1-2. (a) Dahkot sounparen onohnsapahl? (Menlau kilang koakon me oaralape “ Dahkot Sounparen Onohnsapahlo?”) (b) Nan Luk 4:16-18, dahme Sises mahmahsanih duwe?

NAN ekei sahpw, kasarawi tohrohr kan kin wiawihda pwehn kasarawih kalimeisek en sounpar me nanmwarki men de lih nanmwarki men kin wie kakaun. Kalimeisek en sounpar kin kalapw adaneki sounpar en onohnsapahl en kaun emen. Aramas akan ele kin kamadipwe pahr tohrohr wet erein rahn ehu, wihk ehu, de pil reireisang, ahpw kamadipw ko kin kedekedeo uhdi, oh peren en ahnsowo pil kin manokonokla mwuhr.

² Kitail pahn tehkpene duwen ehu sounparen onohnsapahl me mwahusang mwo kan, pil mwahusang kasarawih en sounpar 50 koaros me mehn Israel kan mahso kin wia erein sounpar ehu. Sounparen Onohnsapahl en mahso kin kasaledekihala mehn Israel kan. Dahme kahrehda kitail men sukuhlki duwen met? Pwehki e kin katamankihong kitail duwen koasoandi kaselel ehu me Siohwa ketin wiahda ong kitail. E pahn wadohng kitail soangen saledek me pahn mihmi kohkohlahte, oh kitail pil kak paiekihda ahnsou wet. Sises mahsanih duwen saledek kaselel wet.​—Wadek Luk 4:16-18.

3. Nin duwen me Lipai 25:8-12 mahsanih, ia duwen mehn Israel kan ar paiekihda Sounparen Onohnsapahlo?

³ E pahn mengei en wehwehki dahme Sises mahsanihki duwen saledek ma kitail koasoiapene mahs duwen Sounparen Onohnsapahlo me Koht ketin wiahda ong sapwellime aramas akan mahso. Siohwa ketin mahsanihong mehn Israel kan: “Ih duwen met amwail pahn katorehla sounpar kalimeisek wet oh lohkihda saledek ong tohn sahpwo koaros. Nan sounpar wet sahpw akan koaros me netilahr pahn kapwurupwurlahng aramaso me uhdahn sapweniki sahpwo, de kadaudoke kan; oh aramas akan me netilahr nin  duwen lidu pahn pwuralahng rehn arail peneinei.” (Wadek Lipai 25:8-12.) Nan iren onop en mwoweo, kitail koasoiapene ia duwen mehn Israel kan ar paiekihda rahnen Sapad me kin wiawi nan wihk koaros. Ahpw ia duwen arail paiekihda Sounparen Onohnsapahlo? Ni karasaras, medewehla mehn Israel men me mihla nan pweipwand laud oh anahne netikihla sapweo pwehn pwainla eh pweipwando. Erein Sounparen Onohnsapahlo, e pahn pwurehng ale sapweo. Sapweo me e netikihla pahn kakehr “kapwurupwurlahng” ih, oh mwuhr nah seri kan pahn sohsohki sahpwo. De mwein emen ohl mihla nan pweipwand laud me kahrehda e anahne netikihla pein ih de emen nah seri ko en wiahla lidu pwehn kak pwainla pweipwando. Erein Sounparen Onohnsapahlo, lidu menet pahn ‘pwuralahng rehn eh peneineio.’ Eri sohte emen pahn wiahla lidu kohkohlahte me sohte mie koapworopwor en saledekla! Koasoandi wet kasalehda me Siohwa kin uhdahn ketin nsenohki sapwellime aramas akan!

4-5. Dahme kahrehda e kesempwal kitail en sukuhlki duwen Sounparen Onohnsapahlo?

⁴ Ia pil ehu kamwahu me Sounparen Onohnsapahlo kihda? Siohwa ketin mahsanih: “KAUN-O, amwail Koht, pahn ketin kupwuramwahwih kumwail nan sahpw me e pahn ketikihong kumwail. Sohte emen kumwail pahn semwehmwehla.” (Deud. 15:4) Met inenen weksang dahme kin wiewiawi nan sampah rahnwet, me aramas kepwehpwe kan kin wie kepwkepwehpwehla oh me semwehmwe kan kin wie semwsemwehmwehla!

⁵ Pwehki kitail Kristian kei, kitail sohte mi pahn Kosonned en Moseso. Met wehwehki me kitail sohte kin idawehn koasoandi en Sounparen Onohnsapahl me kin kasaledekihala lidu kan, kasohrehla pweipwand, oh kapwurehiong aramas akan uhdahn sapwarail kan. (Rom 7:4; 10:4; Ep. 2:15) Ahpw e kesempwal kitail en sukuhlki duwen Sounparen Onohnsapahlo. Dahme kahrehda? Pwehki kitail kak ahneki saledek me kin katamankihong kitail dahme Siohwa ketin koasoanehdi ong mehn Israel kan.

6. Dahme aramas akan anahne saledekla sang?

⁶ Kitail koaros anahne saledekla pwehki kitail wia lidun dihp kei, me iei ehu wiepen kalidu me  uhdahn lemei. Pwehki kitail aramas dipan kei, kitail kin mahla, soumwahuda, oh pil mehla. Me tohto kin kilang mehlelpen met ni arail kilang nan kilahs en irongen de kohla tuhwong toahkte pwehki re soumwahu. Kitail pil kin mworuskihla atail wiahda dihp. Wahnpoaron Pohl nda me e kin ‘selidi pahn kosonned en dihp me kin mi nan paliwere.’ E pil nda: “Uhdahn aramas paisuwed men ngehi! Ihs me pahn kapitiehla sang ni paliwar me kin kahluwaielahng soangen mehla wet?”​—Rom 7:23, 24.

7. Dahme Aiseia kohpada duwen saledek?

⁷ E kaperen en ese me Koht ketin koasoanehdi ahl ehu me kitail en pitla, de saledekla sang dihp. Sises iei me ketin kahrehda kitail en kak saledekla. Sounpar isipwiki samwa mwohn Sises ketido sampah, soukohp Aiseia kohpada duwen koasoandi en saledek ehu me uhdahn kaselel ong ahnsou kohkohdo. Koasoandi kaselel wet pahn wahdo soangen saledek me uhdahn mwahusang me mehn Israel kan ahneki erein Sounparen Onohnsapahlo. E ntingihedi: “Ngenen KAUN-O ketier rehi. E ketin keieiedier pwe I en lohkiong me semwehmwe kan rongamwahu, I en kansenamwahwihala me nan kapehd toutoulahr akan, I en lohkiong me sensel kan ar saledek.” (Ais. 61:1) Ihs me kokohp wet dokedoke?

8. Ihs me kokohp en Aiseia duwen saledekla kin dokedoke?

⁸ Kokohp kesempwal wet duwen saledekla tepida pweida mwurin Sises ketin tapiada sapwellime doadoahk en kalohk. Ni eh ketila ni sinakokeo nan eh wasahn kousoan nan Nasaret, Sises ketin wadek kokohp wet en Aiseia mwohn mehn Suhs ko me pokonpene wasao. Sises ketin doadoahngki mahsen pwukat ong pein ih: “Sapwellimen Siohwa manaman mi rehi pwehki eh ketin keieiehdier pwe I en lohki rongamwahu ong me semwehmwe kan. E ketin poaroneiehdo en lohkihong me sensel kan ar saledek, oh me maskun ar pahn kilangada wasa oh kasaledekihala irail me mi nan apwal, oh en kalohki ahnsoun alehdi sapwellimen Siohwa kupwuramwahu.” (Luk 4:16-19) Ia duwen Sises eh ketin kapwaiada kokohp wet?

9. Dahme me tohto ni mwehin Siseso men saledek sang?

⁹ Soangen saledek me Aiseia kohpada oh me Sises ketin wadek duwe tepida pweida ni mwehin Siseso. Kitail kak kamehlele met pwehki Sises mahsanih: “Rahnwet, nting sarawi wet me kumwail ahpwtehn rong pweidahr.” (Luk 4:21) Me tohto me rong dahme Sises ketin wadekada ele kasikasik me irail pahn saledekla sang kaundahn koperment en Rom. Ele irail ahneki soangen madamadauohte me ohl riemeno ahneki me nda: “Se ahpw koapworopworkihla me ohl menet me pahn doarehla Israel.” (Luk 24:13, 21) Ahpw kitail  ese me Sises sohte ketin kangoange sapwellime tohnpadahk kan ren uhwong kaunda lemei en mehn Rom kan. Ahpw e ketin padahkihong irail ren pwainohng “Sihsar mehkan me ahn Sihsar.” (Mad. 22:21) Eri ia duwen Sises eh ketin kasaledekihala aramas akan ni ahnsowo?

10. Dahme Sises ketin sewese aramas akan en saledek sang?

¹⁰ Sapwellimen Koht Ohlo ketido pwehn ketin sewese aramas akan en saledekla sang soahng riau. Keieu, Sises ketin sewese aramas akan en saledekla sang padahk sapwung kan en kaunen pelien lamalam ko. Mehn Suhs tohto ahnsowo anahne idawehn ni idihd tiahk kodoudou kan en aramas oh pil padahk likamw kan. (Mad. 5:31-37; 15:1-11) Irail kan me dene irail kin sewese meteikan en papah Koht, pein irail sohte kin papah Koht ni pwung, kahrehda re mwomwen maskun. Pwehki re soikala Mesaiao oh pil padahk mehlel me e ketin padahngki, re sohte esehla Koht, re maskunte, oh sohte ale mahkpen diparail kan. (Sohn 9:1, 14-16, 35-41) Pwehki Sises ketin padahngki me mehlelo oh ketin wiahda mehn kahlemeng mwahu, e ketin kasalehiong me aktikitik kan ia duwen arail kak saledek sang padahk likamw kan.​—Mark 1:22; 2:23–3:5.

11. Ia ahl keriau me Sises ketikihda ong kasaledekihala aramas?

¹¹ Keriau, Sises ketin kasaledekihala aramas akan sang liduwih dihp me irail sohsohki. Pwehki Sises tounmeteikihla eh mour nin duwen meirong ehu, Koht kak ketin mahkohng dipen irail kan koaros me kin pwoson meirongo oh kasalehda met sang ni arail wiewia kan. (Ipru 10:12-18) Sises mahsanih: “Ma Pwutako pahn kasaledengkumwailla, kumwail uhdahn pahn saledekla.” (Sohn 8:36) Soangen saledek wet uhdahn mwahusang soangen saledek me mehn Israel ko kak ahneki erein Sounparen Onohnsapahlo! Karasepe, emen me saledekla ni Sounparen Onohnsapahlo pil kakete pwurehng wiahla lidu men, oh pahn kedekedeo uhdahn mehla. Ahpw saledek me Sises ketikihda pahn mihmi kohkohlahte.

12. Ihs irail kan me tepin paiekihda saledek me Sises ketin lohkihda duwe?

¹² Ni rahnen Pendekos pahr 33, Siohwa ketin keikihdi wahnpoaron kan oh ohl oh lih lelepek teikan sapwellime manaman. E ketin pwekirailda nin duwen sapwellime seri kan pwe mwuhr irail pahn iasada oh iang Sises ketin kaunda sang nanleng. (Rom 8:2, 15-17) Irail pwukat iei me tepin paiekihda saledek me Sises ketin lohkihda duwe nan sinakokeo Nasaret. Ohl oh lih pwukat solahr wia lidun padahk likamw oh pil tiahk kan en kaunen pelien lamalam en mehn Suhs ko me sohte poahsoanda sang nan Paipel.  Koht pil ketin wiahkinirailla aramas kei me saledeksangehr dihp me kin kahluwalahng mehla. Sapwellimen Siohwa koasoandi en onohnsapahlih saledek tepida wiawi ni ahnsou me e ketin keiehdi nein Krais tohnpadahk kan nan pahr 33 oh e pahn imwisekla ni imwin Kaundahn Pahr Kid en Krais. Soahng mwahu dah kan pahn wiawi sang ahnsou wet lel ni imwin Kaundahn Pahr Kido?

13-14. Likin irail Kristian keidi kan, ihs me kak ahneki saledek me Sises ketin lohkihda?

¹³ Rahnwet, aramas mwahu rar rar kei sang wehi kan koaros wia kisehn “sihpw teikan.” (Sohn 10:16) Koht sohte ketin malipe irail en iang Sises kaunda sang nanleng. Ahpw re ahneki koapworopwor me poahsoanda sang Paipel en mour kohkohlahte nin sampah. Ia duwe, ke ahneki koapworopwor wet?

¹⁴ Pil ahnsou wet ke kak ahneki ekei kapai kan me irail me keidi kan ahneki. Pwehki omw pwoson sapwellimen Sises nta, ke kak peki mahkpen dipomw kan. Met kin imwikihla omw pwungla rehn Koht oh kin wadohng uhk nsenmwakelekel. (Ep. 1:7; Kaud. 7:14, 15) Pil medewehla kapai kan me ke ahneki pwehki ke saledek sangehr padahk likamw kan. Sises mahsanih: “Kumwail pahn esehla me mehlelo oh me mehlelo pahn kasaledengkumwailla.” (Sohn 8:32) Kitail uhdahn perenki atail ahneki soangen saledek wet!

15. Soangen saledek oh kapai dah kan me kitail kak kasik ni ahnsou kohkohdo?

¹⁵ Ke kak kasik soangen saledek me laudsang met ni ahnsou kohkohdo. Ahnsou keren, Sises pahn ketin kasohrehla pelien lamalam likamw  oh kaunda mwersuwed en aramas akan. Koht pahn ketin pere ‘pokon kalaimwuno’ me kin papah ih, oh mwuhr e pahn ketin mweidohng irail en nsenamwahuki kapai kan en nan paradais nin sampah. (Kaud. 7:9, 14) Aramas tohtohie pahn iasada oh pahn ahneki ahnsou mwahu en saledek sang imwila suwed koaros en dipen Adam.​—Wiewia 24:15.

16. Saledek kaselel dahieu me aramas akan pahn ahneki ni ahnsou kohkohdo?

¹⁶ Erein Kaundahn Pahr Kido, Sises oh ienge kan me pahn iang ih kaunda pahn ketin sewese aramas akan ren ahneki roson unsek oh nanpwungmwahu unsek rehn Koht. Ahnsoun onohnsapahl oh saledekla wet pahn duwehte Sounparen Onohnsapahlo nan Israel. Imwilahn irail kan koaros nin sampah me kin papah Siohwa ni loalopwoat iei irail pahn unsekla, saledekla sang dihp.

17. Dahme Aiseia 65:21-23 kohpada ong sapwellimen Koht aramas akan? (Menlau kilang kilel ni kilin Kahn Iroir wet.)

¹⁷ Aiseia 65:21-23 (Wadek.) kasalehda ia pahn mwomwen mour nan sampah ni ahnsou kohkohdo. Kitail sohte pahn dangahnga oh sohte wia mehkot. Paipel kasalehda me sapwellimen Koht aramas akan ahnsowo pahn wiewia doadoahk kan me kaperen oh mie katepe. Ni imwin Kaundahn Pahr Kido, kitail kak kamehlele me “kepikipik kan pil pahn saledek sang liduwih paliwar ehu me kin mwerpeseng oh ahneki saledek lingan en sapwellimen Koht seri kan.”​—Rom 8:21.

18. Dahme kahrehda kitail kak kamehlele me kitail pahn ahneki mour nsenamwahu ahnsou kohkohdo?

¹⁸ Duwehte Siohwa eh ketin tehk mwahu me mehn Israel kan kin ahneki ahnsoun doadoahk oh ahnsoun kommoal, e pil pahn ketin wia duwehte ong sapwellime aramas akan erein Kaundahn Krais Pahr Kido. Ahnsowo pahn uhdahn mie ahnsou en kaudokiong Koht. Kaudok ong Koht kin kesempwal pwe kitail en nsenamwahu rahnwet, oh nan sampah kapwo kitail pahn ahneki ahnsou en wia met. Ei, aramas lelepek koaros pahn pereperen erein Kaundahn Krais Pahr Kido pwehki kitail koaros pahn wiewia doadoahk kaperen kan oh koaros pahn papah Koht.