1-2. Nin duwen me Melkahka 34:8 mahsanih, ia duwen atail kak esehda duwen sapwellimen Siohwa kupwuramwahu?

MEDEWEHLA ma emen kihong uhk mwenge ehu me ke saikinte song. Ke kak esehda soahng kei duwen mwengeo sang ni omw pahn kilang, ned, idek ia duwen omw pahn kak wiahda, de idek rehn meteikan ma irail iouki. Ahpw ihte ahl me ke pahn esehda ma ke iouki de soh iei sang ni omw pahn song mwengeo.

² Kitail kak sukuhlki duwen sapwellimen Siohwa kupwuramwahu sang ni atail wadek Paipel oh neitail sawasepen Paipel kan, oh pil rong meteikan koasoia duwen kapai kan me re alehdihsang Siohwa. Ahpw kitail pahn uhdahn wehwehkihla ia uwen mwahu en Siohwa sang ni atail pahn pein “song” sapwellime kupwuramwahu ong kitail. (Wadek Melkahka 34:8, NW.) * Kitail kilang ehu karasepen met. Mwein kitail men doadoahngki pali laud en atail ahnsou ong papah Koht, ahpw pwe kitail en lel mehn akadei wet, kitail anahne kihsang soahng kan me sohte nohn kesempwal nan atail mour. Ele kitail kin kalapw wadek duwen sapwellimen Sises inowo me ma kitail kin mwohneki mahs Wehin Koht, Siohwa pahn ketikihda soahng kan me kitail uhdahn anahne, ahpw pein kitail saikinte kilang inou wet wiawihong kitail. (Mad. 6:33) Ahpw pwehki kitail kin pwoson sapwellimen Sises inowo, kitail kin kanahieng atail doadoahngki neitail mwohni, katikala atail awahn doadoahk, oh wia uwen atail kak nan doadoahk en kalohk. Ni atail wia met, kitail kin esehda sang dahme kin wiawihong kitail me Siohwa kin uhdahn ketin apwalihala atail anahn akan. Pein kitail kin “song” sapwellimen Siohwa kupwuramwahu.

3. Nin duwen me Melkahka 16:1, 2 mahsanih, ihs me kin alehdi sapwellimen Siohwa kupwuramwahu?

 ³ Siohwa kin ketin “kupwur mwahu ong aramas akan koaros,” pil irail kan me sehse ih. (Mel. 145:9; Mad. 5:45) Ahpw e kin ketin wiahda soahng mwahu tohto ong irail kan me kin poakohng ih oh wia uwen arail kak en papah ih. (Wadek Melkahka 16:1, 2.) Kitail pahn koasoiapene ekei soahng kan me Siohwa ketin wiadahr ong kitail.

4. Ia duwen Siohwa eh kin ketin kasalehda sapwellime kupwuramwahu ong irail kan me tepida karanihala ih?

⁴ Ehuehu ahnsou me kitail kin kapwaiada dahme kitail sukuhlkihsang Siohwa, kitail kin kilang ia duwen met eh kin sewese kitail. Karasepe, ni atail kin kalaudehla atail sukuhlki duwen ih oh tepida poakohngala ih, e kin ketin sewese kitail en uhdihsang medemedewe oh pil wiewia soahng kan me e sohte kin ketin kupwurperenki. (Kol. 1:21) Oh ni atail inoukihong Siohwa atail mour oh papidaisla, e pil ketin kalaudehla soahng mwahu kan me e ketikihong kitail, duwehte nsenmwakelekel oh nanpwungmwahu keren reh.​—1 Pit. 3:21.

5. Ia duwen atail kin alehdi sapwellimen Siohwa kupwuramwahu nan kalohk?

⁵ Kitail kin pousehlahte alehdi sapwellimen Siohwa kupwuramwahu ni atail kin iang kalohk. Ia duwe, kowe emen me kin namenek? Tohtohn sapwellimen Siohwa aramas akan kin namenek. Mwein mwohn omw wiahla emen sapwellimen Siohwa ladu, ke sohte leme me ke pahn kohla letelet ni en emen wenihmw me ke sehse oh koasoiaiong ih duwen Paipel. Ahpw rahnwet, ke kin kaukaule wia met. Oh Siohwa pil ketin seweseiuk en perenki doadoahk wet! E pil kin ketin seweseiuk ni ahl tohto teikan. E kin ketin seweseiuk en meleilei ni emen me ke tuhwong nan kalohk eh lemei ong uhk. E pil ketin seweseiuk en tamanda iren Paipel ehu me uhdahn mwahu en ehukihong emen me men rong. Oh e ketikihong uhk kehl en pousehlahte kalohk pil ni ahnsou me aramas akan sohte men rong.​—Ser. 20:7-9.

6. Ia duwen kaiahn kan me Siohwa kin ketikihda ar kadehdehda duwen sapwellime kupwuramwahu?

⁶ Siohwa pil ketin kasalehiong kitail sapwellime kupwuramwahu sang ni eh kin ketin kaiahne kitail ong doadoahk en kalohk. (Sohn 6:45) Nan atail mihting en nan wihk, kitail kin rong wiepen koasoi kan ong kalohk, oh kitail kin alehdi kangoang en doadoahngki wiepe pwukat nan kalohk. Ni tapio, ele kitail ekis saloh en song wiepe kapw ehu, ahpw ma kitail wia met, kitail pahn diarada me wiepen kalohk kapwo kin uhdahn kadoadoahk nan atail wasahn kalohk. Kitail pil kin ale kangoang sang atail mihting kan oh mihting tohrohr kan en wia wiepen kalohk teikan me ele kitail saikinte song mwoweo. Ele met pil kak kahrehda kitail en saloh, ahpw ni atail kin song wia soahng pwukat, Siohwa pahn ketin kapaikitailda. Met kitail pahn sukuhlki ekei soahng mwahu kan me Siohwa pahn ketikihong kitail ma kitail kin likih ih oh song wiepe kapw kan pwehn wia uwen atail kak en papah ih, sohte lipilipil soangen irair dah me kitail ahneki. Mwuhr, kitail pahn koasoiapene ia duwen atail kak lel atail mehn akadei kan.

7. Soangen kapai dah kan me kitail kin alehdi ni atail kalaudehla atail doadoahk en kalohk?

⁷ Kitail pil kin karanihala Siohwa. Medewehla dahme wiawihong elder men me adaneki Samuel, * me ih oh eh pwoudo kin papah nan Colombia. Ira kin perenki ara wia pioneer kei nan ara mwomwohdisou, ahpw ira men kalaudehla ara doadoahk en kalohk oh sewese mwomwohdiso ehu me anahne sawas laud. Pwe ira en lel ara mehn akadeio, ira anahne uhdihsang wia soahng kei me ira kin perenki wia. Samuel koasoia: “Se doadoahngki kaweid en Madiu 6:33  oh uhdihsang pwainda soahng kan me se sohte anahne. Ahpw dahme se keieu apwalki iei en mwekidsang imwato. Imwato wiawihdahte ong kiht, oh sohte mie pweipwand me se anahne pwainla ong ihmwo.” Ni ara keseula nan mwomwohdiso kapwo, ira diarada me ira sohte anahne mwohni laud pwehn apwaliheki ira, duwehte mwoweo. Samuel nda: “Se kin kilang ia duwen Siohwa eh kin ketin kaweid kiht oh sapengala at kapakap kan. Se pehm me Siohwa ketin kupwurperenki kiht, oh pehm sapwellime limpoak ni ahl me se sohte kin ese mwoweo.” Ia duwe, ke kak kalaudehla omw doadoahk en kalohk ni ahl teikan? Ma ei, ke kak uhdahn kamehlele me ke pahn karanihala Siohwa oh e pahn ketikihda dahme ke anahne.​—Mel. 18:25.

8. Dahme ke sukuhlkihsang dahme Ivan oh Viktoria koasoia?

⁸ Kitail kin diar peren nan atail doadoahk ong Siohwa. Tehk dahme Ivan oh Viktoria nda, pwopwoud ehu me wia pioneer kei nan Kyrgyzstan. Ira kihsang soahng kan me sohte nohn kesempwal nan ara mour pwe ira en kak toukihda pein ira ong pwukoa sohte lipilipil, iangahki kauwada wasahn kaudok kan. Ivan nda: “Se kin doadoahk laud nan ehuehu pwukoa me se ahneki. Mendahki se kin pwangada imwin rahno, se kin peren pwehki se ese me se kin doadoahngki at kehl pwehn doadoahk laud ong Siohwa. Se pil kin peren pwehki se wiahda kompoakepaht tohto oh soahng kaperen tohto kin wiawihong kiht.”​—Mark 10:29, 30.

9. Dahme emen sister me ahneki kahpwal wiahda pwehn kalaudehla eh doadoahk en kalohk, oh ia imwilahn met?

⁹ Kitail kin diar peren nan sapwellimen Siohwa doadoahk mendahki mie atail kahpwal kan. Karasepe, Mirreh, liohdi mah men sang Palikapi en Aperika wia toahkte men. Ni ahnsou me e kommoaldihsang eh doadoahko, e tepida pioneer. Mirreh ahneki soumwahu en nankoakonmedek oh kin kak doadoahngkihte awa ehu nan kalohk en ihmw lel ihmw. Ahpw e kin kak doadoahngki ahnsou laud nan kalohk ong wehipokon. Mie me e kin pwurehng pwurala rehrail oh pil nah tohnsukuhl en Paipel tohto. E kin kalohk ong ekei irail nan delepwohn. Dahme kahrehda Mirreh men kalaudehla eh doadoahk ong Siohwa? E koasoia: “I kin uhdahn poakohng Siohwa oh Krais Sises. Oh I kin kalapw kapakapki me Siohwa en ketin sewese ie wia uwen ei kak nan sapwellime doadoahk.”​—Mad. 22:36, 37.

10. Nin duwen me 1 Piter 5:10 mahsanih, dahme irail kan me kin kalaudehla arail papah Siohwa kin alehdi sang reh?

¹⁰ Kitail pil kin alehdi kaiahn teikan sang rehn Siohwa. Kenny, pioneer men me kin papah nan Mauritius, pil kamehlele met. Ni ahnsou me e esehda padahk mehlel, e uhdihsang iang sukuhl laud, papidaisla, oh kihong pali laud en eh ahnsou ong papah Siohwa. E koasoia: “I kin song en duwehte soukohp Aiseia, me nda: ‘Iet ngehi, Maing, komwi ketin poaroneiehla.’” (Ais. 6:8) Kenny iangehr sewese kauwada wasahn kaudok tohto, oh e pil iang sewese kawehwehda sawasepen Paipel kan ong ni lokaia me e kin lokaiahki. E nda: “I alehdi kaiahn me kin padahkihong ie soangen koahiek kan me I anahne pwehn kapwaiada ei pwukoa kan.” Ahpw e pil sukuhlki laudsang en wiahte pwukoa ko. E pil nda: “I sukuhlki duwen soahng kan me I kakohng oh sohte kakohng oh pil irair kan me I anahne kakairada pwehn wiahla sapwellimen Siohwa ladu mwahu men.” (Wadek 1 Piter 5:10.) Ele ke pil kak wiahda wekidekla kan pwe Siohwa en kak ketin kaiahne iuk ni ahl teikan.

11. Dahme sister silimen nan South Korea nantihong wia pwe ren kak iang kalohk, oh ia imwilahn met? (Menlau kilang kilel ni kilin Kahn Iroir wet.)

¹¹ Pil irail kan me wereilahr nan padahk mehlel kin anahne kaiahn ni arail song wiepen kalohk kapw ehu. Erein soumwahu lusuluso COVID-19, elder kan nan South Korea ntingihedi: “Ekei me mwoweo medewe me re sohte kak iang kalohk pwehki arail roson sohte mwahu  met kakehr iang kalohk nan computer ape. Sister silimen me sounpar 80 samwa sukuhlki ia duwen arail kak doadoahngki computer pwehn wia met, eri met re kin iang kalohk kereniong rahn koaros.” (Mel. 92:14, 15) Ia duwe, ke men kalaudehla omw doadoahk en kalohk oh song sapwellimen Siohwa kupwuramwahu? Tehk ekei kahk kan me ke kak wia pwehn seweseiuk lel mehn akadeio.

12. Dahme Siohwa ketin inoukihong irail kan me kin likih ih?

¹² Esehla koapworopworki Siohwa. Siohwa ketin inoukihda me e pahn ketikihong kitail soahng mwahu tohto ma kitail likih ih oh patohwanohng uwen atail kak koaros. (Mal. 3:10) Sister men nan Colombia me adaneki Fabiola pein kilang ia duwen Siohwa eh ketin kapwaiada inou wet. Fabiola men wiahla pioneer men mwurinte eh papidaisla. Ahpw e anahne doadoahk pwehn sewese apwalih eh pwoudo oh nah seri silimeno. Eri ni ahnsou me e kakehr kommoaldihsang eh doadoahko, e kapakap ong Siohwa ni ngidingid pwehn ketin sewese ih. E koasoia: “Aramas anahne awih ahnsou reirei pwehn tepida ale neirail mwohni mwurin arail kommoalasang doadoahk. Ahpw I alehdi nei mwohnio sounpwong ehute mwurin ei kapedolong nei doaropwe ko. Met inenen kapwuriamwei!” Sounpwong riau mwurin mwo, e tepida pioneer. Met e sounpar 70 samwa oh e wiahte pioneer men dauliher sounpar 20. Erein ahnsou ko, e sewesehier aramas welimen en papidaisla. E koasoia: “Mendahki ekei pak I kin luwet, Siohwa kin ketin sewese ie rahn koaros pwe I en kak pousehlahte pioneer.”

13-14. Mehn kahlemeng dah kan me kak sewese kitail en likih Siohwa oh men kalaudehla atail papah ih?

 ¹³ Sukuhlsang mehn kahlemeng en irail kan me kin koapworopworki Siohwa. Paipel kin audaudki mehn kahlemeng tohto duwen irail kan me kin doadoahk laud nan sapwellimen Siohwa doadoahk. Mie karasaras tohto duwen ahnsou me Siohwa kin ketin kapaiairailda ihte mwurin arail wia soahng ehu me kasalehda arail likih ih. Karasepe, ihte mwurin Eipraam eh kohkohlahsang eh wasao​—“mendahki e sehse ia wasa e kohkohlahng ie”—​me Siohwa ketin kapaiahda ih. (Ipru 11:8) Ihte mwurin Seikop eh poadoarohng tohnlengo me e alehdi kapai tohrohr ehu. (Sen. 32:24-30) Ni ahnsou me wehin Israel pahn kereniong pedolong nan Sapwen Inowo, ihte mwurin samworo ko sokedihla nan Pillap Sordan me aramas ako kak kotehla.​—Sos. 3:14-16.

¹⁴ Ke pil kak sukuhlsang mehn kahlemeng en riatail Kristian kan rahnwet me kin koapworopworki Siohwa oh kalaudehla arail papah ih. Karasepe, brother men me adaneki Payton oh eh pwoudo, Diana, kin perenki wadek duwen riatail Kristian kan me kin kalaudehla arail papah Siohwa, duwehte koasoipen riatail kan me pwarada nan oaralapo “Toukihda Pein Irail ni Peren.” * Payton koasoia: “Ni at kin wadek duwen irail, e mwomwen me se kilikilang emen eh pereperenki eh kang mwenge iou. Ni at kin kalapw kilikilang, at men ‘song oh kilang me Siohwa me ketin mwahu’ pil kin laudla.” Mwuhr, Payton oh Diana keseuhla oh papah wasa me mie anahn laud ong sounkalohk kan. Mie pak me ke wadek oaralapo? Oh ke kilangehr kisin kasdo riau ko Witnessing in Isolated Territory​—Australia oh Witnessing in Isolated Territory​—Ireland me mi nan jw.org? Soahng pwukat ele kak seweseiuk en rapahki ahl akan en kak kalaudehla omw papah Siohwa.

15. Ia duwen werek mwahu eh kak sewese kitail?

¹⁵ Pilada werek mwahu. E kin mengei ong kitail en song mwenge kapw ehu ma kitail kin iang irail kan me iouki. Ma kitail kin werekiong irail kan me kin mwohneki mahs Siohwa nan arail mour, e pahn mengei ong kitail en rapahki ahl akan en kalaudehla atail papah ih. Ih met me wiawihong pwopwoud ehu me adaneki Kent oh Veronica. Kent koasoia: “Kompoakepaht kan oh at peneinei kin kangoange kiht en song wiepen kalohk teikan. Se wehwehki me en werekiong irail kan me kin mwohneki mahs Wehio, met kin kahrehiong kiht en eimah oh men song mehkot kapw.” Met Kent oh Veronica kin papah nin duwen pioneer tohrohr kei nan Serbia.

16. Nin duwen me sapwellimen Sises karasaraso nan Luk 12:16-21 kasalehda, dahme kahrehda kitail en kin men wiahda tounmetei kan?

¹⁶ Wiahda tounmetei kan ong Siohwa. Kitail sohte anahne uhdihsang wia soahng koaros me kitail kin perenki wia pwehn kaperenda Siohwa. (Ekl. 5:19, 20) Ahpw ma kitail pilada en dehr kalaudehla atail doadoahk ong Siohwa pwehki kitail sohte men uhdihsang wia soahng kan me kitail perenki, kitail kakete wiahda soangen sapwungohte me mwahnakapwo nan sapwellimen Sises karasaraso wiahda, me kin doadoahk laud en ahnekihda soahng mwahu tohto ahpw sohte nsenohki duwen Koht. (Wadek Luk 12:16-21.) Emen brother sang France me adaneki Christian, koasoia: “I sohte doadoahngki ei ahnsou oh kehl ni uwen ei kak koaros ong Siohwa oh pil ong ei peneineio.” Ih oh eh pwoudo pilada ira en pioneer. Ahpw pwe ira en lel ara mehn akadeio, ira anahne uhdihsang doadoahk. Ira tepida kisin pesines en kamwakel ehu pwehn apwalih ira, oh ira esehla en itarki kisin mwohni me ira kin wiahda. Ia duwe, ara wiahda tounmetei wet uhdahn mie katepe? Christian koasoia: “At perenki doadoahk en kalohk uhdahn laudla oh se perenki kilang nait tohnsukuhl en Paipel kan  oh irail kan me se kin pwurehng pwurala rehrail sukuhlki duwen Siohwa.”

17. Dahme kahrehda e kakete apwal ong kitail en song wiepe kapw ehu nan kalohk?

¹⁷ Perenki song wiepen kalohk kapw kan? (Wiewia 17:16, 17; 20:20, 21) Shirley, emen pioneer nan Wehin Amerika, anahne wekidala eh koasoandi en kalohk erein soumwahu lusuluso COVID-19. Nin tapio, e kin pweiek en song kalohk doadoahngki delepwohn. Mwurin eh ale kaiahn erein mwemweit en sounapwalih me kin seiloako, e tepida iang kalohk nan delepwohn kaukaule. E koasoia: “Nin tapio, I masak en wia met, ahpw met I uhdahn perenki. Se kin koasoiong aramas tohtohsang me se kin tuhwong ni at kalohk ihmw lel ihmw!”

18. Dahme kak sewese kitail ma mehkot kahrehda en apwal en kalaudehla atail doadoahk en kalohk?

¹⁸ Wiahda mehn akadei oh song en kapwaiada. Ni atail kin lelohng kahpwal kan, kitail kin kapakapki sawas oh medewe kanahieng ia duwen atail en apwalihala kahpwal ko. (Lep. Pad. 3:21) Sonia, emen pioneer me kin iang pwihnen kalohk ehu me kin lokaiahki lokaiahn Romany nan Iurop, koasoia: “I kin men ntingihedi ei mehn akadei kan nan doaropwe oh kihdi wasa kis me I pahn kak kilang. Pohn ei tehpelo, mie mahlen en ahl riau me kolahng wasa riau. Ni ei kin wiahda pilipil ehu, I kin kilang ahl riau pwukat oh medewe ma ei pilipilo pahn sewese ie lel ei mehn akadeio de soh.” Sonia kin song en ahneki madamadau pwung duwen kahpwal kan me e ahneki. E koasoia: “I anahne pilada ma I pahn wiahki wekidekla ehu nan ei irairo en duwehte dihd ehu me pahn kauhiehdihsang ei pahn lel ei mehn akadeio, de duwehte piris ehu me pahn sewese ie lel mehn akadeio.”

19. Ia duwen atail kak kasalehda me kitail kalahnganki soahng mwahu koaros me Siohwa ketikihong kitail?

¹⁹ Siohwa kin ketin kapaikitailda ni ahl tohto. Kitail kak kasalehda uwen atail kalahnganki kapai pwukat sang ni atail wia uwen atail kak koaros en wadohng ih kaping. (Ipru 13:15) Met ele kin pidada en song wiepe kapw kan pwehn kalaudehla atail doadoahk en kalohk. Eri Siohwa pahn ketin kapaikitailda laud. Ehuehu rahn, kitail en rapahki ahl akan en “song oh kilang me Siohwa me ketin mwahu.” Eri kitail pahn duwehte Sises me mahsanih: “Kenei mwenge iei en kapwaiada kupwuren ih me ketin poaroneiehdo oh kanekehla sapwellime doadoahk.”​—Sohn 4:34.