MEDEWEHLA duwen rahn me keieu kaperen nan omw mour. Ia duwe, iei rahno me ke pwopwoudida de ahnsou me keieun noumw serio ipwidi? De rahno me ke papidaisla? Mwein met wia rahn me keieu kesempwal oh kaperen nan omw mour. Oh ni rahno, ia uwen riomw Kristian kan ar perenki kilang omw kadehdehda me ke poakohng Koht sang nan omw mohngiong, mour, lamalam oh kehl unsek!​—Mark 12:30.

Ele ke kin ahneki peren laud ni omw papah Siohwa sangete ni ahnsou me ke papidaisla. Ahpw, ekei sounkalohk kan solahr nohn peren duwehte me re kin wia mahs. Dahme kahrehda met wiawi? Kahrepe dah kan me kitail ahneki pwehn pousehlahte papah Siohwa ni peren?

Rongamwahu en Wehio kin wahdohng kitail peren laud. Dahme kahrehda? Pwehki Siohwa ketin inoukihda me Wehio pahn kereniong kasohrehla sampah suwed wet oh wahdo sapwellime sampah kapw. Sepanaia 1:14 mahsaniong kitail: “Rahn lapalap en KAUN-O kerendohr​—kerendohr mehlel oh pahn mwadang leledo!” Ahpw ma kitail pehm me kitail anahne awih wereisang dahme kitail kasik, kitail kak sohla nohn peren duwehte me kitail kin wia mahso. Met kak kahrehiong kitail en sohla nohn ngoangki atail papah Koht.​—Lep. Pad. 13:12.

Ni atail kin iang riatail Kristian kan, e kin kangoange kitail en pousehlahte papah Siohwa ni peren. Wiewia mwahu en sapwellimen Siohwa aramas akan ele kahrehiong kitail en men iang kaudok mehlel oh sewese kitail en tepida papah Siohwa ni peren. (1 Pit. 2:12) Ahpw, dahme kak wiawi ma emen riatail Kristian ale peneu pwehki e sohte peikiong sapwellimen Koht kehkehlik kan? Met ele kak kaluwetehla ekei nan mwomwohdiso oh kahrehiong irail en sohla nohn peren.

Atail men kepwehpwehla pil kak kahrehiong kitail en sohla nohn peren. Ia duwen? Ahn Sehdan sampah men kitail en kamehlele me kitail anahne pwainda soahng kan me kitail sohte uhdahn anahne. Eri kitail en tamanda sapwellimen Sises mahsen pwukat: “Sohte aramas emen kak liduwih soumas riemen; pwe e pahn kailongki emen, e ahpw pahn poakepoake meteio; e pahn loalopwoatohng emen, e ahpw pahn mwamwahliki meteio. Eri, ih pil duwen kumwail: kumwail sohte kak papah Koht oh pil kepwehn sampah kan.” (Mad. 6:24) Kitail sohte kak papah Siohwa ni peren oh ni ahnsowohte song en  alehdi soahng koaros me kitail kak nin sampah wet.

Papah Siohwa sohte wia wisik toutou ehu ong irail kan me kin poakohng ih. (1 Sohn 5:3) Taman me Sises mahsanih: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla. Kumwail ale oh kapaikada ei mehn wisiket, oh kumwail padahngki sang ie, pwe I me opampap oh nan kapehd karakarahk; kumwail ahpw pahn diar kommoalpen ngenomwail kan. Pwe mehn wisik me I pahn kihong kumwail me mengei, oh audepe kan me marahra.” (Mad. 11:28-30) Atail wia Kristian mehlel kei kin kansenamwahu oh wahdo peren. Uhdahn mie kahrepe mwahu kan kitail en peren nan atail papah Siohwa. Kitail tehkpene kahrepe siluh.​—Apak. 3:18.

Kitail kin papah Meno me Ketikihda Mour, “Koht en peren.” (Wiewia 17:28; 1 Tim. 1:11, NW) Kitail ese me kitail pweipwandkihong Sounkapikpatail atail mour. Eri kitail en pousehlahte papah ih ni peren mendahki sounpar tohto dower powe sang ahnsou me kitail papidaisla.

Medewehla Héctor, me papahkiher Siohwa nin duwen sounapwalih me kin seiloak erein sounpar 40. Pil ni ahnsou me e “mahlahr,” e kin pil perenkihte papah Siohwa. (Mel. 92:12-14) Ahn eh pwoudo soumwahwo kahrehiong eh doadoahk en papah Koht tikitikla, ahpw Héctor kin kolokolte eh peren. E nda: “Mendahki e kansensuwed en kilang ei pwoudo eh roson wie susuwedla oh pil kin apwal en apwalih ih, I sohte mweidohng met en kihsang ei peren en papah Koht mehlelo. Ei ese me I pweipwandki ei mour ong Siohwa me ketin kapikada aramas ong kahrepe ieu, met itar ong ie en poakohng ih laud oh papah ih ni mohngiong unsek. I kin wia uwen ei kak en pwerisek nan doadoahk en kalohk, oh song en kolokol ei koapworopwor en Wehio keieu nan ei madamadau pwe ien dehr sohla peren.”

Siohwa ketikihda pweinen pweipwei sapahlo me kahrehiong kitail en kak ahneki mour peren. Mehlel, “pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Ei, kitail kak ale mahkpen dipatail kan oh ale mour soutuk ni atail kasalehda pwoson sapwellimen Koht kisakis limpoak en pweinen pweipwei sapahlo. Met wia kahrepe uhdahn mwahu ehu en kasalehda kalahngan! Oh atail kalahnganki pweinen pweipwei sapahl wet pahn kamwakid kitail en papah Siohwa ni peren.

Emen brother nan Mexico me adaneki Jesús, nda:  “I wia lidun ei doadoahko, ekei pak I kin doadoahk kereniong rahn ehu pwon mehnda ma I sohte anahne wia met. I kin wia met pwehn wiahda mwohni laud. Mwuhr I sukuhlki duwen Siohwa oh ia duwen eh ketikihda sapwellime Ohlo ong tohnsampah. I uhdahn inengieng papah ih. I eri inoukihong Siohwa ei mour, oh mendahki ei doadoahk nan ei wasahn doadoahko erein sounpar 28, I medewehda en sohla doadoahk oh tepida doadoahngki pali laud en ei ahnsou ong papah Siohwa.” Ih ahnsowo me e tapiada eh papah Siohwa ni peren erein sounpar tohtohie.

Kitail kin mourki mour mwakelekel me kin wahdo peren. Ke tamanda ia mwomwen omw mour mwohn omw esehla Siohwa? Wahnpoaron Pohl katamankihong Kristian ko nan Rom me ‘mahso irail me lidun dihp’ kei ahpw re wiahlahr “lidun pwung.” Pwehki re kin momourki mour mwakelekel, re kak kasikasik mour soutuk. (Rom 6:17-22) Kitail pil kin idawehn sapwellimen Siohwa koasoandi kan, eri kitail kin saledeksang nsensuwed me kin kohsang mour en tiahk samin de lemei. Met kin kahrehda peren.

Medewehla Jaime me sohte kin kamehlele me mie Koht ahpw e kin kamehlele me mour pein miehla oh aramas kohsang mahn. Ih emen sounpaker. Jaime tepida iang towehda mihting kan oh uhdahn mwekidkihda limpoak me e kilang wasao. Pwehn kesehla eh mour en mahs, Jaime anahne peki rehn Siohwa en ketin sewese en kamehlele Ih. Jaime nda: “Ekisekis, I diarada me mie Samatail Koht men me kin ketin limpoak oh mahk kalahngan. Ei kolokol sapwellimen Siohwa koasoandi pwung kan kin wia mehn perepe ehu ong ie. Ma I sohte wekila, I pahn kakete kamakamala, duwehte ekei iengei sounpaker ko. Ahnsou me keieu kaperen nan ei mour iei ahnsou kan me I doadoahngki pwehn papah Siohwa.”

Ia pahn atail pepehm erein atail awiawih imwiseklahn sampah suwed wet? Tamataman me kitail kin wiewia kupwuren Koht oh me kitail kasikasik mour soutik. “Eri, kitail dehr pwangahki atail wiewia mwahu kan; pwe ma kitail sohte pahn pwangahkihda, ahnsou pahn leledo kitail ahpw pahn dolung.” (Kal. 6:8, 9) Siohwa pahn ketin sewese kitail en dadaurete oh nantihong en kakairada irair kan me kitail anahne pwehn pitsang kahn kamakam kowahlapo, oh pousehlahte papah Siohwa ni peren.​—Kaud. 7:9, 13, 14; Seims 1:2-4.

Kitail kak kamehlele me Siohwa pahn ketin katingih atail kin dadaur pwehki e mwahngih atail doadoahk oh limpoak me kitail kin kasalehda ong ih oh mwareo. Ma kitail pousehlahte papah ih ni peren, kitail pahn duwehte sounmelkahkao Depit, me nda: “I kin aririh KAUN-O ahnsou koaros; e kin ketiket limwahi, oh sohte mehkot kak kauweiehla. Ihme kahrehda I kin diren kaping oh peren oh I kin pehm saledek sang apwal.”​—Mel. 16:8, 9.