KE LEME ke wia soangen aramas me kin perenki kasalehda kalahngan? Kitail koaros anahne medemedewe duwen peidek wet. Paipel kohpada me nan atail ahnsou, aramas tohto “sohte pahn kin kasapahlkalahngan.” (2 Tim. 3:2) Ele ke tuhwongehr soangen aramas me kin kasik me meteikan anahne wia de kihong irail soahng kan. E mwomwen me re kin leme me re sohte anahne kalahnganki dahme re alehdi. Ia duwe, ke seu pwungki me e sohte kaperen en mihseli rehn soangen aramas duwehte me?

Weksang met, Siohwa mahsanihong sapwellime ladu kan: “Kumwail en kin kasalehda kalahngan.” Kitail en pil kin “kalahnganki mehkoaros.” (Kol. 3:15; 1 Des. 5:18) Ni mehlel, e mwahu ong kitail en kin kasalehda kalahngan. Mie kahrepe mwahu tohto me kitail en wia met.

Ehu kahrepe mwahu me kitail en kakairada madamadau en kalahngan iei me e kak sewese kitail en ahneki madamadau pwung duwen pein kitail. Ni emen eh nda kalahngan ong emen, ele met kin kaperenda ih, oh mwein e pil kaperenda mehmeno me e ndaiong kalahngan. Dahme kahrehda kalahngan kin kaperenda kitail oh pil meteikan? Nna medewehla karasaras wet: Ma meteikan perenki kihong arail ahnsou en wiahda soahng mwahu ehu ong uhk, met pwehki re medewe me ke warohng alehdi soahng mwahu ehu, kaidehn? Irail kin nsenohkin uhk. Ni omw kehn soangen nsenoh wet, e kahrehiong uhk en ahneki madamadau pwung duwen pein uhk. Kitail kak medewe me met duwehte dahme wiawihong Rud. Pohas uhdahn kadek ong Rud. Met kahrehiong Rud en uhdahn perenda ni eh esehda me mie me nsenohkin ih.​—Rud 2:10-13.

E uhdahn konehng kitail en kasalehda kalahngan ong Koht. Mwein mie ahnsou me ke kin medewe duwen kisakis mwahu tohto me e ketikihda oh pahn doulahte ketikihda, duwehte kapai kan en papah ih oh pil atail anahn en war kan. (Deud. 8:17, 18; Wiewia 14:17) Ahpw kitail en dehr medewe ahnsou kiste duwen sapwellimen Koht kamwahu kan. Kitail en kihong ahnsou laud en medemedewe mwahu duwen kapai tohtohie me Koht ketikihda ni sapan ong kitail oh pil ong irail kan me kitail poakohng. Atail doudouloale duwen kadek sapan en Sounkapikpatailo pahn uhdahn kalaudehla atail kalahngan ong ih oh kakehlailihala atail likih uwen eh ketin poakohng oh kesempwalkin kitail.​—1 Sohn 4:9.

Kitail en medemedewe mwahu duwen soahng kan me Siohwa ketikihong kitail, oh pil kalahngankihong ih sapwellime kamwahu kan. (Mel. 100:4, 5) Mie ekei me nda me “en kasalehda kalahngan ong meteikan wia ahl kesempwal ehu ong onepek mwahu en aramas.”

Pil ehu kahrepen atail en kasalehda kalahngan iei e kin mwahu ong uhk oh pil kakehlakahda omw nanpwungmwahu rehn meteikan. Kitail koaros anahne kalahnganki meteikan oh pil pehm me irail pil kalahnganki kitail. Ni omw kin ni mehlel kalahnganki emen eh wiahda soahng mwahu ehu ong uhk, kumwa pahn karanihala emenemen. (Rom 16:3, 4) Patehng met, aramas me kin kasalehda kalahngan kin perenki sewese meteikan. Irail kin pohnese ni meteikan ar kadek ong irail oh met kamwakid irail en pil kadek ong irail. Ei, atail sewese meteikan kin wadohng kitail peren. E duwehte dahme Sises mahsanih: “Kihwei kin kaperen sang ale.”​—Wiewia 20:35.

Robert Emmons me wia sounsawas ong director en pwihn ehu me wia roporop duwen irair en kalahngan nan sukuhl laud ehu (University of California) nda: “Pwehn kasalehda kalahngan, kitail anahne wehwehki me kitail anahne meteikan pwehn wia met. Ekei pak kitail kin kihwei oh ekei pak kitail kin ale.” Pwehn wie momour oh pil mour nsenamwahu, kitail anahne sawas oh utuht sang meteikan ni ahl tohto. Karasepe, meteikan ele kin  kihong kitail kanatail mwenge de pil apwalih kitail ni atail kin soumwahuda. (1 Kor. 12:21) Emen me kin kalahngan kin uhdahn kalahnganki soahng mwahu kan me meteikan wiahiong ih. Eri ia duwe, ke wiahkilahr tiahk ehu ken kin kalahnganki dahme meteikan wiahda ong uhk?

Pil ehu kahrepen ken kakairada irair en kalahngan iei me omw kasalehda kalahngan kin seweseiuk ahneki madamadau pwung ahpw kaidehn madamadau sapwung duwen soahng kan. Omw madamadau kak doadoahk rasehng mehn kamwakel me kin katohre me mwakelekel sang me samin. Ke kak kilang soahng kan limwahmw ahpw ni ahnsowohte katohrehla irair mwahu kan sang irair suwed kan. Ke pahn kin men medemedewehte soahng mwahu kan oh sohte medewe kahpwal kan. Uwen laud en omw kalahngan, ih pil uwen laud en omw kak kilang soahng mwahu kan, oh met pil kalaudehla omw kalahngan. Ma ke kin medemedewehte soahng kan me ke kak kalahnganki, e pahn seweseiuk en wia dahme wahnpoaron Pohl nda: “Kumwail en pereperenki Kauno ahnsou koaros.”​—Pil. 4:4.

Kasalehda kalahngan kin seweseiuk ken dehr medewe soahng kan ni sapwung. E kin uhdahn apwal en kasalehda kalahngan ahpw ni ahnsowohte ahneki pepehm en peirin, nsensuwed de kailok, kaidehn? Aramas me kin kasalehda kalahngan pil wia soangen aramas me sohte kin noahrok. Re kin kalahnganki dahme re ahneki oh sohte kin medemedewehte en alehda laudsang.​—Pil. 4:12.

Nin duwen Kristian men, ke ese me Sehdan pahn men ken nsensuwedkihla de mworuskihla kahpwal kan me ke ahneki ni imwin rahn pwukat. E pahn uhdahn perenki ma ke ahnekihda madamadau sapwung oh men kaulim. Soangen madamadau wet pahn kahrehiong uhk en sohte nohn pweida nin duwen sounkalohki rongamwahu men. Ni mehlel, kalahngan oh wahn sapwellimen Koht manaman kin dokpene. Karasepe, kitail kin peren pwehki kitail kilang soahng mwahu kan me Koht ketikihong kitail, oh kitail kin pwoson dahme e ketin inoukihda duwen ahnsou kohkohdo.​—Kal. 5:22, 23.

Pwehki kitail wia sapwellimen Siohwa aramas akan, kitail iang pwungki duwen dahme oaralap wet koasoiahki duwen irair en kalahngan. Ke pil wehwehki me e sohte mengei en kasalehda kalahngan oh ahneki madamadau pwung duwen mour ahnsou koaros. Ahpw dehr nsensuwedkihla met. Ke kak kakairada oh pil kolokol madamadau en kalahngan. Ia duwen? Kihong ahnsou ken kin medemedewe duwen soahng kan nan omw mour me ke kak kalahnganki. Uwen laud en omw wia met pahn pil kalaudehla omw ahnla kasalehda kalahngan. Met pahn kahrehiong uhk en peren laudsang irail kan me medemedewehte kahpwal kan en mour. Medewe duwen soahng mwahu kan me Koht ketin wiahda oh pil dahme meteikan wiahda me kin kahrehiong uhk peren. Ke kak pil tepida ntingihedi ehuehu rahn duwen soahng pwukat. Ke kak ntingihedi soahng riau de siluh me kahrehiong uhk en kalahnganki duwen rahno.

Ekei sounwia roporop kan diarada me ni atail kin kaukaule kasalehda kalahngan ong meteikan, e kak wekidala mwomwen atail mwahliel eh kin doadoahk pwe en kamengeila atail en perenki atail mour. Aramas men me kin kalahngan kin wia aramas peren men. Eri medewehla soahng mwahu koaros me ke alehdi, perenki soahng mwahu kan me wiawihong uhk, oh ahnsou koaros kasalehda kalahngan! Kitail en dehr isanekihla soahng mwahu kan, ahpw kitail en “patohwan kapingkalahngan ong KAUN-O, pwehki ih me kupwur mwahu.” Ei, kitail en “kalahnganki mehkoaros.”​—1 Kron. 16:34; 1 Des. 5:18.