1, 2. (a) Dahme aramas akan wiewia pwehn ahneki saledek? (b) Ia imwilahn mwekid pwukat?

RAHNWET, aramas nan sahpw tohto kin kalapw koasoia duwen aramas koaros ar pahrekpene oh pil duwen saledek. Ekei kin men saledeksang ar lokolongki wiewia sapahrek oh lemei, lipilipilki aramas, oh semwehmwe. Ekei men ahneki saledek en nda dahme re men nda, pilada dahme re men pilada, oh pein pilada soangen mour me re mwahuki. Aramas akan wasa koaros kin men ahneki saledek.

² Pwehn alehdi saledek, aramas kin wiahda soangen mwekid en uhwong kan, oh pil song en wekidala koasoandi en arail koperment. Ahpw ia duwe, re kin alehdi dahme re mwahuki? Soh. Re kin kalapw lelkihong lokolok laud oh pil mehla. Dahme Nanmwarki Solomon nda uhdahn mehlel: “Ekei aramas ahneki manaman, a ekei kin wie lokolok pahn ar manaman.”—Ekl. 8:9.

3. Dahme kitail kak wia pwehn ahneki peren oh nsenamwahu mehlel?

³ Paipel padahkihong kitail dahme kitail anahne wia pwehn ahneki peren oh saledek mehlel. Wahnpoaron Seims ntingihedi: “A  me kin tehk mwahu kosonned unseko me kin kasaledekla aramas . . . oh kin dadaurete . . . iei aramas menet me Koht pahn ketin kapaiahda ni mehkoaros me e pahn kin wia.” (Seims 1:25) Kosonned unsek wet pwilsang rehn Siohwa oh Ih me keieu ketin mwahngih soahng kan me aramas anahne pwe ren uhdahn peren oh nsenamwahu. Siohwa ketikihong Adam oh Ihp saledek mehlel oh soahng koaros me ira anahne pwe ira en nsenamwahu.

4. Soangen saledek dah me Adam oh Ihp ahneki? (Menlau kilang tepin kilel.)

⁴ Ni atail wadek Senesis irelaud 1 oh 2, kitail sukuhlki me Adam oh Ihp ahneki soangen saledek me aramas akan rahnwet kin men ahneki ahpw sohte kak. Ira ahneki soahng koaros me ira anahne. Ira sohte perki mehkot oh sohte me kin wiahiong ira wiewia sapahrek. Ira sohte kin pwunodki duwen mwenge, doadoahk, soumwahu, de mehla. (Sen. 1:27-29; 2:8, 9, 15) Ahpw ia duwe, saledek me Adam oh Ihp ahneki uhdahn unsek, de sohte irepe? Kitail pahn kilang.

5. Weksang dahme me tohto kin medewe, dahme aramas akan anahne pwe ren ahneki saledek?

⁵ Aramas tohto rahnwet medewe me saledek mehlel kin wehwehki me re kak wia soahng koaros me re men wia oh sohte pwunodki imwilahn arail wiewia. Pwuhken dikseneri ehu (The World Book Encyclopedia) nda me saledek iei “koahiek en wiahda pilipil kan oh kapwaiada.” Ahpw pwuhko pil nda me aramas akan kin ahneki saledek ma palien koperment ehu sohte ireiraildi ni ahl ehu me sohte pwung, sohte katepe, de sohte toupahrek. Met wehwehki me mie irepen soahng kei me anahn pwe koaros en kak ahneki saledek. Ahpw ihs me ahneki pwuhng en pilada ma irepen soahng ehu kin pwung, katepe oh toupahrek?

6. (a) Dahme kahrehda Siohwa kelehpw me ketin sapwellimanki saledek unsek? (b) Saledek dah me aramas akan kak ahneki, oh dahme kahrehda?

⁶ E kesempwal kitail en tamataman me Siohwa Koht kelehpw me sapwellimanki saledek unsek me sohte irepe. Dahme kahrehda? Pwehki ih me Sounkapikpen mehkoaros oh Kaun wasa lapalahpie en lahng oh sampah. (1 Tim. 1:17; Kaud. 4:11) Nanmwarki Depit doadoahngki mahsen kaselel kan pwehn kawehwehda mwoahl me Siohwa ketin sapwellimanki. (Wadek 1 Kronikel 29:11, 12.) Weksang ih, soahng koaros me kapikipikda nanleng oh sampah kin mie irepen arail saledek. Siohwa Koht kupwurki kitail en wehwehki me Ih kelehpw me sapwellimanki pwuhng en ketin pilada ma irepen soahng kan me pwung, katapan, oh toupahrek. Sangete nin tapio, Siohwa ketikihdi irepen soahng kan ong sapwellime kapikipik kan.

7. Soahng dah kei me kitail anahne wia pwehn kahrehda nsenamwahu?

⁷ Mendahki Adam oh Ihp ahneki saledek laud, miehte irepen ara saledeko. Ira kapikpikdahte ahneki ekei irepe pwukat. Karasepe, ira anahne esingek, mwenge, meir pwe ira en kak momour. Ia duwe, met wehwehki me ira sohte ahneki saledek? Soh. Siohwa ketin tehk mwahu me ara wiewia soahng pwukat pahn kahrehda ira en peren oh nsenamwahu. (Mel. 104:14, 15; Ekl. 3:12, 13) Kitail koaros kin perenki esingengki kisinieng mwakelekel, tungoale soangen mwenge kan me kitail keieu iouki, de pirida sang meir mwahu ni pwong kan. Ni atail kin wia soahng pwukat, kitail sohte pehm me soahng pwukat kin irekitaildi. Adam oh Ihp ele pil ahneki soangen pepehm wette.

8. Kehkehlik dahieu me Koht ketikihong Adam oh Ihp, oh dahme kahrehda?

⁸ Siohwa ketikihong Adam oh Ihp kehkehlik ehu me uhdahn sansal. E ketin mahsanihong  ira en kaparaparala oh kadirehla sampah oh pil apwalih. (Sen. 1:28) Ia duwe, kehkehlik wet kihsang ara saledek? Uhdahn soh! Kehkehlik wet kihong ira ahnsou mwahu en kaparadaisihala sampah pwon pwehn wiahla wasahn kousoan ehu me ira oh pil neira seri unsek kan en kak mour kohkohlahte. Met iei kupwuren Koht. (Ais. 45:18) Rahnwet, pilipil en sohte pwopwoudida de naineki seri sohte kin uhwong kupwuren Koht. Aramas akan kin pwopwoudida oh naineki seri kan mendahte pilipil pwukat kin wahdo kahpwal kan. (1 Kor. 7:36-38) Dahme kahrehda? Pwehki re kasik me re pahn diar peren oh nsenamwahu. (Mel. 127:3) Ma Adam oh Ihp peikiongete Siohwa, ira kak perenki ara mouren pwopwoud oh ara peneinei kohkohlahte.

9. Dahme kahrehda sapwellimen Koht kehkehliko nan Senesis 2:17 kin pwung, mie katepe, de toupahrek?

⁹ Siohwa ketikihong Adam oh Ihp pil ehu kehkehlik oh mahsanihong ira ni sansal dahme pahn wiawi ma ira sapeikiong. E mahsanih: “Ihte wahntuhkehn kehsehki aramas dahme mwahu oh dahme suwed me ke sohte pahn tungoale, ma ke pahn tungoale, ke pahn mehkihla rahnohte.” (Sen. 2:17) Ia duwe, kehkehlik wet sohte pwung, sohte katepe, de sohte toupahrek? E kihsang ahn Adam oh Ihp ara saledek? Uhdahn soh. Me tohto me samanih Paipel medewe me sapwellimen Koht kehkehliko uhdahn toupahrek oh erpit. Karasepe, emen irail nda: “Kehkehliko nan [Senesis 2:16, 17] kin padahkihong kitail me Koht kelehpw me ketin mwahngih dahme mwahu . . . ong aramas akan oh Koht kelehpw me mwahngih dahme sohte mwahu . . . ong irail. Pwe ren ahneki ‘dahme mwahu,’ aramas akan anahne likih Koht oh peikiong ih. Ma re sapeikiong, re pahn pein pilada dahme mwahu . . . oh dahme sohte mwahu.” Met wia mehkot me nohn apwal ong aramas en wia.

10. Dahme kahrehda saledek en wiahda pilipil oh en ahneki pwuhng en koasoanehdi dahme mwahu oh dahme suwed sohte duwepenehte?

¹⁰ Ekei aramas ele medewe me Siohwa sohte ketikihong Adam saledek en wia dahme e men wia. Ahpw re sohte wehwehki me saledek en wiahda pilipil oh en ahneki pwuhng en koasoanehdi dahme mwahu oh dahme suwed sohte duwepenehte. Adam oh Ihp ahneki saledek en pilada ma ira pahn peikiong Koht de soh. Ahpw Siohwa kelehpw me sapwellimanki pwuhng en ketin koasoanehdi dahme mwahu oh dahme suwed. “Tuhkehn kehsehki aramas dahme mwahu oh dahme suwed” wia mehn kadehde ehu ong Adam oh Ihp duwen ire mehlel wet. (Sen. 2:9) Kitail sohte kin ahnsou koaros ese ia imwilahn atail pilipil kan, oh pil kitail sohte ese ma pilipil pwukat pahn imwila mwahu ahnsou koaros. Ihme kahrehda kitail kin kalapw kilang aramas akan wiahda pilipil sang kahrepe mwahu kan me re ahneki, ahpw pilipil pwukat kin imwikihla lokolok de kahpwal laud. (Lep. Pad. 14:12) Ei, mie irepen soahng kan me aramas kak wia. Ni Siohwa eh ketin kehkehlingkihong Adam oh Ihp ira en dehr tungoale wahn tuhkeo, e ketin padahkihong ira me ira anahne peikiong ih pwe ira en ahneki saledek mehlel. Ahpw dahme Adam oh Ihp pilada en wia?

11, 12. Dahme kahrehda ahn Adam oh Ihp ara pilipil imwikihla kahpwal laud? Menlau kihda ehu karasaras.

¹¹ E kansensuwed me Adam oh Ihp pilada en sapeikiong Siohwa. Ihp rongala Sehdan ni Sehdan eh inoukihda: “Kumwa pahn marainla oh duwehla Koht, pwe kumwa pahn esehla dahme mwahu oh dahme suwed.” (Sen. 3:5) Ia duwe, pilipil me Adam oh Ihp wiahda kalaudehla ara saledek, nin duwen me Sehdan  nda? Soh. Ni mehlel, ira esehda me en soikala sapwellimen Siohwa kaweid kin imwikihla kahpwal laud. (Sen. 3:16-19) Dahme kahrehda? Met pwehki Siohwa sohte ketikihong aramas akan saledek en pilada ong pein irail dahme mwahu oh dahme suwed.​—Wadek Lepin Padahk 20:24; Seremaia 10:23.

¹² Met kak karasaraskihong emen me kin pihrki sompihr. Pwehn pihrla wasa me koasoandiong ih en pihrla ie oh sohte lelohng kahpwal, e kin idawehn wasa me kileldier ong ih en keid ie, oh doadoahngki mehn katanga sompihro oh pil dipwisou en koasoiong de ale kaweid sang me kin apwalih tangatang en sompihr kan nan wehwe. Ma e sohte idawehn kaweid kan oh pihrla sohte lipilipil wasa me e men pihrla ie, met pahn kahrehda kahpwal laud. Duwehte met, Adam oh Ihp men wia dahme ira mwahuki. Ira soikala sapwellimen Koht kaweid. Ia imwilahn met? Kahpwal laud! Ara pilipilo imwikihla dihp oh mehla ong ira oh kadaudokara kan koaros. (Rom 5:12) Adam oh Ihp sohte kalaudehla ara saledek sang ni ara song en pilada ong pein ira dahme mwahu oh dahme suwed. Ahpw ira katihasang saledek mehlel me Koht ketikihong ira.

13, 14. Ia duwen atail kak ahneki saledek mehlel?

¹³ Ekei aramas kin medewe me ahneki saledek me sohte irepe iei me keieu mwahu. Ahpw met mehlel? Mehnda ma ahneki saledek kin wahdo kamwahu tohto, ke kak medewehla ia mwomwen sampah ma sohte douluhl mie irepen soahng kan? Pwuhken diksenerio, The World Book Encyclopedia, nda me kosonned en sahpw koaros kin apwal en wehwehki pwehki kosonned pwukat anahne pere oh pil ni ahnsowohte wiahda irepen ahn aramas arail saledek. Met sohte kin mengei ahnsou koaros. Ihme kahrehda kitail kin kilang kosonned tohto oh pil sounrepenpwung oh sounkopwung tohto kin song en kawehwehda oh pil doadoahngki kosonned pwukat.

¹⁴ Sises Krais ketin kawehwehda ia duwen atail kak ahneki saledek mehlel. E mahsanih: “Ma kumwail pahn peikiong ei padahk  kan, kumwail uhdahn pahn wiahla nei tohnpadahk mehlel. Oh kumwail pahn dehdehki dahme mehlel, oh me mehlelo pahn kasaledengkumwailla.” (Sohn 8:31, 32) Eri pwehn ahneki saledek mehlel, kitail anahne wia soahng riau. Keieu, kitail anahne pwungki padahk mehlel me Sises ketin padahngki. Keriau, kitail anahne wiahla sapwellime tohnpadahk kan. Atail wia mepwukat pahn wadohng kitail saledek mehlel. Ahpw saledek sang dah? Sises ketin mahsanih: “Mehmen me kin wiahda dihp, iei ih me lidun dihp.” E pil mahsanih: “Ma Sapwellimeo pahn kasaledengkumwailla, kumwail uhdahn pahn saledekla mehlel.”​—Sohn 8:34, 36.

15. Dahme kahrehda saledek me Sises ketin inoukihong kitail kak kahrehiong kitail en “saledekla mehlel”?

¹⁵ E sansal me saledek me Sises ketin inoukihong sapwellime tohnpadahk kan inenen mwahusang soangen saledek me pali laud en aramas akan men ahneki rahnwet. Ni Sises eh mahsanih: “Ma Sapwellimeo pahn kasaledengkumwailla, kumwail uhdahn pahn saledekla mehlel,” e kin mahmahsanih duwen aramas akan ar pahn maiaudahsang wia lidun dihp, soangen kalidu me keieu suwed me aramas ahneki. Ni ahl dah me kitail kin wia lidun dihp? Dihp kin kahrehiong kitail en wia me suwed. E pil kak kauhkitaildihsang en wia dahme kitail ese me pwung de en wiewia uwen atail kak. Imwilahn met iei pwunod laud, weirek, lokolok, oh mwuhr mehla. (Rom 6:23) Wahnpoaron Pohl kehnehr medek en mi pahn lidun dihp. (Wadek Rom 7:21-25.) Ihte ahnsowo me dihp pahn sohrala douluhl me kitail kak ahneki saledek mehlel me Adam oh Ihp ahneki mahso.

16. Ia duwen atail kak saledekla mehlel?

¹⁶ Sapwellimen Sises mahsen, “ma kumwail pahn peikiong ei padahk kan” kin kasalehda me ma kitail men Sises en ketin kasaledekihala kitail, kitail anahne en wia soahng kei. Soahng dah kan? Nin duwen Kristian kei, kitail tounmeteikilahr pein kitail oh pilada en pwungki soangen mehn irepe kan me Sises ketikihong sapwellime tohnpadahk kan. (Mad. 16:24) Duwehte me Sises ketin inoukihda, kitail pahn saledekla mehlel ahnsou kohkohdo, ni atail pahn alehdi ni unsek kamwahu kan me kohsang pweinen pweipwei sapahlo.

17. (a) Ia duwen atail kak uhdahn peren oh nsenamwahu? (b) Dahme kitail pahn sukuhlki nan iren onop en mwuhr?

¹⁷ Pwehn ahneki peren oh nsenamwahu mehlel, kitail anahne peikiong sapwellimen Sises padahk kan nin duwen sapwellime tohnpadahk kan. Ma kitail wia soahng pwukat, ehu rahn kitail kak uhdahn saledekla mehlel sang lidun dihp oh mehla. (Wadek Rom 8:1, 2, 20, 21.) Kitail pahn koasoiapene nan iren onop en mwuhr ia duwen atail kak doadoahngki ni erpit atail saledek me kitail ahneki ahnsou wet. Eri kitail kak kawauwih Siohwa, Koht en saledek mehlel, kohkohlahte.