1. Nin duwen me Ipru 12:1 mahsanih, dahme kitail anahne wia pwehn kanekehla atail weirentang en mour?

 PAIPEL kapahrekiong atail mour nin duwen Kristian kei weirentang ehu. Sounweiren tang kan me kanekehla weiro pahn alehdi mour soutuk. (2 Tim. 4:7, 8) Kitail anahne wia uwen atail kak koaros pwehn tangatangete pwehki kitail uhdahn kerenlahngehr ni imwin weiro. Wahnpoaron Pohl me kanekehla eh weirentang en mour koasoia dahme pahn sewese kitail pwehn kana nan weiro. E kaweidki kitail en “kesehsang kitail mehkoaros me kin katoutou . . . oh kitail en dadaurete tang ni weirentang me pwilidier mwohtail.”​—Wadek Ipru 12:1.

2. Ia wehwehn en “kesehsang kitail mehkoaros me kin katoutou”?

² Ni ahnsou me Pohl ntingihedi me kitail anahne “kesehsang kitail mehkoaros me kin katoutou,” met wehwehki me sohte wisik ehu Kristian men anahne wahda? Soh. Ahpw, wehwehn eh koasoio iei me kitail en uhdihsang wahda katoutou kan me kitail sohte anahne wa. Soangen katoutou wet kak kahrehiong kitail en wawaila oh pwangada. Pwehn dadaurete, kitail anahne mwadang esehda oh kesehla katoutou koaros me sohte anahn me kak kahrehda kitail en wawaila. Ahpw ni ahnsowohte, kitail sohte men kesehla wisik kan me kitail anahne wahda. Ma kitail sohla wa katoutou pwukat, kitail sohla pahn mihmihte nan weiro. (2 Tim. 2:5) Wisik dah kan me kitail anahne wahda?

3. Nin duwen me Kalesia 6:5 mahsanih, dahme kitail anahne wahda? (b) Dahme kitail pahn koasoiapene nan iren onop wet, oh dahme kahrehda?

³ Wadek Kalesia 6:5. Pohl kasalehda mehkot me kitail anahne wahda. E ntingihedi me “emenemen pahn wa pein eh wisik.” Wasaht Pohl koasokoasoia pein atail pwukoa mwohn Koht, mehkot me kitail anahne pein wa. Nan iren onop  wet, kitail pahn koasoiapene dahme kin iang pein atail “wisik” oh ia duwen atail kak wahda. Kitail pahn pil tehkpene mehn katoutou kan me sohte anahn me ele kitail kin weuwa oh sukuhlki ia duwen atail kak kesehla. En pein wahda atail wisik oh kesehla katoutou kan me sohte anahn pahn sewese pweida nan atail weirentang en mour.

4. Dahme kahrehda e sohte nohn apwal en kapwaiada atail inou ong Siohwa? (Pil kilang kilel.)

⁴ Atail inou ong Siohwa. Ni atail inoukihong Siohwa atail mour, kitail inoukihda en kaudokiong ih oh wia kupwure. Kitail anahne kolokol inowo. En kapwaiada atail inou ong Siohwa wia pwukoa laud ehu, ahpw e sohte wia wisik toutou ehu. Met pwehki Siohwa ketin kapikkitailda en wia kupwure. (Kaud. 4:11) E ketin wiaikitailda pwehn esehla oh kaudokiong ih, oh e ketin wiaikitailda rasehng ih. Pwehki met, kitail kak karanihala oh perenki wia kupwure. (Mel. 40:8) Patehng met, ni atail kin wia kupwuren Koht oh idawehn sapwellime Ohlo, kitail kin pein “diar nsenamwahu.”​—Mad. 11:28-30.

5. Dahme kak seweseiuk en kapwaiada omw inou? (1 Sohn 5:3)

 ⁵ Ia duwen omw kak wahda wisiko? Soahng riau kak sawas. Keieu, pousehlahte kakehlaka omw limpoak ong Siohwa. Ke kak wia met sang ni omw medemedewe soahng mwahu koaros me e ketin wiahiong uhk oh kapai kan me e pahn ketikihong uhk. Ni omw poakohng Koht eh laudla, e pahn mengeiong uhk en peikiong ih. (Wadek 1 Sohn 5:3.) Keriau, kahlemengih Sises. E pweida ni eh wia kupwuren Koht pwehki e kapakapki sapwellimen Siohwa sawas oh medemedewehte ketingpe. (Ipru 5:7; 12:2) Duwehte Sises, kapakapki sapwellimen Siohwa kehl oh pousehlahte medemedewe koapworopwor en mour soutuk. Ni omw limpoak ong Koht oh kahlemengih sapwellime Ohlo eh laudla, ke pahn kak kapwaiada omw inou ong Siohwa.

6. Dahme kahrehda kitail anahne apwalih atail pwukoahn nan peneinei? (Pil kilang kilel.)

⁶ Atail pwukoahn nan peneinei. Nan atail weirentang en mour, kitail anahne poakohng Siohwa oh Sises laudsang atail poakohng atail peneinei. (Mad. 10:37) Ahpw met sohte wehwehki me kitail kak pohnsehsehla atail pwukoahn nan peneinei. Weksang met, pwehn kaperenda Koht oh Krais, kitail anahne kapwaiada atail pwukoahn nan peneinei. (1 Tim. 5:4, 8) Ni atail wia met, kitail pahn peren. Siohwa ketin mwahngih me peneinei kan pahn peren ni pwopwoud ehu ara kin wauneki oh poakohng emenemen, ni pahpa nohno kan ar kin poakohng oh kaiahne neirail seri kan, oh ni seri kan ar peikiong arail pahpa nohno.​—Ep. 5:33; 6:1, 4.

7. Ia duwen omw kak kapwaiada omw pwukoahn nan peneinei?

⁷ Ia duwen omw kak wahda wisiko? Sohte lipilipil ia omw pwukoa nan peneinei, likih kaweid en Paipel erpit kan. Dehr wiahte dahme ke medewe me pwung, de dahme me tohto kin wia, de dahme me saman kin koasoia me ke anahne wia. (Lep. Pad. 24:3, 4) Doadoahngki mwahu neitail sawasepen Paipel kan. Soahng pwukat audaudki iren sawas kan ong ia duwen atail pahn kapwaiada kaweid en Paipel kan. Karasepe, kisin pwuhko Omw Peneinei Kak Nsenamwahu, oh pwuhko Pereperenki Mour Kohkohlahte! iren mehn kasukuhl 49 oh 50, ele kak sewese pwopwoud kan, pahpa nohno kan, oh me pwulopwul kan. Koasoanehdi teng en kapwaiada dahme Paipel mahsanih, mehnda me ekei tohn omw peneinei kan sohte kin wia met. Ni omw wia met, omw peneinei pahn paiekihda, oh ke pahn perenki sapwellimen Siohwa kapai.​—1 Pit. 3:1, 2.

8. Ia duwen atail pilipil kan eh kak kamwakid kitail?

⁸ Atail pwukoa kan sang pilipil kan me kitail wiahda. Siohwa ketikihong kitail saledek en pein wiahda pilipil kan, oh e kupwurki kitail en peren pwehki atail pilipil mwahu kan. Ahpw e pil sohte kin perekitailsang imwilahn pilipil sapwung kan me kitail wiahda. (Kal. 6:7, 8) Eri kitail pwukoahki kahpwal kan me kitail ahneki pwehki atail pilipil sapwung. Ele kadeikpen loalatail kin kapwunode kitail pwehki dahme kitail pilada en wia. Ahpw atail ese me kitail pein pwukoahki atail pilipil kan kak kamwakid kitail en wehkada dipatail kan, kapwungala atail sapwung kan, oh dehr pwurehng wiahda sapwung. Atail wia met kak sewese kitail en mihmihte nan weirentang en mour.

9. Dahme ke kak wia ma ke wiahda pilipil sapwung ehu? (Pil kilang kilel.)

⁹ Ia duwen atail kak wahda wisiko? Ma ke wiahda pilipil sapwung ehu, dahme ke kak wia? Pohnese me ke sohte kak wekidala dahme wiawi  mahso. Dehr doadoahngkihla omw ahnsou oh kehl pwehn kadehdehda me ke pwung de kapwopwohnki pein uhk de meteikan omw pilipil sapwung kan. Ahpw, pohnese omw sapwung kan oh wia uwen omw kak koaros ahnsou wet. Ma ke nsensuwedkihla sapwung ehu me ke wiahda, ni aktikitik kapakapohng Siohwa, kasalehda omw sapwung kan, oh peki en ketin mahkohng uhk. (Mel. 25:11; 51:3, 4) Peki mahk ong irail kan me ele ke kansensuwedihala, oh ma anahn, rapahki sawas sang elder kan. (Seims 5:14, 15) Sukuhlsang omw sapwung kan, oh song en dehr pwurehng wiahda. Ni omw wia met, ke kak kamehlele me Siohwa pahn ketin kasalehiong uhk mahk oh ketikihong uhk sawas me ke anahne.​—Mel. 103:8-13.

10. Dahme kahrehda pepehm me kitail anahne wia laudsang dahme kitail kak wia katoutou ehu? (Kalesia 6:4)

¹⁰ Pehm me kitail anahne wia laudsang dahme kitail kak. Kitail kak katoutouwihala pein kitail ni atail kapahrekihong pein kitail meteikan. (Wadek Kalesia 6:4.) Ma kitail kin kalapw kapahrekihong kitail ong meteikan, kitail pahn peirin oh ahneki madamadau en siai. (Kal. 5:26) Ma kitail kin song en wia dahme meteikan kin wia mendahki atail sohte kak wia met, kitail kakete kamedekihala pein kitail. Oh ma “koapworopwor kin ohla, mohngiongomw pil kin ohla,” eri ia uwen eh kansensuwed en awih mehkot me kitail sohte douluhl kak alehdi! (Lep. Pad. 13:12) Ma kitail wia met, e pahn kahrehiong kitail en nohn pwangada nan atail weirentang en mour.​—Lep. Pad. 24:10.

11. Dahme kak seweseiuk en dehr kasik laudsang dahme ke kak wia?

¹¹ Ia duwen omw kak kesehla katoutouo? Dehr kasik laudsang dahme Siohwa ketin kupwurki. E sohte ketin kasik ken patohwanohng dahme ke sohte ahneki. (2 Kor. 8:12) Kamehlele me Siohwa sohte kin ketin kapahrekihong dahme ke kin wia ong dahme meteikan kin wia. (Mad. 25:20-23) E ketin kesempwalki omw papahki ih sang omw mour unsek, omw lelepek, oh omw dadaurete. Pohnese me ke sohte kak wia soahng koaros me ke men wia ahnsou wet pwehki omw sounpar, omw roson, oh omw irair. Duwehte Parsilai, nda soh ma omw roson de sounpar pahn kahrehda en apwal ong uhk en wia pwukoa ehu. (2 Sam. 19:35, 36) Duwehte Moses, pwungki ale sawas oh kihong meteikan pwukoa kan ni ahnsou me konehng. (Eks. 18:21, 22) Ni omw kin aktikitik, ke sohte pahn kasik soahng tohto me ke kak wia me pahn kahrehiong uhk en pwangada nan omw weirentang en mour.

12. Kitail pwukoahki pilipil sapwung kan me meteikan wiahda? Menlau kawehwehda.

¹² Pehm me ke pwukoahki pilipil sapwung kan me meteikan wiahda. Kitail sohte kak wiahiong ahn meteikan pilipil; kitail pil sohte kak ahnsou koaros pereirailsang imwilahn pilipil sapwung kan me re wiahda. Karasepe, nein pahpa nohno pwutak men de serepein men kedekedeo ele pilada en uhdihsang pahpa Siohwa. Pilipilo kak kahrehiong papah nohnou nsensuwed laud. Ahpw, pahpa nohno kan me kin kapwopwohnki pein irail pilipil me neirail serio wiahda kin wahda katoutou laud ehu. Kaidehn katoutou ehu me Siohwa kupwurki ren wahda.​—Rom 14:12.

13. Dahme papah nohno men kak wiahiong pilipil sapwung me nah serio wiahda?

¹³ Ia duwen omw kak kesehla katoutouo? Pohnese me Siohwa ketikihong kitail koaros  saledek en pilipil. E ketin mweidohng emenemen en pein wiahda eh pilipil. Met kin pidada ma en papah ih. Siohwa mwahngih me ke sohte wia papah nohno unsek men; oh e kupwurki ken wia uwen omw kak koaros. Noumw serio me pwukoahki pilipil kan me e wiahda, kaidehn kowe. (Lep. Pad. 20:11) Ahpw, ele ke kin pwunopwunodkihte sapwung kan me ke wiahda nin duwen papah nohno men. Ma ei, kasalehiong Siohwa omw pepehm oh peki sapwellime mahk. E mwahngih me ke sohte kak pwurala oh wekidala dahme wiawiher. Oh e sohte ketin kasik ken perehsang noumw serio kalokepen dahme e wiao. Tamataman me ma noumw serio nanti laud pwehn pwurodo rehn Siohwa, E uhdahn pahn men ketin kasamwo.​—Luk 15:18-20.

14. Dahme kahrehda kitail anahne kesehla katoutou en medewe me kitail me sapwung ahnsou koaros?

¹⁴ Ahnsou koaros pehm me omw sapwung. Ni atail wiahda dihp, e pwung en ahneki pepehm me kitail wiahda sapwung. Ahpw, Siohwa sohte kupwurki kitail en pehm me ahnsou koaros atail sapwung. Kitail anahne kesehla katoutou wet. Ahpw ia duwen atail ese me atail pepehm nohn daulihala? Ma kitail wehkada dipatail, koluhla, oh wia uwen atail kak koaros pwehn dehr pwurehng wiahda sapwungo, kitail kak kamehlele me Siohwa ketin mahkohngehr kitail. (Wiewia 3:19) Mwurin atail wia soahng pwukat, Siohwa sohte pahn kupwurki kitail en doulahte pehm me ahnsou koaros atail sapwung. E mwahngih me met pahn kamedekeikitailla. (Mel. 31:10) Ma kitail kin nohn nsensuwed, kitail kakete uhdihsang atail weirentang en mour.​—2 Kor. 2:7.

15. Dahme kak seweseiuk en powehdi madamadau me kowe me sapwung ahnsou koaros? (1 Sohn 3:19, 20) (Pil kilang kilel.)

¹⁵ Ia duwen omw kak kesehla katoutouo? Ma ke kin pousehlahte pehm me kowe me sapwung, medemedewehte me Koht kin ketin “mahkohng” kitail. (Mel. 130:4) Ni eh kin ketin mahkohng irail kan me koluhla mehlel, e  ketin inoukihda: “I solahr pahn tamanda arail sapwung kan.” (Ser. 31:34) Met wehwehki me Siohwa sohte pahn ketin pwurehng medewe sapwung kan me e ketin mahkikihong uhk. Eri dehr medewe me kahpwal kan me ke kin lelohng pwehki dipomw, kin wehwehki me e saikinte ketin mahkohng uhk. Oh dehr nsensuwedkihla pein kowe pwehki ele sohla ekei omw pwukoa nan mwomwohdiso. Siohwa sohte kin ketin medemedewehte dipomw kan, oh ken dehr pil wia met.​—Wadek 1 Sohn 3:19, 20.

16. Nin duwen sountangatang kei, dahme kitail anahne pohnese?

¹⁶ Ni atail kin tang nan weirentang en mour, kitail anahne “tang kehlail pwe [kitail] en kana.” (1 Kor. 9:24) Kitail kak wia met ma kitail ese wekpeseng en wisik kan me kitail anahne wahda oh katoutou kan me kitail anahne kesehla. Nan iren onop wet, kitail koasoiapenehr ekeite karasepen dahme kitail anahne wahda oh dahme kitail anahne kesehla. Ahpw mie katoutou teikan. Sises mahsanih me kitail kak “nohn kedirepwki mwenge laud oh sakau laud oh pwunod en mour.” (Luk 21:34) Soahng pwukat oh iren Paipel teikan kak seweseiuk esehda wekidekla kan me ke anahne wiahda ni omw tang nan weirentang en mour.

17. Dahme kahrehda kitail kak kamehlele me kitail pahn kana nan weirentang en mour?

¹⁷ Kitail kak kamehlele me kitail pahn kana nan weirentang en mour pwehki Siohwa pahn ketikihong kitail kehl me kitail anahne. (Ais. 40:29-31) Eri, dehr wawaila! Kahlemengih wahnpoaron Pohl, me tang kehlail pwehn alehdi ketingo me mi mwowe. (Pil. 3:13, 14) Sohte me kak weirkin uhk, ahpw sang ni sapwellimen Siohwa sawas ke kak pweida. Siohwa kak ketin seweseiuk wahda omw wisik kan oh kesehla omw katoutou kan. (Mel. 68:19) Ni Siohwa eh kin ketin ieiang uhk, ke pahn kak dadaurete oh kana nan omw weirentang!