1. Dahme Depit ndahki duwen sapwellimen Siohwa aktikitik?

KITAIL kak uhdahn nda me Siohwa kin ketin aktikitik? Ei, kitail kak. Pak ehu, Depit nda: “Komw ketikihong ie sapwellimomwi mehn sansar en komour, Oh sapwellimomwi aktikitik kalinganeiehla.” (2 Sam. 22:36, NW; Mel. 18:35) Mwein Depit medemedewe rahno me soukohp Samuel kohla ni imwen eh pahpao pwehn keiehdi me pahn uhd wiahla nanmwarki. Depit me keieu tikitik nanpwungen pwutak welimen; ahpw Siohwa ketin pilada ih en uhd wiliandi Nanmwarki Sohl.​—1 Sam. 16:1, 10-13.

2. Dahme kitail pahn koasoiapene nan iren onop wet?

² Depit pahn uhdahn pwungki dahme emen sounmelkahka ndahki Siohwa: “E kin ketin pwekada me semwehmwe kan . . . oh kin ketin wiahkinirailla werek en me lapalap akan.” (Mel. 113:6-8) Nan iren onop wet, kitail pahn koasoiapene mahs ekei mehn kasukuhl kesempwal duwen aktikitik sang ni atail kousapahlih ahnsou kan me Siohwa ketin kasalehda aktikitik. Kitail pil pahn kalaudehla atail sukuhlki duwen aktikitik sang ni mehn kahlemeng en Nanmwarki Sohl, soukohp Daniel, oh Sises.

3. Ia mwomwen sapwellimen Siohwa wiewia ong kitail, oh dahme met kin kadehdehda?

³ Siohwa ketin kadehdehda me e kin ketin aktikitik sang ni mwomwen sapwellime wiewia ong aramas soh unsek kan. E sohte kin ihte ketin pwungki atail kaudok ahpw e pil kin ketin wiahkin kitail kompoakepah. (Mel. 25:14) Pwe kitail en kak wiahla kompoakepah, Siohwa ketin tiengla mwowe oh ketikihda sapwellime Ohlo nin duwen meirong ehu ong dipatail kan. Ia uwen eh ketin kadek kalahngan oh poakehla kitail!

4. Dahme Siohwa ketikihong kitail, oh dahme kahrehda?

 ⁴ Medewehla pil ehu ahl me Siohwa kin ketin kasalehda aktikitik. Nin duwen Sounkapikpatail, Siohwa kakete ketin wiaikitailda en sohte ahneki koahiek en pilada dahme kitail pahn wiahiong atail mour. Ahpw e sohte ketin wia met. E ketin wiaikitailda rasehng ih oh ketikihong kitail saledek en wiahda pilipil. E ketin kupwurki kitail aramas, me uhdahn tikitik oh luwet, en papah ih sang mohngiongitail pwehki kitail poakohng ih oh pohnese kamwahupen atail en peikiong ih. (Deud. 10:12; Ais. 48:17, 18) Ia uwen atail kalahnganki me Siohwa kin uhdahn ketin aktikitik!

5. Ia duwen Siohwa eh ketin padahkihong kitail en aktikitik? (Menlau kilang kilel ni kilin Kahn Iroir wet.)

⁵ Siohwa ketin padahkihong kitail en aktikitik sang ni mwomwen sapwellime wiewia ong kitail. Siohwa me keieu ketin erpit nanleng oh sampah. Ahpw mendahki met, e ketin kupwurki karonge ahn meteikan arail madamadau. Karasepe, Siohwa ketin mweidohng sapwellime Ohlo en sewese ih kapikada mehkoaros. (Lep. Pad. 8:27-30; Kol. 1:15, 16) Oh mendahki Siohwa me keieu ketin manaman, e kin ketikihong meteikan ekei pwukoa kan. Karasepe, e ketin idihada Sises en wia Nanmwarki en Wehio, oh E pahn ketikihong ekei pwukoa kan rehn meh 144,000 ko me pahn iang Sises kaunda. (Luk 12:32) Ei mehlel, Siohwa ketin kaiahnehda Sises en wia Nanmwarki oh Samworo Lapalap. (Ipru 5:8, 9) E pil ketin kaiahnehda irail kan me pahn iang Sises kaunda pwe ren kapwaiada arail pwukoa kan, ahpw e sohte pahn song en ketin kaunda mwomwen arail pahn wia doadoahko. Ahpw e kin ketin koapworopworki me re pahn wia kupwure.​—Kaud. 5:10.

6-7. Dahme kitail kak sukuhlkihsang Samatailo nanleng duwen en kihong meteikan pwukoa kan?

⁶ Ma Samatailo nanleng​—me sohte ketin anahne sawas sang emen—ketikihong meteikan ekei pwukoa kan, kitail en pil wia duwehte!  Karasepe, kowe emen kaunen peneinei de elder men nan mwomwohdiso? Idawehn sapwellimen Siohwa mehn kahlemeng sang ni omw kin kihong meteikan ekei pwukoa oh dehr song en kaunda mwomwen arail kin wia doadoahko. Ni omw kin alasang Siohwa, ke sohte pahn ihte kanekehla doadoahko ahpw ke pil pahn kaiahnehda meteikan oh sewese irail en kalaudehla arail likih arail koahiek. (Ais. 41:10) Pil dahme irail me ahneki ekei pwukoa kak sukuhlkihsang Siohwa?

⁷ Paipel kasalehda me Siohwa ketin kupwurki karonge madamadau en sapwellime tohnleng kan. (1 Nan. 22:19-22) Pahpa nohno kan, ia duwen amwail kak alasang sapwellimen Siohwa mehn kahlemeng? Ni ahnsou me konehng, idek rehn noumw seri kan ia arail madamadau ong mwomwen doadoahk ehu eh pahn wiawi. Oh ma konehng, idawehn dahme irail nda.

8. Ia duwen Siohwa eh ketin kanengamahiong Eipraam oh Sara?

⁸ Pil ehu ahl me Siohwa ketin kasalehda aktikitik iei sang ni eh ketin kanengamah. Karasepe, ni irail kan me kin papah ih ar ni wahu peidengki sapwellime pilipil kan, e kin ketin kanengamahiong irail. E ketin karonge Eipraam ni Eipraam eh kasalehda eh madamadau duwen kasohralahn Sodom oh Komora. (Sen. 18:22-33) Pil tamanda dahme Siohwa ketin wiahiong ahn Eipraam eh pwoudo, Sara. Siohwa sohte ketin engiengda pahn Sara pwehki e kouruhrki sapwellimen Koht inou me Sara pahn liseianda mendahki eh mahlahr. (Sen. 18:10-14) Ahpw e ketin wauneki Sara.

9. Dahme pahpa nohno oh elder kan kak sukuhlkihsang sapwellimen Siohwa mehn kahlemeng?

⁹ Pahpa nohno kan oh elder kan, dahme kumwail kak sukuhlkihsang sapwellimen Siohwa mehn kahlemeng? Medewehla dahme kumwail pahn wia ni ahnsou me noumwail seri kan de ekei nan mwomwohdiso pahn peidengki amwail pilipil kan? Ia duwe, kumwail kin mwadangete kapwungala irail? De kumwail kin song en wehwehki arail madamadau? Peneinei oh mwomwohdiso kan kin uhdahn paiekihda ni irail kan me ahneki manaman ar alasang Siohwa. Eri, kitail koasoiapenehier dahme kitail kak sukuhlki duwen aktikitik sang sapwellimen Siohwa mehn kahlemeng. Met kitail pahn kilang dahme kitail kak sukuhlki duwen aktikitik sang mehn kahlemeng en irail kan nan Paipel.

10. Ia duwen Siohwa eh ketin doadoahngki mehn kahlemeng en meteikan pwehn padahkih kitail?

¹⁰ Nin duwen atail “Sounpadahk Lapalapo,” Siohwa ketikihda mehn kahlemeng kan nan sapwellime Mahsen pwehn padahkih kitail. (Ais. 30:20, 21, NW) Kitail kin sukuhlsang atail doudouloale duwen irail kan nan Paipel me ahneki irair kaselel kan me kin kaperenda Koht, iangahki aktikitik. Kitail pil sukuhlsang atail tehk kanahieng dahme kin wiawihong irail kan me sohte kin kasalehda soangen irair kaselel pwukat.​—Mel. 37:37; 1 Kor. 10:11.

11. Dahme kitail kak sukuhlkihsang mehn kahlemeng suwed en Sohl?

¹¹ Medewehla dahme wiawihong Nanmwarki Sohl. Ni tapio, e wia aramas aktikitik men. E pohnese dahme e kak wia oh sohte kak wia, oh e pil pweiek en ale pwukoa teikan. (1 Sam. 9:21; 10:20-22) Ahpw mwuhr, e tepida aklapalapala oh kin wia soahng kan me e sohte ahneki pwuhng en wia. E tepida aklapalapala mwurinte e wiahla nanmwarki. Ehu pak, e sohla kanengamah nin doken eh awiawih soukohp Samuel. E sohte ni aktikitik likih me Siohwa pahn ketin sewese aramas ako, ahpw e wiahda meirong isihs ehu mendahki eh sohte ahneki pwuhng en wia met. Pwehki met, Siohwa sohla  ketin kupwurperenki Sohl oh kedekedeo e sohla nanmwarki. (1 Sam. 13:8-14) E wia elen erpit ma kitail sukuhlkihsang mehn kataman wet oh dehr wia soahng kan me kitail sohte ahneki pwuhng en wia.

12. Ia duwen Daniel eh kasalehda aktikitik?

¹² Weksang mehn kahlemeng suwed en Sohl, tehk duwen mehn kahlemeng mwahu en soukohp Daniel. Erein eh mour, Daniel kin wiewiahte sapwellimen Koht ladu aktikitik men me kin ahnsou koaros sohpeiong Siohwa pwehn ale kaweid. Karasepe, ni ahnsou me Siohwa ketin doadoahngki ih en kawehwehda ahn Nepukadnesar ouramano, Daniel sohte nda me pein ih kelehpw me kawehwehda ouramano. Ahpw ni aktikitik, e patohwanohng Siohwa lingan oh kaping koaros. (Dan. 2:26-28) Dahme kitail kak sukuhlkihsang met? Ma riatail Kristian kan kin perenki rong atail padahk de ma kitail kin pweida mwahu nan doadoahk en kalohk, kitail men tamataman en patohwanohng Siohwa kaping koaros. Kitail en ni aktikitik pohnese me kitail sohte kak wia soahng pwukat ma sohte sawas sang rehn Siohwa. (Pil. 4:13) Ni atail kin kasalehda madamadau wet, kitail pil kin alasang sapwellimen Sises mehn kahlemeng mwahu. Ia duwen?

13. Nin duwen me Sohn 5:19, 30 kasalehda, dahme kitail kak sukuhlkihsang Sises duwen aktikitik?

¹³ Mendahte Sises iei sapwellimen Koht Ohl me unsek, e kin ketin koapworopworkihte Siohwa. (Wadek Sohn 5:19, 30.) E sohte mwahn kin song en adihasang manaman me Semeo nanleng ketin sapwellimanki. Pilipai 2:6 mahsanihong kitail me Sises “sohte ketin medewehda en alehdi dehu me Koht ketin sapwellimanki, me iei, en pahrekiong Koht.” Nin duwen sapwellimen Koht Ohl, Sises kin ketin uhpah Semeo oh ketin pohnese soahng kan me e kak de sohte kak ketin wia. E pil ketin wauneki manaman me Semeo ketin sapwellimanki.

14. Dahme Sises ketin wia ahnsou me ekei peki reh en ketin wia mehkot me e sohte sapwellimanki pwuhng en wia?

¹⁴ Medewehla dahme Sises ketin wia ahnsou me tohnpadahk ko Seims oh Sohn oh ara nohno peki reh en ketin wia mehkot me e sohte sapwellimanki pwuhng en wia. Sises ketin mwadangete sapengki me Semeo nanleng kelehpw me kak ketin pilada ihs me pahn mwohd ni palimaun oh palimeing en Sises nan Wehio. (Mad. 20:20-23) Sises ketin kasalehda me e ketin pohnese dahme e kak oh sohte kak ketin wia. E ketin aktikitik. E sohte mwahn wia soahng ehu me Siohwa sohte  ketikihong ih manaman en wia. (Sohn 12:49) Ia duwen atail kak alasang sapwellimen Sises mehn kahlemeng mwahu?

15-16. Ia duwen atail kak doadoahngki kaweid en Paipel me mi nan 1 Korint 4:6?

¹⁵ Kitail kin alasang sapwellimen Sises aktikitik ni atail doadoahngki kaweid en Paipel me mi nan 1 Korint 4:6. Ire wet mahsanihong kitail: “Dehr daulihala soahng kan me ntingdier.” Eri ni meteikan ar peki atail kaweid, kitail sohte men idingkihong irail en pwungki pein atail madamadau, de koasoi ni atail sohte medewe kanahieng duwen ireo. Ahpw kitail en sewesehkin irail kaweid kan sang Paipel oh neitail sawasepen Paipel kan. Ni ahl wet, kitail kin pohnese dahme kitail kak wia de sohte kak wia. Ni aktikitik, kitail kin kapingahki me Keieu Manamano ‘sapwellime kadeik pwung.’​—Kaud. 15:3, 4.

¹⁶ Likin atail kin kawauwih Siohwa, kitail pil ahneki kahrepe mwahu teikan en kasalehda aktikitik. Met kitail pahn tehkpene ia duwen aktikitik eh kak wadohng kitail peren oh sewese kitail en ehuong meteikan.

17. Dahme kahrehda aramas aktikitik kin peren?

¹⁷ Ni atail kin aktikitik, kitail kin peren. Dahme kahrehda? Pwehki ni atail pohnese me mie soahng kan me kitail sohte kak wia, kitail pahn kalahnganki oh pil perenki sawas kan me kitail ale sang meteikan. Karasepe, medewehla ahnsou me Sises ketin kamwahwihala ohl ehk ko me tokutok. Emente rehrail me pwurodo pwehn kalahngankihong Sises eh ketin kamwahwihala ih sang eh soumwahu suwedo​—mehkot me ohlo sohte kak pein wia. Ohl aktikitik menet kalahnganki sawas me e alehdi, oh kapingahki Koht.​—Luk 17:11-19.

18. Ia duwen aktikitik eh sewese kitail en ehuong meteikan? (Rom 12:10)

¹⁸ Aramas aktikitik kin ehuong meteikan oh pil mengei ong irail en ahneki kompoakepah  keren kan. Dahme kahrehda? Pwehki irail kin men pohnese me meteikan ahneki irair kaselel kan oh re kin kasalehda me re likih irail. Me aktikitik kan kin peren ni meteikan ar pweida nan pwukoa sohte lipilipil kan me re alehdi oh re kin mwadang en kapinga oh wauneki irail.​—Wadek Rom 12:10.

19. Kahrepe dah kan me kitail en dehr aklapalap?

¹⁹ Weksang met, aramas aklapalap kin apwalki kapinga meteikan, oh kin men irailte me pahn alehdi kaping. Irail kin men kapahrekihong irail meteikan oh kin kalaudehla pepehm en akutuhwahu. Aramas aklapalap men kin kalapw medewe me ih me pahn kin wia pwukoa ehu pwehki e leme me meteikan pahn wia ni sapwung. E kin kalapw men wiahki me e kesempwalsang meteikan, oh kin peirinki ni meteikan ar pweida mwahusang ih. (Kal. 5:26) Soangen aramas duwehte met sohte kin kalapw ahneki kompoakepah mwahu kan ahnsou werei. Ma kitail esehda me kitail kin aklapalap, kitail en kapakapki ni ngidingid pwe Siohwa en ketin sewese kitail ‘wekidala elen atail madamadau,’ pwe irair suwed wet en dehr wiahla kisehn atail tiahk.​—Rom 12:2.

20. Dahme kahrehda kitail en kin aktikitik?

²⁰ Ia uwen atail kalahnganki sapwellimen Siohwa mehn kahlemeng! Kitail kilang sapwellime aktikitik sang ni sapwellime wiewia ong sapwellime ladu kan, oh kitail men alasang ih. Patehng met, kitail men alasang mehn kahlemeng mwahu en irail me aktikitik kan nan Paipel me ahneki pai kaselel en iang Koht kekeid. Kitail en kin ahnsou koaros patohwanohng Siohwa wahu oh lingan me e ketin warohng sapwellimanki. (Kaud. 4:11) Eri kitail pil pahn warohng en iang Samatailo nanleng kekeidwei, Samatailo me kin ketin poakohng aramas aktikitik kan.