohte katapan omw pahn sewese Gavin? Soh! Tehk ia duwen padahk en Paipel eh kak wia kamwahu ong emen. Siohwa mahsanihong sapwellime aramas akan mahso: “Ei pato kan pahn mweredi rasehng keteu pohn poadakapw en wahnsahpw, rasehng keteu pohn dihpw kan.” (Deud. 31:19, 30; 32:2) Soahng kan duwen pwoaiken menseng kin karasahda mwahu ia duwen atail kak koahiekla ni atail sewese soangsoangen aramas nan atail doadoahk en kalohk.​—1 Tim. 2:3, 4.

Pwoaiken menseng kin malamal. Pwoaiken menseng kin ekisekis miehla, sang ni dingiding en pihl en pahnlahng kan ar kin kohpene. Mahsen en Siohwa ko “mwerediong pohn sampah rasehng pwoaiken lahng” ni eh kin ketin mahsen ni kadek, kamantik, oh kasalehda eh nsenohki sapwellime kan. Kitail kin alasang ih ni atail kin kasalehda atail wauneki ahn emen eh madamadau. Kitail kin kangoange aramas en pein medemedewe oh kasalehda arail madamadau. Ni atail kin kasalehda atail nsenohki arail madamadau, irail pahn mwadang en koledi atail koasoi kan oh atail doadoahk en kalohk kin pweida mwahu.

Pwoaiken menseng kin kansenamwahu. Atail doadoahk en kalohk kin kansenamwahu ong meteikan ma kitail kin medemedewe ia ahl me keieu mwahu en kalaudehla arail men rong. Gavin, me kitail koasoiapenehr mwoweo, sohte pehm me emen idingkihong ih en pwungkihda en onopki Paipel. Ahpw, Chris, brothero me tepin tuhwong ih, rapahki soangen ahl dah me pahn kahrehiong Gavin en soanamwahu ni ara koasoiapene duwen Paipel. Chris kawehwehiong Gavin me mie oaralap en Paipel oh ma e wehwehki duwen met, e pahn sewese ih en wehwehkihla mwahu mihting ko me e kin iang towehda. Chris eri kasalehda me kokohp kan en Paipel iei me kamehlelehiong pein ih me Paipel uhdahn mehlel. Met imwikihla ara koasoiapene soahng tohto me pid pweidahn kokohp kan. Ara koasoakoasoipene kin kansenamwahwihala Gavin oh met imwikihla eh pwungkihda en onop Paipel.

Pwoaiken menseng kin kesempwal ong mour. Mie ahnsou me nan sapwen Israel kin kakarakar oh sohte keteuki erein sounpwong tohto. Ma sohte pihl me kin kohsang pwoaiken menseng, tuhke kan kin luwetala oh mehla. Mie duhpek en pihl nan atail ahnsou, duwehte me Siohwa ketin kohpada. (Eimw. 8:11) E ketin inoukihda me sounkalohk koahiek keidi kan pahn “rasehng pwoaiken menseng me KAUN-O ketikihdo” ni arail kalohki rongamwahu en Wehio oh iangarail “sihpw teikan” kin utung irail. (Maika 5:7; Sohn 10:16, NW) Ia duwe, kitail kin kesempwalki rongamwahu en Wehio me wia kisehn sapwellimen Siohwa elen komour me rasehng pihl me kohsang pwoaiken menseng?

Pwoaiken menseng iei kapai ehu sang Siohwa. (Deud. 33:13) Atail doadoahk en kalohk kak wia kapai ehu ong irail kan me rong. Gavin alehdi soangen kapai wet. Sang eh onop en Paipel, e diarada pasapengpen eh peidek kan koaros. E mwadang kekeirda lao e papidaisla. Met ih oh eh pwoudo, Joyce, kin wia uwen ara kak en iang kalohki rongamwahu en Wehio.

Ni atail medemedewe duwen pwoaiken menseng pil kak kangoange kitail en keieu kesempwalki atail iang doadoahk en kalohk. Ia duwen? Ehu dingiding en pihl sohte kin wiahda mehkot laud, ahpw ma ke kapatapene pwoaiken menseng tohto, e kak kalamwuri sampah. Pil duwehte, ahn emente doadoahk en kalohk ele mwomwen uhdahn tikitik ong kitail. Ahpw, ma kitail kapatapene sapwellimen Siohwa sounkalohk ngoang kan koaros re pahn kak wia kadehde “ong aramas koaros.” (Mad. 24:14) Ia duwe, atail doadoahk en kalohk pahn wia kapai ehu sang Siohwa ong meteikan? E pahn ma rohng me kitail padahngki kin duwehte pwoaiken menseng me maledek, kansenamwahu, oh kesempwal ong mour!