1-2. Dahme kitail koasoiapene nan iren onop en mwoweo, oh dahme kitail pahn koasoiapene nan iren onop wet?

NAN iren onop en mwoweo, kitail koasoiapene ekei iren sawas kan sang Lipai irelaud 19. Karasepe, nan iretikitik 3, Siohwa ketin kehkehlingkihong mehn Israel ko en wauneki arail pahpa oh nohno kan. Kitail koasoiapene ia duwen atail kak doadoahngki kaweido rahnwet sang ni atail sewesehki atail pahpa oh nohno kan dahme re anahne, kangoange oh kansenamwahwih irail, sewese irail en karanihete Siohwa. Nan iretikitiko, Koht ketin padahkihong sapwellime aramas akan en kapwaiada rahnen Sapad. Kitail sukuhlki me mehnda ma kitail sohte kin kapwaiada rahnen Sapado rahnwet, kitail kak kapwaiada kaweido sang ni atail kaukaule wiahda ahnsou nan atail koasoandi pwehn papah Siohwa rahn koaros. Ni atail wia met, kitail pahn kasalehda me kitail nannanti en sarawihla, nin duwen me Lipai 19:2 oh 1 Piter 1:15 kaweidki.

² Nan iren onop wet, kitail pahn doulahte koasoiapene Lipai irelaud 19. Dahme irelaud wet padahkihong kitail duwen en kasalehda kadek ong irail kan me ahneki soumwahu, duwen en kin mehlel ni atail wia pesines, oh duwen atail en kasalehda limpoak ong meteikan? Kitail men sarawihla duwehte Koht me ketin sarawi, eri kitail pahn kilang dahme kitail kak sukuhlki.

3-4. Ia duwen Lipai 19:14 eh kaweidki duwen en mehn Israel ko wiewia ong me salengepon oh maskun?

³ Wadek Lipai 19:14. Siohwa ketin kupwurki sapwellime aramas akan en kadek ong irail kan me ahneki soumwahu. Karasepe, e ketin mahsanihong mehn Israel ko en dehr keriahla  emen me salengepon. Met kak pidada lokaia lemei de nda mehkot suwed duwen aramaso. E uhdahn suwed en wiahiong aramas salengepon men met! E sohte pahn kak rong dahme aramas ndahki ih, eri e sohte kak pere pein ih sang met.

⁴ Pil ehu, nan iretikitik 14, Koht ketin mahsanihong sapwellime ladu kan en dehr “kihdiong mehkot mwohn me maskun men.” Ehu pwuhk koasoia me nan Israel mahso, aramas akan kin kalapw wiakauwe oh mwamwahliki me ahneki soumwahu kan. Mwein aramas suwed men pahn kihdi mehkot mwohn me maskuno pwehn kamedekihala de pwehki irail men kouruhrki. Met wia tiahk lemei ehu! Siohwa ketin doadoahngki kehkehlik wet pwehn sewese sapwellime aramas ako en kilang me irail anahne kasalehda kadek ong irail kan me ahneki soumwahu.

5. Ia duwen atail kak kasalehda atail poakehla irail kan me ahneki soumwahu?

⁵ Sises kin ketin kasalehda kadek ong irail kan me ahneki soumwahu. Tamanda dahme Sises mahsanihong ohl riemeno en pakairkihong Sohn Sounpapidais: “Met me maskun kan kilangadahr wasa, me dangepel kan alialu mwahu, me tokutok kan mwakelekeldahr, me salengepon kan rongadahr wasa, me melahr akan mourdahr.” Mwurin ar kilang sapwellimen Sises manaman ko, “aramas ako koaros ahpw kapinga Koht.” (Luk 7:20-22; 18:43) Kristian kan men alasang Sises oh kasalehda arail poakehla irail kan me ahneki soumwahu. Eri kitail en kin kadek oh kanengamahiong irail. Ei mehlel, Siohwa sohte ketikihong kitail manaman en wiahda manaman kapwuriamwei kan. Ahpw, kitail ahneki pwais kaselel en padahkihong meteikan, iangahki irail me maskun de sehse padahk mehlel, duwen rongamwahwo oh paradaiso, wasa me aramas akan pahn unsekla oh ahneki nanpwungmwahu rehn Koht. (Luk 4:18) Rongamwahu wet kin kahrehiong me tohto en kapinga Koht.

6. Ia duwen Lipai irelaud 19 eh sewese kitail en wehwehki mwahu Kosonned Eiseko?

⁶ Ekei iretikitik kan nan Lipai irelaud 19 kalaudehla dahme Kosonned Eiseko koasoia.  Karasepe, kawaluhn kosonnedo ndahte: “Kumwail sohte pahn pirap.” (Eks. 20:15) Emen kakete medewe me ma e sohte ale mehkot me kaidehn ah, met wehwehki me e kin peikiong kosonnedo. Ahpw, ele nan irair teikan e kin pirap.

7. Ia duwen soun pesines men eh kakete sapeikiong kosonned kawaluhwo duwen pirap?

⁷ Soun pesines men kakete medewe me e sohte kin pirap pwehki e sohte ale mehkot me kaidehn ah. Ahpw ia duwen ahnsou me e kin wia pesines? Nin duwen me kileldi nan Lipai 19:35, 36 Siohwa mahsanih: “Kumwail dehr pitihedi aramas ni amwail pahn doadoahngki mehn sohng sapwung oh mehn tenek sapwung. Kumwail doadoahngki mehn sohng pwung oh mehn tenek pwung.” Soun pesines men me kin doadoahngki mehn sohng sapwung pwehn pitih sounnetinet kan kin uhdahn piripirapa irail. Pil iretikitik teikan nan Lipai irelaud 19 pil kasansalehda met.

8. Ia duwen oaritik kan nan Lipai 19:11-13 eh sewese mehn Suhs ko en doadoahngki kosonned kawaluhwo, oh ia duwen atail kak paiekihda?

⁸ Wadek Lipai 19:11-13. Tepin mahsen kan nan Lipai 19:11 koasoia: “Kumwail dehr pirap.” Iretikitik 13 kadokepene pirap oh mwersuwed nan pesines ni eh mahsanih: “Kumwail dehr wiahda mehkot suwed ong aramas emen.” Ma emen kin likamw ni eh wia pesines, e kin pirap. Kosonned kawaluhwo koasoia me pirap sapwung. Ahpw oaritik kan nan Lipai sewese mehn Suhs ko en wehwehki me irail kak kapwaiada mouren kosonnedo me iei, ia duwen arail kak mehlel ni soahng koaros me re kin wia. E mwahu kitail en medewe ia sapwellimen Siohwa madamadau ong likamw oh pirap. Kitail kak pein idek rehtail: ‘Ni ei kin medewe duwen Lipai 19:11-13, mie wasa kan me I anahne wekidala nan ei mour, ahpw mehlel ni ei kin wia pesines?’

9. Ia duwen kosonnedo nan Lipai 19:13 eh sewese tohndoadoahk kan?

⁹ Pil mie ehu ahl me Kristian men anahne medemedewe en kin mehlel ni eh doadoahngki meteikan. Lipai 19:13 mahsanih: “Kumwail dehr kolokol pweinen noumwail tohndoadoahk kan, en dehr pil pwandkihla rahn ehu.” Nan Israel, pali laud en aramas akan kin wia doadoahk en mwetuwel, oh tohndoadoahk kan kin ale pweinarail ehuehu rahn. Ma tohndoadoahk men sohte ale pweine ni imwin rahno, e kakete sohte nah mwohni pwehn pwainda dahme eh peneineio anahne rahno. Siohwa mahsanih: “Aramas semwehmwe men ih me kin anahne mwohnio ong eh mour.”​—Deud. 24:14, 15; Mad. 20:8.

10. Dahme kitail kak sukuhlkihsang Lipai 19:13?

¹⁰ Pali laud en tohndoadoahk kan rahnwet kin ale pweinarail pak ehu de pak riau nan sounpwong ehu, kaidehn rahn koaros. Ahpw, kaweido nan Lipai 19:13 kin kadoadoahkte rahnwet. Ekei kaunen doadoahk kan sohte kin pahrek ni arail kin pwainki tohndoadoahk kan uwen mwohni me uhdahn tikitik. Irail ese me tohndoadoahk ko uhdahn anahne arail doadoahko oh re pahn doadoahkte mendahki pweinarail ko uhdahn tikitik. Eri kaunen doadoahk pwukat kin ‘kolokol pweinen neirail tohndoadoahk kan.’ Kristian men me kin wia pesines anahne tehk mwahu me e kin pahrek ong nah tohndoadoahk kan. Met kitail pahn kilang dahme kitail pil kak sukuhlkihsang Lipai irelaud 19.

11-12. Dahme Sises ketin kasansalehda ni eh doadoahngki Lipai 19:17, 18?

¹¹ Koht ketin kupwurki kitail en dehr kamedekihala meteikan, ahpw e pil ketin kasik laudsang met. Kitail kak kilang duwen met  nan Lipai 19:17, 18. (Wadek.) Siohwa ketin kehkehlingki: “Ke en poakohng mehn mpomw duwehte omw kin poakohng pein uhk.” Kristian men anahne wia met ma e men kaperenda Koht.

¹² Sises ketin kasalehda me kehkehlik me mi nan Lipai 19:18 uhdahn kesempwal. Mie pak me Parisi men idek rehn Sises: “Mehnia kehkehlik me keieu kesempwal nan Kosonnedo?” Sises ketin sapengki me “me keieu kesempwal oh ih keieun kehkehlik” iei en poakohng Siohwa sang mohngiongitail unsek, mour unsek, oh lamalam unsek. Sises eri pil mahsanih dahme Lipai 19:18 mahsanih: “Me keriauo me rasehngete met iei: ‘Ke anahne poakohng mehn mpomw duwen omw kin poakohng pein uhk.’” (Mad. 22:35-40) Mie ahl tohto teikan me kitail kak kasalehda limpoak ong meteikan. Kitail kak sukuhlki ekei ahl pwukat sang Lipai irelaud 19.

13. Ia duwen atail kak wehwehki mwahu Lipai 19:18 ni atail medemedewe duwen Sosep?

¹³ Ehu ahl me kitail kak kasalehda me kitail poakohng mehn mpatail iei sang ni atail kapwaiada kaweid me mi nan Lipai 19:18. E mahsanih: “Dehr dupungki me suwed ong emen eh wia suwed ong uhk, de kadakadaur omw kailongki.” Pali laud en kitail ese aramas me kin kolokolete arail lingeringer pahn iengarail tohndoadoahk, iengarail tohnsukuhl, de tohn arail peneinei men, ekei pak erein sounpar tohto. Tamataman me rien Sosep pwutak ehk ko uhdahn lingeringer pah oh mwuhr re mwersuwedihedi pwehki ar kailongki. (Sen. 37:2-8, 25-28) Sosep sohte wiahiong irail me suwed! Ni ahnsou me e kakehr dupuk ong rie ko, e kasalehda mahk. Sosep sohte kadakadaur eh lingeringer pahrail. Ahpw, e kapwaiada dahme Lipai 19:18 mahsanih me kitail en wia.​—Sen. 50:19-21.

14. Dahme kasalehda me kitail anahne peikiong kaweido me mi nan Lipai 19:18?

¹⁴ Kristian kan me men kaperenda Koht anahne alasang Sosep, me mahkohng rie ko oh sohte ikih irail. Met pil sansal sang dahme Sises mahsanih nan sapwellime kapakapo me kitail en mahkohng irail kan me wiahda dihp ong kitail. (Mad. 6:9, 12) Duwehte met, wahnpoaron Pohl kaweidki rie Kristian ko: “Riei ko, kumwail dehr pein dupuk.” (Rom  12:19) E pil kangoangehkin irail: “Kumwail pousehlahte kanengamahiong emenemen oh mahkpene douluhl mehnda ma mie kahrepen en kaulimih emen.” (Kol. 3:13) Sapwellimen Siohwa kaweid kan sohte kin wekila. Kitail en peikiongete kosonnedo me mi nan Lipai 19:18.

15. Karasaras dahieu me sewese kitail en wehwehki me kitail anahne mahkohng suwed me wiawihong kitail?

¹⁵ Medewehla ehu karasaras. Ni emen eh kansensuwedihkitailla, e kak duwehte ohla ehu ni kilitail. Ekei ohla kan tikitik, a ekei laud. Karasepe, ni ahnsou me kitail kin kuk, e kakete mie kisin lek ni sendin pehtail ka. Met kakete kamedek, ahpw kedekedeo e pahn sohla medek oh mwahula. Mwurin rahn ehu de riau, kitail kakete manokehla wasa me ohlao mi ie. Duwehte met, ekei soahng kan me kin wiawihong kitail, kitail sohte kin wiahki mehkot laud. Karasepe, ele kompoakepatail men nda de wia mehkot me kamedekeikitailla, ahpw kitail kak mwadang mahkohng ih. Ma atail ohlao uhdahn laud, toahkteo anahne dehkpene oh kidimala. Ma kitail kin kalapw doahke ohlao, e sohte pahn mwadang mohdi oh e pahn suwedla. Aramas emen kakete wia soahng wet ni ahnsou me e uhdahn medekla. Ele e kin kalapw medemedewehte uwen eh nsensuwedla oh medekla. Ahpw emen me kin kolokolete eh nsensuwed pahn kamedekihala pein ih. E pahn mwahu en peikiong kaweid me mi nan Lipai 19:18!

16. Nin duwen me Lipai 19:33, 34 mahsanih, dahme Siohwa ketin kasik mehn Israel ko en wiahiong mehn liki kan, oh dahme kitail kak sukuhlkihsang met?

¹⁶ Ni Siohwa eh ketin kehkehlingkihong mehn Israel kan en poakohng meteikan, met sohte wehwehki me irail anahne poakohngete mehn Israel teikan. Irail pil anahne poakohng mehn liki kan me kin kousoan rehrail. Kaweid wet mi nan Lipai 19:33, 34. (Wadek.) Mehn Israel kan anahne nsenohki mehn liki kan ‘duwehte arail kin nsenohki riarail mehn Israel kan’ oh irail anahne ‘poakohng irail duwehte arail kin poakohng pein irail.’ Karasepe, mehn Israel kan anahne mweidohng mehn liki kan oh me semwehmwe kan en rikada wahn sapwarail kan. (Lip. 19:9, 10) Kaweido ren poakohng mehn liki kan pil kin dokedoke Kristian kan rahnwet. (Luk 10:30-37) Ia duwen? Mie aramas rar rar kei nan sampah me keseulahr oh kousoanla nan sahpw teikan. Oh ele ekei irail karanihiuk. E uhdahn kesempwal kitail en wauneki irail koaros.

17-18. (a) Dahme Lipai 19:2 oh 1 Piter 1:15 kangoange kitail en wia? (b) Doadoahk kesempwal dahieu me wahnpoaron Piter kangoange kitail en wia?

¹⁷ Lipai 19:2 oh 1 Piter 1:15 kangoange sapwellimen Koht aramas akan en sarawihla. Iretikitik teikan nan Lipai irelaud 19 kak sewese kitail en kilang dahme kitail kak wia pwe Siohwa en ketin kupwurkin kitail. Kitail koasoiapenehr iretikitik teikan me kasalehda ekei soahng mwahu kan me kitail kak wia oh soahng teikan me kitail en soikala. * Palien Paipel ni Lokaiahn Krihk kasalehda me Siohwa ketin kupwurkihte kitail en kapwaiada kaweid pwukat nan atail mour. Ahpw mie mehkot ehu me wahnpoaron Piter kapatahiong.

¹⁸ Ele kitail kin kaukaule kaudokiong Siohwa oh wiahiong meteikan soahng mwahu kan. Ahpw Piter uhdahn kangoange Kristian kan en wia mehkot kesempwal ehu. Mwohn Piter eh kangoange kitail en sarawihla ni atail wiewia kan koaros, e koasoia: “Katengehdi amwail lamalam akan ong doadoahk.” (1 Pit. 1:13, 15) Doadoahk dahieu mwo? Piter koasoia me iengen Krais me keidi kan pahn “lohkiseli wasa koaros irair kaselel kan en Meno me ketin malipei” irail. (1 Pit. 2:9) Ni mehlel, Kristian koaros ahneki pai kaselel en iang wia doadoahk kesempwal wet me kin sewese aramas laudsang doadoahk teikan me kitail kin wia. E uhdahn wia pwais kaselel ehu ong sapwellimen Koht aramas sarawi kan en kaukaule kalohk oh katohnpadahk ni ngoang! (Mark 13:10) Ni atail kin wia uwen atail kak en kapwaiada kaweid kan nan Lipai irelaud 19, kitail kadehdehda me kitail poakohng atail Kohto oh meteikan. Oh kitail kasalehda me kitail men “sarawihla” ni atail wiewia kan koaros.