1. Pai kaselel dahieu me kitail ahneki?

IA UWEN eh wia pai kaselel ehu en wia kisehn sapwellimen Siohwa mwomwohdiso! Kitail kin perenki popohl oh nsenamwahu mehlel ni atail kin iangih riatail Kristian kan kaudokiong Siohwa nan mwomwohdiso. Soangen pwukoa dah me ke ahneki nan mwomwohdiso?

2. Karasaras dahieu me wahnpoaron Pohl doadoahngki nan ekei nah kisinlikou ko?

² Kitail kak esehla laud duwen ire wet sang karasaras ehu me wahnpoaron Pohl doadoahngki nan ekei nah kisinlikou ko. Nan ehuehu kisinlikou ko, Pohl kapahrekiong mwomwohdiso paliwar en aramas. E pil kapahrekiong emenemen nan mwomwohdiso ong kisehn paliwar kan.​—Rom 12:4-8; 1 Kor. 12:12-27; Ep. 4:16.

3. Mehn kasukuhl siluh dah kan me kitail pahn koasoiapene nan iren onop wet?

³ Nan iren onop wet, kitail pahn tehkpene ire kesempwal siluh me kitail kak sukuhlkihsang en Pohl karasaraso. Keieu, kitail pahn sukuhlki me emenemen kitail ahneki pwukoa * nan sapwellimen Siohwa mwomwohdiso. Keriau, kitail pahn koasoiapene dahme kitail kak wia ma kitail apwalki wehwehki ia atail pwukoa nan mwomwohdiso. Oh kesiluh, kitail pahn koasoiapene dahme kahrehda kitail anahne soupisengki doadoahk me Siohwa ketikihong kitail nan mwomwohdiso.

4. Dahme Rom 12:4, 5 padahkihong kitail?

⁴ Tepin ire me kitail kak sukuhlkihsang en Pohl karasaraso iei me emenemen kitail ahneki pwukoa kesempwal ehu nan sapwellimen Siohwa peneinei. Pohl tepikihda eh karasaraso ni eh nda: “Duwehte eh mie kisehn paliwar tohto nan paliwar ehu, ahpw kisehn paliwar pwukat koaros sohte kin ahneki doadoahk tehieu, eri, mendahki atail tohto, kitail wia warteieu me miniminiong Krais oh emenemen kitail wia kisehn paliwar kan me kin sawaspene.” (Rom 12:4, 5) Ia wehwehn eh koasoio? Pwukoa me emenemen kitail ahneki nan mwomwohdiso wekpeseng, ahpw emenemen kitail kesempwal.

5. “Kisakis” dah kei me Siohwa ketikihong mwomwohdiso?

⁵ Ni omw medewehla irail kan me mie arail pwukoa nan mwomwohdiso, ele ke pahn mwadangete medewe duwen irail kan me kin tiengla mwowe. (1 Des. 5:12; Ipru 13:17) E mehlel me Siohwa ketin doadoahngki Krais pwehn ketikihda “aramas akan nin duwen kisakis kei” ong Sapwellime mwomwohdiso. (Ep. 4:8) Irail “kisakis” pwukat iei Pwihn me Kin Apwalih Mwomwohdiso nan Sampah Pwon, sounsawas kan en pwihn wet, Pwihn me Kin Apwalih Ohpis en Sounkadehdehn Siohwa kan, sounapwalih me kin seiloak, irail kan me kin kihda kasukuhl nan Sukuhl en Paipel kan, elder kan nan mwomwohdiso, oh sounsawas kan. Sapwellimen Koht manaman idihada brother pwukat koaros pwehn apwalih sapwellimen Siohwa sihpw kesempwal kan oh pwehn kakehlaka mwomwohdiso.​—1 Pit. 5:2, 3.

6. Nin duwen me 1 Deselonika 2:6-8 mahsanih, dahme brother kan me sapwellimen Koht manaman idihada kin nantihong en wia?

⁶ Sapwellimen Koht manaman idihada brother kan pwehn wia soangsoangen pwukoa kan. Duwehte koakon kan nan paliwar ar kin doadoahkpene pwehn sewese paliwaro pwon, duwehte peh oh neh kan, brother kan me sapwellimen Koht manaman idihada kin doadoahk laud pwe mwomwohdiso pwon en paiekihda. Re sohte kin song en ale kaping sang meteikan. Ahpw, re kin nantihong en kakehlakahla oh kangoange riarail Kristian kan. (Wadek 1 Deselonika 2:6-8.) Kitail kin kalahngankihong Siohwa pwehki brother koahiek pwukat me sohte kin roporop!

7. Soangen kapai dah kan me irail me kin doadoahngki pali laud en ar ahnsou nan kalohk ahneki?

⁷ Ekei nan mwomwohdiso ele idihdida pwehn papah nin duwen misineri, pioneer tohrohr, de pioneer kan. Ni mehlel, mie riatail Kristian kan nan sampah pwon me koasoanedier en doadoahngki pali laud en ar ahnsou en kalohk oh katohnpadahk. Pwehki re koasoanehdi en wia met, re sewesehier me tohto en wiahla tohnpadahk en Krais Sises. Mendahki pali laud en irail pwukat sohte nohn mie neirail mwohni de arail kepwe, Siohwa kin ketikihong irail soahng mwahu tohto. (Mark 10:29, 30) Kitail kin poakohng riatail Kristian pwukat, oh kalahnganki me irail wia kisehn atail mwomwohdiso!

8. Dahme kahrehda sounkalohk koaros me kin kalohki rongamwahwo kin kesempwal rehn Siohwa?

⁸ Ia duwe, brother kante me idihdida oh irail kante me kin doadoahngki pali laud en ar ahnsou nan kalohk me ahneki pwukoa nan mwomwohdiso? Uhdahn soh! Emenemen sounkalohki rongamwahwo kin kesempwal rehn Koht oh nan mwomwohdiso. (Rom 10:15; 1 Kor. 3:6-9) Met pwehki ehu mehn akadei keieu kesempwal en mwomwohdiso iei en sewese meteikan en wiahla tohnpadahk en Krais Sises atail Kaun. (Mad. 28:19, 20; 1 Tim. 2:4) Koaros me kin iang kalohk, sounkalohk kan me  papidaislahr oh me saik papidais, kin song en wiahki doadoahk wet me keieu kesempwal.​—Mad. 24:14.

9. Dahme kahrehda kitail kin kalahnganki riatail lih Kristian kan?

⁹ Siohwa ketin wauneki riatail lih Kristian kan ni eh ketikihong irail doadoahk kesempwal kan. E kin ketin kesempwalki lih pwopwoud, nohno, liohdi, oh lih kiripw kan me kin lelepek papah ih. Paipel kin kalapw koasoia duwen lih akan me kin kaperenda Koht. Paipel kin kapingahki arail mehn kahlemeng mwahu en erpit, pwoson, ngoang, eimah, kadek, oh doadoahk mwahu kan. (Luk 8:2, 3; Wiewia 16:14, 15; Rom 16:3, 6; Pil. 4:3; Ipru 11:11, 31, 35) Ia uwen atail kalahngankihong Siohwa lih Kristian kan nan atail mwomwohdiso, me pil kin ahneki soangen irair kaselel pwukat!

10. Dahme kahrehda kitail kin kesempwalki me mah kan?

¹⁰ Kitail pil perenki me mie me mah tohto nan mwomwohdiso. Mie riatail me mah kan nan ekei mwomwohdiso me kin lelepek papah Siohwa erein arail mour. Ekei me laud kan ele ahpwtehn esehla padahk mehlel. Sohte lipilipil mehnia, me mah kan ele ahneki kahpwal en roson pwehki ar mahla. Kahpwal ko kakete irehdi dahme re kak wia nan mwomwohdiso oh nan doadoahk en kalohk. Ahpw, me mah pwukat kin wia dahme re kak wia nan doadoahk en kalohk, oh kin doadoahngki arail kehl koaros pwehn kangoange oh kaiahne meteikan! Oh kitail kin paiekihda koasoipen arail mour. Re uhdahn kaselel mwohn silangin Siohwa oh ong kitail.​—Lep. Pad. 16:31.

11-12. Ia duwen omw alehdi kangoang sang rehn me pwulopwul kan nan mwomwohdiso?

¹¹ Pil medewehla me pwulopwul kan. Irail kin lelohng kahpwal tohto pwehki re tikida nan sampah ehu me mi pahn kaundahn Sehdan me Tepil oh eh madamadau suwed kan. (1 Sohn 5:19) Ahpw, kitail koaros kin alehdi kangoang ni atail kilang me pwulopwul pwukat ar kin iang pasapeng nan mihting kan, iang kalohk, oh ni eimah pere dahme re kin kamehlele. Ei, kumwail me pwulopwul kan ahneki pwukoa kesempwal ehu nan sapwellimen Siohwa mwomwohdiso!​—Mel. 8:2.

¹² Ahpw, ekei riatail Kristian kan kin apwalki  kamehlele me irail kesempwal nan mwomwohdiso. Dahme kak sewese kitail en pehm me emenemen kitail kesempwal nan mwomwohdiso? Kitail pahn kilang.

13-14. Dahme kahrehda ekei ele medewe me re sohte kesempwal nan mwomwohdiso?

¹³ Tehk ire keriau me kitail kak sukuhlkihsang en Pohl karasaraso. E koasoia duwen kahpwal me me tohto ahneki rahnwet; re kin apwalki kamehlele me re kesempwal nan mwomwohdiso. Pohl ntingihedi: “Ma patehn neh pahn nda, ‘Pwehki ngehi kaidehn peh, eri I sohte wia kisehn paliwaro,’ met sohte wehwehki me e sohte wia kisehn paliwaro. Oh ma saleng pahn nda, ‘Pwehki ngehi kaidehn pwoaren mas, eri I sohte wia kisehn paliwaro,’ met sohte wehwehki me e sohte wia kisehn paliwaro.” (1 Kor. 12:15, 16) Dahme Pohl padapadahkiong kitail?

¹⁴ Ma ke kapahrekihong uhk ong meteikan nan mwomwohdiso, ke pahn kakete tepida medewe me ke sohte kesempwal nan mwomwohdiso. Ekei nan mwomwohdiso ele koahiek en padahk, ese koasoanehdi soahng kan, de ese kansenamwahwihala oh kangoange meteikan. Ele ke medewe me ke sohte kak ahneki koahiek duwehte irail. Met kasalehda me ke kin aktikitik oh mpahi. (Lep. Pad. 11:2) Ahpw kanahieng. Ma ke kin kalapw kapahrengkihong uhk ong irail kan me uhdahn koahiek, ke pahn nsensuwedkihla pein kowe. Ke pil kak medewe duwehte dahme Pohl ndao me sohte katepomw nan mwomwohdiso. Dahme kak seweseiuk en powehdi soangen pepehm wet?

15. Nin duwen me 1 Korint 12:4-11 mahsanih, dahme kitail anahne pohnese me pid kisakis kan me kitail ahneki?

¹⁵ Tehk ire mehlel wet: Siohwa ketikihong tepin Kristian kan kisakis kapwuriamwei kan en sapwellime manaman, ahpw kaidehn Kristian ko koaros alehdi soangen kisakisohte. (Wadek 1 Korint 12:4-11.) Siohwa ketikihong irail kisakis oh koahiek kan me wekpeseng, ahpw emenemen Kristian kesempwal. Rahnwet, kitail sohte ahneki kisakis kapwuriamwei kan en sapwellimen Koht manaman. Ahpw ire mehlel wet kesempwalte. Ele kitail koaros sohte  ahneki koahiek me duwepenehte, ahpw kitail koaros kesempwal rehn Siohwa.

16. Mehn kaweid dah me kitail en doadoahngki me kohsang wahnpoaron Pohl?

¹⁶ Pwehn dehr kapahrengkihong pein kitail Kristian teikan, kitail anahne doadoahngki en wahnpoaron Pohl kaweido: “Emenemen en kasawih pein eh wiewia kan, e ahpw pahn perenkihda pein ih, a kaidehn en kapahrekiong ih meteikan.”​—Kal. 6:4.

17. Ia duwen atail pahn paiekihda ma kitail idawehn en Pohl kaweido?

¹⁷ Ma kitail idawehn en Pohl kaweido oh tehk pein atail wiewia kan, kitail kakete tepida kilang me kitail ahneki koahiek kan me meteikan sohte ahneki. Karasepe, elder men kakete sohte koahiek en wia padahk kan pohn stage, ahpw e kin pweida nan eh doadoahk en katohnpadahk. De mwein e sohte kin soandi mwahu duwehte elder teikan nan mwomwohdiso, ahpw e kin uhdahn kadek oh limpoak oh riatail Kristian kan kin mengeiki peki reh kaweid sang nan Paipel. De mwein ekei esehki eh kin perenki kasamwo meteikan. (Ipru 13:2, 16) Ni atail kin uhdahn kilang pein atail koahiek, kitail pahn ahneki kahrepe mwahu en perenki dahme kitail kak sawaski ong mwomwohdiso. Oh kitail sohte pahn nohn peiriniong riatail kan me ahneki koahiek me weksang atail.

18. Ia duwen atail kak kamwahwihala atail koahiek kan?

¹⁸ Sohte lipilipil pwukoa dah me kitail ahneki nan mwomwohdiso, kitail koaros anahne inengieng kamwahwihala atail doadoahk en kalohk oh kakairada atail koahiek kan. Pwehn sewese kitail en wia met, Siohwa ketin doadoahngki sapwellime pwihn pwehn kihda kaiahn kaselel kan. Karasepe, nan atail mihting en nan wihk, kitail kin alehdi kasukuhl ong ia duwen atail kak kalaudehla atail koahiek nan doadoahk en kalohk. Ke kin isaneki prokram en kasukuhl wet?

19. Ia duwen omw kak lel mehn akadei en iang Sukuhl ong Sounkalohki Wehio kan?

¹⁹ Pil ehu mehn kasukuhl kaselel iei Sukuhl ong Sounkalohki Wehio kan. Irail kan me kin doadoahngki pali laud en ar ahnsou nan kalohk me sounpar 23 lel 65 me kak iang sukuhl wet. E pahn mwomwen me ke sohte kak lel mehn akadei wet. Ahpw dehr ntingihedi kahrepe kan me ke sohte kak iang, ahpw ntingihedi dahme kahrehda ke men iang sukuhlo. Eri wiahda koasoandi ehu me pahn seweseiuk wia dahme anahn pwe ken kak iang. Pwehki sapwellimen Siohwa sawas oh omw doadoahk laud nan omw pwukoa, dahme mwomwen sohte kak wiawi ong uhk kak pweida.

20. Dahme kitail kak sukuhlkihsang Rom 12:6-8?

²⁰ Mehn kasukuhl kesiluh me kitail kak sukuhlkihsang en Pohl karasaraso dierek nan Rom 12:6-8. (Wadek.) Wasaht Pohl pil pwurehng kasalehda me irail kan nan mwomwohdiso ahneki koahiek kan me wekpeseng. Ahpw met e kasalehda me kitail en doadoahngki sohte lipilipil soangen koahiek dah me kitail ahneki pwehn kangoange oh kakehlaka mwomwohdiso.

21-22. Mehn kasukuhl dah me kitail kak sukuhlkihsang Robert oh Felice?

²¹ Tehk dahme wiawihong emen brother me adaneki Robert. * Mwurin eh papah nan ehu sahpw tohrohr, e pilipilda en uhd papah nan Pedel wasa me e tikida ie. Mendahki brother teikan kamehlelehiong me sohte mehkot sapwung e wiahda, e nda: “Sounpwong tohto I sohte kin peren pwehki I medewe me I sohte pweida nan ei pwukoa. Mie ahnsou kei me I medewe ien uhdihsang ei doadoahk nan Pedel.” Ia duwen eh pwurehng ahnekihda peren?  Emen elder me wia kompoakepah katamankihong me Siohwa kin ketin kaiahne kitail nan ehuehu pwukoa me kitail ahneki mwoweo pwehn kalaudehla atail koahiek ong atail pwukoa me kitail ahneki ahnsou wet. Robert ese me e anahne uhdihsang en medemedewehte dahme nekier oh tepida kilangwohngete dahme e kak wia met.

²² Brother Felice Episcopo lelohng kahpwal me duwehte met. Ih oh eh pwoudo kesepwilsang Kilead nan pahr 1956 oh papah nin duwen sounapwalih me kin seiloak nan Bolivia. Nan pahr 1964 ira nainekihda kisin seri men. Felice nda: “E uhdahn apwal en kohkohsang aht pwukoa me se uhdahn perenki. Kereniong sounpar ehu I uhdahn mworusala. Ahpw sang ni sapwellimen Siohwa sawas, I wekidala ei madamadau oh kilangwohngete ei pwukoa en wia pahpa men.” Ke ahneki pepehm me duwehte ahn Robert de Felice? Ke kin mworusala pwehki ahnsou wet ke sohte ahneki soangen pwukoaohte me ke ahneki mwoweo? Ma ei, ke pahn peren ma ke wekidala omw madamadau oh kilangwohngete dahme ke kak wia met pwehn papah Siohwa oh riomw Kristian kan. Kedirepwkihte dahme ke kak wia met oh doadoahngki omw koahiek kan pwehn sewese meteikan, oh ke pahn diar peren ni omw kakehlakahda mwomwohdiso.

23. Dahme kitail en uhdi oh medewe, oh dahme kitail pahn koasoiapene nan iren onop en mwuhr?

²³ Emenemen kitail kesempwal rehn Siohwa. E ketin kupwurki kitail en wia kisehn sapwellime peneinei. Ma kitail uhdi oh medewe duwen dahme kitail kak wia pwehn kakehlaka riatail Kristian kan oh eri doadoahk laud pwehn kapwaiada atail pwukoa, kitail sohte pahn nohn medewe me kitail sohte warohng en iang mwomwohdiso! Ahpw ia duwen mwomwen atail kin kilengwohng meteikan nan mwomwohdiso? Ia duwen atail kak kasalehda me kitail poakohng oh wauneki irail? Nan iren onop en mwuhr, kitail pahn koasoiapene ire kesempwal wet.