E sansal me soh. Tepilo sohte padahkihong Ihp me ma Ihp kang sang wahntuhkeo me Koht ketin keinepwihsang, paliwereo pahn mehla ahpw mehkot me soh sansal nan paliwereo pahn wie momour ehu wasa tohrohr. Sehdan doadoahngki serpent men oh nda me ma Ihp kang wahntuhkeo, Ihp uhdahn “sohte pahn mehla.” E mwomwen ndinda me dene Ihp pahn doulahte wie momour nin sampah oh pereperenki mour me mwahusang, mour ehu me uhtohr sang Koht.​—Sen. 2:17; 3:3-5.

Ma padahk likamw pwoatet, me aramas tohto kin kamehlele rahnwet, sohte tepisang nan Ihden, eri iahd me e wiawihda? Kitail sohte kak uhdahn ese iahd. Ahpw kitail ese me kaudok likamw koaros sohrala nan Nohliko ni mwehin Nohao. Sohte lamalam likamw ehu pitla mwurin Nohliko pwehki Noha oh eh peneineio kelehpw​—me wia tohnkaudok mehlel kei—​me pitla.

Eri, padahk me dene mie mehkot me soh sansal nan paliwar me kin wie momour mwurin mehla ele tepida mwurin Nohliko. Ni ahnsou me Koht ketin kapingada lokaiahn aramas koaros nan Papel oh ketin kalipeihrpeseng “ong wasa koaros nin sampah,” lamalam me dene mie mehkot me soh sansal nan paliwar me kin wie momour mwurin mehla pil iangete irail kohpeseng wasa koaros. (Sen. 11:8, 9) Sohte lipilipil iahd me lamalam de padahk likamw pwoatet tepida, kitail kak kamehlele me Sehdan, me wia “semen likamw,” iei me kahrehda likamw wet en miehla oh e perenki kilang likamw wet eh kohpeseng wasa koaros.​—Sohn 8:44.