1. Tounmetei dah kan me me tohto wiadahr, oh dahme kahrehda?

SAPWELLIMEN Koht aramas rar rar kei rahnpwukat kin wiahda tounmetei kan. Riatail Kristian tohto pilada en dehr pwopwoudida. Mie pwopwoud kan me pilada en dehr naineki seri ahnsou wet. Pil mie peneinei kan me kin mourki mour ehu me sohte kin kedirepwkihla soahng kan me sohte nohn kesempwal. Irail koaros wiahda pilipil pwukat pwehki kahrepe kesempwal ehu, me iei en papah Siohwa ni uwen arail kak. Irail itarki dahme re ahneki oh likih me Siohwa pahn ketikihda soahng koaros me re uhdahn anahne. Ia duwe, irail pahn nsensuwedkihla met? Uhdahn soh! Dahme kahrehda kitail kak kamehlele met? Ehu kahrepe iei me Siohwa ketin kapaiahda Eipraam, “semen irail koaros me kin pwoson.”​—Rom 4:11.

2. (a) Nin duwen me Ipru 11:8-10, 16 mahsanih, dahme kahrehda Eipraam pilada en kohkohsang Ur? (b) Dahme kitail pahn koasoiapene nan iren onop wet?

² Eipraam pilada en kohkohsang mour nsenamwahu me e ahneki nan kahnimw en Ur. Dahme kahrehda? Pwehki e awiawih “kahnimw ehu me poahsoankihda poahsoan mehlel.” (Wadek Ipru 11:8-10, 16.) “Kahnimw” dahieu mwo? Kahpwal dah kan me Eipraam lelohng ni eh awiawih kahnimw wet en kokouda? Oh ia duwen atail kak alasang Eipraam oh pil irail kan nan atail ahnsou me kin idawehn eh mehn kahlemeng?

3. Kahnimw dahieu me Eipraam awiawih?

³ Kahnimw me Eipraam awiawih iei Wehin Koht. Wehi wet iei me Sises Krais oh ienge Kristian keidi meh 144,000 ko pahn kaunda.  Pohl kahdaneki Wehi wet “kahnimw en Koht ieias, me iei Serusalem en nanleng.” (Ipru 12:22; Kaud. 5:8-10; 14:1) Sises ketin padahkihong sapwellime tohnpadahk kan en kapakapki wehi wet, oh peki en ketido pwe kupwuren Koht en kak pweida nin sampah nin duwen eh kin wiawi nanleng.​—Mad. 6:10.

4. Nin duwen me Senesis 17:1, 2, 6 mahsanih, ia uwen laud en Eipraam eh ese duwen kahnimwo, de Wehio, me Koht ketin inoukihda?

⁴ Ia duwe, Eipraam ese ia duwen Wehin Koht eh pahn koasoansoandi? Soh. Erein ahnsou werei, ire wet wia ire “rir sarawi” ehu. (Ep. 1:8-10; Kol. 1:26, 27) Ahpw Eipraam ese me ekei kadaudoke kan pahn wiahla nanmwarki. Siohwa ketin wiahda inou wet ong ih. (Wadek Senesis 17:1, 2, 6.) Uwen laud en Eipraam eh pwoson sapwellimen Koht inou kan, e mwomwen me e kak kilang Me Keidio, de Mesaia, me pahn ketin wiahla Nanmwarki en Wehin Koht. Pwehki met, Sises kak mahsanihong mehn Suhs ko nan eh mwehio: “Samamwail Eipraam perenkihda kowahlap eh kasikasik en kilang ei rahn, oh e kilangehr oh perenkihda.” (Sohn 8:56) E sansal me Eipraam ese me ekei kadaudoke kan pahn wia kisehn Wehi ehu me Siohwa pahn ketin kauwada, oh e pilada en awih Siohwa en ketin kapwaiada inou wet.

5. Ia duwen atail ese me Eipraam kin awiawih kahnimwo me Koht ketin koasoanehdi?

⁵ Ia duwen Eipraam eh kasalehda me e awiawih kahnimwo, de Wehio, me Koht ketin koasoanehdi? Keieu, Eipraam sohte wiahla towe mehlel en wehi ehu nin sampah. E kin keseuseli, e sohte pilada en kousoanla wasa ehu, oh e sohte utungada nanmwarki men. Patehng met, Eipraam sohte song en wiahda pein eh wehi. Ahpw e kin peikiongete Siohwa oh awiawih en ketin kapwaiada sapwellime inou. Ni eh wia met, Eipraam kasalehda me e uhdahn pwoson Siohwa. Kitail pahn tehkpene ekei kahpwal kan me e lelohng oh kilang dahme kitail kak sukuhlkihsang eh mehn kahlemeng.

6. Soangen kahnimw dahieu Ur?

⁶ Eipraam kohkohsang kahnimw en Ur, wasa ehu me kansenamwahu oh sohte keper, oh aramas ako kasukuhlda mwahu oh kepwehpwe. Kahnimwo perperkihda kehl ehu me uhdahn laud oh pil mie warawar loal kei ni wasa siluh en kehlo. Aramas akan nan Ur uhdahn  koahiek en nting oh wahntuhkeih nempe kan. Oh mwomwen me aramas ako kin wia pesines nan kahnimwo pwehki me saman kan diarada doaropwe tohto me aramas ako kin doadoahngki nan pesines. Imwarail kan wiawihkihda semend, dihd ko medendel, oh litopwki poh pwetepwet. Ekei ihmw ko mie pere 13 de 14 me kapilpene wasa ehu me tahto wiawihkihda takai.

7. Dahme kahrehda Eipraam anahne likih me Siohwa pahn ketin pere ih oh eh peneineio?

⁷ Eipraam anahne likih me Siohwa pahn ketin pere ih oh eh peneineio. Dahme kahrehda? Taman me Eipraam oh Sara pilada en kohkohsang imweo nan Ur me kansenamwahu oh sohte keper pwehn kohla kousoan nan impwal kan nan sapwen Kenan. Eri sohte kehl laud ehu de warawar kan me kak perehsang ih oh eh peneineio keper. Met irail mi wasa ehu me mengei ong imwintihti kan en kak mahweniong irail.

8. Dahme wiawihong Eipraam ehu ahnsowo?

⁸ Eipraam kin wia kupwuren Koht, ahpw mie ahnsou ehu me sohla itar kanarail mwenge. Duhpek laud ehu wiawi nan sahpwohte me Siohwa ketin poaronehla ih ie. Duhpeko uhdahn laud me kahrehda Eipraam koasoanehdi me ih oh eh peneineio en keseula Isip erein ahnsou kis. Ahpw erein eh mihmi Isip, kaunen sahpwo, Parao, kihsang eh pwoudo. Medewehla pwunod laud me Eipraam ahneki lao Siohwa ketin mahsanihong Parao en kapwurehla Sara rehn Eipraam.​—Sen. 12:10-19.

9. Soangen kahpwal dah me Eipraam ahneki nan eh peneineio?

⁹ Pil mie kahpwal laud kan nan ahn Eipraam peneineio. Eh pwoudo, Sara, sohte kak naineki seri. Erein sounpar tohto, ira kin uhdahn nsensuwedkihla met. Kedekedeo, Sara kihong Eipraam nah liduwo, Akar, pwehn nainekihda seri ong Eipraam oh Sara. Ahpw ahnsou me Akar liseiankihda Ismael, e tepida mwamwahlikihla Sara. Irairo uhdahn apwalla kahrehda Sara kausala Akar.​—Sen. 16:1-6.

10. Dahme wiawihong Ismael oh Aisek me kakete kahrehiong Eipraam en apwalki likih Siohwa?

¹⁰ Sara eri liseianda oh neitikiehdi pwutak men ong Eipraam oh e kahdaneki pwutako Aisek. Eipraam kin poakepoake nah pwutak riemeno, Ismael oh Aisek. Ahpw pwehki Ismael kin lemeiong Aisek, Eipraam anahne kasarehla Ismael oh Akar. (Sen. 21:9-14) Mwuhr, Siohwa ketin mahsanihong Eipraam en meirongkihla Aisek. (Sen. 22:1, 2; Ipru 11:17-19) Nan irair riau ko, Eipraam anahne likih me ehu rahn Siohwa pahn ketin kapwaiada sapwellime inowo me pid nah pwutak ko.

11. Dahme kahrehda Eipraam anahne kanengamah oh awih Siohwa?

¹¹ Erein ahnsou ko, Eipraam anahne sukuhlki en kanengamah oh awih Siohwa. Ele e daulih sounpar 70 ahnsou me ih oh eh peneineio kohkohsang Ur. (Sen. 11:31–12:4) Oh sounpar epwiki samwa, e kin kousoan nan impwal kan, keskeseuseli nan sapwen Kenan. Eipraam mehla ni ahnsou me e sounpar 175. (Sen. 25:7) Ahpw e sohte kilang Siohwa eh ketin kapwaiada sapwellime inowo en ketikihong kadaudoke kan sahpwo me e mihmiseli ie. Oh e sohte mour werei pwehn kilang kahnimwo, Wehin Koht, eh kokouda. Mendahki met, Paipel mahsanih me e mehla ni eh “likeilapala oh nsenamwahu.” (Sen. 25:8, NW) Mendahki Eipraam anahne dadaur pahn kahpwal tohto, e kolokolete eh pwoson kehlail oh pilada en awih Siohwa. Dahme kahrehda e kak dadaurete? Pwehki erein ahn Eipraam mour, Siohwa kin ketin pere oh wiahki ih kompoakepah.​—Sen. 15:1; Ais. 41:8; Seims 2:22, 23.

12. Dahme kitail kin awiawih, oh dahme kitail pahn koasoiapene?

¹² Duwehte Eipraam, kitail kin awiawih kahnimwo me poahsoankihda poahsoan mehlel. Ahpw kitail sohte kin awiawih pwe kahnimw wet en kokouda. Wehin Koht kokoudahr nan pahr 1914 oh wie kakaun nanleng pwon. (Kaud. 12:7-10) Ahpw kitail awiawih wehi wet en kaunda  sampah pwon. Nin doken atail awiawih met en wiawi, mie soangen irair tohto me kitail anahne dadaur pah me duwehte dahme Eipraam oh Sara lelohng. Ia duwe, sapwellimen Siohwa ladu kan rahnwet kak alasang mehn kahlemeng en Eipraam? Koasoipen riatail Kristian kan nan Kahn Iroir kan kasalehda me, duwehte Eipraam oh Sara, me tohto rahnwet kin ahneki pwoson oh kanengamah. Kitail pahn tehkpene koasoipen ekei irail oh kilang dahme kitail kak sukuhlki.

13. Dahme ke sukuhlkihsang koasoipen Brother Walden?

¹³ Men wiahda tounmetei kan. Ma kitail men mwohneki mahs Wehin Koht nan atail mour, kitail anahne duwehte Eipraam me kin pilada wiahda tounmetei kan pwehn kaperenda Koht. (Mad. 6:33; Mark 10:28-30) Tehk mehn kahlemeng en brother men me adaneki Bill Walden. * Nan pahr 1942, Bill pahn kereniongehr kesepwilsang sukuhl laud ehu nan Wehin Amerika oh alehdi nah kisinlikou (degree) ong palien engineer. Ih ahnsowo me e tepida onop rehn Sounkadehdehn Siohwa kan. Ahn Bill sounpadahko (professor) koasoanedier me Bill en ale doadoahk ehu mwurin eh kesepwil, ahpw Bill nda soh. Bill kawehwehiong me e piladahr en kihong eh ahnsou laud ong papah Koht ahpw kaidehn en ale doadoahk pweimwahu ehu. Sohte pwand mwurin mwo, koperment en wasao koasoanehdi me Bill en iangala palien sounpei. Ni wahu, e nda soh, oh pwehki met, e anahne pwain tala $10,000 oh selidi nan imweteng sounpar limau. E pedoisang nan imweteng mwurin sounpar 3. Mwuhr, e alehdi luhk en iang Sukuhl en Kilead oh papah nin duwen misineri men nan Aperika. Bill eri pwoudikihda Eva, oh ira koaros papah nan Aperika, me wehwehki ira anahne wiahda tounmetei kan. Kedekedeo, ira pwurala Wehin Amerika pwehn apwalih ahn Bill nohno. Bill ndahki eh mour: “I kin uhdahn perenki oh pil kalahnganki pwais kaselel me I ahneki en papah Siohwa tohtohsang sounpar 70. I kin kalapw kalahngankihong ih eh ketin sewese ie en doadoahngki ei mour pwehn papah ih.” Ia duwe, ke kak kihong pali laud en omw ahnsou ong papah Siohwa?

14-15. Dahme ke sukuhlkihsang koasoipen Brother oh Sister Apostolidis?

 ¹⁴ Dehr kasik me ke sohte pahn lelohng kahpwal. Sang ahn Eipraam mehn kahlemeng, kitail sukuhlki me irail me kin poadidiong papah Siohwa erein arail mour pil kin ahneki kahpwal kan. (Seims 1:2; 1 Pit. 5:9) Tehk duwen mehlelpen met nan koasoipen Aristotelis Apostolidis. * E papidaisla nan pahr 1946 nan Krihs, oh nan pahr 1952, e inoun pwopwoud ong sister men me adaneki Eleni, me pil ahneki mehn akadeiohte me e ahneki. Ahpw Eleni soumwahuda oh toahkte kan padahkihong me mie war ehu nan eh mwahlielo. Toahkte ko kihsang waro, ahpw sounpar keite mwurin ara pwopwoudida, waro pwurehng pwarada. Toahkte ko pwurehng pwalang, ahpw apali Eleni mwoatorala mwurin mwo, oh e sohla kak lokaia mwahu. E wiahte sounkalohk ngoang men mendahki eh soumwahwo oh pil kalokolok kan sang palien koperment en ahnsowo.

¹⁵ Aristotelis apwalih eh pwoudo erein sounpar 30. Erein ahnsou ko e kin papah nin duwen elder men, iang pwihn me kin apwalih mihting tohrohr kan, oh sewese kauwada Wasahn Mihting Tohrohr ehu. Mwuhr, nan pahr 1987, Eleni lelohng aksident ehu ni eh kalokalohk. E mihla nan coma erein sounpar siluh, oh mwuhr mehla. Aristotelis ndahki eh mour: “Erein sounpar ko, I ahneki kahpwal tohto oh ekei kahpwal ko mwadangete wiawi ni ei sohte kasik. I anahne koasoanehdi teng en dadaurete oh dehr mworuskihla soahng pwukat. Ahpw Siohwa kin ahnsou koaros ketikihong ie kehl me I anahne pwehn powehdi kahpwal pwukat.” (Mel. 94:18, 19) Ia uwen Siohwa eh kin ketin poakohng irail kan me kin wia uwen arail kak koaros en papah ih mendahki arail kahpwal kan!

16. Kaweid mwahu dahieu me Brother Knorr kihong eh pwoudo?

¹⁶ Kilangwohngete ahnsou kohkohdo. Eipraam kin kilikilangwohngete keting kan en ahnsou kohkohdo me Siohwa pahn ketikihong ih, oh met sewese ih en powehdi eh kahpwal kan. Sister Audrey Hyde kin medemedewehte duwen eh koapworopwor ong ahnsou kohkohdo, mendahki tepin eh pwoudo, Nathan H. Knorr,  mehkihla kanser oh keriaun eh pwoudo, Glenn Hyde, ahnekihda soumwahu en Alzheimer. * E nda me mie mehkot me tepin eh pwoudo, Brother Knorr, ndaiong ih wihk keite mwohn eh mehla me sewese ih en dadaurete ni peren. E nda: “Nathan katamankihong ie: ‘Mwurin mehla, ata koapworopwor uhdahn mehlel, oh kita sohte pahn pwurehng ahneki medek.’ Ih eri kangoange ie nda: ‘Kilengla mwowe, pwehki ih wasao me ketingpomw mi ie.’ . . . E pil nda: ‘Ahnsou koaros soupisek​—song en doadoahngki omw mour pwehn sewese meteikan. Met pahn seweseiuk en ahneki peren.’” Ia uwen met eh wia kaweid mwahu en kin ahnsou koaros soupisengki wiewia me mwahu ong meteikan oh ‘perenda pwehki atail koapworopwor’!​—Rom 12:12.

17. (a) Dahme kahrehda kitail ahneki kahrepe mwahu en kilangwohngete ahnsou kohkohdo? (b) Ia duwen atail idawehn mehn kahlemeng me kileldi nan Maika 7:7 eh pahn sewese kitail en perenki kapai kan ni ahnsou kohkohdo?

¹⁷ Rahnwet, mie kahrepe tohto me kitail ahneki en kilangwohngete ahnsou kohkohdo. Soahng kan me wiewiawi nin sampah kasalehda ni sansal me kitail miher ni kaimwiseklahn imwin rahn akan en koasoandi wet. Ahnsou keren kitail solahr pahn anahne awih kahnimwo me poahsoankihda poahsoan mehlel en kaunda sampah pwon. Ehu rehn soahng mwahu tohto me pahn kaperenda kitail iei iasadahn irail kan me kitail poakohng. Ni ahnsowo, Siohwa pahn ketin katingih Eipraam pwehki eh pwoson oh kanengamah sang ni eh pahn ketin kaiasada ih oh eh peneineio ong mour nin sampah. Ia duwe, ke pahn mi mwo pwehn kasamwo irail? Ke kak ma ke duwehte Eipraam me kin men wiahda tounmetei kan ong Wehin Koht, ma ke kin kolokolete omw pwoson mendahki kahpwal kan, oh ma ke sukuhlki en awih Siohwa ni kanengamah.​—Wadek Maika 7:7.