Ke kak sapengala peidek pwukat me poahsoanda sang nan Kahn Iroir en 2019?

Ia wehwehn sapwellimen Koht inou me mahsanih: “Sohte tehtehn mahwen ehu pahn kak kauweiukala”? (Ais. 54:17)

Kitail kak kamehlele me Koht pahn ketin pere kitail sang pwihnen aramas lemei kan me rasehng “melimel ni ahnsoun kopou.” (Ais. 25:4, 5) Atail imwintihti kan sohte pahn kak kauweikitailla kohkohlahte.​—w19.01, pali 6-7.

Ia duwen sapwellimen Koht wiewia ong mehn Kenan kan oh mehn Israel kan me sohla lelepek eh kasalehda sapwellime pwung pahrek?

Koht ketin kadeikada irail akan me kin iang wia soahng kasaut kan me pidada tiahk samin me pid wia nsenen pwopwoud de wiakauwe lih oh seri kan. E ketin kapaiahda irail kan me kin peikiong ih oh kasalehda wiewia pahrek ong meteikan.​—w19.02, pali 22-23.

Dahme kitail pahn wia ma kitail mi wasa ehu me emen me kaidehn Sounkadehdehn Siohwa kapakap?

Kitail kak nennenlahte oh kasalehda wahu ahpw sohte nda “amen” de koledi pehn irail kan me iang mi mwo. Kitail kak wia pein atail kapakap ni ngihl tikitik.​—w19.03, pali 31.

Ia uwen laud en dipen tiahk suwedih seri?

Tiahk suwedih seri wia dihp ehu ong me lelohng tiahk lemei wet, ong mwomwohdiso, ong irail kan me ahneki manaman, oh pil ong Koht. Ma kosonned en wehi anahne elder kan en ripohtki kadipadip ehu me emen tiahk suwedih seri, elder kan kin peikiong.​—w19.05, pali 9-10.

Ia duwen omw kak wekidala de kamwahwihala omw elen madamadau?

Kahk kesempwal kan: Kapakap ong Siohwa. Doudouloale ni omw nantihong en kasawih duwen pein kowe. Pilada ni loalokong omw werek kan.​—w19.06, pali 12.

Dahme kitail kak wia met pwehn kaunopada ong kalokolok kan?

Kitail anahne kakehlakahda atail nanpwungmwahu rehn Siohwa. Likih me e kin ketin poakohng kitail oh sohte pahn ketin likidmelieikitailla. Wadek Paipel rahn koaros, oh kaukaule kapakap. Uhdahn kamehlele me kapai kan en Wehio pahn pweida. Wadlikihala iren Paipel kan oh koul en kaping kan me ke keieu perenki.​—w19.07, pali 2-4.

Dahme kitail kak wia pwehn sewese kisehtail kan en poadoandoarla?

E kesempwal kitail en kasalehda me kitail kin wehwehki arail pepehm, atail mehn kahlemeng en wia mehn kadehde mwahu, oh kitail en kanengamah oh ese lamalam ni atail koasoiong irail.​—w19.08, pali 15-17.

Ia duwen atail pahn diar nsenamwahu, nin duwen me Sises ketin inoukihda nan Madiu 11:28?

Kitail ahneki sounapwalih Kristian kan me limpoak, kompoakepah kan me keieu mwahu, oh doadoahk me keieu mwahu.​—w19.09, pali 23.

Ia duwen Koht eh kak ketikihong kitail ineng oh kehl en wia doadoahk? (Pil. 2:13)

Ni atail wadek Mahsen en Koht oh doudouloale, Koht kak ketin kakehlakahda kitail, ketikihong kitail ineng en wia kupwure oh kehl en wia doadoahk. Sapwellime manaman kak kalaudehla atail koahiek kan.​—w19.10, pali 21.

Kahk loalokong dah kan me ke anahne wia mwohn omw wiahda pilipil laud ehu?

Iet akan kahk limau: Wia roporop ni keneinei. Kapakapki erpit. Tehk mwahu kahrepen omw wiahda pilipil ehu. Koasoanehdi ni oaritik omw mehn akadei kan. Pohnese dahme ke kak de sohte kak wia.​—w19.11, pali 27-29.

Padahk me dene mie mehkot me soh sansal nan paliwar kin wie momour mwurin mehla tepida sang dahme Sehdan ndaiong Ihp?

Soh. Sehdan ndaiong Ihp me Ihp sohte pahn mehla, kaidehn e pahn ihte mwomwen mehla. Padahk en lamalam likamw koaros sohrala nan Nohliko. Padahk me dene mie mehkot me soh sansal nan paliwar kin wie momour mwurin mehla ele tepida miehla mwohn Koht eh ketin kalipilipala aramas ako me kauwada ihmw doulik en Papel ong wasa koaros nin sampah.​—w19.12, pali 15.