1. Dahme kahrehda Siohwa ketin kapikada mour?

MIE ahnsou ehu me Siohwa kin ketin kelekelehpw. Ahpw e sohte ketin nsensuwedkihla. Siohwa sohte ketin anahne emen en mi reh pwehn kahrehiong en peren. Ahpw e ketin kupwurki meteikan en pil perenki mour. Pwehki limpoak, Siohwa ketin tepida kapikada soahng kan.​—Mel. 36:9; 1 Sohn 4:19.

2. Ia ahn Sises oh tohnleng kan ar pepehm ni ahnsou me Siohwa ketin kapikada soahng kan?

² Keieu, Siohwa ketin kapikada sapwellime Ohlo, Sises. Mwuhr, ni eh ketin doadoahngki sapwellime Meseniho, Siohwa ketin kapikada “soahng teikan koaros,” iangahki tohnleng kan koaros. (Kol. 1:16) Sises perenki en iang Semeo ketin doadoahk. (Lep. Pad. 8:30) Oh tohnleng kan pil iang peren. Irail kilang ni ahnsou me Siohwa oh sapwellime Sounsawaso Sises, ketin wiahda nanleng oh sampah. Ia duwen arail mwekidki met? Irail “ngisingiski ar peren” ni ahnsou me sampah wiawihda, oh pousehlahte kapinga ehuehu sapwellimen Siohwa doadoahk en kepikipik, iangahki kaimwiseklahn sapwellime kepikipik, me iei aramas. (Sohp 38:7; Lep. Pad. 8:31) Ehuehu kepikipik kan kin kasalehda sapwellimen Siohwa limpoak oh erpit.​—Mel. 104:24; Rom 1:20.

3. Nin duwen me 1 Korint 15:21, 22 mahsanih, dahme sapwellimen Sises pweinen pweipwei sapahlo kak wiahiong aramas akan?

³ Siohwa ketin kupwurki aramas koaros en mour kohkohlahte nan sampah kaselel wet me e ketin kapikada. Ahpw Adam oh Ihp dipada mwohn Siohwa, oh ira sohla kak mour kohkohlahte. Ira oh iangahki kadaudokara kan pahn kohkohlaho mehla. (Rom 5:12) Dahme Siohwa ketin wia? E ketin mwadangete kasalehda  ia duwen eh pahn ketin kapitala aramas. (Sen. 3:15) Siohwa pahn ketikihda sapwellime Ohlo, Sises, nin duwen pweinen pweipwei sapahl ehu me pahn kak kahrehiong kadaudok en Adam oh Ihp kan en saledeksang dihp oh mehla. Ih eri kak ketin mweidohng emenemen en pilada en papah Ih oh alehdi mour soutik.​—Sohn 3:16; Rom 6:23; wadek 1 Korint 15:21, 22.

4. Peidek dah kan me kitail pahn koasoiapene nan iren onop wet?

⁴ Sapwellimen Koht inou en kaiasada me melahr kan kahredahr en mie peidek kan. Karasepe, ia duwen kaiasada eh pahn wiawi? Kitail pahn kak pohnese irail me kitail kin poakohng ni ar pahn iasada? Ni ahl dah kan me kaiasada pahn wahdohng kitail peren? Oh ia duwen doudouloale duwen kaiasada eh pahn kalaudehla atail kalahnganki sapwellimen Siohwa limpoak, erpit, oh kanengamah? Kitail pahn koasoiapene ehuehu peidek pwukat.

5. Dahme kahrehda kitail kak kasik me aramas sohte pahn iasada ni ahnsou ehute?

⁵ Ni ahnsou me Siohwa pahn ketin doadoahngki sapwellime Ohlo pwehn kaiasada me rar rar kei, kitail kak kasik me irail koaros sohte pahn iasada ahnsou ehute. Dahme kahrehda? Pwehki ma me tohto pahn iasada ni ahnsou ehute nin sampah, e pahn kahrehda pingiping. Oh Siohwa sohte kin ketin wia mehkot me sohte soandi mwahu. E ketin mwahngih me soahng kan anahne en kin soandi mwahu pwe aramas en kak mour meleilei. (1 Kor. 14:33) Siohwa Koht ketin erpit oh kanengamah ni ahnsou me Sises iang ih kaunopada sampah pwe aramas en kousoan loale. Eri, Sises pahn ketin kasalehda soangen irairkohte erein Kaundahn Pahr Kido ni ahnsou me e pahn ketin iangih irail kan me pitsang Armakedon kaunopada sampah ong me pahn iasada kan.

6. Nin duwen me Wiewia 24:15 mahsanih, ihs me pahn iang irail kan me Siohwa pahn ketin kaiasada?

 ⁶ Me keieu kesempwal sang koaros, irail kan me pitsang Armakedon pahn anahne padahkihong irail kan me iasada duwen Wehin Koht oh dahme Siohwa kupwurki irail en wia. Pwekida? Pwehki tohtohn irail me pahn iasada pahn wia kisehn me “sapwung kan.” (Wadek Wiewia 24:15.) Irail pahn anahne wiahda wekidekla tohto pwe ren kak iang paiekihda sapwellimen Krais pweinen pweipwei sapahlo. Song medewehla ia uwen doadoahk laud me pahn wiawi pwehn padahkih aramas rar rar kei me sohte wehwehki douluhl duwen Siohwa. Ia duwe, emenemen pahn mie pein eh sounpadahk, duwehte atail kin onop Paipel rehn emen? Irail me kapw pwukat pahn anahne iang mwomwohdiso kan oh kaiahnda pwehn padahkih irail kan me pahn iasada mwurirail? Kitail pahn anahne awih oh kilang. Ahpw, kitail ese me kerenlahng imwin Kaundahn Krais Pahr Kido, “sampah pahn direkihla kupwurokong en KAUN-O.” (Ais. 11:9) Ia uwen eh pahn kedirepw ahpw kaperen ni erein pahr kido!

7. Dahme kahrehda sapwellimen Koht aramas kan pahn ahneki pepehm en nsenoh ni ar padahkih irail kan me iasada?

⁷ Erein Kaundahn Krais Pahr Kido, sapwellimen Siohwa aramas koaros pahn doulahte wiahda wekidekla kan pwehn kaperenda ih. Eri irail koaros pahn ahneki pepehm en nsenoh ni ar sewese irail kan me iasada en powehdi madamadau oh ineng sapwung kan oh mour pahrekiong sapwellimen Siohwa koasoandi kan. (1 Pit. 3:8) Irail kan me iasada pahn kilang me sapwellimen Siohwa aramas akan iei aramas aktikitik kei me kin nannantihte en wiahda wekidekla kan, oh re pahn men iang irail kaudokiong Siohwa.​—Pil. 2:12.

8. Dahme kahrehda kitail kak kasik en pohnese atail peneinei oh kompoakepatail kan me iasada?

⁸ Mie kahrepe kan me kitail kak nda me irail me pahn kasamwo me iasada kan pahn kak pohnese irail kan me re kin poakohng. Karasepe, pwehki mwomwen kaiasada kan me wiawiher mwoweo, kitail kak kasik me Siohwa pahn ketin pwurehng kapikada aramas ako, kahrehda mwomwarail, arail lokaia, oh soangen madamadau me re ahneki pahn duduwehte mwohnte ar mehla. Tamataman me Sises ketin kapahrekihong mehla ong meir oh iasada ong pirida sang meir. (Mad. 9:18, 24; Sohn 11:11-13) Ni aramas ar kin pirida sang meir, mwomwarail, ngilarail, oh dahme re tamataman kin duduwehte. Tehk karasepe en Lasarus. E melahr rahn pahieu, eri paliwereo tepidahr ohla. Ahpw, ni ahnsou me Sises ketin kaiasada ih, rie lih ako mwadangete pohnese ih, oh e sansal me Lasarus tamatamante ira.​—Sohn 11:38-44; 12:1, 2.

9. Dahme kahrehda irail kan me iasada sohte pahn ahneki madamadau oh paliwar unsek?

⁹ Siohwa ketin inoukihda me nan Paradaiso, sohte me pahn “kaulimkihla eh soumwahu.” (Ais. 33:24; Rom 6:7) Eri, Siohwa pahn ketin pwurehng kapikada irail me melahr oh re pahn ahneki paliwar roson. Ahpw, irail sohte pahn mwadangete unsekla. Ma irail pahn wia met, arail peneinei oh kompoakparail kan pahn kakete sohte pohnese irail. E mwomwen me aramas koaros pahn ekisekis unsekla erein Kaundahn Krais Pahr Kido. Ihte ni imwin pahr kido me Sises pahn patohwan kapwurehiong Semeo sapwellime Wehio. Eri, Wehio pahn kapwaiadahr soahng koaros me Siohwa ketin kupwurki en wiawi, pil kahrehiong aramas akan en unsekla.​—1 Kor. 15:24-28; Kaud. 20:1-3.

10. Soangen pepehm dah me kaiasada pahn kahrehiong uhk ken ahneki?

¹⁰ Medewehla ia mwomwen ahnsou me ke pahn pwurehng kasamwo kompoakepahmw kan. Omw peren pahn kahrehiong uhk en kouruhr de sengiseng? Ke pahn uhdahn peren me kahrehda ke pahn koulki koul en kaping ong Siohwa? Kitail kak kamehlele me kitail pahn ahneki limpoak laud ong Samatailo me kin ketin nsenoh oh pil sapwellime Ohl limpoako pwehki ara ketikihda koasoandi en kaiasada.

11. Nin duwen me Sises mahsanih nan Sohn 5:28, 29, dahme pahn wiawihong irail kan me kin peikiong Koht?

¹¹ Medewehla peren me irail kan me iasada pahn ahneki ni ar kesehla arail mouren mahs oh mour pahrekiong sapwellimen Koht koasoandi pwung kan. Irail kan me wiahda wekidekla pwukat pahn kak mour kohkohlahte nan Paradais. Ahpw, Siohwa sohte pahn ketin mweidohng irail kan me sohte men wekila ren mihmi nan Paradais pwehn kauwehla onepek.​—Ais. 65:20; wadek Sohn 5:28, 29.

12. Ni ahl dah me irail kan koaros me mi nin sampah pahn alehdi kapai sang rehn Siohwa?

¹² Pahn kaundahn Wehio, sapwellimen Koht aramas koaros pahn kilang me nting ko me mi nan Lepin Padahk 10:22 mehlel: “Iei kupwuramwahu en KAUN-O me kahrehda omw kepwehpwe. Doadoahk laud sohte kak en kakepwehpwehiukala.” Sang ni sawas en sapwellimen Siohwa manaman rehrail, sapwellimen Koht aramas kan pahn kepwehpwehla, me iei, irail pahn ekisekis duduwehla Krais oh pahn kohkohlaho unsekla. (Sohn 13:15-17; Ep. 4:23, 24) Ehuehu rahn paliwararail kan pahn kehlailla, oh re pahn wiahla aramas mwahu kei. Ia uwen met eh pahn wia mour ehu me kaperen! (Sohp 33:25) Ahpw, ia duwen doudouloale duwen kaiasadao eh kak sewese iuk met?

13. Pwehn pahrekiong Melkahka 139:1-4, ia duwen kaiasada eh pahn kasalehda uwen Siohwa eh uhdahn ketin mwahngih kitail?

¹³ Nin duwen me kitail koasoiapenehier mwoweo, ni ahnsou me Siohwa kin ketin kaiasada aramas, re pahn tamatamante soahng kan oh irail pahn duduwehte. Medewehla ia wehwehn met. Siohwa uhdahn ketin poakohng uhk me kahrehda e kin ketin mwahngih oh tamataman soahng koaros me ke kin medewe, pehm, nda, oh wia. Eri ma e pahn ketin kaiasuhkada, e pahn mengei ong ih en ketin kapwurehdo soahng kan me ke kin tamataman, omw madamadau, oh wiewia kan. Nanmwarki Depit ese me Siohwa ketin mwahngih ni unsek emenemen kitail. (Wadek Melkahka 139:1-4.) Ia pahn atail pepehm ni atail esehda uwen Siohwa eh ketin mwahngih kitail?

14. Ia pahn atail pepehm ni ahnsou me kitail kin doudouloale uwen Siohwa eh ketin mwahngih kitail?

¹⁴ Ni atail kin doudouloale ia uwen Siohwa eh kin ketin mwahngih kitail, kitail en dehr pwunod. Dahme kahrehda? Tamataman me Siohwa uhdahn ketin nsenohkin kitail. E kin ketin wiahki emenemen kitail nin duwen aramas kesempwal kei. E kin ketin tehk kanahieng soahng koaros me kin kamwakid atail mour. Ia uwen met eh kansenamwahu! Kitail en dehr medewe me kitail kin kelekelehpw. Siohwa kin ahnsou koaros ketin ieiang kitail oh kupwurki sewese kitail.​—2 Kron. 16:9.

15. Ia duwen kaiasada eh kadehdehda me Siohwa ketin erpit?

¹⁵ Masak mehla iei mehkot me imwintihti kan kin doadoahngki. Aramas akan me mi pahn kaundahn Sehdan kin doadoahngki met pwehn idingkihong aramas en pangala kompoakparail kan de wia mehkot me re ese me  sapwung. Ahpw re sohte kak idingkihong kitail en wia met. Kitail ese me ma atail imwintihti kan kemeikitailla, Siohwa kak ketin kaiasada kitail. (Kaud. 2:10) Kitail uhdahn kamehlele me sohte mehkot re kin wia me kak kauhdi atail papah Siohwa. (Rom 8:35-39) Siohwa ketin erpit sang ni eh ketikihong kitail koapworopwor en kaiasada. Pwehki koapworopwor wet, Sehdan sohte kak doadoahngki masak mehla pwehn idingkihong kitail en wia dahme e men kitail en wia. Oh koapworopwor wet pil kihong kitail eimah laud pwehn lelepek ong Siohwa.

16. Soangen peidek dah kan me ke anahne idek rehmw, oh ia duwen pasapeng ko eh kak seweseiuk en ese ia uwen omw likih Siohwa?

¹⁶ Ma irail kan me kin kailongki Siohwa nda me re pahn kemeiukala, ke pahn likih me Siohwa pahn ketin kaiasuhkada? Ia duwen omw kak ese? Ehu ahl iei en idek rehmw, ‘Pilipil tikitik kan me I wiahda ehuehu rahn kin kadehdehda me I kin likih Siohwa?’ (Luk 16:10) Pil ehu peidek kakete met, ‘Mwomwen ei mour kin kasalehda me I kin likih sapwellimen Siohwa inou en apwalihala ei anahn kan ma I rapahki mahs sapwellime Wehio?’ (Mad. 6:31-33) Ma pasapengpen peidek ko iei ei, eri ke kadehdehda me ke likih Siohwa, oh ke onopadahngehr sohte lipilipil soangen kahpwal dah me ke pahn lelohng.​—Lep. Pad. 3:5, 6.

17. (a) Ia duwen kaiasada eh kasalehda me Siohwa ketin kanengamah? (b) Ia duwen atail kak kasalehda atail kalahnganki sapwellimen Siohwa kanengamah?

¹⁷ Siohwa ketin koasoanedier iahd me e pahn ketin kasohrehla sampah suwed wet. (Mad. 24:36) E pahn ketin kanengamahte oh sohte wia mehkot mwohn ahnsowo. E ketin kupwurki kaiasada me melahr, ahpw e kin ketin kanengamah. (Sohp 14:14, 15) E kin ketin awiawih lao en lel ahnsou me konehng en kaiasada irail. (Sohn 5:28) Kitail ahneki kahrepe mwahu en kalahnganki sapwellimen Siohwa kanengamah. Nna medewehla: Pwehki Siohwa ketin kanengamah, aramas tohto, iangahki kitail, ahneki ahnsou “en koluhla.” (2 Pit. 3:9) Siohwa ketin kupwurki aramas tohto ma kak ren ahneki ahnsou en alehdi mour soutik. Eri kitail en kasalehda me kitail kalahnganki sapwellime kanengamah. Ia duwen? Sang ni atail rapahki irail kan me “ahneki mohngiong mwahu en ale mour soutuk” oh sewese irail en poakohng Siohwa oh papah ih. (Wiewia 13:48) Eri duwehte kitail, re pahn paiekihda sapwellimen Siohwa kanengamah.

18. Dahme kahrehda kitail anahne kanengamahiong meteikan?

 ¹⁸ Siohwa pahn ketin awih ni kanengamah lao lel imwin kaundahn pahr kido mwohn eh pahn ketin kasik kitail en unsekla. Lao lel ahnsowo, Siohwa ketin kupwurki mahkohng dipatail kan. Eri kitail anahne kahlemengih sapwellime wiewia oh kilangwohngete ahn meteikan irair mwahu kan oh kanengamahiong irail. Tehk mehn kahlemeng en emen sister me eh pwoudo tepida lelohng pwunod laud oh uhdihsang iang towehda mihting kan. E nda, “Met uhdahn apwal ong ie, aht mour mwadangete wekila, oh se solahr kak wia soahng kan me se kin men wia.” Ahpw, lih pwopwoud menet me limpoak kin pousehlahte kanengamahiong eh pwoudo. E likihete Siohwa, oh sohte uhdi. Duwehte Siohwa, e sohte tetehkte kahpwalo ahpw e kilangwohngete soahng mwahu kan en eh pwoudo. E nda, “Mie en ei pwoudo irair mwahu kan, oh e wiewia uwen eh kak koaros pwehn kak mwahula.” Ia uwen eh kesempwal me kitail en kanengamahiong atail peneinei de irail nan mwomwohdiso me kin songosong en powehdi kahpwal kan!

19. Dahme kitail en koasoanehdi teng en wia?

¹⁹ Sises oh tohnleng kan perenda ni ahnsou me sampah tepin kepikipikda. Ahpw medewehla ia uwen peren me re pahn ahneki ni ahnsou me sampah pahn direkihla aramas unsek, me kin poakohng oh papah Siohwa. Medewehla ia uwen peren me irail kan me pahn kohdahla nanleng pahn ahneki ni ar kilang aramas akan ar paiekihda arail doadoahk. (Kaud. 4:4, 9-11; 5:9, 10) Oh medewehla omw pahn momour ahnsowo me pilen mesomw kan pahn kohda pwehki omw peren a kaidehn nsensuwed, ni soumwahu, medek, oh mehla ar pahn sohrala. (Kaud. 21:4) Lao lel ahnsowo, koasoanehdi teng en kahlemengih Semomw me kin ketin limpoak, erpit, oh kanengamah. Ma ke wia met, ke pahn kolokolete omw peren, sohte lipilipil kahpwal dah me ke lelohng. (Seims 1:2-4) Ia uwen atail kak kalahnganki sapwellimen Siohwa inou me “e pahn mie kaiasada”!​—Wiewia 24:15.