1-2. Dahme kahrehda Kristian koaros anahne esehla duwen kaiasadao ong mour nanleng?

PALI laud en irail kan me kin papah Siohwa ahnsou wet ahneki koapworopwor en mour kohkohlahte nin sampah. Ahpw Kristian keidi malaulau kei me ahneki koapworopwor en iasadahng mour nanleng. Irail me keidi pwukat kin men ese mwomwen arail mour nanleng. Ahpw dahme kahrehda irail kan me ahneki koapworopwor en mour nin sampah pil men sukuhlki duwen met? Nin duwen me kitail pahn kilang, iasadahng mour nanleng pil pahn wahdo kapai kan ong irail kan me ahneki koapworopwor en mour kohkohlahte nin sampah. Eri sohte lipilipil ma atail koapworopwor iei en mour kohkohlahte nanleng de nin sampah, kitail men esehla duwen kaiasada wet ong mour nanleng.

² Koht ketin kaweid ekei nein Sises tohnpadahk ko ni mwehin tepin Kristian ko ren ntingihedi duwen kaiasadao ong nanleng. Wahnpoaron Sohn kawehwehda: “Met kitail sapwellimen Koht seri kan, ahpw e saikinte sansalda dahme kitail pahn wiahla. Kitail ese me ni eh pahn ketin sansalda kitail pahn duwehla ih.” (1 Sohn 3:2) Eri Kristian keidi kan sohte ese ia pahn duwen mour nanleng mwurin arail iasada. Ahpw irail pahn kilang Siohwa ni ahnsou me re alehdi ketingparail nanleng. Paipel sohte kasalehda soahng koaros me pid kaiasadao ong nanleng, ahpw wahnpoaron Pohl ekis kawehwehda duwen met. Me keidi kan pahn iang Krais ni ahnsou me e pahn ketin “kasohrehla koperment koaros oh pwuhng en kaunda koaros oh manaman koaros.” Pil iangahki “imwintihti me keieu mwuhr, iei mehla.” Mwuhr, Sises oh irail kan me pahn iangih kaunda pahn uhpahiong Siohwa oh patohwanohng  ih mehkoaros. (1 Kor. 15:24-28) Ahnsowo pahn wia ahnsou kaselel ehu! *

3. Nin duwen me 1 Korint 15:30-32 mahsanih, en Pohl kamehlele duwen kaiasada sewese ih en wia dah?

³ Pohl kamehlele duwen kaiasada oh met sewese ih en dadaur pahn soangsoangen kahpwal kan. (Wadek 1 Korint 15:30-32.) E ndaiong mehn Korint ko: “Rahn koaros I kin sohpai mehla.” Pohl pil ntingihedi: “I peiong mahn lawalo kan nan Episos.” Mwein Pohl kin koasoakoasoia duwen eh peiong mahn lawalo kan nan wasahn mwadong laud kan nan Episos. (2 Kor. 1:8; 4:10; 11:23) De ele e koasoakoasoia mehn Suhs oh meteikan me kin lemei duwehte “mahn lawalo kan.” (Wiewia 19:26-34; 1 Kor. 16:9) Sohte lipilipil mehnia, Pohl lelohng soangen keper laud tohto. Ahpw e pousehlahte kamehlele me e pahn ahneki mour nsenamwahu ni ahnsou kohkohdo.​—2 Kor. 4:16-18.

4. Ia duwen koapworopwor en kaiasada eh kin kakehlakahda Kristian kan rahnwet? (Menlau kilang kilel ni kilin Kahn Iroir wet.)

⁴ Kitail mihmi ni ahnsou keper kei. Ekei riatail Kristian kan kin lelohng tiahk lemei. Ekei kin kousoan wasa kan me mie mahwen oh re kin pehm me sohte pereparail. Nan ekei sahpw, sapwellimen Siohwa aramas akan sohte ahneki saledek en kalohkseli, oh re kin papah ih mehnda ma irail kakete selidi de kamakamala pwehki met. Ahpw riatail Kristian pwukat koaros kin wonoweite kaudokiong Siohwa oh wia mehn kahlemeng uhdahn mwahu ong kitail. Irail sohte masepwehk pwehki irail ese me mehnda ma irail mehla ahnsou wet, Siohwa ketin inoukihda me ni ahnsou kohkohdo, e pahn ketikihong irail mehkot me mwahusang ahnsou wet.

5. Madamadau keper dahieu me kak kaluwetehla atail pwoson kaiasadao?

⁵ Pohl katamankihong ienge Kristian ko ren dehr ahneki soangen madamadau keper wet me ekei aramas ahneki: “Ma me melahr akan sohte pahn iasada, eri ‘kitail en mwenge oh nim, pwe lakapw kitail pahn mehla.’” Mwohn mwehin Pohlo, ekei aramas ahneki madamadau wet. Ele Pohl koasoakoasoia dahme Aiseia 22:13 ndahki ahn mehn Israel ko madamadau. Mehn Israel ko kin nsenohkihte arail peren ahpw sohte song en kakehlakahda arail limpoak ong Koht. Eri arail madamadau iei en perenki mour ahnsowo pwehki e kakete sohla mie ahnsou. Me tohto rahnwet pil ahneki soangen madamadau wet. Ahpw Paipel kasalehda imwila suwed me wehin Israel lelohng pwehki arail madamadau sapwungo.​—2 Kron. 36:15-20.

6. Ia duwen koapworopwor en kaiasada eh kamwakid atail pahn pilada ihs kompoakepatail?

⁶ Kitail ese me Siohwa pahn ketin kaiasada me melahr kan, eri met anahne kamwakid atail pahn pilada ihs kompoakepatail kan. Kristian kan nan Korint anahne soikala werekiong irail kan me sohte kin kamehlele duwen kaiasada. Met wia mehn kasukuhl ong kitail rahnwet: Ma kitail kin kihong ahnsou laud en werekiong irail kan me sohte nsenohki dahme pahn wiawi ni ahnsou kohkohdo, ahpw kin nsenohkihte arail peren, met kakete imwila suwed ong kitail. Ma Kristian mehlel men kin kalapw werekiong soangen aramaso, e kak sohla ahneki eh irair mwahu kan. Ni mehlel, soangen aramas ko kak kahrehiong ih en wia soahng kan me Koht kin ketin kalahdeki. Eri, Pohl kaweidki ni kehlail: “Kumwail pwuralahng amwail madamadau pwung oh wiahda me pwung, oh dehr kin wia dihp.”​—1 Kor. 15:33, 34.

7. Peidek dahieu duwen kaiasada me ekei kin idek, nin duwen me 1 Korint 15:35-38 kasalehda?

⁷ Wadek 1 Korint 15:35-38. Aramas emen me kin men kahrehiong meteikan en peikasalki duwen kaiasada ele pahn idek: “Ia duwen me melahr akan ar pahn iasada?” E mwahu kitail en medewe dahme Pohl sapengki met pwehki aramas tohto rahnwet kin ahneki pein arail madamadau ong dahme kin wiawihong aramas mwurin arail mehla. Ahpw dahme Paipel padahngki?

8. Karasaras dahieu me kak sewese kitail en wehwehki duwen kaiasadao ong mour nanleng?

⁸ Ni aramas emen eh mehla, paliwereo kin ohla. Ahpw Koht me ketin kapikada nanleng oh sampah ni eh sohte ketin doadoahngki mehkot, kak ketin kaiasada aramaso oh ketikihong soangen paliwar ehu me e pahn anahne. (Sen. 1:1; 2:7) Pohl doadoahngki karasaras ehu pwehn kasalehda me Koht sohte anahne ketin kapwurehdo soangen paliwarohte. Medewehla “werentuhke ehu.” Ni werentuhkeo eh poadidi nanpwel, e kin tepida wosada oh wiahla tuhke kapw pwoat. Tuhke kapwo kin weksang werentuhke tikitiko. Pohl doadoahngki karasaras wet pwehn kasalehda me Sounkapikpatailo kak ketikihda “paliwar ehu nin duwen me e ketin kupwurki.”

9. Dahme 1 Korint 15:39-41 mahsanihki duwen wekpeseng en paliwar kan?

⁹ Wadek 1 Korint 15:39-41. Pohl nda me kapikipik kan koaros wekpeseng. Karasepe, paliwar en kou kan, menpihr kan, oh mwahmw kan wekpeseng. E nda me kitail kin kilang wekpeseng en ketipin oh maram en pahnlahng. Oh e pil nda me “lingan en ehuehu usu wekpeseng.” Met mehlel mehnda ma kitail sohte kak kilangki pein masatail wekpeseng wet. Saintis kan kasalehda me mie soangsoangen usu kan, ekei lapala, ekei tikitik, ekei weitahta, ekei pwetepwet, oh ekei oangoahng duwehte ketipino. Pohl pil nda me “mie paliwar kan en nanleng oh paliwar kan en sampah.” Ia wehwehn met? Nin  sampah, kitail ahneki paliwar uduk, ahpw irail kan nanleng ahneki paliwar ngehn, duwehte me tohnleng kan ahneki.

10. Soangen paliwar dah me irail kan me iasadahng mour nanleng pahn ahneki?

¹⁰ Tehk dahme Pohl nda mwuhr: “Eri ih pil duwen kaiasadahn me melahr akan. Dahme kin kamwarakdi kin mwerpeseng; dahme kin iasada sohte kak mwerpeseng.” Kitail ese me ni emen eh kin mehla, paliwereo kin ohla oh pwuralahng pwehl. (Sen. 3:19) Eri ia duwen paliwar ehu eh kak “iasada sohte kak mwerpeseng”? Pohl sohte ndinda duwen aramas emen me iasada ong mour nin sampah, duwehte irail kan me Elaisa, Elisa, oh Sises ketin kaiasada. Ahpw Pohl kin koasoakoasoia duwen emen me iasada ahneki paliwar ehu me kak mour nanleng, de “paliwar ehu me ngehn.”​—1 Kor. 15:42-44.

11-12. Wekila dahieu me wiawihong kahlap en Siseso ahnsou me e ketin iasada, oh ia duwen irail me keidi kan ar pil lelohng soahngohte?

¹¹ Ni Sises eh ketiket sampah, e sapwellimanki paliwar uduk. Ahpw ni eh ketin iasada, e ketin “wiahla ngehn emen me kin kihda mour” oh ketidahla nanleng. Duwehte met, Kristian keidi kan koaros pahn iasada ahneki paliwar ehu me kak mour nanleng. Pohl kawehwehda: “Duwehte atail kin weuwa mwomwen meno me wiawihkihda pwelpar, kitail pil pahn weuwa mwomwen meno me kohsang nanleng.”​—1 Kor. 15:45-49.

¹² E kesempwal en taman me Sises sohte ketin iasada ahneki paliwar uduk. Ni Pohl eh kerenlahng kaimwiseklahn eh koasoio, e kawehwehda dahme kahrehda. E nda: “Uduk oh nta sohte kak sohsohki Wehin Koht” me mi nanleng. (1 Kor. 15:50) Wahnpoaron ko oh irail me keidi teikan sohte pahn iasadahng nanleng ahneki paliwar uduk oh nta me kak ohla. Iahd me irail pahn iasada? Pohl nda me re pahn iasada ahnsou ehu mwuhr ni ahnsou kohkohdo, ahpw kaidehn mwurinte arail mehla. Ni ahnsou me Pohl ntingihedi 1 Korint, ekei tohnpadahk ko “melahr,” karasepe, wahnpoaron Seims. (Wiewia 12:1, 2)  Wahnpoaron teikan oh pil me keidi kan pahn mehla mwuhr.​—1 Kor. 15:6.

13. Dahme pahn wiawi erein ketier en Sises?

¹³ Sises oh Pohl kohpada duwen ahnsou kesempwal ehu me pahn kohdo. Ahnsowo iei ketier en Krais. Erein ketier en Krais, mahwen, rerrer en sahpw, soumwahu lusulus, oh soahng suwed teikan pahn wiawi nan sampah pwon. Kitail kilangehr kokohp en Paipel wet eh pweida sang pahr 1914. Mie pali kesempwal ehu en kilel wet me pahn pil wiawi. Sises mahsanih me rongamwahwo me Wehin Koht wie kakaun pahn lohkseli “wasa koaros me aramas kin mi ie nin sampah pwe en mie kadehde ong tohnwehi koaros, a mwuri, imwio ahpw pahn leledo.” (Mad. 24:3, 7-14) Pohl nda me “ketier en Kauno” pahn pil wia ahnsoun kaiasadahn Kristian keidi kan me “melahr.”​—1 Des. 4:14-16; 1 Kor. 15:23.

14. Dahme kin wiawihong Kristian keidi kan me mehla erein ketier en Krais?

¹⁴ Kristian keidi kan me mehla ahnsou wet pahn mwadangete iasada ong mour nanleng. Dahme Pohl nda nan 1 Korint 15:51, 52 kamehlelehiong kitail duwen met: “Kitail koaros sohte pahn meirla ni mehla, ahpw kitail koaros pahn wekidekla, ni ahnsoutehkis, ni marep tehieu, erein ngilen kaimwiseklahn sowi.” Ahn Pohl koasoi pwukat wie pweipweida ahnsou wet! Ni arail iasada, rien Krais pwukat pahn ahneki peren laud; irail pahn “ieiang Kauno ahnsou koaros.”​—1 Des. 4:17.

15. Doadoahk dahieu me irail kan me pahn wekila “ni marep tehieu” pahn wia?

¹⁵ Paipel padahkihong kitail soangen doadoahk dah me irail pwukat me wekila “ni  marep tehieu” pahn wia nanleng. Sises mahsanihong irail: “Ong mehmen me kin kalowehdi oh idawehn ei wiewia kan lel ni imwi, I pahn kihong manaman pohn wehi kan, me duwehte ei alehdi sang rehn Semei, oh e pahn kaunkihda aramas akan sokon mete pwe irail en mwerpeseng rasehng sah pwehl kan.” (Kaud. 2:26, 27) Irail pahn idawehn Sises oh kaunkihda wehi kan sokon mete.​—Kaud. 19:11-15.

16. Ia duwen aramas tohtohie pahn powehdi mehla?

¹⁶ E sansal me irail me keidi kan pahn powehdi mehla. (1 Kor. 15:54-57) Arail iasada pahn kahrehiong irail en iang sewese kihsang suwed koaros nin sampah nan mahwen en Armakedon me pahn wiawi. Kristian rar rar teikan pahn ‘kohieisang nan kahn kamakam kowahlapo’ oh pedolong nan sampah kapwo. (Kaud. 7:14) Irail pwukat pahn kilang pil ehu kadehdepen mehla eh lohdi ni ahnsou me aramas lik lik kei me mehla mahso pahn iasada. Song medewehla ia uwen kaperen en ahnsowo me mwekid kapwuriamwei wet pahn wiawi! (Wiewia 24:15) Oh koaros me kin loalopwoatohng Siohwa ni unsek pahn pil powehdi mehla me irail sohsohki sang Adam. Irail pahn kakehr mour kohkohlahte.

17. Dahme 1 Korint 15:58 kangoange kitail en wia ahnsou wet?

¹⁷ Kristian koaros me momour ahnsou wet anahne kalahnganki lokaia kansenamwahu kan me Pohl ntingkilahng mehn Korint ko duwen kaiasada. Kitail ahneki kahrepe mwahu en peikiong ahn Pohl kaweid en wia uwen atail kak ahnsou wet “nan doadoahk en Kauno.” (Wadek 1 Korint 15:58.) Ma kitail kin ahnsou koaros wia uwen atail kak nan doadoahk wet, kitail kak kasik mour ehu me uhdahn kaperen ni ahnsou kohkohdo. Ahnsowo pahn uhdahn kaselel sang soahng koaros me kitail kak medewehda. E pahn kadehdehiong kitail me atail doadoahk me pid Kauno kaidehk mehkot mwahl.