PAHR nekilahro nan sampah pwon, ohl kid kid kei idihdida nin duwen elder oh sounsawas kei nanpwungen Sounkadehdehn Siohwa kan. Ma kowe emen brother pwukat, eri ke uhdahn pahn perenki omw pwais kapw wet nan sapwellimen Siohwa doadoahk.

Ahpw, ele ke pil ekis pwunod. Jason, me wia elder pwulopwul men, koasoia, “Ni ahnsou me I tepin idihdidao, I pehm me nohn tohtohla ei pwukoa kan me I anahne wia.” Moses oh Seremaia pehm me ira sohte koahiek ni ahnsou me ira ale pwukoa kapw kan sang Siohwa. (Eks. 4:10; Ser. 1:6) Ma ke pil ahneki soangen pepehm pwukat, ia duwen omw kak powehdi oh doulahte kekeirda? Medewehla mehn kahlemeng en tohnpadahko Timoty.​—Wiewia 16:1-3.

Timoty ele kereniong sounpar 20 de daulih ni ahnsou me wahnpoaron Pohl luke en iang ih seiloak. Nin tapio, pwehki e pwulopwul, Timoty ele sohte koapworopworki pein eh koahiek oh ele kin pweiek en wia eh pwukoa kapwo. (1 Tim. 4:11, 12; 2 Tim. 1:1, 2, 7) Ahpw, sounpar eisek mwuri, Pohl kak ndaiong mwomwohdisohn Pilipai: “Ma iei kupwuren Kaun Sises, I koapworopworki me I pahn kadarewei Timoty ni ahnsou keren . . . Pwe sohte emen me mi rehi me duwehte ih.”​—Pil. 2:19, 20, NW.

Dahme kahrehda Timoty wia elder men me uhdahn mwahu? Tehk iren mehn kasukuhl weneu me ke kak sukuhlkihsang eh mehn kahlemeng.

1. E uhdahn kin nsenohki aramas akan. Pohl ndaiong rie Kristian kan nan Pilipai: “[Timoty] uhdahn pahn nsenohkin kumwail.” (Pil. 2:20, NW) Ei, Timoty kin nsenohki aramas akan. E uhdahn men irail en karanihala Siohwa, oh e kin perenki kihong irail eh ahnsou oh kehl.

Dehr duwehte soundake bus men me kin nsenohkihte koasoandi en lella ni wasa me bus kan kin uhdi laudsang eh pahn pwekada pasinse kan. William, me wia elder men daulih sounpar 20 oh me me tohto kin wauneki, kaweidki ohl kapw kan me idihdida: “Poakohng riatail kan. Medemedewehte arail anahn kan ahpw kaidehn en ihte nsenohki koasoandi kan en mwomwohdiso.”

2. E kin mwohneki mahs doadoahk en kalohk. Pohl kasalehda mehn kahlemeng en Timoty eh weksang meteikan ni eh nda: “Meteikan koaros kin nsenohkihte pein arail mwekid kan, ahpw kaidehn doadoahk en Sises Krais.” (Pil. 2:21) Pohl mi Rom ni eh ntingihda kisinlikou wet. E tehkada me rie Kristian kan wasao kin nohn kedirepwkihla soahng kan nan arail mour. Re sohte kin ngoangki wia sapwellimen Koht doadoahk. Ahpw Timoty weksang irail! Ni ahnsou mwahu kin pwarada pwehn kalohki rongamwahwo, eh madamadau kin duwehte ahn Aiseia, me nda: “Iet ngehi, Maing, komwi ketin poaroneiehla.”—Ais. 6:8.

Ia duwen omw kak wia pwe pein omw pwukoa kan oh pwukoa kan nan sapwellimen Koht doadoahk en toupahrek? Keieu, koasoanehdi dahme keieu kesempwal. Pohl kehkehliki: “Pilada dahme keieu kesempwal.” (Pil. 1:10, NW) Wiahkihla soahng kan me kesempwal rehn Koht en keieu kesempwal rehmw. Keriau, kihsang mehkan nan omw mour me sohte nohn kesempwal. Kihsang soahng kan me kin kauwehla mwahl omw ahnsou oh kehl. Pohl  kangoange Timoty oh nda: “Kalekehkin uhk ineng en mwahnakapw akan; nantihong ke en pwung, pwoson, limpoak, oh popohl.”—2 Tim. 2:22.

3. E doadoahk laud nan sapwellimen Koht doadoahk. Pohl katamankihong mehn Pilipai kan: “Pein kumwail ese ia uwen katepen eh [Timoty] wiewia kan, oh duwen kiht, ih oh ngehi, pwe se kin doadoahkpene pwehki rongamwahu, rasehng pahpa men oh nah pwutak.” (Pil. 2:22) Timoty sohte pohnkahke. E kin iang Pohl doadoahk laud, oh met kakehlakahda ara nanpwungmwahupene.

Mie doadoahk tohto nan sapwellimen Koht pwihn rahnwet. Doadoahk pwukat uhdahn katapan oh kak kahrehiong uhk en karanihala riomw Kristian kan. Eri akadeiong ken kin ahnsou koaros “wia soahng tohto nan doadoahk en Kauno.”—1 Kor. 15:58.

4. E doadoahngki iren mehn kasukuhl kan me e sukuhlki. Pohl nting ong Timoty oh nda: “Ke idawehnehr ei padahk, ei wiewia, oh pil kahrepen ei mour nan mour wet; ke kilangehr duwen ei pwoson, ei kanengamah, ei limpoak, ei kin nannanti ni ahnsou apwal akan.” (2 Tim. 3:10) Pwehki Timoty doadoahngki dahme e sukuhlki, e kakehr wia pwukoa laud kan.—1 Kor. 4:17.

Mie kompoakepahmw men me mah sang uhk oh ahneki koahiek laud me ke kak alasang? Ma soh, ke seu rapahkihda emen? Tom, me wia elder men sounpar tohto, nda: “Emen elder koahiek kin kasalehda eh nsenohkin ie oh kasukuhliehda mwahu. I kin kalapw peki oh doadoahngki eh kaweid kan. Met kin mwadang en kalaudehla ei koahiek.”

5. E kin doulahte kaiahne pein ih. Pohl kangoange Timoty oh nda: “Kaiakaiahne pein kowe ni omw kin ahneki mehn akadei en poadidiong Koht.” (1 Tim. 4:7) Sounmwadong men ele kin mie nah sounkaweid men (coach), ahpw e pil kin anahne kaiahne pein ih. Pohl kangoange Timoty oh nda: “Nantihong wadewadek Pwuhk Sarawi ong aramas akan, oh padapadahkih oh panapanawih irail. . . . Pwerisekiong [“medemedewe mwahu,” NW] oh poadidiong wiewia soahng pwukat, pwe aramas koaros en kak kilang omw kekeirda.”​—1 Tim. 4:13-15.

Ke pil anahne doulahte kamwahwihala omw koahiek kan. Wia tohnsukuhl men me kin pwerisekiong oh peipeian kaweid kapw kan me kin kohda nan sapwellimen Siohwa pwihn. Oh pil, dehr nohn koapworopworkin pein uhk oh ele medewe me ke uhdahn ahneki koahiek laud oh kak apwalihala irair koaros ni omw sohte wia roporop mwahu. Alasang Timoty oh “kanakanahieng pein kowe oh pil kanahieng omw padahk kan.”—1 Tim. 4:16.

6. E likih sapwellimen Siohwa manaman. Ni Pohl eh medewehla duwen kalohk me Timoty kin wia, e katamankihong Timoty: “Sinsile likilik kaselel wet pwehki sawas en sapwellimen Koht manaman, me kin mi loalatail.” (2 Tim. 1:14, NW) Pwehn sinsile mwahu eh doadoahk en kalohk, Timoty anahne likih sapwellimen Koht manaman.

Donald, me wia elder men sounpar tohto, nda: “Ohl me idihdida kan anahne kesempwalki arail nanpwungmwahu rehn Koht. Irail kan me kin wia met pahn ‘kekehlailla.’ Ma re kin kapakapki sapwellimen Koht manaman oh kakairada wahn sapwellimen Koht manaman, re pahn wia kapai mehlel ehu ong riarail Kristian kan.”​—Mel. 84:7; 1 Pit. 4:11.

E uhdahn wia mehn kangoang ni atail kilang brother idihdida tohto me kapw, me duwehte iuk, me kin kekeirda nan sapwellimen Siohwa doadoahk. Jason, me kitail koasoia mwoweo, nda: “Erein ei wia elder men, I sukuhlki soahng tohto oh laudla ei kin koapworopworki pein ngehi. Met I uhdahn kin perenki ei pwukoa oh wiahki pwais kaselel ehu!”

Ia duwe, ke pahn doulahte kekeirda nan sapwellimen Siohwa doadoahk? Akadeiong ken sukuhlkihsang Timoty. Eri ke pahn pil wia kapai ehu ong sapwellimen Koht aramas akan.