Ia duwe, ke kin wadek kanahieng Kahn Iroir kan me wiawihda nan pahret? Eri, kilang ma ke kak sapengala peidek kan me mi pah:

Soangen dihp dah me Sises mahmahsanih duwe nan kaweido me kileldi nan Madiu 18:15-17?

E mahmahsanih duwen kahpwal kan me kak kapwungpwungla nanpwungen irail kan me pidada. Ahpw dihpo uhdahn laud me kak kahrehiong me dipano en piskenla ma kahpwalo sohte kapwungpwungla. Karasepe, dihpo kak pidada karaun likamw oh pil pitiehdi oh pirapahsang emen mwohni.​—w16.05, pali 7

Dahme ke kak wia pwehn paiekihda laud omw wadawad en Paipel?

Ke kak wia mepwukat: Ahneki toupahrek ni omw wadawad, rapahki iren kasukuhl kan me ke kak doadoahngki nan omw mour; pein idek rehmw peidek kan duwehte ‘Ia duwen ei kak doadoahngki ire wet pwehn sewese meteikan?’; oh doadoahngki mehn sawas kan me mie pwehn wia roporop ong ire ieu me ke ahpwtehn wadek.​—w16.05, pali 24-26.

Ia duwe, e sapwung ong Kristian men en pahtou mendahki e kamehlele duwen kaiasada?

Ahn Kristian men ahneki pwoson duwen kaiasada sohte kin kihsang pahtou laud me e ele kin ahneki. Eipraam pahtouki mehlahn Sara. (Sen. 23:2) Kedekedeo, ahn emen pahtou pahn tikitikla.​—wp16.3, pali 4.

Nin duwen me kileldi nan Esekiel irelaud 9, ihs me ohl me weuwa mehn ntingo oh ohl wenemeno me weuwa tehtehn pei ko kin karasaraskihong?

Kitail wehwehki me irail pwukat karasaraskihong karis en tohnleng kan nanleng me iang pidada nan kasohrlahn Serusalem oh me pahn iang pidada nan kasohrlahn koasoandi suwed wet ni Armakedon. Nan atail ahnsou, ohl me weuwa mehn ntingo karasaraskihong Sises Krais, me kin ketin kilelehdi irail kan me pahn komourla.​—w16.06, pali 16-17.

Paipel pitsang soangen kahpwal dah kan?

E pitsang (1) kahpwal me pid ohlahn soangen dipwisou kan me sounnting kan kin nting loale, duwehte tuhke papyrus oh kilin mahn; (2) uhwong sang palien politik oh kaunen pelien lamalam kan me song en kauwehla; oh (3) ekei ar songosong en wekidala rohng me mi loale.​—wp16.4, pali 4-7.

Dahme Kristian men kak wia pwehn kihsang soahng kan me sohte nohn kesempwal nan eh mour?

Kilelehdi soahng kan me ke anahne, oh dehr doadoahngki noumw mwohni ong soahng kan me ke sohte uhdahn anahne. Koasoanehdi dahme ke anahne pwainda nan wihk de sounpwong koaros oh ia uwen mwohni me ke kak doadoahngki. Netikihla, kisakiskihla, de kesehla soahng kan me ke sohte kin doadoahngki, oh mwadang pwainla pweipwand koaros me ke ahneki. Medewehda ia duwen omw kak katikala omw ahnsou ong omw doadoahk en mwohnio, oh pilahnihada ia duwen omw kak kalaudehla omw doadoahk en kalohk.​—w16.07, pali 10.

Dahme Paipel kasalehda me uhdahn kesempwalsang kohl de silper?

Sohp 28:12, 15 kasalehda me erpit sang rehn Koht uhdahn mwahusang kohl de silper. Ni omw rapahki met, doadoahk laud pwe ken kolokolte omw aktikitik oh kehlail nan pwoson.​—w16.08, pali 18-19.

Ia duwe, e konehng brother men rahnwet en mie eh alis?

Nan ekei sahpw, re kin pwungki alis me soandi oh reirei mwahu oh me sohte kin kasohwe aramas en rong rongamwahu en Wehio me kitail kin padahngki. Ahpw mendahki met, ekei brother ele kin pilada en sohte mie arail alis. (1 Kor. 8:9) Nan ekei tiahk oh wasa, aramas ako sohte mwahuki alis oh re sohte medewe me e konehng Kristian men en mie eh alis.​—w16.09, pali 21.

Dahme kahrehda kitail kak kamehlele duwen koasoipen Depit eh pelian Kolaiad me kileldi nan Paipel?

Kolaiad ins weneute (15 cm) reireisang aramas me keieu reirei me kileldi nan atail ahnsou. Depit uhdahn aramas men, nting kan ni takai kesempwal ehu me koasoia duwen kadaudoken Depit oh pil dahme Sises mahsanih me kadehdehda duwen met. Oaritik en wasa kan me kileldi nan Paipel kin pahrekiong ire mehlel kan me me tohto kin ese duwe.​—wp16.5, pali 13.

Ia duwen loalokong, wehwe, oh erpit ar wekpeseng?

Aramas emen me ahneki loalokong kin ese ire kan de soahng tohto. Emen me kin wehwehki soahng kan kak kilang ia duwen ire kan ar kin dokpene. Ahpw emen me ahneki erpit kak kihpene loalokong oh wehwe oh doadoahngki ni ahl me katapan.​—w16.10, pali 18.