1. Pwukoa dahieu me Siohwa ketikihong pahpa nohno kan?

SIOHWA ketin kapikada tepin pwopwoudo ira en men naineki seri kan. Ni pwung Paipel mahsanih: “Seri kan, iei kisakis ehu sang rehn KAUN-O.” (Mel. 127:3) Ia wehwehn met? Medewehla ma kompoakepahmw keren men kihong uhk uwen mwohni laud ehu oh peki ken apwalih mwahu ong ih. Ia pahn omw pepehm? Ele ke pahn pohlki eh likih iuk. Ahpw mwein ke pahn pwunodki ia duwen omw pahn apwalih mwahu mwohnio. Kompoakepatail keieu kereno, Siohwa, ketikihong pahpa nohno kan mehkot me uhdahn kesempwalsang mwohni me ren apwalih. E ketikihong irail pwukoahn tehk mwahu me neirail seri kan en alehdi epwel mwahu oh mour nsenamwahu.

2. Peidek dah kan me kitail pahn koasoiapene?

² Ihs me pahn pilada ma pwopwoud ehu pahn naineki seri oh pil iahd me ira en naineki seri? Oh dahme pahpa nohno kan kak wia pwehn sewese neirail seri kan en ahneki mour nsenamwahu? Tehk ekeite kaweid oh ire mehlel kan nan Mahsen en Koht me kak sewese pwopwoud Kristian kan ren wiahda pilipil mwahu kan.

3. (a) Ihs me anahne pilada ma pwopwoud ehu pahn naineki seri de soh? (b) Ire mehlel dahieu en Paipel me kompoakepahn oh peneinei en pwopwoud ehu anahne medemedewe?

³ Nan ekei tiahk en sahpw, aramas akan kin kasik me pwopwoud kapw kan en mwadang tepida naineki seri. Peneinei kan oh pil meteikan ele kin song en idingkihong pwopwoud kapw ehu en idawehn soangen tiahk wet. Jethro, emen brother sang Eisia, nda: “Nan at mwomwohdiso, ekei me naineki seri kin idingki pwopwoud kan me sohte neirail seri ren tepida naineki seri.” Jeffrey, pil emen brother sang Eisia, koasoia: “Ekei kin  ndaiong pwopwoud kan me sohte neirail seri me sohte me pahn apwalih irail ahnsou me re mahla.” Ahpw ehuehu pwopwoud anahne pein pilada ma ira pahn naineki seri de soh. Ira me pahn pilada; ih met ara pwukoa. (Kal. 6:5, ntp.) Ei mehlel, peneinei kan oh kompoakepah kan kin men pwopwoud kapw ehu en peren. Ahpw koaros anahne tamataman me pwopwoudo iei me ahneki pwuhng en pilada ma ira pahn naineki seri de soh.​—1 Des. 4:11.

4-5. Ire riau dah kan me pwopwoud ehu anahne koasoiapene, oh iahd me keieu mwahu ira en wia met? Menlau kawehwehda.

⁴ Pwopwoud ehu me pilada ira en naineki seri anahne koasoiapene ire kesempwal riau: Keieu, iahd me ira men naineki seri? Keriau, meh depe me ira men naineki? Ahnsou dah me keieu mwahu ong pwopwoud ehu en koasoiapene met? Oh dahme kahrehda ire riau pwukat uhdahn kesempwal?

⁵ Pali laud en ahnsou, mwohn pwopwoud ehu pwopwoudida, ira anahne koasoiapene duwen ara pahn naineki seri. Dahme kahrehda ahnsowo me mwahu? Ehu kahrepe mwahu iei e inenen kesempwal ira en ahnekipene soangen madamadau ehute duwen ire wet. Pil ehu, ira pahn anahne medewe ma ira onopadahngehr en alehdi pwukoa wet. Ekei pwopwoud kin pilada en awih sounpar ehu de riau mwurin rahnen kapwopwoudo mwohn ira naineki seri pwehki ni ara wiahla pahpa nohno, ira pahn doadoahngki ara ahnsou oh kehl laud en apwalih neira seri kan. Ira medewe me ma ira awih mahs, met pahn kihong ira ahnsou en ahnla mihmihpene nin duwen pwopwoud ehu oh karanihala emenemen.​—Ep. 5:33.

6. Ia duwen soangen ahnsou me kitail miher loale eh kamwakid ekei pwopwoud?

⁶ Ekei pwopwoud Kristian kan kin pilada en alasang mehn kahlemeng en nein Noha ohl silimeno oh arail pwoud ko. Pwopwoud siluh pwuko sohte mwadang nainekihda seri. (Sen. 6:18; 9:18, 19; 10:1; 2 Pit. 2:5) Sises ketin karasahiong atail ahnsou “ni mwehin Nohao,” oh kitail pil mieier ni “ahnsou apwal oh keper.” (Mad. 24:37; 2 Tim. 3:1) Pwehki kahrepe pwukat, ekei pwopwoud pilada en awih mahs mwohn arail naineki seri, pwe irail en kak kihong arail ahnsou laud ong papah Siohwa.

7. Ia duwen kaweid oh ire mehlel kan en Luk 14:28, 29 oh Lepin Padahk 21:5 ar kak sewese pwopwoud ehu?

⁷ Ni ar wia pilipil ma irail pahn naineki seri oh meh depe me ren naineki, pwopwoud kan me ahneki erpit kin “kapatahda uwen pweine.” (Wadek Luk 14:28, 29.) Pwopwoud kan me  eseier duwen epwel seri kin nda me e sohte ihte pweilaud en apwalihada seri ahpw e pil kin kihsang ahnsou oh kehl laud. Eri, e kesempwal ong pwopwoud ehu en medemedewe soangen peidek pwukat: ‘Kita koaros anahne doadoahk pwehn pwainda anahn akan en ata peneinei? Kita pwungkipenehr soangen “anahn” dah kei me? Ma kita pahn doadoahk, ihs me pahn kilang neita seri kan? Ihs me pahn kakete kamwakid arail madamadau oh wiewia kan?’ Pwopwoud kan me kin koasoiapene ni meleilei soangen peidek pwukat kin doadoahngki kaweid en Lepin Padahk 21:5.​—Wadek.

8. Kahpwal dah kan me pwopwoud Kristian kan anahne kasik, oh dahme ohl pwopwoud limpoak men pahn wia?

⁸ Seri men warohng ale oh pil anahne ahnsou oh kehl laud sang eh pahpa nohno. Eri ma pwopwoud ehu nainekihda seri kan me arail sounpar kerenpene, ira kakete apwalki en kihong emenemen seri ko ara ahnsou oh kehl. Ekei pwopwoud me naineki seri tohto nda me re pehm me pwukoa wet nohn laud. Nohno men ele kin ahnsou koaros pwangada, kaidehn ihte ni war ahpw pil ni pepehm. Ele e kin nohn pwangada kahrehda e sohla ahneki kehl en kaukaule onop, kapakap, oh kalohk. E pil kak apwalki en rong mwahu oh paiekihda padahk kan erein mihting kan. Ohl pwopwoud limpoak men pahn wia dahme e kak wia pwehn sewese eh pwoudo ni ahnsou me neira seri kan anahne ira, ni ahnsoun mihting oh ni imwarailo. Karasepe, e kak sewese eh pwoudo wia doadoahk kan en nan ihmw. E pahn doadoahk laud en tehk mwahu me koaros paiekihda arail kin kaukaule wia arail prokram en Kaudok en Peneinei. Oh pahpa Kristian kan pahn kin kaukaule iang eh peneineio nan kalohk.

9-10. Dahme pahpa nohno kan anahne wia pwehn sewese neirail seri kan?

⁹ Soahng dah kei me pahpa nohno kan kak wia pwehn sewese neirail seri kan en sukuhlki en poakohng Siohwa? Ia duwen arail kak pere neirail seri kan sang soahng keper kan en sampah suwed wet? Tehk ekei kahk kan me pahpa nohno kan kak wia.

¹⁰ Kapakapki sapwellimen Siohwa sawas. Medewehla duwen mehn kahlemeng en Manoha oh eh pwoudo, me wiahla ahn Samson pahpa oh nohno. Ni Manoha eh esehda me ih oh eh pwoudo pahn nainekihda pwutak men, e patohwan peki Siohwa en ketikihong ira kaweid duwen ara pahn apwalihada serio.

11. Ia duwen pahpa nohno kan ar kak alasang mehn kahlemeng en Manoha, nin duwen me Sounkopwung 13:8 kasalehda?

¹¹ Nihad oh Alma, sang Bosnia oh Herzegovina, sukuhlki sang mehn kahlemeng en Manoha. Ira nda: “Duwehte Manoha, se patohwan peki Siohwa en ketin kaweid kiht duwen at  pahn wia pahpa nohno mwahu kei. Oh Siohwa ketin sapengala at kapakap kan ni soangsoangen ahl akan​—sang nan Paipel, sang sawaspen Paipel kan, sang mihting en mwomwohdiso, oh mihting tohrohr kan.”​—Wadek Sounkopwung 13:8.

12. Mehn kahlemeng dahieu me Sosep oh Mery wiahda ong neira seri kan?

¹² Wia kasukuhl sang omw mehn kahlemeng kan. Dahme ke nda kin kesempwal; ahpw dahme ke wia pahn kamwakid laud noumw serio. Kitail kak kamehlele me Sosep oh Mery wiahda mehn kahlemeng mwahu ong neira seri ko, iangahki Sises. Sosep kin doadoahk laud pwehn apwalih eh peneineio. Patehng met, Sosep pil kin kangoange eh peneineio en perenki papah Siohwa. (Deud. 4:9, 10) Mendahki Kosonnedo sohte nda me Sosep anahne kahre eh peneineio en iang ih kohla Serusalem “nan pahr koaros” pwehn kasarawih Pahsohpao, e kin wia met. (Luk 2:41, 42) Mwein pahpa teikan ni eh mwehio medewe me e nohn apwal, nohn pweilaud oh pil anahne ahnsou laud en kahre ar peneinei pwon nan seiloak wet. Ahpw Sosep kin kesempwalki soahng kan me pidada eh kaudok ong Siohwa oh kin padahkihong nah seri kan en wia duwehte. Mery pil esehla mwahu Nting Sarawi kan. Sang eh lokaia oh wiewia, e uhdahn padahkihong nah seri ko en poakohng Mahsen en Koht.

13. Ia duwen pwopwoud ehu ara idawehn mehn kahlemeng en Sosep oh Mery?

¹³ Nihad oh Alma, me kitail koasoia mwoweo, men idawehn mehn kahlemeng en Sosep oh Mery. Ia duwen met eh sewese ira en apwalihada neira pwutako en poakohng oh papah Koht? Ira nda, “Sang ni mwomwen at mour, se song en kasalehiong nait pwutako ia uwen mwahu en kin mour pahrekiong sapwellimen Siohwa kaweid kan.” Nihad pil nda, “Ken wiahla soangen aramas me ke men noumw serio en wiahla.”

14. Dahme kahrehda pahpa nohno kan anahne ese ihs me neirail seri kan kin werekiong?

¹⁴ Sewese noumw seri kan en pilada werek mwahu kan. Pahpa oh pil nohno anahne ese ihs me neira seri kan kin werekiong oh dahme irail kin wiewia. Met wehwehki me ira anahne ese ihs me neira seri kan kin koasoiong nan social media oh nan neirail sehlpwohn kan. Soangen werek pwukat kak kamwakid ahn seri ko ar madamadau oh wiewia kan.​—1 Kor. 15:33.

15. Dahme pahpa nohno kan kak sukuhlki sang mehn kahlemeng en Jessie?

¹⁵ Dahme pahpa nohno kan kak wia ma re sohte nohn ese duwen kompiuder de sehlpwohn ape? Jessie, pahpa men nan Philippines, nda: “Se sohte nohn ese duwen dipwisou kan duwehte kompiuder ape. Ahpw met sohte kauhdi kiht sang at padahkihong nait seri kan duwen keper kan me kak kohsang soangen dipwisou pwukat.” Jessie sohte keinepwihsang nah seri ko dipwisou pwukat ihte pwehki e sohte nohn ese duwen soahng pwukat. E koasoia: “I kin kangoange nei seri kan en doadoahngki neirail sehlpwohn de tablet ape pwehn sukuhlki ehu lokaia tohrohr, kaunopada ong mihting kan, oh wadek Paipel rahn koaros.” Ma kowe pahpa de nohno men, ia duwe, ke wadekehr oh koasoiaiong noumw seri kan duwen kaweid toupahrek me pid text emen oh kihda kilel nan Internet? Ke kak diar met nan jw.org^® pahn oaralap “Teenagers.” Ia duwe, ke iang noumw seri kan tehksapahl kisin kasdo ko Who’s in Control​—You or Your Devices? oh Be Social-Network Smart? * Oaralap wet kak kadoadoahk ni omw padahkihong noumw seri kan duwen arail en doadoahngki ni loalokong dipwisou kan me duwehte kompiuder ape.​—Lep. Pad. 13:20.

16. Dahme pahpa nohno tohto kin wia, oh ia imwilahn met?

 ¹⁶ Pahpa nohno tohto kin nantihong en koasoanehdi ahnsou ong neirail seri kan en werekiong irail kan me wia mehn kahlemeng mwahu en papah Koht. Karasepe, N’Déni oh Bomine, pwopwoud ehu sang Côte d’Ivoire, kin kalapw lukehdo sounapwalih me kin seiloak en mi ni imwarao. N’Déni koasoia: “Met uhdahn mwahu ong nait pwutako. E tepida pioneer oh met e kin papah nin duwen wiliepen sounapwalih me kin seiloak.” Ia duwe, ke kak koasoanehdi ahnsoun werek mwahu me duwehte met ong noumw seri kan?

17-18. Iahd me pahpa nohno kan anahne tepida kaiahne neirail seri kan?

¹⁷ Tepida mwadang en kaiahne noumw seri kan. Ma pahpa nohno kan tepida mwadang en kaiahne neirail seri kan, e pahn uhdahn mwahu. (Lep. Pad. 22:6) Medewehla Timoty, me mwuhr iang wahnpoaron Pohl seiloakseli. Ahn Timoty nohno, Iunis, oh eh nohno kahlapo Lois, kaiahnehda ih ‘sang ni eh seri pwelel.’​—2 Tim. 1:5; 3:15.

¹⁸ Pil ehu pwopwoud sang Côte d’Ivoire, Jean-Claude oh Peace, pil kak en kaiahnehda neira seri wenemen ko koaros en poakohng oh papah Siohwa. Dahme sewese ira en pweida mwahu? Ira idawehn mehn kahlemeng en Iunis oh Lois. Ira nda, “Se kin pwurupwurehng padahki oh katamanki nait seri kan duwen Mahsen en Koht sangete ar pwelel, se tepida mwurinte arail ipwidi.”​—Deud. 6:6, 7.

19. Ia wehwehn en padahkihong noumwail seri kan Mahsen en Koht?

¹⁹ Ia wehwehn en “padahkihong” noumwail seri kan Mahsen en Siohwa? Nan Deuderonomi 6:7, lepin lokaiahn Ipru me kawehwehdi ong “padahkihong” kin wehwehki en “kalapw pwurupwurehng padahki oh katamanki.” Pwehn wia met, pahpa nohno kan anahne kalapw kihong ahnsou en mi rehn neirail seri kan. Ekei pak pahpa nohno kan kakete tihwohkihla arail pwurupwurehng kaweid neirail seri kan. Ahpw pahpa nohno kan kak nantihong en kilangwohng met nin duwen ahnsou mwahu ehu en sewese neirail seri kan en wehwehki Mahsen en Koht oh kapwaiada.

20. Menlau kawehwehda ia duwen omw kak doadoahngki dahme Melkahka 127:4 mahsanih pwehn kaiahne noumw seri kan.

²⁰ Esehla mwahu noumw seri kan. Melkahka  127 kin karasahiong seri kan arep kei. (Wadek Melkahka 127:4.) Duwehte arep kan ar kak wiawihda sang soangsoangen mehkan oh pil ni soangsoangen sais, emenemen seri kin wekpeseng. Eri pahpa nohno kan anahne koasoanehdi ia duwen arail en kaiahne emenemen neirail seri kan. Pwopwoud ehu nan Israel rahnwet me pweida mwahu nan ara apwalihada neira seri riemeno pwehn papah Siohwa koasoiahda dahme kin sewese ira. Ira nda: “Se kin katohrepeseng nait seri ko oh onop rehn emenemen.” Mehlel, emenemen tapwin peneinei pahn koasoanehdi ma irail kak de ma irail anahne idawehn elen wia onop wet de soh.

21. Soangen sawas dah me pahpa nohno kan kak kasik sang rehn Siohwa?

²¹ Ekei pak pahpa nohno kan kin pehm me e nohn apwal en padahki neirail seri kan, ahpw seri kan wia kisakis ehu sang rehn Siohwa. Siohwa kin ahnsou koaros ketin onopada en ketin sewese pahpa nohno kan. E kin ketin kupwurperenki karonge kapakap en pahpa nohno kan. Oh e kin ketin sapengala kapakap pwukat sang nan Paipel, neitail sawasepen Paipel kan, oh pil mehn kahlemeng oh kaweid en pahpa nohno koahieklahr kan nan mwomwohdiso.

22. Nanpwungen soahng dah kan me keieu mwahu me pahpa nohno kan kak kihong neirail seri kan?

²² Ekei aramas nda me ke kin anahne sounpar 20 pwehn apwalihada seri men, ahpw pahpa nohno kan sohte kin uhdahn uhdihsang arail wia pahpa oh nohno. Nanpwungen soahng kan me keieu mwahu me re kak kihong neirail seri kan iei arail limpoak, arail ahnsou, oh kaiahn me poahsoanda sang Paipel. Emenemen seri eh pahn mwekidki kaiahn wet kin wekpeseng. Ahpw seri tohto me ale kaiahn sang pahpa nohno kan me kin poakohng Siohwa kin ahneki soangen pepehmohte me Joanna Mae, sister men nan Eisia, ahneki. E nda: “Ni ei tamanda kaiahn me I alehdi sang ei pahpa oh nohno, I inenen kalahnganki ara kaweid ie oh padahkihong ie en poakohng Siohwa. Ira sohte ihte kihong ie mour, ahpw ira kihong ie mour ehu me mie katepe.” (Lep. Pad. 23:24, 25) Riatail Kristian rar rar kei ahneki soangen pepehmohte.