1, 2. (a) Ia duwen atail ese me aramas kak kompoakepahnkihla Koht? (b) Dahme kitail pahn koasoiapene nan iren onop wet?

 SANGETE atail ipwidi lao lel ahnsou me kitail mehla, kitail kin anahne aramas en poakohng kitail. Aramas anahne kompoakepah keren kan me kin poakohng irail, a kaidehn ihte soangen limpoak me mi nanpwungen ohl oh lih. Dahme kitail keieu anahne iei limpoak sang Siohwa. Aramas tohto sohte kamehlele me aramas kak ahneki nanpwungmwahu keren rehn Koht pwehki re sohte kak kilang ih oh ih me wasa lapalahpie. Ahpw kitail ese dahme mehlel!

² Kitail ese sang nan Paipel me aramas kin kompoakepahnkihla Koht. Kitail anahne sukuhlkihsang arail mehn kahlemeng kan. Dahme kahrehda? Pwehki atail kompoakepahnkihla Koht wia mehn akadei ehu me keieu kesempwal me kitail kak ahneki. Eri kitail pahn koasoiapene mehn kahlemeng en Eipraam. (Wadek Seims 2:23.) Ia duwen eh kompoakepahnkihla Koht? Ahn Eipraam  nanpwungmwahu keren rehn Koht kin poahsoankihda pwoson, oh Paipel kahdanekin ih “semen irail kan koaros me pwoson.” (Rom 4:11) Ni atail pahn koasoiapene eh mehn kahlemengo, pein idek rehmw, ‘Ia duwen ei kak alasang ahn Eipraam pwoson oh kakehlakahda ei nanpwungmwahu rehn Siohwa?’

3, 4. (a) Menlau kawehwehda kasongosong dahieu me ele keieu laud ong ahn Eipraam pwoson. (b) Dahme kahrehda Eipraam men meirongkihla nah pwutako?

³ Medewehla Eipraam me mi mpen sounpar 125, eh alialu wawai kohdahla pohn nahna ehu. ^[1] (Menlau kilang ire kan mwuri.) Nah pwutako, Aisek, me kereniong sounpar 25, alu mwuri. Aisek wahda tuwi kei oh Eipraam wa naip pwoat oh soahng kei me e anahne pwehn saunkihda kisiniei. Ele seiloak wet me keieu apwal nan ahn Eipraam mour. Ahpw met kaidehn pwehki e mahlahr. E wie kehkehlailte. Seiloak wet apwal ong ih pwehki Siohwa ketin mahsanihong en meirongkihla nah pwutako!​—Sen. 22:1-8.

⁴ Ele met wia kasongosong me keieu laud ong ahn Eipraam pwoson. Ekei aramas nda me Koht ketin lemei ni eh mahsanihong Eipraam en meirongkihla nah pwutako. Ekei pil nda me Eipraam men wia met pwehki e sohte poakohng nah pwutako. Aramas kin nda mepwukat pwehki sohte arail pwoson oh re sohte wehwehki dahkot pwoson. (Ipru 11:1) Ahpw Eipraam sohte kin peikiong Koht ni soh lamalam. E kin peik pwehki e ahneki pwoson mehlel. E ese me Siohwa sohte pahn ketin mahsanihong ih en wia mehkot me pahn kauwehla eh mour kohkohla. Eipraam ese me ma e peik, Siohwa pahn ketin kapaiada ih oh nah pwutak kompoakeo. Dahme Eipraam anahne pwehn ahneki soangen pwoson laud wet? E anahne esehla oh pil lelohng irair kan pwehn ahneki met.

5. Ia duwen Eipraam eh kakete esehla duwen Siohwa, oh ia eh pepehm duwen loalokong wet?

⁵ Dahme e esehla. Eipraam tikida nan kahnimw ehu me adaneki Ur. Aramas ako wasao kin kaudokiong koht likamw kan oh eh pahpao pil kin iang wia met. (Sos. 24:2) Eri ia duwen Eipraam eh esehla duwen Siohwa? Paipel kasalehda me nein Noha pwutako Sehm iei kisehn Eipraam. Sehm wie momour lao Eipraam kereniong sounpar 150. E ahneki pwoson laud oh mwein e kin padahkihong eh peneinei ko duwen Siohwa. Kitail sohte uhdahn ese, ahpw Eipraam kakete esehla duwen Siohwa ni ahl wet. Dahme e esehla kahrehiong ih en poakohngala Siohwa, oh loalokong wet sewese ih en kakairada eh pwoson.

6, 7. Ia duwen dahme wiawihong Eipraam eh kahrehiong eh pwoson en kehlailla?

⁶ Dahme e lelohng. Dahme wiawihong Eipraam me kakehlakahda eh pwoson? Ekei aramas kin nda me madamadau kin imwikihla pepehm oh pepehm kin imwikihla wiewia. Dahme Eipraam esehla duwen Koht kamwakidada eh mohngiong, oh met kahrehiong ih en uhdahn wauneki Siohwa, “Koht Wasa Lapalahpie, Sounwiepen nanleng oh sampah.” (Sen. 14:22) Paipel kahdaneki soangen kasalepen wahu laud wet “lemmwiki” Koht. Pwe kitail en ahneki nanpwungmwahu keren rehn Koht, kitail anahne lemmwiki ih. (Wiewia 10:35; Mel. 25:14) Irair mwahu wet iei me kamwakid Eipraam en peikiong Siohwa.

⁷ Koht ketin mahsanihong Eipraam oh Sara en mweselsang imwarao nan Ur oh keseula nan sahpw doh ehu. Ira mahlahr oh anahne kousoan nan impwal kan erein ara mour. Mendahki Eipraam ese me mie soangen keper tohto, e koasoanehdi teng en peikiong  Siohwa. Pwehki eh peik, Koht ketin kapaiada oh pere ih. Karasepe, ni ahnsou me nanmwarki men wahsang ahn Eipraam pwoud masamwahwo Sara, oh Eipraam kereniong kamakamla, Siohwa ketin perehla ira ni ahl kapwuriamwei ehu. (Sen. 12:10-20; 20:2-7, 10-12, 17, 18) Dahme wiawihong Eipraam iei me kahrehiong eh pwoson en kehlailla.

8. Ia duwen atail esehla duwen Siohwa oh atail koahiekla eh pahn kakehlakahda atail nanpwungmwahu reh?

⁸ Ia duwe, kitail kak wiahla sapwellimen Siohwa kompoakepah keren men? Ei, kitail uhdahn kak! Duwehte Eipraam, kitail anahne esehla duwen Siohwa. Rahnwet, Paipel kin kihda loalokong oh sawas me kitail anahne pwehn koahiekla. Dahme kitail ahneki uhdahn laudsang dahme Eipraam ahneki. (Dan. 12:4; Rom 11:33) Paipel kin audaudki soahng kan duwen “Sounwiepen nanleng oh sampah” me kitail kak loalokongkihla. Dahme kitail sukuhlki kin kahrehiong kitail en poakohng Siohwa oh pil sewese kitail en uhdahn wauneki ih. Soangen limpoak oh wahu wet ong Koht kin kamwakid kitail en peikiong ih. Ni atail wia met, kitail kin kilang ia duwen eh kin ketin pere oh kapaikitailda, oh met kin kahrehda kitail en koahiekla. Ni atail kin papah Siohwa sang mohngiongitail unsek, kitail pahn ahneki nsenamwahu, popohl oh peren. (Mel. 34:8; Lep. Pad. 10:22) Ni atail kin kalaudehla atail esehla duwen Siohwa oh paiekihda kapai kan sang ih, atail nanpwungmwahu reh pahn kehlailla.

9, 10. (a) Dahme anahn pwe nanpwungmwahu ehu en kehlailla? (b) Dahme kasalehda me Eipraam kin kesempwalki oh kakehlaka eh nanpwungmwahu rehn Siohwa?

⁹ Kompoakepah keren men kak duwehte dipwisou kesempwal ehu. (Wadek Lepin Padahk 17:17.) E sohte duwehte sah pweilaud ehu me kin ongete mehn kapwat. Ahpw e duwehte wahnrohs lingan ehu me ke anahne kalamwuri oh apwalih mwahu. Eipraam uhdahn kesempwalki oh kolokol eh nanpwungmwahu rehn Siohwa. Ia duwen eh wia met?

¹⁰ Eipraam doulahte kakehlaka eh peik oh lemmwiki Koht. Karasepe, ni ahnsou me ih, eh peneinei, oh nah ladu ko seiloakla Kenan, e pousehlahte mweidohng Siohwa en ketin kaweid ih ni eh wiahda pilipil laud oh pil tikitik kan. Sounpar ehu mwohn Aisek ipwidi, ni Eipraam eh sounpar 99, Siohwa ketin mahsanihong ih en sirkumsaisihala ohl koaros nan imweo. Ia duwe, Eipraam peikasalki dahme Siohwa pahn ketin wia de song en rapahki kahrepe kan pwehn dehr wia dahme Siohwa mahsanihong? Soh, e likih Siohwa oh peikiong ni “rahnohte.”​—Sen. 17:10-14, 23.

11. Dahme kahrehda Eipraam pwunodikihda Sodom oh Komora, oh ia duwen Siohwa eh ketin sewese ih?

¹¹ Pwehki Eipraam kin peikiong Siohwa  ahnsou koaros pil ni soahng kan me tikitik, ara nanpwungmwahu kin kehlailla. E pehm me e kak patohwanohng Siohwa duwen soahng koaros oh peki sapwellime sawas ni ahnsou me ekei peidek kin apwal ong ih. Karasepe, ni Siohwa eh mahsanih me e pahn ketin kasohrehla kahnimw kan en Sodom oh Komora, Eipraam pwunodikihda. Dahme kahrehda? E pwunodki ma aramas mwahu kan pahn iangete me suwed kan mehla. Ele e pwunodki nein rie ohlo pwutak, Lohd, oh ahn Lohd peneineio me kin kousoan Sodom. Eipraam likih Siohwa, “Sounkopwung en sampah pwon,” eri, ni aktikitik e patohwanohng Siohwa eh iren kapwunod kan. Siohwa ketin kanengamahiong kompoakepaho oh ketin kasalehda me E sapwellimaniki mahk kalahngan. Siohwa ketin kawehwehda me ni eh pahn ketin wia kadeik, e pahn ketin rapahki aramas mwahu kan oh doareirailla.​—Sen. 18:22-33.

12, 13. (a) Ia duwen dahme Eipraam esehla oh dahme e lelohng ar sewese ih mwuhr? (b) Dahme kasalehda me Eipraam uhdahn likih Siohwa?

¹² E sansal me soahng koaros me Eipraam esehla oh dahme e lelohng sewese ih en kolokolte eh nanpwungmwahu rehn Siohwa en kehlail. Eri mwuhr, ni ahnsou me Siohwa ketin mahsanihong Eipraam en meirongkihla nah pwutako, Eipraam ese me Siohwa kin ahnsou koaros ketin kasalehda kanengamah, mahk kalahngan, likilik oh e kak ketin pere ih. Eipraam uhdahn kamehlele me Siohwa sohte ketin mwadangete wekila oh lemeiongala ih! Ia duwen atail ese met?

¹³ Mwohn Eipraam kohkohlahsang nah ladu ko, e nda: “Kumwa mihmihte met rehn ahset. Ngehi oh pwutaket pahn kolahng wia kaudok mwo, se ahpw pahn pwurodo rehmwa.” (Sen. 22:5) Ia wehwehn ahn Eipraam koasoio? Ia duwe, e likamwkihda me ih oh Aisek pahn pwurodo ni eh ese me e pahn meirongkihla Aisek? Soh. Paipel mahsanih me Eipraam ese me Siohwa kak ketin kaiasada Aisek sang me melahr kan. (Wadek Ipru 11:19.) Eipraam ese me Siohwa ketikihong ih kehl en nainekihda pwutak men mendahte ih oh Sara uhdahn mahlahr. (Ipru 11:11, 12, 18) Eri e pohnese me sohte mehkot me Siohwa sohte kak ketin wia. Eipraam sehse dahme pahn wiawi rahno. Ahpw e pwoson me ma anahn, Siohwa pahn ketin kaiasada nah pwutako pwe sapwellime inou ko koaros pahn pweida. Ihme kahrehda Paipel kahdaneki Eipraam “semen irail kan koaros me pwoson”!

14. Kahpwal dah kan me ke kin lelohng ni omw papah Siohwa, oh ia duwen ahn Eipraam mehn kahlemeng eh kak sewese iuk?

¹⁴ Rahnwet, Siohwa sohte ketin mahsanihong kitail en meirongkihla neitail seri kan, ahpw e ketin mahsanihong kitail en peikiong sapwellime kehkehlik kan. Ele ekei pak kitail  sohte kin wehwehki ia kahrepen kehkehlik pwukat de mwein e apwal ong kitail en kapwaiada. Ke ahneki soangen pepehm wet? Ong ekei, re kin apwalki doadoahk en kalohk. Mwein re namenek oh apwalki koasoiong aramas akan me re sehse. Ekei kin perki en weksang iangarail tohndoadoahk oh tohnsukuhl kan. (Eks. 23:2; 1 Des. 2:2) Ni eh mahsanihong uhk ken wia mehkot apwal, medewehla ahn Eipraam mehn kahlemeng mwahu en pwoson oh eimah. Ni atail doudouloale mehn kahlemeng en ohl oh lih lelepek kan, met kak kamwakid kitail en alasang irail oh karanihala Kompoakepatailo, Siohwa.​—Ipru 12:1, 2.

15. Dahme kahrehda kitail kamehlele me Eipraam sohte koluhkihla eh peikiong Siohwa ni loalopwoat?

¹⁵ Ia duwe, mie pak Eipraam koluhkihla eh peikiong sapwellimen Siohwa kehkehlik kan? Paipel mahsanih me Eipraam “sipalla ni eh likeilapalahr mehlel, mahlahr oh nsenamwahu.” (Sen. 25:8, NW) Pil ni eh sounpar 175, Eipraam kak medewe duwen eh mour werei oh nsenamwahuki. Dahme kahrehda? Pwehki eh nanpwungmwahu rehn Siohwa kin ahnsou koaros wia mehkot me keieu kesempwal ong ih. Ahpw, ni atail wadek me Eipraam “mahlahr oh nsenamwahu,” met sohte wehwehki me e sohte kin inengieng en mour ni ahnsou kohkohdo.

16. Soangen peren dah me Eipraam pahn ahneki nan Paradais?

¹⁶ Paipel mahsanih me Eipraam “awiawih kahnimw ehu me Koht ketin kupwurehla oh kauwada, kahnimw me poahsoan poatopoat.” (Ipru 11:10) Eipraam kamehlele me ehu rahn e pahn kilang kahnimwo, Wehin Koht, kakaun sampah. Oh e uhdahn pahn kilang! Medewehla ia uwen Eipraam eh peren ni eh pahn mour nan paradais ehu nin sampah oh pousehlahte kakehlaka eh nanpwungmwahu rehn Koht. E pahn perenki ese me eh mehn kahlemeng en pwoson sewesehier sapwellimen Koht ladu kan erein sounpar kid kid kei! Nan Paradais, e pahn diarada me meirong me e wia pohn Nahnahn Moria kin karasahda mehkot me laudsang met. (Ipru 11:19) Oh e pahn pil esehda ia duwen medek me e ahneki ni eh kaunopada en meirongkihla nah pwutako Aisek sewesehier aramas lelepek rar rar kei en wehwehki sapwellimen Siohwa pepehm ni eh ketikihda sapwellime Ohlo, Sises Krais, nin duwen pweinen pweipwei sapahl ehu ong aramas akan. (Sohn 3:16) Ahn Eipraam mehn kahlemeng sewese kitail koaros en kalaudehla atail kalahnganki pweinen pweipwei sapahlo, me iei kasalepen limpoak me keieu laud!

17. Dahme ke koasoanehdi teng ken wia, oh dahme kitail pahn koasoiapene nan iren onop en mwuhr?

¹⁷ Emenemen kitail en koasoanehdi teng en alasang ahn Eipraam pwoson. Duwehte Eipraam, kitail anahne esehla oh pil lelohng irair kan pwe kitail en koahiekla. Ni atail doulahte esehla duwen Siohwa oh peikiong ih, kitail pahn kilang ia duwen eh kin ketin kapaikitailda oh pere kitail. (Wadek Ipru 6:10-12.) Siohwa en ketin wia Kompoakepatail kohkohlahte! Nan iren onop en mwuhr, kitail pil pahn koasoiapene mehn kahlemeng siluh duwen me lelepek kan me wiahla sapwellimen Koht kompoakepah keren kei.