1-2. Dahkot pweinen pweipwei sapahlo, oh dahme kahrehda kitail anahne?

NI AHNSOU me ohl unseko Adam dipada, e katihasang mour soutuk, kaidehn ongete pein ih, ahpw pil ong kadaudoke kan. Sohte kahrepe mwahu me e ahneki pwehn wia met. E pilada en dipada. Nah seri kan sohte wiahda sapwung oh kaidehn irail me kahrehiong ih en wia met. (Rom 5:12, 14) E konehng Adam en mehla pwehki dahme e wiahda. Ahpw ia duwe, mie mehkot me Siohwa kak ketin wia pwe nein Adam seri kan en kak mour kohkohlahte? Ei! Mwurinte Adam dipada, Siohwa ketin tepida kasalehda ia duwen eh pahn ketin doarehla nein Adam seri rar rar kei sang dihp oh mehla. (Sen. 3:15) Ni ahnsou me e ketin koasoanehdi, Siohwa pahn ketin poaronehdo sapwellime Ohlo sang nanleng pwehn “toukihda moure nin duwen pweinen pweipwei sapahl ehu ong aramas tohto.”​—Mark 10:45; Sohn 6:51.

² Dahkot pweinen pweipwei sapahlo? Nan Palien Paipel ni Lokaiahn Krihs, e kin wehwehki pweipwei ehu me Sises ketikihda pwehn pwainla dahme Adam luhssang. (1 Kor. 15:22) Dahme kahrehda kitail anahnehki pweipwei sapahlo? Pwehki sapwellimen Siohwa kosonned me pwung pahrek iei en wiliankihdi mour ong mour. (Eks. 21:23, 24) Adam luhssang eh mour unsek. Pwehn pahrekiong sapwellimen Koht pwung pahrek, Sises tounmeteikihla eh mour unsek. (Rom 5:17) E ketin wiahla “Sahm Poatopoat” ong koaros me kin pwoson pweinen pweipwei sapahlo.​—Ais. 9:6; Rom 3:23, 24.

3. Nin duwen me Sohn 14:31; 15:13 mahsanih, dahme kahrehda Sises kupwurki meirongkihla sapwellime mour unsek?

³ Sises ketin kupwurki meirongkihla eh mour pwehki e uhdahn poakohng Semeo nanleng oh pil kitail. (Wadek Sohn 14:31; 15:13.) Pwehki Sises uhdahn poakohng Siohwa oh  kitail, e ketin koasoanehdi teng en lelepekte lao e pwoula oh kapwaiada kupwuren Semeo. Pwehki met, dahme Siohwa ketin kupwurki nin tapio ong aramas oh sampah pahn pweida. Nan iren onop wet, kitail pahn koasoiapene dahme kahrehda Koht ketin mweidohng Sises en lokolok mwohn eh pwoula. Kitail pahn pil koasoiapene ni mwotomwot duwen sounnting en Paipel men me uhdahn kalahnganki pweinen pweipwei sapahlo. Oh mwurin mwo kitail pahn pil koasoiapene ia duwen atail kak kasalehda atail kalahnganki pweinen pweipwei sapahlo, oh ia duwen atail kak kalahnganki meirong me Siohwa oh Sises ketikihda ong kitail.

4. Menlau kawehwehda ia duwen Sises eh pwoula.

⁴ Medewehla dahme wiawi ni kaimwiseklahn rahn mwohnte Sises pwoula. Mendahki e kak ketin peki karis en tohnleng kan en pere ih, e mweidohng sounpei en Rom ko en salihedi oh keme ih. (Mad. 26:52-54; Sohn 18:3; 19:1) Irail wokihki sahl ehu me kauwehla kilio. Mwuhr, irail kidahng pohn pwopweo me ohlahr tuhke toutou ehu. Sises tepida ketiki tuhkeo kohla wasa me e pahn kamakamalao, ahpw mwurin ahnsou kis, sounpei en Rom ko ndaiong emen ohl en wahda tuhkeo. (Mad. 27:32) Ni Sises eh lella wasa me e pahn ketin kamakamalao, sounpei ko doadoahngki nihl oh pasuradahng kahlepeo ni tuhkeo. Pwehki toutou en kahlepeo, nihl ko ni lime ko oh aluweluwe ko kahrehda weirek laud. Kompoakepah ko pahtoula oh eh nohnou sengiseng, ahpw kaunen mehn Suhs ko kapailoke Sises. (Luk 23:32-38; Sohn 19:25) Sises ketin lokolongki erein awa kei. Pwehki mwomwen kahlepeo eh langalang, e uhdahn apwal ong ih en esingek mwahu. Mwohnte e pwoula, e kapakap ong Siohwa. Ih eri itiekidi oh mweidala eh mour. (Mark 15:37; Luk 23:46; Sohn 10:17, 18; 19:30) Eh pwoulao uhdahn kaweikek oh kanamenek.

5. Dahme Sises ketin pwunodki laudsang mwomwen e kamakamalao?

⁵ Sises sohte nohn pwunodki mwomwen eh kamakamalao, ahpw dahme e keieu ketin pwunodki iei karaunlikamw me kahrehiong ih en kamakamala. Aramas ako karaunehki me e sohte kin wauneki Koht de mwaren Koht. (Mad. 26:64-66) Karaunlikamw wet uhdahn kapwunode Sises kahrehda e koapworopworki me Semeo sohte pahn ketin mweidohng ih en pwoula ni ahl kanamenek wet. (Mad. 26:38, 39, 42) Dahme kahrehda Siohwa ketin mweidohng sapwellime Ohl kompoakeo en lokolok oh pwoula? Kitail pahn koasoiapene kahrepe siluh.

6. Dahme kahrehda Sises anahne ketin langada pohn tuhkehn kalokolok ehu?

⁶ Keieu, irail anahne langahda Sises pohn tuhkehn kalokoloko pwehn kasaledekihala mehn Suhs ko sang keria ehu. (Kal. 3:10, 13) Irail mi pahn keria wet pwehki re inoukihda me re pahn peikiong sapwellimen Koht Kosonned kan ahpw re sohte wia met. Kahrehda keria wet kohwong irail patehngete arail kin mehla pwehki irail wia kadaudok en ohl dipano, Adam. (Rom 5:12) Sapwellimen Koht Kosonned ong mehn Israel ko iei ma emen pahn wiahda dihp ehu me konehng en kamakamkihla, e anahne kamakamala. Mwuhr, paliwereo ele pahn langada pohn tuhke ehu. * (Deud. 21:22, 23; 27:26) Pwehki Sises ketin kamakamala pohn tuhkehn kalokoloko, mehn Suhs ko kak saledeksang keriao oh sapwellime meirong kak sewese irail mendahki arail soikala ih.

7. Ia kahrepe keriau me Koht ketin mweidohng sapwellime Ohlo en lokolok?

 ⁷ Medewehla kahrepe keriau me Koht ketin mweidohng sapwellime Ohlo en lokolok. E ketin kaiakaiahne Sises ong pwukoahn Samworo Lapalap me Sises pahn ketin wia ni ahnsou kohkohdo. Sises mwahngih uwen apwal emen en peikiong Koht ni eh mihla pahn kasongosong laud. Sises uhdahn ketin pwunodada me kahrehda e kapakapki sawas “ni kapitie laudida iangahki pilen silangi.” Pwehki Sises ketin lelohng soangen kapwunod laud wet, e kak mwahngih atail anahn kan oh “kak ketin sewese [kitail]” ni atail “lelohng kasongosong.” Ia uwen atail kalahnganki me Siohwa ketin idihada Samworo Lapalap men me kin kalahngan oh kak “wehwehki atail luwet akan”!​—Ipru 2:17, 18; 4:14-16; 5:7-10.

8. Ia kahrepe kesiluh me Koht ketin mweidohng Sises en lelohng kasongosong laud?

⁸ Kesiluh, Siohwa ketin mweidohng Sises en lelohng lokolok laud pwehn sapengala peidek kesempwal wet: Aramas kak lelepekte ong Siohwa ni arail lelohng kasongosong laud? Sehdan nda soh! E kose me aramas akan kin papah Koht pwehki kahrepe roporop kan. Oh e kamehlele me re sohte kin poakohng Siohwa, duwehte Adam eh sohte poakohng Siohwa. (Sohp 1:9-11; 2:4, 5) Pwehki Siohwa uhdahn ketin kamehlele me Sises pahn kolokolete eh lelepek, e ketin mweidohng sapwellime Ohlo en lelohng kasongosong laud. Sises lelepekte oh kasalehda me Sehdan sounlikamw men.

9. Mehn kahlemeng dah me wahnpoaron Sohn wiahda ong kitail?

⁹ Padahk en pweinen pweipwei sapahlo kin kakehlaka pwoson en Kristian tohto. Irail kin doulahte kalokalohk mendahki uhwong oh kin dadaur pahn soangsoangen kahpwal kan lao re mahla. Medewehla mehn kahlemeng en wahnpoaron Sohn. E lelepek kalokalohki dahme mehlel duwen Krais oh pweinen pweipwei sapahlo, mwein daulih sounpar 60. Ni ahnsou me e kereniong sounpar 100, mehn Rom kan kin wiahki ih aramas keper men oh salihedi ih pohn dekehn Padmos. Soahng suwed dah me e wiahda? E ‘kin koasoia duwen Koht oh pwehki e kin kadehdehda duwen Sises.’ (Kaud. 1:9) E uhdahn wiahda mehn kahlemeng mwahu en pwoson oh dadaur!

10. Ia duwen dahme Sohn ntingihedi ko eh kasalehda me e uhdahn kalahnganki pweinen pweipwei sapahlo?

¹⁰ Nan pwuhken Paipel ko me Sohn ntingihedi, Sohn kasalehda uwen eh poakohng Sises oh uwen eh kalahnganki sapwellime meirong. E koasoia daulih pak 100 kei duwen pweinen pweipwei sapahlo oh kamwahu kan me met kak kahrehda ong aramas. Karasepe, Sohn ntingihedi: “Ma emen wiahda dihp, sounsawaspatail mie rehn Sahmo, iei Sises Krais, me pwung men.” (1 Sohn 2:1, 2) Dahme Sohn ntingihedi pil kasalehda kesempwalpen en “kadehde duwen Sises.” (Kaud. 19:10) E sansal me Sohn uhdahn kalahnganki pweinen pweipwei sapahlo. Ia duwen atail pil kak kasalehda me kitail pil kalahnganki?

11. Dahme kak sewese kitail en pelianda kasongosong?

¹¹ Pelianda kasongosong en wiahda dihp. Ma kitail uhdahn kalahnganki pweinen pweipwei sapahlo, kitail sohte pahn ahneki madamadau wet: ‘I sohte anahne pelianda kasongosong kan. I kak wiahda dihp, oh mwuhr I pahn pek mahk.’ Ahpw, ni ahnsou me kitail lelohng kasongosong en wiahda sapwung, kitail pahn nda: ‘Soh! Ia duwen ei kak wia soahng wet mwurin soahng koaros me Siohwa oh Sises  ketin wiahiong ie?’ Patehng met, kitail kak peki kehl sang rehn Siohwa, oh patohwan: ‘Dehr ketin mweidohng ie en lohdiong nan songosong.’​—Mad. 6:13.

12. Ia duwen atail kak doadoahngki kaweid me kileldi nan 1 Sohn 3:16-18?

¹² Poakohng riomw Kristian kan. Ni atail kin kasalehda soangen limpoak wet, kitail pil kin kasalehda atail kalahnganki pweinen pweipwei sapahlo. Dahme kahrehda? Pwehki Sises ketin tounmeteikihla moure kaidehn ong kitailte ahpw pil ong riatail Kristian kan. Sises uhdahn kupwurki pwoukinirailla, eri e sansal me e uhdahn ketin poakohng irail. (Wadek 1 Sohn 3:16-18.) Kitail kin kasalehda atail limpoak ong riatail Kristian kan sang ni mwomwen atail wiewia ong irail. (Ep. 4:29, 31–5:2) Karasepe, kitail kin sewese irail ni ahnsou me re soumwahu de ahnsou me irail kin dadaur pahn kahpwal laud, me iangahki melimel de rerrer en sahpw ape. Ahpw dahme kitail pahn wia ma emen riatail Kristian wia de nda mehkot me kansensuwedihkitailla?

13. Dahme kahrehda kitail anahne en kin mahk?

¹³ Ke kin ekei pak apwalki mahkohng riomw Kristian kan? (Lip. 19:18) Ma ei, idawehn kaweid wet: “Pousehlahte kanengamahiong emenemen oh mahkpene douluhl mehnda ma mie kahrepen en kaulimih emen. Nin duwen Siohwa eh kin ketin mahkohng kumwail, kumwail pil anahne wia duwehte.” (Kol. 3:13) Ahnsou koaros me kitail kin mahkohng riatail Kristian kan, kitail kin kadehdehiong Samatailo nanleng me kitail uhdahn kalahnganki pweinen pweipwei sapahlo. Ia duwen atail kak pousehlahte kalaudehla atail kalahnganki kisakis wet sang rehn Koht?

14. Ia pil ehu ahl me kitail kak kalaudehla atail kalahnganki pweinen pweipwei sapahlo?

¹⁴ Kalahngankihong Siohwa pweinen pweipwei sapahlo. Sister men sang India me adaneki Joanna me sounpar 83, nda: “I medewe e kesempwal en kin nda duwen pweinen pweipwei sapahlo nan ei kapakap kan ehuehu rahn oh kalahngankihong Siohwa.” Ehuehu rahn me ke kin kelehpwla kapakap, padahkihong Siohwa sapwung me ke wiahda oh peki reh mahk. Ni omw wiahda dihp laud ehu, ke pil anahne sawas sang elder kan. Irail pahn rong uhk oh kihda kaweid mwahu kan sang Mahsen en Koht. Irail pahn iang uhk kapakap oh peki rehn Siohwa en ketin mahkohng uhk pwe ken kak pwurehng ahneki nanpwungmwahu reh.​—Seims 5:14-16.

15. Dahme kahrehda kitail anahne wiahda ahnsou pwehn wadek oh doudouloale duwen pweinen pweipwei sapahlo?

 ¹⁵ Doudouloale duwen pweinen pweipwei sapahlo. Sister men me adaneki Rajamani me sounpar 73, nda: “Ni ei kin wadek duwen Sises eh ketin lokolok, pilen mesei ka kin kohda.” Ele ke pil kin nsensuwedla ni omw kin medewe duwen lokolok laud me sapwellimen Koht Ohlo lelohng. Ahpw ni omw kalaudehla omw medemedewe duwen meirong me Sises ketin wiahda, omw limpoak ong ih oh pil ong Semeo pahn laudla. Pwehn sewese iuk en doudouloale duwen pweinen pweipwei sapahlo, ke sou wiahki met oaralap tohrohr ehu me ken onopki?

16. Ia duwen atail kin padahkihong meteikan duwen pweinen pweipwei sapahlo eh kak sewese kitail? (Menlau kilang kilel ni kilin Kahn Iroir wet.)

¹⁶ Padahkihong meteikan duwen pweinen pweipwei sapahlo. Ahnsou koaros me kitail kin padahkihong meteikan duwen pweinen pweipwei sapahlo, atail kalahnganki pahn laudla. Mie mehn sawas kan me kitail kak doadoahngki pwehn padahkihong meteikan dahme kahrehda Sises anahne ketin pwoukinkitailla. Karasepe, kitail kak doadoahngki iren mehn kasukuhl 4 nan kisin pwuhko Rohng Mwahu Sang Rehn Koht! Oaralapo “Ihs Sises Krais?” mi nan iren mehn kasukuhlo. De kitail kak doadoahngki irelaud 5 en pwuhko Dahme Paipel Kak Padahkihong Kitail? Oaralap en irelaudo iei “Pweinen Pweipwei Sapahl​—Sapwellimen Koht Kisakis me Keieu Laud.” Oh sounpar koaros kitail kin kalaudehla atail kalahnganki pweinen pweipwei sapahlo sang ni atail kin iang towehda Katamanpen pwoulahn Sises oh ngoangki luke meteikan en iang kitail. Ia uwen eh wia pai kaselel ehu me Siohwa ketikihong kitail en padahkihong meteikan duwen sapwellime Ohlo!

17. Dahme kahrehda pweinen pweipwei sapahlo iei kisakis me keieu laud ong aramas akan?

¹⁷ Kitail uhdahn ahneki kahrepe mwahu en kakairada oh kolokol atail kalahnganki pweinen pweipwei sapahlo. Pwehki pweinen pweipwei sapahlo, kitail kak ahneki nanpwungmwahu keren rehn Siohwa mendahki atail soh unsek. Pwehki pweinen pweipwei sapahlo, Sises pahn ketin kauwehla doadoahk en Tepilo. (1 Sohn 3:8) Pwehki pweinen pweipwei sapahlo, kupwuren Siohwa ong sampah nin tapio pahn pweida. Sampah pwon pahn wiahla paradais ehu. Aramas koaros me ke pahn tuhwong pahn poakohng Siohwa oh papah ih. Eri, rahn koaros kitail en rapahki ahl kan en kasalehda atail kalahnganki pweinen pweipwei sapahlo, me iei sapwellimen Koht kisakis me keieu laud ong aramas akan!