I IPWIDI nan pahr 1926 nan Crooksville, Ohio, nan Wehin Amerika. Pahpa oh Nohno sohte kin perenki sarawi, ahpw ira kin padahkihong kiht seri welimen en kohla sarawi. I kin kohla iang pelien lamalam en Methodist. Ni ahnsou me I sounpar 14, kaunen pelien lamalamo kihong ie kisakis ehu pwehki I kin iang sarawi Rahn Sarawi koaros erein sounpar ehu.

Ni ahnsowo, emen mehn mpat me adaneki Margaret Walker, emen Sounkadehdehn Siohwa, tepida mwemweitdo rehn ei nohnou oh koasoiaiong ih duwen Paipel. Ehu rahn, I medewehda en iang rong. Nohno medewe me I pahn kedirepwehla ara onopo, eri e ndaiong ie en pedoila likio. Ahpw I kin songosong en rong dahme ira koasoiapene. Mwurin eh pwurodo pak kei, Margaret idek rehi, “Ke ese ia mwaren Koht?” I nda, “Koaros ese me mware iei Koht.” Ih eri nda, “Wahdo noumw Paipelo oh pahkalahng Melkahka 83:18.” I wia met oh I diarada me mwaren Koht iei Siohwa. I tangala likio rehn iengei ko oh ndaiong irail, “Ni amwail pahn lella imwamwailo pwohnget, pahkalahng Melkahka 83:18 nan noumwail Paipel oh kilang ia mwaren Koht.” Ele ke pahn nda me I tepidahr kalohk ahnsowo.

 I onopki Paipel oh papidaisla nan pahr 1941. Mwurinte mwo, I alehdi pwukoa en wia onop en Paipel en mwomwohdiso. I kangoange ei nohno oh riei ko en kohdo iang oh irail koaros tepida towehda onop en Paipel me I kin wiao. Ahpw, Pahpa sohte perenki.

I alehdi pwukoa tohto nan mwomwohdiso oh nei sawaspen Paipel kan me Sounkadehdehn Siohwa kan wiahda wie tohtohla. Ehu rahno, Pahpa idih nei pwuhk ko oh nda: “Ke kilang men? I men ken kihsang nan imweiet, oh ke pil kak iangete kohkohla.” I kohkohlahsang nihmwo oh mihla wasakis karanih Zanesville, Ohio, ahpw I kin kalapw mwemweitla pwehn kangoange ei peneineio.

Pahpa kin song en kauhdi Nohno sang eh iang towehda mihting kan. Ekei pak ni ahnsou me e kin kohkohla, ei pahpao kin pwakih oh song en kapwurehdo imwato. Ahpw e kin tangalahte ni wenihmw teio oh kohla ni mihtingo. I ndaiong Nohno: “Ke dehr pwunod. E pahn pwangahkihda pwakih iuk.” Kedekedeo, Pahpa sohla song en kauhdi ih oh Nohno sohla ahneki kahpwal en iang towehda mihting kan.

Nan pahr 1943, at mwomwohdiso tepida wia Sukuhl ong Sapwellimen Koht Doadoahk, oh I tepida iang wia padahk kan. Kaweid me I alehdi mwurin ei padahk nan sukuhlo sewese ien kamwahwihala ei koahiek en padahk.

Ni ahnsowo, wehi kan tepidahr Mahwen Keriau en Sampah. Nan pahr 1944, palien sounpei eker ien iang kohla mahwen. I kohla Fort Hayes nan Columbus, Ohio, ale keseu en paliwar, oh audehda doaropwe. I pil ndaiong kaunen sounpei ko me I sohte pahn iang sounpei. Re mweidohng ien kohkohla. Rahn kei mwuri, emen pilismen kohdo imweio oh ndaiong ie: “Corwin Robison, I wa doaropwehn salihukedi.”

Wihk riau mwuri nan mwoalen kopwung, sounkopwungo nda: “Ma nsenei me, I pahn kihong uhk ken selidi erein omw mour. Mie mehkot me ke pahn nda?” I sapengki: “Maing, e konehng ma I adaneki emen me kin kalohk. Imwen aramas koaros iei wasahn ei padahk oh I kalohkiselier rongamwahu en Wehio ong aramas tohto.” Sounkopwungo ndaiong sounkarongorong kan en kopwungo: “Kumwail sohte kohdo wasaht pwehn pilada ma ohl menet sounkalohk men de soh. Kumwail kohdo pwehn kadeikada ma e ripohtla pwehn iang mahwen de soh.” Sohte lel minit silihsek, sounkarongorong ko pwurodo sang arail wiahda arail pilipilo oh kasalehda me I dipada. Sounkopwungo koasoanehdi I en selidi erein sounpar limau nan imweteng laud en Ashland, Kentucky.

I mihmi nan ehu imweteng en Columbus, Ohio, erein wihk riau. Tepin rahno, I mihmihte nan ei pereo. I kapakap ong Siohwa: “I sohte kak mihmihki nan pere ehu erein sounpar limau. I sehse dahme I pahn wia.”

Mandahn rahno, sounsilepen imweteng ko mweidohng ien pedoila. I aluhla rehn emen ohl me reirei oh lapala me pil iang mi nan imwetengo,  oh se kesihnen ni wenihmwtoko kilekilangala liki. E idekdo rehi, “Kisin ohl, dahme kahrehda ke selikihdi?” I sapengki, “Ngehi emen Sounkadehdehn Siohwa.” E nda, “Ke mehlel? Eri dahme ke mihmihki wasaht?” I nda, “Sounkadehdehn Siohwa kan sohte kin iang mahwen oh kemehla aramas.” E nda, “Re kihong uhk nan imweteng pwehki ke sohte men kemehla aramas. Re kihong ekei nan imweteng pwehki re kemehla aramas. Mie wehwehn met?” I nda, “Soh.”

Ohlo eri nda, “Erein sounpar 15 me I mihmihki nan ehu imweteng tohrohr, I kin wadek ekei noumwail pwuhk kan.” Ni ei rong met, I kapakap, “Siohwa, komw ketin sewese ie pwe ohl menet en dehr uhwong ie.” Ni ahnsowohte, Paul, me iei eden ohlo, nda: “Ma mie emen rehn ohl pwukat doahke iuk, likwerih ie. I nek apwalihala.” Dahme wiawi mwuhr, soun imweteng limehk ko wasao sohte kihong ie kahpwal.

Ni ahnsou me kaunen imweteng ko wahiehla Ashland, I diarada me mie brother koahiek tohto wasao. At werekpene kin sewese kiht en kolokolte at nanpwungmwahu rehn Siohwa en kehlail. Re kihong kiht en wadek Paipel ehuehu wihk, oh kaunopada at peidek oh pasapeng ong mihting kan me adaneki Bible Bees. Brother men pil pilipilda en apwalih wasahn kalohk. Se mi nan wasa laud ehu me mie peht ni dihd ko. Brother me kin apwalih wasahn kalohko ndaiong ie: “Robison, ke pwukoahki peht mwo oh mwo. Ke pahn kalohk ong sohte lipilipil ihs me mi ni pehto. Tehk mwahu ken kalohk ong ih mwohn eh pahn kohkohla.” Ih mwomwen at kin kalohk ni ahl me soandi mwahu.

Mahwen Keriau en Sampah imwisekla nan pahr 1945, ahpw I mihmihte nan imweteng ahnsou kei mwurin mwo. I pwunodki dahme pahn wiawihong ei peneinei pwe Pahpa ndaiong ie, “Ma I keseiukala, I pahn pil kak wiahiong meteiko.” Mwurin ei pedoila, mehkot kapwuriamwei wiawi. Mendahki uhwong sang Pahpa, meh isimen sang nan ei peneineio kin iang towehda mihting kan oh emen riei serepein ko papidaisla.

Ni ahnsou me Mahwen en Korea tepida nan pahr 1950, I alehdi keriapak en pahngok en kohla Fort Hayes pwehn iang sounpei. Mwurin ei ale sikeng ehu me pid ei koahiek, emen kaunen sounpei ndaiong ie, “Omw deng en sikengo iang keieu laud nan omw pwihno.” I nda, “E mwahu, ahpw I sohte pahn iang mahwen.” I doadoahngki 2 Timoty 2:3 oh nda, “Ngehi emen sounpei en Krais.” E sohte mwesei erein ahnsou kis, ahpw mwuhr e nda, “Ke kak kohkohla.”

Mwurin mwo, I iang towehda mihting en Pedel ni mihting tohrohr ehu nan Cincinnati, Ohio. Brother Milton Henschel padahkihong kiht me ma brother men men wia doadoahk laud ong Wehio,  pwihn wet kak doadoahngki ih nan Pedel. I audehda doaropwe en iang doadoahk en Pedel, re pwungki oh I kohla iang Pedel en Brooklyn nan August 1954. I mihmier Pedel sangete ahnsowo.

Ahnsou koaros kin mie ei doadoahk nan Pedel. Erein sounpar tohto, I kin katanga misihn kan me kin kakarakarih nan wasahn wiahda pwuhk kan oh nan ohpis kan. I pil kin kamwahwihala misihn teikan oh loahk kan. I pil kin doadoahk nan Wasahn Mihting Tohrohr laud kan nan New York City.

I kin perenki koasoandi en kaudok nan Pedel, me iangahki towehda kaudok en nimenseng oh onop en Kahn Iroir oh pil iang mwomwohdiso kalohk. Ma ke medewehla, soahng pwukat kak oh pil anahn en wiawi rehn peneinei en Sounkadehdehn Siohwa kan koaros. Ni pahpa nohno oh seri kan arail kin koasoiapene iren rahn kan, wia Kaudok en Peneinei, oh kin uhdahn pidada nan mihting kan en mwomwohdiso oh doadoahk en kalohki rongamwahwo, koaros nan peneineio ele pahn kolokolte arail nanpwungmwahu rehn Siohwa.

I kompoakepahkihla me tohto nan Pedel oh nan mwomwohdiso. Ekei irail keidi kei oh kohdahlahier nanleng. Ahpw ekei soh. Ahpw koaros sapwellimen Siohwa ladu kan iangahki tohn Pedel kan sohte unsek. Ma I akamaiong emen brother, ahnsou koaros I kin song en wiahda popohl nanpwungat. I kin medewe Madiu 5:23, 24 oh ia duwen atail en kamwahwihala mehkot me kitail sohte pwungkipene. E sohte kin mengei en nda “mahkohng ie,” ahpw ahl wet iei me kin apwalihala pali laud en akamai kan.

Pwehki ei mahlahr, met I kin apwalki kohla kalohk ihmw lel ihmw, ahpw I sohte uhdihsang. I sukuhlki ekis lokaiahn China, (Mandarin) oh perenki koasoiong mehn China kan pohn ahl. Ekei nimenseng, I kihla makasihn 30 de 40 ong irail kan me men rong.

 Emen me I kin kalohk ong pwurala China ahpw I pwurehng koasoiong! Ehu rahn, emen serepein pwulopwul sirei ong ie ni eh kihpeseng kisin doaropwehn netiki wahnsahpw. I pil sirei oh idek ma e men naineki Kahn Iroir oh Awake! ni lokaiahn China. E ale oh ndaiong ie me ede Katie. Mwurin mwo, ahnsou koaros me e kin kilang ie, e kin kohdo oh lokaiahiong ie. I padahkihong ih eden wahntuhke ko ni lokaiahn wai, oh e kin alasang ie. I pil kawehwehiong iren Paipel kan oh e ale nah pwuhken Paipel Padahngki. Ahpw mwurin wihk kei, e sohla mie.

Sounpwong kei mwuri, emen serepein tohrohr me kihpeseng kisin doaropwehn netiki soahng kan pil ale nah makasihn me I kihong. Wihko mwuri, e kihdo nah cell phono oh nda, “Lokaiahiong China.” I nda, “Sohte me I ese nan China.” Ahpw e ngihtehtehki, eri I ale cell phono oh nda, “Kaselehlie, ngehi Robison.” Me sapengo nda, “Robby, ngehi Katie. I pwurodohr China.” I nda, “China?” Katie sapengki, “Ei. Robby, ke ese serepein en me kihong uhk cell phone en? Riei serepein men. Ke padahkihong ie soahng mwahu tohto. Menlau padahkih ih duwehte omw kin padahki ie.” I nda, “Katie, I pahn wia uwen ei kak. Kalahnganki omw padahkihong ie ia wasa ke mi ie.” I koasoiong rien Katie serepeino mwurin mwo oh ih kaimwiseklahn at koasoipene. Sohte lipilipil ia wasa serepein riemen pwukat mi ie, I koapworopworki me ira kalaudehla ara sukuhlki duwen Siohwa.

I papahkiher Siohwa erein sounpar 73, oh I perenki pwe Siohwa ketin sewese ien kolokol ei soupoupali oh lelepek nan imweteng. Pil ehu, riei ko padahkihong ie me e kin kangoange irail ni ahnsou me I kin lelohng uhwong sang Pahpa ahpw I sohte pweiek. Nohno oh riei meh wenemen ko kedekedeo papidaisla. Pahpa pil sohla nohn uhwong, oh e kin towehda ekei mihting kan mwohn eh mehla.

Ma Koht kupwurki, kisehn ei peneinei kan oh kompoakepahi kan me melahr pahn pwurehng mourda nan sampah kapw. Medewehla ia uwen kaperen ni atail iang irail kan me kitail kin poakohng kaudokiong Siohwa kohkohlahte. *