1-3. (a) Dahme kahrehda kitail kak kamehlele me kitail kak wiahla kompoakepahn Koht? (b) Ihs me kitail pahn koasoiapene nan iren onop wet?

 PAIPEL kasalehda me Eipraam wia kompoakepahn Koht. (Ais. 41:8; Seims 2:23) Eipraam kelehpw me Paipel kahdaneki kompoakepahn Koht. Ia duwe, met wehwehki me Eipraam kelehpw nanpwungen aramas akan me wiahla kompoakepahn Siohwa? Soh. Paipel kasalehda me kitail koaros kak ahneki pai kaselel wet.

² Mie koasoipen ohl oh lih lelepek tohto nan Paipel me kin peikiong Siohwa, pwoson ih, oh wiahla kompoakepah keren kan. (Wadek Melkahka 25:14.) Pohl koasoia me re iang kisehn sounkadehde tohto me duwehte “depwek kalaimwun ehu.” (Ipru 12:1) Irail koaros wia kompoakepahn Koht mendahki irail wekpeseng.

³ Kitail pahn koasoiapene duwen kompoakepahn Siohwa meh silimen me Paipel kasalehda: (1) Rud, liohdi pwulopwul loalopwoat men sang Mohap, (2) Esekaia, nanmwarki en Suda lelepek men, oh (3) Mery, inen Sises, me kin aktikitik. Dahme kitail kak sukuhlkihsang mwomwen emenemen irail arail wiahla kompoakepahn Koht?

4, 5. Pilipil mwahu dahieu me Rud wiahda, oh dahme kahrehda e uhdahn apwal ong ih? (Menlau kilang tepin kilel.)

⁴ Naomi, iangahki en nah pwutak riemen ko ara pwoud, Rud oh Orpa, sapasapal kohkohlahng Israel me uhdahn dohsang Mohap. Erein arail alialu kohla, Orpa pilada en pwurala sapweo Mohap. Ahpw Naomi koasoanehdier me e pahn pwurala sapweo nan Israel. Dahme Rud pilada en wia? E anahne wiahda pilipil ehu me ele keieu kesempwal nan eh mour. Ia duwe, e pahn pwurala sapweo Mohap rehn eh peneinei ko, de iang eh mwaho, Naomi, kohla Pedleem?—Rud 1:1-8, 14.

⁵ Ahn Rud peneinei ko mi Mohap. E kak pwurala rehrail, oh re kak apwalih ih. E ese aramas ako, oh pil ese lokaia oh tiahk en Mohap. Naomi sohte kak inoukihong Rud mepwukat nan Pedleem. Oh Naomi perki me e sohte pahn kak diar ahn Rud pwoud de eh wasahn kousoan. Eri e ndaiong Rud en pwurala Mohap. Nin duwen me kitail kilangehr, Orpa “pwuralahngehr rehn eh peneinei oh eh koht.” (Rud 1:9-15) Ahpw Rud pilada en dehr pwurala rehn eh aramas ako oh arail koht likamw ko.

6. (a) Pilipil mwahu dahieu me Rud wiahda? (b) Dahme kahrehda Pohas nda me Rud rapahki eh wasahn ruk pahn limen Siohwa?

⁶ E mwomwen me Rud sukuhlki duwen Siohwa sang eh pwoudo de sang Naomi. E sukuhlki me Siohwa sohte ketin duwehte koht kan en Mohap. E poakohng Siohwa oh ese me Siohwa ketin warohng eh limpoak oh kaudok. Eri Rud wiahda pilipil mwahu ehu. E ndaiong Naomi: “Kisehmw kan iei kisehi; oh omw Koht iei ei Koht.” (Rud 1:16) Mohngiongitail kin mwekidkihda atail medewehla limpoak me Rud ahneki ong Naomi. Ahpw laudsang met iei limpoak me Rud ahneki ong Siohwa. Limpoak wet pil kamwakid Pohas me mwuhr kapingahki Rud eh ‘rapahki eh wasahn ruk pahn limen Siohwa.’ (Wadek Rud 2:12, NW. ^[1]) Lepin lokaia kan me Pohas doadoahngki ele katamankihong kitail duwen mwomwen kisin menpihr kis eh kin rapahki perepe pahn pehnpihr en eh nohno. (Mel. 36:7; 91:1-4) Ni ahlohte, Siohwa ketikihong Rud perepe mwahu oh katingih pwehki eh pwoson. Sohte kahrepe ehu me Rud en koluhkihla eh pilipilo.

7. Dahme kak sewese irail kan me kin pweiek en inoukihong Siohwa arail mour?

⁷ Aramas tohto sukuhlki duwen Siohwa ahpw re pilada en sohte wiahki ih arail wasahn ruk. Re kin pweiek en inoukihong ih arail mour oh papidaisla. Ma ke ahneki soangen pepehm wet, medewehla dahme kahrehda ke kin pweiek. Aramas koaros kin mie arail koht men me re kin kaudokiong. (Sos. 24:15) Pilipil mwahwo iei en papah Koht mehlelo. Ni omw inoukihong Siohwa pein uhk, ke kasalehda me ke kin pwoson me e pahn ketin wia omw wasahn ruk. Oh e pahn ketin sewese iuk ken doulahte papah ih mendahki soangen kahpwal kan me ke ahneki. Iei met me Koht ketin wiahiong Rud.

8. Menlau kawehwehda mwomwen mour me Esekaia tikida loale.

⁸ Mwomwen mour me Esekaia tikida loale uhdahn weksang ahn Rud. Esekaia wia kisehn wehi ehu me inouda ong Koht. Ahpw kaidehn mehn Israel koaros kin kolokolte arail lelepek. Ahn Esekaia pahpao, Nanmwarki Ahas, wia ohl suwed men. E sohte wauneki sapwellimen Koht tehnpas sarawio oh kahrehiong aramas ako en kaudokiong koht teikan. Ahas pil isikala ekei rien Esekaia pwutak ko nin duwen meirong kei ong koht likamw men. Mouren Esekaia  ni eh tikitiko inenen suwed!​—2 Nan. 16:2-4, 10-17; 2 Kron. 28:1-3.

9, 10. (a) Dahme kahrehda Esekaia kakete wiahla emen me kin keh lingeringer? (b) Dahme kahrehda kitail en dehr lingeringerda pahn Koht? (c) Dahme kahrehda kitail en dehr medewe me mour me kitail tikida loale kin kahrehda soangen aramas dah kitail pahn wiahla?

⁹ Mehn kahlemeng suwed en Ahas kakete kahrehiong nah pwutako Esekaia en lingeringerda pahn Siohwa de wiahla aramas suwed duwehte eh pahpao. Rahnwet, ekei me lelohng soangen kahpwal kan me sohte nohn laud duwehte dahme Esekaia lelohng kin pehm me re ahneki kahrepe mwahu en “kaulimehki” Siohwa de lingeringerda pahn sapwellime pwihn. (Lep. Pad. 19:3) Ekei pehm me mouren peneinei suwed me re tikida loale ele kahrehiong irail en ahneki mour suwed, de kahrehiong irail en pwurehng wia soangen sapwung kohte me arail pahpa nohno ko wiahda. (Esek. 18:2, 3) Ahpw ia duwe, madamadau pwukat mehlel?

¹⁰ Mouren Esekaia kadehdehda me pasapengo soh! Sohte kahrepe mwahu ehu kitail en lingeringerda pahn Siohwa. E sohte kin ketin kahrehda soahng suwed kan en wiawihong aramas. (Sohp 34:12) Mehlel, pahpa nohno kan kak padahkihong neirail seri kan ren wia me mwahu de suwed. (Lep. Pad. 22:6; Kol. 3:21) Ahpw met sohte wehwehki me mouren peneinei me kitail tikida loale pahn kahrehiong kitail en wiahla aramas mwahu de suwed. Dahme kahrehda? Pwehki Siohwa ketin kisekisehkin kitail saledek en wiahda pilipil, me iei koahiek en pilada en wia me mwahu de me suwed. (Deud. 30:19) Ia duwen Esekaia eh doadoahngki kisakis kesempwal wet?

11. Dahme kahrehda Esekaia wia emen nanmwarki me keieu mwahu nan Suda?

¹¹ Mendahki eh pahpao wia emen rehn nanmwarki keieu suwed ko nan Suda, Esekaia wiahla emen nanmwarki me keieu mwahu. (Wadek 2 Nanmwarki 18:5, 6.) E pilada en dehr idawehn mehn kahlemeng suwed en eh pahpao. E pilada en rong kanahieng sapwellimen Siohwa soukohp ako, duwehte Aiseia, Maika, oh Oseia. E rong kanahieng arail peneu oh arail kin kapwungala ih. Met kamwakid ih  en kamwahwihala kahpwal tohto me eh pahpao wiahda. E kamwakelehda tehnpas sarawio, peki rehn Koht en ketin mahkohng dipen aramas ako, oh kasohrehla dikedik ko nan sahpwo pwon. (2 Kron. 29:1-11, 18-24; 31:1) Mwuhr, ni ahnsou me nanmwarki en Asiriao, Senakerip, nda me e pahn mahweniong Serusalem, Esekaia kasalehda eimah oh pwoson laud. E likih me Siohwa pahn ketin pere sapwellime aramas akan oh e kakehlaka irail. (2 Kron. 32:7, 8) Mie ahnsou ehu me Esekaia aklapalapala, ahpw ni Siohwa eh ketin kapwungala ih, e kasalehda aktikitik. (2 Kron. 32:24-26) E sansal me Esekaia wia mehn kahlemeng mwahu ong kitail en alasang. E sohte mweidohng mouren peneinei me e tikida loale en kauwehla eh mour. Ahpw, e kasalehda me e kompoakepahnki Siohwa.

12. Duwehte Esekaia, ia duwen me tohto rahnwet ar kadehdehda me re wia kompoakepahn Siohwa?

¹² Sampah rahnwet kin lemei oh sempoak, kahrehda seri tohto sohte ahneki soangen pahpa nohno me kin poakohng oh apwalih irail ni ar kekeirda. (2 Tim. 3:1-5) Mendahki Kristian tohto rahnwet tikida nan mouren peneinei ehu me apwal, re pilada en kakairada nanpwungmwahu rehn Siohwa. Duwehte Esekaia, re kasalehda me mouren peneinei me re tikida loale sohte kin kahrehiong soangen aramas dah re pahn wiahla mwuhr. Koht ketin kisekisehkin kitail saledek en wiahda pilipil oh kitail kak pilada en papah oh wauneki ih, duwehte me Esekaia wia.

13, 14. Dahme kahrehda pwais me Mery alehdi mwomwen nohn apwal, ahpw ia duwen eh mwekidki dahme Kapriel ndaiong ih?

¹³ Sounpar tohto mwurin Esekaia, peinakapw aktikitik men me adaneki Mery ahneki nanpwungmwahu tohrohr rehn Siohwa oh pil pwukoa tohrohr ehu. E pahn liseianda, kaipwidi oh pil apwalihada sapwellimen Koht Ohlo! Siohwa uhdahn ketin poakohng oh likih Mery pwehn ketikihong ih soangen pwais kaselel oh kapwuriamwei wet. Ahpw ia duwen Mery eh mwekidki met ni eh tepin rong duwen pwukoa wet?

¹⁴ Kitail kin kalapw koasoia duwen pwais kaselel me Mery alehdi. Ahpw ia ekei soangen pwunod me ele e ahneki? Karasepe, tohnleng Kapriel nda me e pahn liseianda nan eh sohte wendi rehn ohl emen. Kapriel pil sohte kawehwehiong eh peneineio de mehn mpe ko ia duwen eh pahn liseianda. Dahme re pahn lemehkiong ih? Ia duwen eh pahn kamehlelehiong Sosep me e kin lelepekohngete ih? Patehng met, e ahneki pwukoa laud en apwalihada sapwellimen Koht Ohlo nin duwen aramas emen! Kitail sehse soangen kapwunod koaros me Mery ahneki, ahpw kitail ese dahme e wia mwurin Kapriel koasoiong ih. E nda: “Iet sapwellimen Kaun-o lidu ngehi; en wiawihong  ie duwen me komwi mahsanih.”​—Luk 1:26-38.

15. Dahme kahrehda ahn Mery pwoson uhdahn kapwuriamwei?

¹⁵ Ahn Mery pwoson uhdahn kapwuriamwei! E onopadahngehr en wia soahng koaros me e anahne wia duwehte lidu men. E likih me Siohwa pahn ketin apwalih oh pere ih. Ia duwen Mery eh kak ahneki soangen pwoson laud wet? Kitail sohte kin ipwidihte ahneki pwoson. Ahpw kitail kak ahneki pwoson ma kitail kakairada irair wet oh peki rehn Koht en ketin kapaiada atail nannanti. (Ep. 2:8) Mery kin doadoahk laud pwehn kakehlakahda eh pwoson. Ia duwen atail ese met? Kitail pahn koasoiapene mwomwen eh kin rong oh dahme e kin nda.

16. Dahme kasalehda me Mery kin rong kanahieng?

¹⁶ Ia duwen Mery eh kin rong. Paipel mahsanih me kitail “en nan kapehd mwadang ong rong, ahpw dehr nan kapehd karuaru en lokaia.” (Seims 1:19) Mery kin rong kanahieng. Paipel kasalehda me e kin rong kanahieng mehkan me e rongada, ahpw mehlel soahng kan me e sukuhlki duwen Siohwa. E kin kihong ahnsou en doudouloale soahng kesempwal pwukat. Ehu karasepen met iei ahnsowo me Sises ketin ipwidi ni sounsilepen sihpw ko ar ndaiong Mery dahme tohnleng men ndaiong irail. Mwuhr, ahnsou me Sises sounpar 12, e mahsanih mehkot me Mery inenen pwuriamweikihla. Ni ahnsou ko koaros, Mery kin rong, tamataman oh medemedewe mwahu dahme e rongadao.​—Wadek Luk 2:16-19, 49, 51.

17. Dahme kitail kak sukuhlki duwen Mery sang ni mwomwen eh kin lokaia?

¹⁷ Dahme Mery kin nda. Paipel sohte nohn padahkihong kitail dahme Mery kin nda. Dahme Mery nda me keieu reirei iei me dierek nan Luk 1:46-55. Lepin lokaia pwukat kasalehda me Mery uhdahn esehla mwahu Mahsen en Koht. Ia duwen? Ahn Mery lokaia ko duwehte lepin lokaia ko me Ana, ahn Samuel nohno, doadoahngki nan eh kapakapo. (1 Sam. 2:1-10) E mwomwen me nan eh lokaia ko, Mery doadoahngki iren Paipel kan pak 20. E sansal me e kin perenki koasoia duwen padahk mehlel kan me e sukuhlkihsang Kompoakepah me keieu lapalap, Siohwa, oh sapwellime Mahsen.

18. Ni ahl dah kei me kitail kak alasang ahn Mery pwoson?

¹⁸ Duwehte Mery, ele ekei pak kitail kin alehdi pwukoa kan sang Siohwa me kitail medewe nohn apwal ong kitail. Kitail en alasang ahn Mery mehn kahlemeng, kasalehda aktikitik ni atail ale pwukoa pwukat oh likih me Siohwa pahn ketin sewese kitail. Kitail pil kak alasang ahn Mery pwoson sang ni atail kin rong kanahieng Siohwa oh doudouloale dahme kitail sukuhlki duwen ih oh kupwure kan. Eri kitail kak ni peren padahkihong meteikan dahme kitail sukuhlkier.​—Mel. 77:11, 12; Luk 8:18; Rom 10:15.

19. Dahme kitail kak kasik ma kitail alasang mehn kahlemeng mwahu kan en pwoson me kileldi nan Paipel?

¹⁹ E sansal me Rud, Esekaia oh Mery wia kompoakepahn Siohwa, duwehte Eipraam. Patehng irail, mie irail sounkadehde tohto me duwehte “depwek kalaimwun ehu” me pil ahneki pai kaselel en wiahla kompoakepahn Koht. Kitail en pousehlahte alasang mehn kahlemeng mwahu pwukat en pwoson. (Ipru 6:11, 12) Ma kitail wia met, kitail kak kasik en ahneki keting laud en kompoakepahnki Siohwa kohkohlahte!