1, 2. Ia duwen Depit eh kasalehda me e loalopwoatohng Koht? (Menlau kilang tepin kilel.)

 SOHL oh nah sounpei 3,000 ko raparapahki Depit nan sapwtehn en Sudia pwehn kemehla. Ahpw ehu pwohngo, Depit oh nah ohl ako diarada wasao me Sohl oh nah sounpei ko mi ie. Irail koaros wie memeir, eri Depit oh Apisai alu kanahieng daulih sounpei ko oh diarada Sohl. Apisai mwengininginkihong Depit: “Mweidohng ie I en doakoahki pein sapwellime ketieu en pwar paliwere oh ilewediong nanpwel ni doak ehute​—I sohte pahn pil doak pak riau!” Ahpw Depit sohte mweidohng en kemehla Sohl. E ndaiong Apisai: “Ke sohte pahn wiahiong mehkot suwed! KAUN-O pahn uhdahn ketin kaloke mehmen me pahn wiahiong sapwellime nanmwarki pilipil mehkot suwed.” Depit eri nda: “KAUN-O sohte ketin mweidohng I en song en kauwehla ih me KAUN-O ketin wiahkilahr nanmwarki!”​—1 Sam. 26:8-12.

² Depit wehwehki dahme e anahne wia pwehn loalopwoatohng Siohwa. E ese me e anahne wauneki Sohl oh e sohte pil medewehda en kamedekihala ih. Dahme kahrehda? Pwehki Koht ketin pilada Sohl  en wia nanmwarkien Israel. Rahnwet, duwehte mahs, Siohwa ketin kupwurki sapwellime ladu kan koaros en loalopwoatohng ih oh wauneki irail kan me e ketin mweidohng en ahneki manaman.​—Wadek Maika 6:8.

3. Ia duwen Apisai eh loalopwoatohng Depit?

³ Apisai wauneki Depit pwehki e ese me Koht ketin pilada Depit en wia nanmwarki. Ahpw Depit wiahda dihp laud mwurin eh wiahla nanmwarki. E wia dipen kamwahl rehn ahn Uraia pwoudo oh eri ndaiong Sohap en tehk mwahu me Uraia en kamakamla nan mahwen. (2 Sam. 11:2-4, 14, 15; 1 Kron. 2:16) Sohap rien Apisai, eri Apisai ele rong duwen dahme Depit wiadahro, ahpw e pousehlahte wauneki Depit. Patehng met, Apisai wia kaunen sounpei men oh kakete doadoahngki eh manaman en pein wiahla nanmwarki men, ahpw e sohte wia met. E kin papah Depit oh doarehsang eh imwintihti kan.​—2 Sam. 10:10; 20:6; 21:15-17.

4. (a) Ia duwen atail ese me Depit kin loalopwoatohng Koht? (b) Mehn kahlemeng dah teikan me kitail pahn koasoiapene?

⁴ Depit kin loalopwoatohng Siohwa erein eh mour. Ni eh pwulopwul, e uhki Siohwa oh pil mehn Israel ko ni eh kemehla kodono Kolaiad. (1 Sam. 17:23, 26, 48-51) Mwurin Depit wiahla nanmwarki oh dipada, sapwellimen Siohwa soukohp Nadan anahne kapwungala ih. Depit wehkada me e dipada oh eri koluhla. (2 Sam. 12:1-5, 13) Mwuhr, ni Depit eh mahla, e kihda soahng kesempwal tohto pwehn sewese kauwada sapwellimen Siohwa tehnpas sarawio. (1 Kron. 29:1-5) E sansal me mendahki Depit wiahda sapwung laud kei nan eh mour, e sohte kin uhdihsang eh loalopwoatohng Koht. (Mel. 51:4, 10; 86:2) Nan iren onop wet, kitail pahn koasoiapene mehn kahlemeng en Depit oh meteikan me mour ni ahnsowo oh sukuhlki ia duwen atail kak loalopwoatohng Siohwa laudsang meteikan. Kitail pil pahn koasoiapene irair teikan me pahn sewese kitail en wia met.

5. Mehn kasukuhl dah me kitail sukuhlkihsang sapwung me Apisai wiahda?

⁵ Ni ahnsou me Apisai men kemehla Sohl, e songosong en loalopwoatohng Depit. Ahpw pwehki Depit ese me e sapwung en kamedekihala mehmen me “KAUN-O ketin wiahkilahr nanmwarki,” e sohte mweidohng Apisai en kemehla nanmwarkio. (1 Sam. 26:8-11) Met padahkihong kitail mehn kasukuhl kesempwal ehu: Ni ahnsou me kitail anahne pilada ihs me kitail en keieu loalopwoatohng, kitail en medewe mehnia kaweid sang nan Paipel me kak sewese kitail nan atail irairo.

6. Mendahki kitail kin men loalopwoatohng atail peneinei oh kompoakepatail kan, dahme kahrehda kitail anahne kanahieng?

⁶ Kitail kin men loalopwoatohng emen me kitail poakohng, duwehte kompoakepatail men de emen tohn atail peneinei. Ahpw pwehki kitail sohte unsek, atail pepehm kak pitihkitaildi. (Ser. 17:9) Eri ma emen me kitail poakohng kin wia dahme suwed oh kesehla padahk mehlel, kitail anahne taman me e uhdahn kesempwal kitail en loalopwoatohng Siohwa laudsang koaros.​—Wadek Madiu 22:37.

7. Ia duwen emen sister eh kolokolte eh loalopwoatohng Koht nan irair apwal ehu?

⁷ Ke kak kasalehiong Siohwa me ke loalopwoatohng ih ma emen nan omw peneinei piskensang nan mwomwohdiso. Karasepe, ehu rahno ahn Anne ^[1] (Menlau kilang ire kan mwuri.) nohnou me piskenla, delepwohni Anne oh ndaiong me e men mwemweitla reh. Ahn Anne nohnou nda me e uhdahn nsensuwed pwehki eh peneineio sohte men koasoiong ih. Anne nsensuwedkihla met oh e inoukihda me e pahn sapeng eh nohnou nan kisinlikou. Mwohn eh ntingihada kisinlikowo, Anne doudouloale ekei kaweid en Paipel. (1 Kor. 5:11; 2 Sohn 9-11) Mwuhr, nan kisinlikowo, e kawehwehda ni ahl kadek me eh nohnou me pilada en kohkohsang  eh peneineio ni ahnsou me e dipada oh sohte men koluhla. Anne ndaiong eh nohnou me ieite ahl me e kak pwurehng nsenamwahula iei ma eh pwurala rehn Siohwa.​—Seims 4:8.

8. Irair dah kei me pahn sewese kitail en loalopwoatohng Koht?

⁸ Sapwellimen Koht ladu loalopwoat kan ni mwehin Depito pil kin aktikitik, kadek oh eimah. Kitail kilang ia duwen irair pwukat ar kak sewese kitail en loalopwoatohng Siohwa.

9. Dahme kahrehda Apner song en kemehkihla Depit?

⁹ Nein Sohl pwutako Sonadan oh kaunen karis en sounpei en Israelo, Apner, kilang ahn Depit eh wahdo moangen Kolaiado rehn Nanmwarki Sohl. Sonadan wiahla kompoakepahn Depit oh kolokolte eh loalopwoatohng ih. (1 Sam. 17:57–18:3) Ahpw Apner sohte wia met. Mwuhr Apner pil sewese Sohl me men kemehla Depit. (Mel. 54:3; 1 Sam. 26:1-5) Sonadan oh Apner ese me Koht ketin kupwurki Depit en uhd wiahla nanmwarki en Israel. Ahpw mwurin Sohl mehla, Apner sohte utung Depit. E song en kahrehiong nein Sohl pwutako Isposed en nanmwarkihla. Mwuhr, ele pein Apner men wiahla nanmwarki oh mwein ihme kahrehda e wia nsenen pwopwoud rehn emen ahn Nanmwarki Sohl pwoud ko. (2 Sam. 2:8-10; 3:6-11) Dahme kahrehda ahn Sonadan oh Apner ara pepehm ong Depit uhdahn wekpeseng? Pwehki Sonadan kin loalopwoatohng Siohwa oh aktikitik ahpw Apner sohte kin.

10. Dahme kahrehda Apsalom sohte loalopwoatohng Koht?

¹⁰ Nein Nanmwarki Depit pwutako, Apsalom, sohte loalopwoatohng Koht pwehki e sohte aktikitik. E men wiahla nanmwarki, eri e alehda “were werennansapw pwoat, oahs ekei, oh sounpei 50 me pahn kin tieng mwowe.” (2 Sam. 15:1) E pil kahrehiong mehn Israel tohto en loalopwoatohng ih. E pil song en kemehla Depit, mendahki e ese me Siohwa me ketin idihada Depit en wia nanmwarki en Israel.​—2 Sam. 15:13, 14; 17:1-4.

11. Dahme kitail sukuhlkihsang Apner, Apsalom, oh Paruk?

¹¹ Ni emen eh sohte aktikitik oh men ahneki manaman laud, e kin apwal ong ih en kolokol eh loalopwoatohng Koht. Ei mehlel, kitail poakepoake Siohwa oh sohte men duwehte Apner oh Apsalom me roporop oh suwed. Ahpw kitail anahne kanahieng pwe kitail en dehr tepida noahroke diren mwohni de doadoahk ehu me  kin kahrehiong kitail en pehm me kitail kesempwal. Met pahn kauwehla atail nanpwungmwahu rehn Siohwa. Erein ahnsou ehu, Paruk, nein Seremaia sekterio, men alehdi mehkot me e sohte ahneki oh solahr perenki papah Koht. Mwuhr, Siohwa mahsanihong Paruk: “Ngehi, KAUN-O, pahn kauwehla dahme I kauwadahr oh usada dahme I padokedier. Ih met me I pahn wiahiong sampah pwon. Ia duwe, ke raparapahki ehu kamwahu ong pein kowe? Eri, ke dehr wia met.” (Ser. 45:4, 5) Paruk rong Siohwa. Kitail pil anahne rong ih, pwehki ahnsou keren e pahn ketin kasohrehla sampah suwed wet.

12. Menlau kasalehda dahme kahrehda kitail sohte kak loalopwoatohng Koht ni ahnsou me kitail kin roporop.

¹² Daniel, emen brother nan Mexico, anahne pilada ihs me e pahn loalopwoatohng. E men pwoudikihda serepein men me sohte kin kaudokiong Siohwa. Daniel nda: “I kin pousehlahte nting ong ih pil mwurin ei tepida pioneer.” Ahpw mwuhr e esehda me ni roporop e kin wiewiahte dahme e men wia. E sohte loalopwoatohng Siohwa oh anahne aktikitik. Ih eri ndaiong elder koahiek men duwen serepeino. Daniel kawehwehda: “E sewese ie en kilang me ma I pahn loalopwoatohng Koht, I anahne uhdihsang ei kin nting ong serepeino. Mwurin ei kapakap oh sengiseng pak tohto, ih met me I wia. Mwuhr, ei peren nan doadoahk en kalohk laudla.” Mwuhr Daniel pwoudikihda lih emen me kin poakohng Siohwa oh met e wia emen sounapwalih me kin seiloak.

13. Ia duwen Nadan eh kolokol eh loalopwoatohng Koht oh pil Depit ni ahnsou me Depit dipada?

¹³ Ni atail kin loalopwoatohng Siohwa, kitail kak pil loalopwoatohng meteikan oh sewese irail ni ahl me keieu mwahu. Soukohp Nadan kolokolte eh loalopwoatohng Siohwa oh pil kin loalopwoatohng Depit. Mwurin Depit kihsang ahn emen ohl pwoud oh eri kemehla ohlo, Siohwa ketin poaronehla Nadan en panawih ih. Nadan kin eimah oh peikiong Siohwa. Ahpw e pil mwekid ni erpit oh lokaiahiong Depit ni ahl kadek. E men sewese Depit en wehwehki uwen laud en eh dipada. Ih eri ndaiong Depit soai pwoat duwen ohl kepwehpwe men me pirapahsang ohl semwehmwe men nah sihmpwultehmen. Ni Depit eh rongada met, e uhdahn lingeringerkihda dahme ohl kepwehpweo wiahda. Nadan eri nda: “Iei komwi me aramaso.” Depit eri wehwehkihda me e dipada mwohn Siohwa.​—2 Sam. 12:1-7, 13.

14. Ia duwen omw kak loalopwoatohng Siohwa oh kompoakepahmw de kisehmw kan?

 ¹⁴ Ke pil kak keieu loalopwoatohng Siohwa oh loalopwoatohng meteikan sang ni omw kasalehda kadek. Karasepe, ele mie mehn kadehde me ke kilang emen riomw Kristian wiahda dihp laud ehu. Ele ke men loalopwoatohng ih, ahpw keieu ma e wia kompoakepahmw keren men de tohn omw peneinei. Ahpw ke pil ese me omw loalopwoatohng Siohwa kin kesempwalsang met. Eri duwehte Nadan, peikiong Siohwa ahpw kadekohng riomw Kristiano. Ndaiong ih me e anahne peki sawas sang elder kan oh koasoiong irail ni ahnsou mwadang. Ma e sohte wia met, ke anahne pein padahkihong elder kan. Ni omw wia met, ke kin kolokol omw loalopwoatohng Siohwa. Oh ni ahnsowohte, ke kin kadekohng riomw Kristiano pwehki elder kan kak sewese ih en pwurehng ahneki nanpwungmwahu rehn Siohwa. Re pahn kapwungala ih ni ahl kadek.​—Wadek Lipai 5:1; Kalesia 6:1.

15, 16. Dahme kahrehda Usai anahne eimah pwehn loalopwoatohng Koht?

¹⁵ Usai iei emen kompoakepahn Nanmwarki Depit me kin loalopwoat. Ni ahnsou me aramas ako men Apsalom en wiahla nanmwarki, Usai anahne eimah pwehn kolokol eh loalopwoatohng Depit oh Koht. E ese me Apsalom iangahki nah sounpei ko leledohr Serusalem oh me Depit tangasangehr wasao. (2 Sam. 15:13; 16:15) Ahpw dahme Usai wia? E kesehla Depit oh utungada Apsalom? Soh. Mendahki Depit eh mahlahr oh aramas tohto men kemehla ih, Usai kolokolte eh loalopwoatohng ih pwehki Depit iei me Siohwa ketin idihadahr en wia nanmwarki. Eri Usai kohla Nahnahn Olip pwehn tuhwong Depit.​—2 Sam. 15:30, 32.

¹⁶ Depit peki Usai en pwurala Serusalem oh mwomwehda wia kompoakepahn Apsalom pwe en kak kahrehiong Apsalom en rong eh kaweid a kaidehn ahn Ahidopel. Usai peikiong Depit oh kolokol eh loalopwoatohng Siohwa mendahki eh mour mihla nan keper. Depit patohwan kapakapohng Siohwa en ketin sewese Usai oh iei met me wiawi. Apsalom rongala Usai a kaidehn Ahidopel.​—2 Sam. 15:31; 17:14.

17. Dahme kahrehda kitail anahne eimah pwehn loalopwoat?

¹⁷ Kitail anahne eimah pwehn loalopwoatohng Siohwa oh peikiong ih a kaidehn wia dahme atail peneinei, iangatail tohndoadoahk, de kaunen koperment kan men kitail en wia. Karasepe, sangete eh tikitik, Taro, sang Sapan, wia soahng koaros me e kak pwehn kaperenda eh pahpa nohno. E kin peikiong oh loalopwoatohng ira, kaidehn ihte pwehki e anahne wia met, ahpw pwehki e poakepoake ira. Ahpw ni eh tepida onop rehn Sounkadehdehn Siohwa kan, eh pahpa nohno men en uhdi. Met kansensuwedihala ih oh e uhdahn apwalki ndaiong ira me e piladahier en iang towehda mihting kan. Taro nda: “Ira uhdahn lingeringerda pahi kahrehda erein sounpar kei ira sohte mweidohng ien mwemweitla rehra imwato. I kapakapki eimah pwehn idawehnte ei pilipilo. Met ira sohla nohn lingeringer oh I kakehr kaukaule mwemweitla rehra.”​—Wadek Lepin Padahk 29:25.

18. Ia duwen omw paiekihda onop wet?

¹⁸ Duwehte Depit, Sonadan, Nadan, oh Usai, kitail en pil pehm nsenamwahu me kin kohsang atail loalopwoatohng Siohwa. Kitail sohte men duwehte Apner oh Apsalom me sohte kin loalopwoat. Mehlel me kitail sohte unsek oh kin wiahda sapwung kan, ahpw kitail en kasalehiong Siohwa me atail loalopwoatohng ih iei me keieu kesempwal nan atail mour.