Dahme kahrehda Sises mahsanih mahsen ko me Depit koasoia nan Melkahka 22:1 mwohnte e pwoula?

Mwohnte Sises pwoula, e mahsanih mahsen ko me kileldi nan Madiu 27:46: “Ei Koht, ei Koht, dahme komw ketin likidmeliekiniehla?” Ni Sises eh mahsanih met, e ketin kapwaiada mahsen ko me sounmelkahkao Depit ntingihedi nan Melkahka 22:1. (Mark 15:34) E pahn sapwung en nda me Sises mahsanih mahsen ko pwehki e ketin nsensuwedla pahn Siohwa de pwehki e sohla pwoson Koht erein ahnsou kis. Sises uhdahn mwahngih dahme kahrehda e anahne pwoula, oh e kupwurki wia met. (Mad. 16:21; 20:28) Oh e pil mwahngih me ni ahnsou me e pahn pwoula, Siohwa pahn anahne ketikihsang “mehn perehpe.” (Sohp 1:10) Eri Siohwa ketin uhdihsang pere Sises pwe Sises en kak kadehdehda me e pahn ahnsou koaros lelepek, sohte lipilipil ia uwen apwal en eh pahn pwoula.​—Mark 14:35, 36.

Eri dahme kahrehda Sises mahsanih mahsen en sounmelkahkao? Kitail sohte uhdahn ese, ahpw kitail pahn koasoiapene soahng kei me kakete kahrehiong ih en ketin wia met. *

Ni eh mahsanih mahsen pwukat, Sises ele mahmahsanih me Siohwa sohte pahn ketin kauhdi eh pahn pwoula. Sises anahne pwainla pweinen pweipwei sapahlo ni Siohwa eh sohte pahn ketin sewese ih. Ih aramas emen oh e anahne pwoula pwe en kak “pwoukihla aramas koaros.”​—Ipru 2:9.

 Ni eh mahsanih ekei lokaia ko sang nan melkahkao, ia duwe, Sises men meteikan en medemedewe dahme melkahkao pwon koasoia? Ni mwehin mehn Suhs ko, aramas ako kin kalapw wadlikihla pali laud en melkahka kan. Ni arail kin rong ehu iretikitik me kohsang nan ehu melkahka, irail pahn kin mwadangete medewehla pwuhken melkahkao pwon. Ma ih met me Sises kupwurki wia, eri e kakete ketin sewese mehn Suhs ko me kin idawehn ih ren tamanda diren kokohp ko me mi nan melkahka wet duwen mwekid kan me wiawi ni ahnsou me e pwoula. (Mel. 22:7, 8, 15, 16, 18, 24) Oh kaimwiseklahn iretikitik kan nan melkahkao kin kapinga Siohwa oh mahsanih me Ih iei Nanmwarki en sampah pwon.​—Mel. 22:27-31.

Ni eh mahsanih en Depit lokaia ko, ia duwe, Sises mahmahsanih me sohte dipe? Mwohn Sises ketin kamakamala, tohn Sanedrin ko koasoanehdi kopwung sapahrek ehu oh nda me e ketin lahlahwe. (Mad. 26:65, 66) Ni eh lukepen pwonglahr, tohn Sanedrin ko mwadangete kohpene oh wia kopwungo ni ar sohte peikiong koasoandi kan en kosonned. (Mad. 26:59; Mark 14:56-59) Ni Sises eh ketin idek peideko “Ei Koht, ei Koht, dahme komw ketin likidmeliekiniehla?” ele e ketin song en kasalehda me ni mehlel, sohte mehkot sapwung me e wiahda oh sohte kahrepe ehu me ren kemehkihla ih.

Ia duwe, Sises pil ketin katakatamankihong meteikan me mendahki Depit, me ntingihedi melkahka wet, lelohng lokolok, met sohte wehwehki me Siohwa sohla ketin kupwurperenki ih? Ni Depit eh idek peidek wet, met sohte wehwehki me e solahr pwoson Koht. Mwurin eh idek peideko, e nda me e likih me Siohwa kak ketin doarehla sapwellime aramas akan. (Mel. 22:23, 24, 27) Duwehte met, mendahki Sises, “Nein Depit,” lelohng lokolok, met sohte wehwehki me Siohwa solahr ketin kupwurperenki ih.​—Mad. 21:9.

Ia duwe, Sises uhdahn nsensuwedkihla Siohwa eh sohte pahn ketin silehsang ih kahpwal pwe en kak kadehdehda eh lelepek? Siohwa sohte ketin kupwurki nin tapio me sapwellime Ohlo pahn lelohng lokolok oh mehla. Ahpw koasoandi wet anahne wiawihda mwurinte Adam oh Ihp sapeikiong Siohwa. Sises sohte ketin wiahda mehkot sapwung, ahpw e anahne ketin lokolok oh pwoula pwehn sapengala peideko me Sehdan kihda oh pwehn ketikihda pweinen pweipwei sapahlo pwehn pwainla dahme Adam luhssang. (Mark 8:31; 1 Pit. 2:21-24) Met kak wiawi ihte ma Siohwa sohte ketin pere Sises erein ahnsou kis nan eh mour.

Ia duwe, Sises songosong en sewese sapwellime tohnpadahk kan en medewe dahme kahrehda Siohwa ketin mweidohng ih en pwoula ni tuhkehn kalokoloko? * Sises mwahngih me en kamakamala nin duwen loallap men ni tuhkehn kalokoloko pahn kadipikelekelih me tohto. (1 Kor. 1:23) Ma sapwellime tohnpadahk kan kin medemedewehte uhdahn kahrepen eh pwoula, re pahn wehwehki kesempwalpen eh pwoula. (Kal. 3:13, 14) Irail eri pahn wiahki ih Sounkomour men ahpw kaidehn loallap men.

Sohte lipilipil kahrepe dahieu me Sises mahsanihki mahsen pwukat, e mwahngih me e ketin kapwaiada kupwuren Siohwa. Mwurinte Sises mahsanih mahsen ko nan melkahkao, e mahsanih: “Mehkoaros pweidahr!” (Sohn 19:30; Luk 22:37) Ei, erein ahnsou kis me Siohwa sohte ketin sewese Sises, met kahrehiong Sises en kapwaiada ni unsek soahng koaros me e ketido sampah pwehn wia. Met pil kahrehiong ih en ketin kapwaiada soahng koaros me ntingdier duwen ih “nan Kosonned en Moseso, rehn Soukohp ako oh nan Melkahka kan.”​—Luk 24:44.