Dahme wiawi nan Deuderonomi 22:25-27 sohte pidadahte en kadehdehda me ohlo dipada, pwehki e sansal me ohlo dipadahr. Kosonned wet wiawihda pwehn kadehdehda en serepeino eh sohte wiahda sapwung. Tehk audepen irelaudo.

Iretikitik kan en mwoweo koasoia duwen ohl emen me wia nsenen pwopwoud ong emen lih “nan kahnimw ehu” me inouongehr emen tohrohr. Ni ohlo eh wia met, e dipikihda dipen kamwahl pwehki aramas akan kin kilangwohng liho me e pwopwoudlahr. Ahpw ia duwen liho? E “sohte likwerih sawasepe” nan kahnimwo. Ma e weriwer, meteikan pahn uhdahn rong ih oh pahn sewese. Ahpw e sohte weriwer. Kahrehda e iang kamwahl, eri ira ale kadeik oh ira koaros sapwung.​—Deud. 22:23, 24.

Kosonnedo pil koasoia ehu irair tohrohr: “Ma ohl emen angkehlailiong serepein men nansapw oh serepeino inouongehr emen tohrohr, eri, ohlohte me pahn kamakamala; sohte mehkot pahn wiawihong serepeino, pwe e sohte wiahda dihp ehu me konehng en kamakamkihla. Soangen ire wet kin duwehte ni ohl emen eh peiong emen ohl oh kemehla. Ohlo angkehlailiong serepein me mie eh inowo nansapw, eri, mehnda ma serepeino likwerih sawasepe, ahpw sohte me kak sewese.”​—Deud. 22:25-27.

Nan irair wet, sounkopwung kan kamehlele liho. Ni ahl dah? Irail medewe me liho “likwerih sawasepe, ahpw sohte me kak sewese.” Eri liho sohte kamwahl. Ahpw ohlo me dipikihda dipen angkehlail oh kamwahl pwehki e “angkehlailiong” liho me inouongehr emen tohrohr.

Eri, mendahki kosonned wet kin koasoia me liho sohte sapwung, iren Paipel pwukat ni pwung kawehwehda me ohlo me dipikihda dipen angkehlail oh kamwahl. Kitail kak kamehlele me sounkopwung ko pahn “rapahki ni keneinei” oh wiahda pilipil me poahsoankihda koasoandi kan me Koht ketin pwurupwurehng ketikihda ni sansal.​—Deud. 13:14; 17:4; Eks. 20:14.