Soh, kaidehn ih wehwehn iretikitiko met. Iretikitiko kin dokedoke emen me kin lelohng kahpwal tohto ahpw kin dadaurete.

Kitail pahn kilang iretikitik kan mwohn oh mwurin Lepin Padahk 24:16. Wasa pwukat mahsanih: “Ke dehr duwehte aramas suwed me kin koasoanehdi en pirapa aramas lelepek men de adihasang imwe. Sohte katepen uwen tohtohn aramas lelepek men eh pahn pwupwudi, ahpw e kin pwurehng pwourda; ahpw kahpwal kin kamwomwala aramas suwed. Dehr perenki ma omw imwintihti kin lelohng apwal.”​—Lep. Pad. 24:15-17.

Ekei kin medewe me iretikitik 16 kin ndinda duwen emen me wiahda dihp ahpw koluhla oh pwurehng ahneki nanpwungmwahu rehn Koht. Karasepe, kaunen pelien lamalam riemen sang England ntingihedi me sounpadahk en sarawi kan, mahso oh pil ahnsouwet, kin kawehwehdi iretikitik wet ni soangen ahlo. Ira pil nda me met wehwehki me “aramas mwahu men kak wiahda dihp laud ehu ahpw kak poakohngete Koht oh kenikenla reh pwehki e koluhla.” Emen me kin wiewia me sapwung ele pahn mwahuki kawehwe wet. E kakete medewe me mehnda ma e pwurupwurehng wiahda dihp, Koht pahn ahnsou koaros ketin mahkohng.

Ahpw met kaidehn wehwehn iretikitik 16.

Lokaiahn Ipru me kawehwehdiong “pwupwudi” nan iretikitik 16 kak kadoadoahk ong soahng kei. E kak wehwehki kou men me pwupwudi nanial, de aramas emen me pwupwudi sang pohn ihmw ehu. (Deud. 22:4, 8) Lepin lokaiao pil kak wehwehki ehu soahng tohrohr, duwehte me kileldi nan ire pwukat: “KAUN-O kin ketin kahluwa aramas akan nan ahl me re en weweid ie oh kin ketin sinsile irail kan me kin kaparanda kupwure. Ma re pahn pwupwudi, re sohte pahn wonohnte nanpwel, pwe KAUN-O pahn ketin sewese kapwourirailda.”​—Mel. 37:23, 24; Lep. Pad. 11:5.

Ahpw tehk dahme Professor Edward H. Plumptre ndahki met. E nda: “Lepin lokaiahn Ipru me kawehwehdiong “pwupwudi” sohte kin wehwehki “dihp.” Ihme kahrehda, emen semen kawehwehda iretikitik 16 ni ahl wet: “Sohte katepen emen eh pahn wiakauwe sapwellimen Koht aramas akan pwehki irail pahn ahnsou koaros pweida, ahpw aramas suwed sohte pahn!”

Ei, Lepin Padahk 24:16 sohte kin mahmahsanih duwen emen eh kin “pwupwudi” ong nan dihp, ahpw e kin mahmahsanih duwen emen eh kin pwurupwurehng lelohng kahpwal kan. Nan sampah suwed wet, aramas lelepek men ele kin kohwahki soumwahu de pil lelohng kahpwal teikan. Ele e pil kin ale kalokolok sang palien koperment pwehki eh pwoson. Ahpw e kak likih me Koht iei sawasepe oh pahn ketin sewese ih en dadaurete oh pweida. Pein idek rehmw, ‘Pakehr depe I kilang soahng kan ar kin imwila mwahu ong sapwellimen Koht ladu kan?’ Ia kahrepen atail pahn idek met? Pwehki kitail uhdahn kamehlele me Siohwa “kin ketin sewese irail kan me kin mihla nan apwal; e kin ketin pwekada irail kan me kin pwupwudi.”​—Mel. 41:1-3; 145:14-19.

“Aramas lelepek men” sohte kin perenki ni meteikan ar lelohng kahpwal kan. Ahpw e kin ale kangoang pwehki e ese me “e pahn imwila mwahu ong irail kan me kin lemmwiki Koht mehlelo, pwehki ar kin lemmwiki ih.”​—Ekl. 8:11-13, NW; Sohp 31:3-6; Mel. 27:5, 6.