1. Ia wiepen onop me Brother Russell oh ienge kan kin idawehn, oh dahme kahrehda wiepe wet mwahu?

DAULIH sounpar epwiki samwalahro, Brother C. T. Russell oh ienge kisin pwihn ehu en tohnsukuhl en Paipel, tepida kin tuhpene. Irail men ese ma re kak sukuhlki dahme Paipel uhdahn padahngki duwen Siohwa Koht, Sises Krais, irair en me melahr kan, oh pil pweinen pweipwei sapahlo. Wiepen arail onopo sohte apwal. Emen pahn kihda ehu peidek, oh pwihno pahn kasawih iren Paipel koaros me pidada peideko. Mwuhr, irail pahn ntingihedi dahme re diarada sang arail roporop. Siohwa ketin sewese irail ohl pwukat en wehwehki padahk kesempwal tohto sang nan Paipel me pil kesempwalte ong kitail rahnwet.

2. Dahme kak kahrehda kitail en ekei pak wehwehki ni sapwung kokohp en Paipel kan?

² Ahpw sohte pwand, tohnsukuhl en Paipel pwukat diarada me en wehwehki kokohp en Paipel ehu kin apwal sang en wehwehki padahk mengei ehu nan Paipel. Dahme kahrehda? Ehu kahrepe iei me kitail kin kalapw wehwehkihla mwahu kokohp kan en Paipel ni ahnsou me kokohp pwukat kin pweida, de mwurin ar pweidahr. Ahpw mie pil ehu kahrepe. Pwehn wehwehki kokohp ehu ni pwung, kitail kin anahne tehk audepen kokohpo pwon. Ma kitail tehk wasa ehute nan kokohpo oh pohnsehsehla wasa teikan, atail wehwehki kokohpo kakete sapwung. Eri, e mwomwen me ih met me wiawi ong kokohpo nan pwuhken Soel. Met kitail pahn pwurehng tehkpene kokohpo oh koasoiapene dahme kahrehda kitail anahne wekidala mwomwen atail wehwehki.

3-4. Sang mahs leledo met, ia duwen atail kin doadoahngki kokohpo nan Soel 2:7-9?

³ Wadek Soel 2:7-9. Soel kohpada me pelin loukust ehu pahn kauwehla sapwen Israel. Loukust mehwo pwukat me ngihrail oh tihn auwerail ko rasehng ngih oh tihn auwen laion pahn kangala  tuhke koaros. (Soel 1:4, 6) Erein sounpar tohto, kitail doadoahngki kokohp wet pwehn karasahiong mwomwen sapwellimen Siohwa aramas akan ar wia doadoahk en kalohk, me rasehng pelin loukust ehu me sohte me kak kauhdi. Kitail wehwehki me doadoahk wet kin kamwakidada laud ‘sahpw,’ de aramas akan me mi pahn kaunen pelien lamalam kan me kahrehda re sehselahr ia duwen arail en powehdi. *

⁴ Kawehwe wet pahn mwomwen pwung ma kitail wadekte nan Soel 2:7-9. Ahpw ma kitail medewe mwahu duwen audepen kokohpo pwon, kitail pahn kilang me kitail anahne wekidala mwomwen atail wehwehki. Kitail tehkpene kahrepe pahieu me kitail en wiahki met.

5-6. Peidek dahieu me kitail kin idek ni atail wadek (a) Soel 2:20? (b) Soel 2:25?

⁵ Kahrepe keieu, tehk sapwellimen Siohwa inowo me pid pelin loukusto: “I pahn kapwurehsang rehmwail karis en loukust me kohdo sang paliepeng.” (Soel 2:20) Ma loukust ko kin karasaraskihong Sounkadehdehn Siohwa kan me kin peikiong sapwellimen Sises kehkehliko en kalohk oh katohnpadahk, dahme kahrehda Siohwa ketin inoukihda me e pahn ketin kasareirailla? (Esek. 33:7-9; Mad. 28:19, 20) E sansal me Siohwa kin ketin kasare, kaidehn sapwellime ladu lelepek kan, ahpw mehkot de mehmen me kin lemeiong irail.

⁶ Kahrepe keriau, medewehla dahme kileldi nan Soel 2:25. Wasao Siohwa ketin mahsanih: “I pahn kapwurehiong kumwail mehkan me sohrala sang kumwail nan sounpar ako me pelin loukust ko kangala amwail wahnsahpw akan. Pwe ngehi me kadarewohng kumwail karis wet.” Tehk me Siohwa ketin inoukihda en “kapwurehiong” irail mehkan me loukust ko kauwehla. Ma loukust ko kin karasaraskihong sounkalohki Wehio kan, met pahn wehwehki me rohng me irail kalohki kin kauwehla wasa. Ahpw rohng wet kin doarehla mour oh kak kamwakid aramas suwed kan ren koluhla. (Esek. 33:8, 19) Met pahn wia mehkot mwahu ong irail!

7. Nan Soel 2:28, 29 (NW), dahme lepin lokaia pwukat “mwurin mwo” sewese kitail en wehwehki?

⁷ Wadek Soel 2:28, 29, NW. * Medewehla kahrepe kesiluh, me iei mwomwen kairekdi en mwekid kan nan kokohpo. Ia duwe, ke tehk me Siohwa ketin mahsanih: “Mwurin mwo I pahn kamwerehdi ei manaman”; me wehwehki, mwurin loukust ko kanekehla doadoahko me irail anahne wia? Ma loukust kan iei sounkalohk kan en Wehin Koht, ia kahrepen Siohwa pahn ketin kamwerehdi sapwellime manaman pohrail mwurin arail kanekehla arail doadoahk en kalohko? Ire mehlelo iei me ma sohte sawas sang sapwellimen Koht manaman me inenen kehlail, sounkalohk kan uhdahn sohte kak doula kalokalohk erein sounpar tohto mendahki uhwong laud pil iangahki arail doadoahko keinapwidi.

8. Ihs me loukust kan nan Kaudiahl 9:1-11 karasaraskihong? (Menlau kilang kilel ni kilin Kahn Iroir wet.)

⁸ Wadek Kaudiahl 9:1-11. Met kitail pahn tehkpene kahrepe kapahieu. Mahso kitail nda me pelin loukust me Soel koasoakoasoia duwe kin karasaraskihong atail doadoahk en kalohko pwehki e mwomwen duwehte kokohp me mi nan pwuhken Kaudiahl. Kokohp wet kawehwehda duwen pelin loukust ehu me masarail duwehte mesen aramas oh “mehkot duwehte  nihn kohl” ehu mi pohn moangarail. (Kaud. 9:7) Irail kaloke “aramas akan [sapwellimen Koht imwintihti kan] me sohte kilelkihdi kilelen Koht ni temwarail kan” erein sounpwong limau, me iei uwen werei me loukust men ele kin momourki. (Kaud. 9:4, 5) Met mwomwen kawehwehda duwen sapwellimen Siohwa ladu keidi kan. Ni eimah, irail kin pakairki sapwellimen Koht kadeik ong koasoandi suwed wet, oh met kahrehda koaros me kin utung koasoandi wet kin uhdahn soansuwedkihda.

9. Ia wekpeseng kan me kesempwal nanpwungen loukust kan me Soel kilangada oh me Sohn kilangada?

⁹ Mendahki kokohp kan nan Kaudiahl oh Soel mwomwen duwepene, mie wasa kesempwal kei me wekpeseng. Medewehla met: Nan kokohp en Soel, loukust ko kauwehla tuhke koaros en nansapw kan. (Soel 1:4, 6, 7) Ahpw nan ahn Sohn kaudiahlo, mahsen kohieng loukust ko ren “dehpa kauwehla rehn nansapw akan.” (Kaud. 9:4) Loukust ko me Soel kilangada kohsang paliepeng. (Soel 2:20) Ahpw loukust ko me Sohn kilangada kohdahsang nan pwoahr loal ehu me soh kapi. (Kaud. 9:2, 3) Loukust kan me Soel kilangada pekeusla wasa ehu. Nan Kaudiahl, loukust ko sohte pekeusla wasa ehu ahpw re ale mweimwei en kanekehla arail doadoahko. Sohte wasa ehu nan Paipel me kasalehda me Siohwa sohte ketin kupwurperenki irail.​—Menlau kilang koakon “ Kokohp en Loukust kan—​Duwehpene Ahpw Pil Wekpeseng.”

10. Menlau kihda ehu karasaras sang nan Paipel me kasalehda me wehwehn loukust kan me Soel oh Sohn kilangada wekpeseng.

 ¹⁰ Wekpeseng kan nanpwungen kokohp riau pwukat sewese kitail en wehwehki me ira sohte dokpene. Ia duwe, kitail ndinda me loukust kan me Soel kilangada weksang loukust ko me mi nan pwuhken Kaudiahl? Ei. Nan Paipel, wehwehn kilel ehu kin ekei pak wekila ni ahnsou me e kin kadoadoahk ong ni ehu ahl tohrohr. Karasepe, Kaudiahl 5:5 kahdaneki Sises “Laiono me sang keinek en Suda,” ahpw 1 Piter 5:8 kahdaneki Tepilo “laion emen me kin weriwer.” Kahrepe pahieu ko me kitail koasoiapene, oh pil soahng ko me duwehpene ahpw pil wekpeseng, kasalehda me kitail anahne rapahki pil ehu wehwehn kokohp en Soel. Eri ia pil ehu wehwe?

11. Ia duwen Soel 1:6 oh 2:1, 8, 11 eh sewese kitail en wehwehki ihs me loukust ko?

¹¹ Ni atail tehk iretikitik teikan en nan kokohp en Soel, kitail wehwehki me soukohpo kin koasoakoasoia duwen uhwong ehu sang sounpei kan. (Soel 1:6; 2:1, 8, 11) Siohwa ketin mahsanih me e pahn ketin doadoahngki sapwellime “karis” laudo (sounpei en Papilon kan) pwehn kaloke mehn Israel sapeik kan. (Soel 2:25) E pwung en nda me karis en sounpei wet kohsang “paliepeng” pwehki mehn Papilon kan pahn kohdo sang paliepeng pwehn kalowehdi Israel. (Soel 2:20) Karis en sounpei wet kin rasehng pelin loukust ehu me soandi mwahu. Soel ndahki irail: “Sohte me pil kin keidla mwohn emen. . . . Re kin tangowehng ni kahnimwo; re kin tang pohn kehl kan; re kin doudahng nan ihmw kan, oh pwedilong nan wenihmwtok kan duwehte sounpirap akan.” (Soel 2:8, 9) Ke kak medewehla dahme wiawi? Sounpei kan mi wasa koaros. Sohte wasa me emen kak rukula ie. Sohte me kak pitsang karis en sounpei kan en Papilon!

12. Ia duwen ahn Soel kokohpo duwen loukust kan eh pweida?

¹² Duwehte loukust kan, mehn Papilon ko kalowehdi kahnimw en Serusalem nan pahr 607 Mwohn Krais. Paipel mahsanih: “Nanmwarkien Papilonia . . . kemehla mwahnakapw akan . . . Sohte mehmen me e ketin kupwur mahkohng, me pwulopwul de mah, ohl de seri, me soumwahu de kehlail. Koht ketikihong irail pahn manaman en nanmwarkien Papilonia. E isikala Tehnpas Sarawio oh kahnimwo, iangahki tehnpesen nanmwarki kan oh kepwe kan, oh kauwehla kelen kahnimwo [“soahng koaros me mie kesempwalpe,” NW].” (2 Kron. 36:17, 19) Ni mehn Papilon kan ar kalowehdi oh kauwehla sahpwo, aramas akan kak ndahte: “Sahpwet pahn wiahla sapwtehn me aramas de mahn sohte pahn kousoan ie, oh dene e pahn kohieng mehn Papilonia kan pwe re en sapwenikihla.”​—Ser. 32:43.

13. Menlau kawehwehda wehwehn Seremaia 16:16, 18.

¹³ Mpen sounpar 200 mwurin ahn Soel kokohpo, Siohwa ketin doadoahngki Seremaia en kohpada pil ehu soahng tohrohr duwen uhwong wet. E ketin mahsanih me sounpei ko pahn rapahki kanahieng irail mehn Israel kan me kin wiewia me suwed oh re pahn koliraildi koaros. “KAUN-O mahsanih, ‘I pahn kadarewei soused tohto pwe re en saikedi aramas pwukat. Mwuhr I pahn pil kadarewei sounkesik tohto pwe re en rapahkin irail pohn nahna oh dohl koaros oh nan pwoaren paip akan. . . . I pahn pwainohng irail pak riapak arail wiewia suwed oh diparail kan.’” Nansed oh nanwel kan sohte pahn kak karukehla mehn Israel kan me sohte koluhla sang mehn Papilon kan.​—Ser. 16:16, 18.

14. Iahd me kokohpo nan Soel 2:28, 29 (NW) pweida?

¹⁴ Met mie rongamwahu me Soel pahn koasoia. Sahpwo pahn pwurehng direkihla wahnsahpw akan. (Soel 2:23-26) Mwuhr, ni ahnsou ehu me pahn kohdo, padahk mehlel tohto me rasehng kisin tungoal, pahn miehla. Siohwa ketin mahsanih: “I pahn kamwerehdi ei manaman pohn soangsoangen aramas akan, oh noumwail pwutak kan oh serepein kan pahn wia kokohp . . . Oh pil pohn nei lidu kan, ohl oh lih, I pahn kamwerehdi ei manaman.” (Soel 2:28, 29, NW) Koht sohte ketin kamwerehdi sapwellime manaman mwurinte mehn Israel kan pwurasang Papilon kohlahng sapwarailo. Ahpw met wiawi sounpar epwiki kei mwuhr, ni Pendekos pahr 33. Ia duwen atail ese met?

15. Nin duwen me Wiewia 2:16, 17 kasalehda, wekidekla dahieu me Piter wiahiong lepin lokaia kan nan Soel 2:28, oh dahme met kasalehda?

¹⁵ Pahn sapwellimen Koht kaweid, wahnpoaron Piter doadoahngki Soel 2:28, 29 ong mwekid kapwuriamwei ehu me wiawi ni rahnen Pendekos. Mpen kuloak duwau nimenseng en rahno, Koht ketin kamwerehdi sapwellime manaman, oh irail kan me alehdi tepida koasoakoasoia “duwen sapwellimen Koht doadoahk kapwuriamwei kan.” (Wiewia 2:11) Pahn sapwellimen Koht kaweid, Piter ekis kawekala lepin lokaia kan ni eh doadoahngki ahn Soel kokohpo. Ke tehk mwomwen eh kawekala lokaia ko? (Wadek Wiewia 2:16, 17.) Piter sohte tepte nda “mwurin mwo,” ahpw e nda: “Ni imwin rahn akan,” me wehwehki imwin rahn akan mwohnte kasohralahn Serusalem oh tehnpas sarawio, sapwellimen Koht manaman pahn mweredi “pohn soangen aramas koaros.” Met kasalehda me ahnsou werei ehu mwuhr me ahn Soel kokohpo pweida.

16. Ia duwen sapwellimen Koht manaman eh sewese doadoahk en kalohko ni mwehin tepin Kristian ko, ahpw ia duwen rahnwet?

 ¹⁶ Mwurin Koht ketin kamwerehdi sapwellime manaman pohn Kristian kan ni mwehin wahnpoaron ko, irail tapiada doadoahk en kalohko me pahn ehu rahn lella nan sampah pwon. Ni ahnsou me wahnpoaron Pohl ntinglahng Kristian kan nan Kolose, mpen pahr 61, e kak nda me rongamwahwo lohkselier “wasa koaros nin sampah.” (Kol. 1:23) Ni Pohl eh nda “wasa koaros,” met kin dokedoke wasa kan me Pohl oh meteikan kak seiloakla ie. Pwehki sawas sang sapwellimen Siohwa manaman me uhdahn kehlail, kohpeseng en doadoahk en kalohko nan atail ahnsou uhdahn laudsang mahs. E lelehr “ni irepen sampah”!​—Wiewia 13:47; menlau kilang koakon “ I Pahn Kamwerehdi Ei Manaman.”

17. Ia duwen atail wehwehki ahn Soel kokohpo duwen loukust kan eh wekila?

¹⁷ Dahme wekila? Met kitail wehwehkihier ni pwung kokohpo nan Soel 2:7-9. E sansal me iretikitik pwukat sohte kin dokedoke atail doadoahk en kalohk, ahpw e kin dokedoke mwekid en karis en Papilon ko me kalowehdi Serusalem nan pahr 607 Mwohn Krais.

18. Dahme sohte wekila duwen sapwellimen Siohwa aramas akan?

¹⁸ Dahme sohte wekila? Sapwellimen Siohwa aramas akan kin pousehlahte kalohki rongamwahwo wasa koaros, oh doadoahngki wiepen kalohk koaros me re kak pwehn wia met. (Mad. 24:14) Sohte koasoandi en keinapwidi ehu sang koperment me kak kauhkitaildihsang atail en kapwaiada kehkehlik en kalohk. Pwehki sapwellimen Siohwa kapai, atail doadoahko tohtohla sang mahs, oh ni eimah kitail kin kalohki rongamwahu en Wehin Koht! Ni aktikitik kitail kin pousehlahte kilangwohng Siohwa en ketin sewese kitail en wehwehkihla kokohp en Paipel, oh likih me ni ahnsou me konehng, e pahn ketin kahluwakitailahng “ni me mehlel koaros”!​—Sohn 16:13.