1. Ihs me sewese wiahda mwomwohdisou nan Pilipai?

NI AHNSOU me wahnpoaron Pohl, Sailas, Luk, oh Timoty lella Pilipai, me mi pahn kaundahn wehin Rom, irail diarada me aramas tohto wasao men rong duwen rongamwahwo. Irail brother ngoang pahmen pwukat sewese wiahda mwomwohdiso ehu, oh tohnpadahk ko koaros tepida tuhpene wasao, ele ni imwen emen sister me ede Lidia, me kin uhdahn kadek.​—Wiewia 16:40.

2. Kahpwal dahieu me mwadang lelohng mwomwohdisou?

² Sohte pwand, mwomwohdiso kapwo lelohng kahpwal ehu. Sehdan kahrehda aramas akan me kailongki padahk mehlel ren uhwongada doadoahk en kalohk me Pohl oh ienge ko wiewia. Aramas ako parokedi Pohl oh Sailas, keme ira, oh keseirahlong nan imweteng. Mwurin ara pedoisang imweteng, ira kohla rehn tohnpadahk kapw ko oh kangoange irail. Mwuhr, Pohl, Sailas, oh Timoty mweselsang kahnimwo ahpw Luk mihmihte wasao. Dahme Kristian kapw ko pahn wia met? Siohwa ketin sewesekin irail sapwellime manaman, eri irail pousehlahte papah ih ni ngoang. (Pil. 2:12) Pohl ahneki kahrepe mwahu en pohlkin irail!

3. Nin duwen me Pilipai 1:9-11 kasalehda, dahme Pohl kapakapki?

³ Mpen sounpar eisek mwuhr, Pohl ntinglahng mwomwohdisou nan Pilipai. Ni omw wadek kisinlikowo, ke kak kilang ia uwen Pohl eh poakohng rie Kristian ko. E nda: ‘I kin loaleidkin kumwail koaros ni soangen limpoak me Krais Sises sapwellimanki.’ (Pil. 1:8) E ntingihong irail me e kin kapakapkin irail. E patohwan peki rehn Siohwa en ketin sewese irail pwe arail  limpoak en lalaudla, ren kin pilada dahme keieu kesempwal, ren mwakelekel, dehr kadipikelekelih meteikan, oh pousehlahte kapwarehda wahn me pwung. Rahnwet, kitail pil kak sukuhlkihsang laud dahme Pohl nda. Eri kitail en wadek dahme Pohl ntingkilahng Kristian kan nan Pilipai. (Wadek Pilipai 1:9-11.) Mwuhr, kitail pahn koasoiapene soahng kan me e kasalehda oh ia duwen atail kak doadoahngki ehuehu iren kaweid ko.

4. (a) Nin duwen me 1 Sohn 4:9, 10 kasalehda, ia duwen Siohwa eh ketin kasalehda sapwellime limpoak ong kitail? (b) Ia uwen laud en atail pahn poakohng Koht?

⁴ Siohwa ketin kasalehda sapwellime limpoak laud ong kitail sang ni eh ketin poaronehdo sapwellime Ohlo nin sampah pwehn pwoukihla dipatail kan. (Wadek 1 Sohn 4:9, 10.) Sapwellimen Koht limpoak laud kin kamwakid kitail en poakohng ih. (Rom 5:8) Ia uwen laud en atail pahn poakohng Koht? Sises ketin sapengala peidek wet ni eh mahsanihong mehn Parisi men: “Ke anahne poakohng Siohwa omw Koht ni omw mohngiong unsek oh omw mour unsek oh omw lamalam unsek.” (Mad. 22:36, 37) Kitail men poakohng Koht sang ni mohngiongitail unsek. Oh kitail men atail limpoak ong ih en kin kehlailla rahn koaros. Pohl padahkihong mehn Pilipai ko me arail limpoak en kin “lalaudla.” Dahme kitail kak wia pwehn kakehlakahla atail limpoak ong Koht?

5. Ia duwen atail limpoak eh kak lalaudla?

⁵ Kitail anahne esehla Koht pwe kitail en kin poakohng ih. Paipel mahsanih: “Mehmen me sohte kin limpoak sohte kin esehla Koht, pwehki Koht iei limpoak.” (1 Sohn 4:8) Wahnpoaron Pohl kasalehda me atail limpoak ong Koht pahn lalaudla ni atail kin alehda “loalokong pwung oh wehwehkihla mwahu” duwen Ih. (Pil. 1:9) Ni atail tepida onopki Paipel, kitail tepida poakohng Siohwa mendahki kitail sohte ese soahng koaros duwen ih. Mwuhr ni atail kalaudehla atail sukuhlki duwen Siohwa, atail limpoak ong ih kin lalaudla. Ihme kahrehda e uhdahn kesempwal kitail en kaukaule onop Paipel oh doudouloale dahme kitail kin wadek.​—Pil. 2:16.

6. Nin duwen me 1 Sohn 4:11, 20, 21 kasalehda, ni ahl dah me kitail kak kalaudehla atail limpoak?

⁶ Sapwellimen Koht limpoak laud ong kitail pahn kamwakid kitail en poakohng riatail Kristian kan. (Wadek 1 Sohn 4:11, 20, 21.) Ele kitail leme me e pahn mengei en poakohng riatail Kristian kan. Met pwehki kitail kin kaudokiong Siohwa oh song en alasang ih. Kitail kin idawehn sapwellimen Sises mehn kahlemeng. E sapwellimaniki limpoak uhdahn laud me kahrehda en ketin tounmeteikihla sapwellime mour ong kitail. Ahpw ekei pak e kak apwal en peikiong kehkehliko en poakohng emenemen. Medewehla karasaras wet sang mwomwohdiso en Pilipai.

7. Dahme kitail sukuhlkihsang ahn Pohl kaweid ong Iuodia oh Sindiki?

⁷ Iuodia oh Sindiki wia Kristian ngoang kei me kin iang wahnpoaron Pohl “doadoahk laud.” Ahpw ele mie iren sawehwe ehu nanpwungara me kahrehda ira en sohla kompoakepahnki emenemen. Nan nah kisinlikowo ong mwomwohdiso me sister riemeno kin papah ie, Pohl kasalehda ni sansal eden Iuodia oh Sindiki oh kaweidkin ira en “ahneki madamadauteieu.” (Pil. 4:2, 3) Pohl pil medewe me e anahne padahkihong mwomwohdisou pwon: “Kumwail pousehlahte wia soahng koaros ni soh kaulim oh akamai.” (Pil. 2:14) Kaweid sansal wet sang Pohl uhdahn sewese sister riemeno oh pil Kristian teikan nan mwomwohdisou en kalaudehla arail limpoakpene nanpwungarail.

8. Dahme kakete kahrehda en uhdahn apwal ong kitail en poakohng riatail Kristian kan, oh dahme kak sewese kitail?

 ⁸ Ekei pak, e kin uhdahn apwal ong kitail en poakohng riatail Kristian kan pwehki kitail kin wia dahme Iuodia oh Sindiki wia oh kilikilangete sapwung kan me riatail kan wiahda. Kitail koaros kin wiahda sapwung kan rahn koaros. Ma kitail kin kilikilangete soh unsek en meteikan, atail limpoak ong irail pahn loula. Karasepe, ma riatail men manokehla en iang sewese kitail kamwakele Wasahn Kaudok, met kak kalingeringerihada kitail. Eri ma kitail tepida kilelehdi sapwung teikan koaros me kitail ese riatailo wiahda, atail lingeringer pah pahn laudla oh atail limpoak ong ih pahn tikitikla. Ma ke milahr nan soangen irairo, e pahn mwahu en medewe ire mehlel wet: Siohwa kin ketin mwahngih atail soh unsek kan oh pil soh unsek en riatailo. Ahpw mendahki soh unsek pwukat, e kin ketin poakepoakehte kitail koaros. Pwehki kahrepe wet, kitail anahne alasang sapwellimen Siohwa limpoak oh kilangete irair kaselel kan en riatail Kristian kan. Ni atail kin doadoahk laud pwe kitail en poakohng riatail kan, kitail kin kalaudehla atail miniminpene.​—Pil. 2:1, 2.

9. Ia ekei soahng kan me “keieu kesempwal” me Pohl koasoiaiong Kristian kan nan Pilipai?

⁹ Sapwellimen Koht manaman kamwakid Pohl en kihda kaweid ong mehn Pilipai ko​—oh Kristian kan koaros—​ren “pilada dahme keieu kesempwal.” (Pil. 1:10) Soahng kesempwal pwukat kin pidada kasarawihlahn mwaren Siohwa, pweidahn kupwure kan, oh popohl oh miniminpenehn mwomwohdiso. (Mad. 6:9, 10; Sohn 13:35) Ni atail wiahkihla mepwukat en keieu kesempwal nan atail mour, kitail kin kadehdehda me kitail poakohng Siohwa.

10. Dahme kitail kak wia pwe Siohwa en ketin kilangwohng kitail nin duwen aramas mwakelekel kei?

¹⁰ Pohl pil nda me kitail anahne “en mwakelekel.” Met sohte wehwehki me kitail en unsek. Kitail sohte kak mwakelekel ni ahlohte me Siohwa Koht kin ketin mwakelekel. Ahpw Siohwa pahn ketin kilangwohng kitail nin duwen aramas mwakelekel kei ma kitail kin wia uwen atail kak en kalaudehla atail limpoak oh pilada dahme keieu kesempwal. Ehu ahl me kitail en kasalehda atail limpoak iei en wia uwen atail kak koaros en dehr kadipikelekelih meteikan.

11. Dahme kahrehda kitail en dehr kadipikelekelih meteikan?

¹¹ Kaweido me kitail en dehr kadipikelekelih meteikan kin wia mehkot uhdahn laud. Ia duwen atail kakete kadipikelekelih emen? Kitail kak wia met sang ni atail pilipil kan ong mehn kamweit, mwomwen atail likou, de soangen doadoahk en mwohni me kitail en wia. Ele kitail sohte wiewia mehkot me sapwung. Ahpw ma atail pilipil kan kin kansensuwedihala kadeikpen loalen emen oh e dipekelekelki, met uhdahn wia mehkot laud. Sises mahsanih me ma kitail kadipikelekelih emen riatail Kristian, met suwedsang takai toutou ehu en pirapiriong tepinweretail oh lekdekdilahng nan madau.​—Mad. 18:6.

12. Dahme kitail sukuhlkihsang mehn kahlemeng en pwopwoud pioneero?

¹² Tehk ia duwen pwopwoud pioneer ehu ara kapwaiada sapwellimen Sises kaweido. Ira iang papah nan mwomwohdiso ehu me pwopwoud ehu me ahpwtehn papidaisla pil kin iang. Pwopwoud me ahpwtehn papidaislao tikida nan soangen peneinei me sohte kin mweidada soahng tohto en wiawi. Pwopwoudo kamehlele me e sohte konehng Kristian kan en kohla kilang kasdo​—pil kasdo mwahu kan. Ira uhdahn pwuriamweila ni ara esehda me pwopwoud pioneero kilangla kasdo ehu. Mwurin  mwo, pwopwoud pioneero sohla kohla kasdo lao pwopwoud kapwo kaiahnehda kadeikpen loalara pwehn toupahrek. (Ipru 5:14) Ni pwopwoud pioneero ara wia met, ira kadehdehda me ira poakohng riara Kristian kapwo kaidehn ihte ni lokaia ahpw pil ni wiewia.​—Rom 14:19-21; 1 Sohn 3:18.

13. Ia duwen atail kak kahrehiong emen en wiahda dihp?

¹³ Pil ehu ahl me kitail kakete kadipikelekelih emen iei en kahrehiong ih en wiahda dihp. Ia duwen met eh kak wiawi? Medewehla irair wet. Mwurin eh nannanti laud erein ahnsou werei, tohnsukuhl en Paipel men kakehr kaunda eh kahpwal en sohte kak uhdihsang kang sakau en wai. E wehwehkier me e anahne sohla douluhl pwurehng kang sakau. E wiahda wekidekla tohto nan eh mour oh papidaisla. Mwuhr, emen rie Kristian luke en iang ih oh ekei riarail ko mwengepene, oh e kihong brother kapwo en nim sakau, oh nda: “Met kowe emen Kristian; mieier sapwellimen Siohwa manaman rehmw. Ehu wahn sapwellimen Koht manaman iei en kaunda pein uhk. Ma ke kin kaunda pein uhk, eri ke kak ese ia uwen sakau me ke pahn nim.” E pahn uhdahn kansensuwed ma brother kapwo rong kaweid sapwungo oh pwurehng sohla kak uhdihsang kang sakau.

14. Ia duwen atail mihting en Kristian kan ar sewese kitail en doadoahngki kaweid kan en Pilipai 1:10?

¹⁴ Atail mihting en Kristian kin sewese kitail en doadoahngki kaweid kan en Pilipai 1:10 ni ahl tohto. Keieu, dahme kitail koasoiapene nan mihting kan kin kasalehiong kitail dahme Siohwa ketin medewe me keieu kesempwal. Keriau, kitail sukuhlki ia duwen atail en  doadoahngki dahme kitail sukuhlki pwe kitail en kak mwakelekel. Oh kesiluh, atail mihting kan kin kangoange kitail “en kasalehda limpoak oh wiewia mwahu kan.” (Ipru 10:24, 25) Ni riatail kan ar kangoange kitail, atail limpoak ong Koht oh irail pahn lalaudla. Ni atail kin poakohng Koht oh riatail kan sang ni mohngiongitail unsek, kitail pahn wia uwen atail kak en dehr kadipikelekelih irail.

15. Ia wehwehn en “direkihla wahn me pwung”?

¹⁵ Pohl nantihong kapakapki me Kristian kan nan Pilipai pahn “direkihla wahn me pwung.” (Pil. 1:11) ‘Wahn me pwungo’ kin iangete arail limpoak ong Siohwa oh sapwellime aramas akan. Met pil iangahki arail kin koasoiaiong meteikan duwen arail pwoson Sises oh arail koapworopwor kaselelo. Pilipai 2:15 pil doadoahngki ehu karasaras, me iei en “wie lingaling nanpwungarail duwehte marain nin sampah.” Karasaras wet konehng pwehki Sises ketin ekerki sapwellime tohnpadahk kan “marain en sampah.” (Mad. 5:14-16) E pil ketin kehkehlingkihong sapwellime tohnpadahk kan ren padahkih aramas akan ‘pwe ren wiahla sapwellime tohnpadahk,’ oh e mahsanih me irail pahn wia “sounkadehde kan nan . . . wasa me keieu doh nin sampah.” (Mad. 28:18-20; Wiewia 1:8) Kitail kin kapwarehda “wahn me pwung” ni atail wia uwen me kitail kak nan doadoahk keieu kesempwal wet.

16. Ia duwen Pilipai 1:12-14 eh kasalehda me kitail kak lingaling duwehte marain pil nan irair apwal kan? (Menlau kilang kilel ni kilin Kahn Iroir wet.)

¹⁶ Sohte lipilipil soangen irair dah me kitail mi loale, kitail kak lingaling duwehte marain. Ekei pak, dahme kin mwomwen kerempwa atail kalokalohk kak wiahla ahnsou mwahu ehu ong kitail en kalohk. Karasepe, wahnpoaron Pohl wie sensel nan ihmw ehu nan Rom ni eh ntingihada nah kisinlikowo ong mehn Pilipai  ko. Mendahki eh wie sensel, e sohte uhdihsang eh kalohk ong sounsilasil ko oh pil ong irail kan me mwemweitdo reh. Nan soangen irair ko, Pohl kin kalohk ni ngoang, oh met kahrehiong Kristian ko en kehlailda oh eimah “kalohki mahsen en Koht ni soh masak.”​—Wadek Pilipai 1:12-14; 4:22.

17. Ia duwen ekei riatail Kristian kan ar kak pousehlahte kalohk mendahki e apwal?

¹⁷ Riatail Kristian tohto kin kasalehda soangen eimahohte me Pohl kasalehda. Irail mi nan sahpw kan me sohte mweidohng irail en kalohk nan wehi pokon de sang ihmw lel ihmw, eri irail kin rapahki ahl teikan en kalohki rongamwahwo. (Mad. 10:16-20) Nan ehu sahpw ko, emen sounapwalih me kin seiloak padahkihong emenemen sounkalohk ren kalohk ong kiserail kan, mehn mparail, iengarail tohnsukuhl, iengarail tohndoadoahk, de pil irail kan me re ese. Sohte lel sounpar riau, nempehn mwomwohdiso kan nan wasa kan me sounapwaliho kin apwalih uhdahn kekeirda laud. Ele kitail sohte mi nan sahpw ehu me kitail sohte kak kalohk ni saledek. Ahpw kitail kak sukuhlki mehn kasukuhl kesempwal ehu sang mehn kahlemeng mwahu en riatail Kristian pwerisek pwukat: Ahnsou koaros rapahki ahl akan en kalaudehla omw doadoahk en kalohk, oh kamehlele me Siohwa pahn ketikihong uhk kehl me ke anahne pwehn powehdi kahpwal kan.​—Pil. 2:13.

18. Dahme kitail en koasoanehdi teng en wia?

¹⁸ Laudsang mahs, kitail anahne koasoanehdi teng ahnsou wet en idawehn kaweid me kitail wadek nan nein Pohl kisinlikowo ong mehn Pilipai ko. Kitail en pilada dahme keieu kesempwal, kitail en mwakelekel, dehr kadipikelekelih meteikan, oh kapwarehda wahn me pwung. Eri atail limpoak pahn lalaudla oh pahn kawauwihala Samatail limpoako, Siohwa.