Soh, sohte wasa ehu nan Paipel de nan pwuhken poadopoad kan me koasoia me Kristian kan papidaisla pwehn wiliandi me melahr kan.

Mwomwen ekei Paipel ar kawehwehdi iretikitik wet kahredahr ekei aramas en medewe me papidais ong me melahr kan kin wiawi ni mwehin tepin Kristian kan. Karasepe, ehu pwuhk koasoia: “Ma me melahr akan sohte pahn iasada, a dahme irail kan me papidaisla ong me melahr kan pahn wia?”​—New International Version.

Emen ohl semen en Paipel me adaneki Dr. Gregory Lockwood koasoia me sohte mehn kadehde ehu nan Paipel de nan poadopoad kan me emen kin papidaisla pwehn wiliandi me mehla men. Emen semen en Paipel, Professor Gordon D. Fee pil iang pwungki met. E ntingihedi me sohte karasaras ehu nan Paipel de nan poadopoad me kasalehda soangen papidais wet. E nda me Kadehde Kapw sohte koasoia duwen met, oh sohte mehn kadehde ehu me Kristian kan mahs de palien sarawi kan me wiawihda mwurin wahnpoaron ko mehla kin wia soahng wet.

Paipel mahsanih me sapwellimen Sises tohnpadahk kan anahne ‘padahkihong aramas en wehi koaros pwe ren wiahla sapwellime tohnpadahk, papidaisihirailla . . . , padahkihong irail en kapwaiada mehkoaros’ me e ketin kehkehlingki. (Mad. 28:19, 20) Mwohn emen eh kak wiahla tohnpadahk men me papidaisla, e anahne sukuhlki, kamehlele, oh peikiong Siohwa oh Sapwellime Ohlo. Ahpw emen me melahr oh mihmi nan sousou sohte kak wia met; pil sohte Kristian men me momour kak wia met ong me melahro.​—Ekl. 9:5, 10; Sohn 4:1; 1 Kor. 1:14-16.

Eri dahme Pohl ndinda?

Ekei mehn Korint ko kin nda me me melahr kan sohte pahn iasada. (1 Kor. 15:12) Pohl kasalehiong irail me met sapwung. Ia duwen? E nda me ‘rahn koaros e kin sohpai mehla.’ Ahpw mendahki e kin lelohng soahng keper kan, e uhdahn kamehlele me mwurin eh mehla, e pahn iasada nin duwen ngehn kehlail men, duwehte me Sises ketin wia.​—1 Kor. 15:30-32, 42-44.

Mehn Korint ko anahne wehwehki me en wia Kristian keidi men kin wehwehki me irail pahn lelohng kahpwal kan rahn koaros oh mehla mwohn arail pahn kak iasada. Eri ni arail “papidaislahr oh miniminiong Krais Sises,” irail pil “papidaislahr ong sapwellime pwoula.” (Rom 6:3) Met wehwehki me duwehte Sises, irail pahn lelohng kahpwal kan oh mehla pwe irail en iasada.

Daulih sounpar riau mwurin Sises ketin papidaisla nan pihl, e mahsanihong sapwellime wahnpoaron riemeno: “Papidais me I papidaiski, kumwa pahn papidaiski.” (Mark 10:38, 39) Sises sohte mahmahsanih duwen papidais nan pihl. Eh mahsen ko wehwehki me eh lelepek ong Koht pahn imwikihla eh pwoula. Pohl ntingihedi me irail me keidi kan pahn ‘iang ih lokolok pwe irail en pil iang ih linganla.’ (Rom 8:16, 17; 2 Kor. 4:17) Eri irail pil pahn mehla pwe irail en iasada ong mour nanleng. 

Eri, dahme Pohl nda kak kawehwehdi ni ahl wet me pwung: “Ma soh, dahme irail me papidaisla pwe ren wiahla me mehla kei pahn wia? Ma me melahr akan sohte mwahn pahn iasada, ia kahrepen arail pil papidaisla pwe ren wiahla soahng wet?”