1, 2. (a) Ia ahn me tohto arail madamadau ong arail kin mwekidki sapwellimen Koht manaman? (b) Peidek kesempwal dah kan me kitail pahn koasoiapene nan iren onop wet?

SISTER men sang Canada nda me en wia emen me kin mwekidki sapwellimen Koht manaman kahrehiong ih en peren oh sewese ih en powehdi eh kahpwal kan. Brother men nan Brazil me pwopwoudki sounpar 23 nda me met pil sewese ih oh eh pwoudo en ahneki mouren pwopwoud me nsenamwahu. Brother men nan Philippines nda me met pil sewese ih en ahneki madamadau nsenamwahu oh ahneki nanpwungmwahu rehn rie Kristian kan sang wasa teikan.

² E sansal me ni atail kin mwekidki sapwellimen Koht manaman, e kin wia kamwahu ong kitail ni ahl tohto. Dahme kitail kak wia pwehn kalaudehla atail kin mwekidki sapwellimen Koht manaman oh nsenamwahuki kapai pwukat? Keieu, kitail anahne wehwehki dahme Paipel mahsanih duwen irail kan me kin mwekidki sapwellimen Koht manaman oh ahneki sapwellime madamadau. Nan iren onop wet, kitail pahn sapengala peidek kesempwal siluh. (1) Ia wehwehn en wia emen me kin mwekidki sapwellimen Koht manaman? (2) Mehn kahlemeng dah kan me pahn sewese kitail en kakairada atail nanpwungmwahu rehn Koht? (3) Ia duwen  atail nannanti en ahneki “sapwellimen Krais madamadau” eh pahn sewese kitail en wia emen me kin mwekidki sapwellimen Koht manaman?

3. Ia duwen Paipel eh kawehwehda wekpeseng en emen me kin mwekidki pein eh ineng oh emen me kin mwekidki sapwellimen Koht manaman?

³ Wahnpoaron Pohl sewese kitail en wehwehki ia wekpeseng en “aramas me kin mwekidki sapwellimen Koht manaman” oh “aramas me kin mwekidki pein eh ineng.” (Wadek 1 Korint 2:14-16, NW.) * Aramas me kin mwekidki pein eh ineng “sohte kin alehdi soahng kan me kohsang sapwellimen Koht manaman, pwe mepwukat wia mehkot pweipwei reh; oh e sohte kak esehla mepwukat.” Weksang met, emen me kin mwekidki sapwellimen Koht manaman kin “kasawih mehkoaros” oh ahneki madamadau en Krais. Pohl kangoange kitail en wia emen me kin mwekidki sapwellimen Koht manaman. Ni ahl dah teikan me irail me kin mwekidki pein arail ineng weksang irail me kin mwekidki sapwellimen Koht manaman?

4, 5. Ia duwen atail kak kasawihada aramas me kin mwekidki pein arail ineng?

⁴ Dahme emen me kin mwekidki pein eh ineng kin medewe? E kin ahneki madamadau en sampah wet oh kin medemedewehte pein eh ineng roporop kan. Pohl kawehwehda madamadau wet nin duwen “elen madamadau me kin doadoahk ahnsou wet rehn irail kan me kin sapeik.” (Ep. 2:2, NW) Madamadau wet kin kamwakid pali laud en aramas akan en alasang meteikan. Re kin wiahte dahme mwomwen pwung ong irail oh sohte katapanki sapwellimen Koht koasoandi kan. Emen me kin mwekidki pein eh ineng kin medewehte duwen soahng kan me e kak kilang, oh kalapw medewe me eh pwukoa, nah mwohni, de eh pwuhng uhdahn kesempwalsang soahng teikan koaros.

⁵ Emen me kin mwekidki pein eh ineng kin kalapw wia dahme Paipel kahdaneki “wiewia kan nin duwen ahnepen aramas.” (Kal. 5:19-21) Nan tepin kisinlikou me Pohl ntingihong Kristian kan nan Korint, e koasoia duwen soahng teikan me soangen aramas pwukat kin wia. Re kin uhpalih ekei nan akamai kan, song en katohrepeseng aramas, kangoange meteikan en uhwongada meteikan, kihong emen nan mwoalen kopwung, sohte wauneki irail me ahneki manaman pohrail, oh wiahkihla mwenge oh dahme re kin nim mehkot me nohn kesempwal nan arail mour. Emen me kin mwekidki pein eh ineng sohte kin pere ih sang kasongosong en wia mehkot suwed. (Lep. Pad. 7:21, 22) Sud ntingihedi duwen irail kan me kin laudla arail mwekidki pein arail ineng me kahrehda re sohla ahneki sapwellimen Siohwa manaman.​—Sud 18, 19.

6. Ia duwen atail kak kasawihada emen me kin mwekidki sapwellimen Koht manaman?

⁶ Weksang emen me kin mwekidki pein eh ineng, emen me kin mwekidki sapwellimen Koht manaman kin uhdahn kesempwalki eh nanpwungmwahu rehn Koht. E kin mweidohng sapwellimen Koht manaman en kaweid ih oh e kin nantihong kahlemengih Siohwa. (Ep. 5:1) E kin nantihong en sukuhlki sapwellimen Siohwa madamadau oh kilangwohng irair ehu nin duwen me Siohwa kin ketin wia. E kin uhdahn kamehlele me mie Koht. Weksang emen me kin mwekidki pein eh ineng, emen me kin mwekidki sapwellimen Koht manaman kin wauneki sapwellimen Siohwa koasoandi kan ni soahng koaros nan eh mour. (Mel. 119:33; 143:10) E sohte kin wia “wiewia kan nin duwen ahnepen aramas” ahpw e kin kakairada “wahn sapwellimen Koht manaman.” (Kal. 5:22, 23, NW) Pwehn wehwehki mwahu wehwehn en wia emen me kin mwekidki sapwellimen Koht manaman, medewehla met: Emen me kin mai en wia pesines kin kalapw medemedewe duwen soahng kan me pidada pesines, oh emen me kin  uhdahn kesempwalki eh kaudok ong Koht kin kalapw medewe oh mwekidki dahme sapwellimen Koht manaman kin kaweidki.

7. Dahme Paipel mahsanih duwen irail kan me kin mwekidki sapwellimen Koht manaman?

⁷ Sises mahsanih me irail kan me kin mwekidki sapwellimen Koht manaman kin nsenamwahu. Madiu 5:3 mahsanih: “Meid pai me koapworopworki Koht ni mehkoaros; pwe iei arail wehi, Wehin Koht!” Rom 8:6 (NW) kawehwehda me kitail anahne ahneki madamadauohte me Siohwa sapwellimanki pwe kitail en mour. E mahsanih: “Medemedewehte ineng en uduk kin wehwehki mehla, ahpw medemedewehte soahng kan me pid sapwellimen Koht manaman kin wehwehki mour oh popohl.” Eri ma kitail kin mwekidki sapwellimen Koht manaman, kitail kak ahneki popohl rehn Koht, popohl rehtail, oh koapworopwor en mour kohkohlahte.

8. Dahme kahrehda e kak apwal en wiahla oh pil wiewiahte emen me kin mwekidki sapwellimen Koht manaman?

⁸ Kitail mi nan sampah ehu me keper. Pwehki kitail mi nanpwungen irail kan me sohte ahneki madamadauohte me Koht sapwellimanki, kitail anahne wia uwen atail kak en perehla atail madamadau. Ma kitail sohte audehkihda atail madamadau sapwellimen Siohwa madamadau kan, atail madamadau pahn audaudkihda wiewia oh madamadau en sampah wet. Dahme kitail kak wia pwehn soikala met? Ia duwen atail kak kakairada atail nanpwungmwahu rehn Koht?

9. (a) Dahme kak sewese kitail en wiahla emen me kin mwekidki sapwellimen Koht manaman? (b) Mehn kahlemeng mwahu dah kan me kitail pahn koasoiapene?

⁹ Duwehte seri men me anahne sukuhlki soahng kan sang eh pahpa nohno oh alasang ara mehn kahlemeng mwahu, kitail pil anahne sukuhlkihsang oh alasang irail kan me ahneki nanpwungmwahu keren rehn Siohwa. Met pahn padahkihong kitail ia duwen atail en wiahla emen me kin mwekidki sapwellimen Koht manaman. Oh pil ehu, kitail kin sukuhlki dahme kitail en dehr wia ni atail kin tehk wiewiahn irail kan me kin mwekidki pein arail ineng. (1 Kor. 3:1-4) Paipel kasalehda duwen mehn kahlemeng mwahu oh suwed kan.  Kitail kilang ekei mehn kahlemeng mwahu kan me kitail kak sukuhlkihsang: Seikop, Mery, oh Sises.

10. Ia duwen Seikop eh kasalehda me e wia emen me kin mwekidki sapwellimen Koht manaman?

¹⁰ Duwehte pali laud en kitail, Seikop sohte ahneki mour ehu me mengei. Pein rie pwutako, Esau, men kemehla ih. Ahn eh pwoudo pahpao kin pitipitih ih. Ahpw ahn Seikop pwoson sapwellimen Siohwa inou ong Eipraam kin kekehlail. Seikop ese me eh peneineio pahn wia kisehn inou wet me pahn pweida, eri e kin apwalih irail mwahu. (Sen. 28:10-15) Seikop sohte mweidohng madamadau en aramas akan wasao en kahrehiong ih en manokehla sapwellimen Siohwa inou kan. Karasepe, ni ahnsou me Seikop medewe me e mihla nan keper pwehki rie pwutako, e peki rehn Siohwa en ketin doarehla ih oh e kapakap patohwan: “Komw kupwukupwure sapwellimomwi inowo me mahsanih, ‘I pahn kupwuramwahwihiuk pwe mehkoaros en pweida rehmw, oh I pahn kihong uhk kadaudokomw ngedehrie me soh kak wadawad. Re pahn tohto duwehte pihken ni oaroahr akan.’” (Sen. 32:6-12) Seikop uhdahn pwoson sapwellimen Siohwa inou kan oh e kasalehda met sang ni mwomwen eh mour.

11. Ia duwen atail ese me Mery wia emen me kin mwekidki sapwellimen Koht manaman?

¹¹ Nna medewehla Mery. Siohwa ketin pilada ih en wia inen Sises pwehki e wia emen me kin mwekidki sapwellimen Koht manaman. Wadek dahme Mery nda ni eh mwemweitla rehn kiseh ko, Sekaraia oh Elisapet. (Wadek Luk 1:46-55.) Kitail kak kilang me Mery poakohng Mahsen en Koht oh uhdahn wehwehki Palien Paipel ni Lokaiahn Ipru. (Sen. 30:13; 1 Sam. 2:1-10; Mal. 3:12) Oh pil mwurin Mery oh Sosep pwopwoudida, ira awih lao Sises ipwidi pwe ira en wia nsenen pwopwoud. Pwukoa me Koht ketikihong ira uhdahn kesempwalsang ara ineng en wia nsenen pwopwoud. (Mad. 1:25) Mery pil kin tetehk mwahu soahng koaros me kin wiawihong Sises ni eh kekeirda oh kin tehk mahsen erpit kan me e ketin mahsanih. E pil kin “tamataman mepwukat koaros oh medemedewe.” (Luk 2:51) E sansal me Mery uhdahn men ese duwen sapwellimen Koht inou kan duwen Mesaiao. Ia duwe, kitail kak alasang Mery oh song en ahnsou koaros wia dahme Koht kupwurki ong kitail?

12. (a) Ni ahl dah me Sises ketin duwehte Semeo? (b) Ia duwen atail kak alasang Sises? (Menlau kilang tepin kilel.)

¹² Nanpwungen aramas koaros sangete mahs leledo, Sises me ketin wia mehn kahlemeng me keieu mwahu nin duwen emen me kin mwekidki sapwellimen Koht manaman. Erein sapwellime mour oh sapwellime doadoahk en kalohk nin sampah, e ketin kadehdehda me e kupwurki alasang Semeo. Sapwellimen Sises madamadau, pepehm, oh wiewia kin duwehte sapwellimen Siohwa. E kin wia dahme Koht kupwurki oh kin wauneki sapwellimen Koht koasoandi kan. (Sohn 8:29; 14:9; 15:10) Karasepe, kapahrekihpene mwomwen ahn Aiseia kawehwehda duwen sapwellimen Siohwa pepehm en poakehla meteikan ong mwomwen Mark eh kawehwehda duwen sapwellimen Sises pepehm kan. (Wadek Aiseia 63:9; Mark 6:34.) Ia duwe, kitail kin alasang Sises sang ni atail kin ahnsou koaros onopadahng kasalehda atail poakehla irail kan me anahne sawas? Duwehte Sises, kitail kin medemedewehte en kalohk oh padahkihong meteikan duwen rongamwahwo? (Luk 4:43) Irail kan me kin mwekidki sapwellimen Koht manaman kin poakehla oh song en sewese meteikan.

13, 14. (a) Dahme kitail kak sukuhlkihsang irail kan me kin mwekidki sapwellimen Koht manaman ahnsou wet? (b) Menlau kihda ehu karasepe.

¹³ Rahnwet, riatail tohto me kin mwekidki sapwellimen Koht manaman kin nantihong en kahlemengih Krais. Ele ke kin tehk me re kin ngoangki kalohk, sewese oh poakohng meteikan. Mendahki irail sohte unsek, re kin song en wia uwen arail kak en kakairada irair mwahu kan oh wia dahme Siohwa ketin kupwurki irail en wia. Rachel, sister men nan Brazil, nda: “I kin perenki alasang sidail en likou kapw kan en sampah. Pwehki met, I sohte kin likouki likou me konehng. Ahpw ei esehla padahk mehlel kamwakid ie en nantihong wia dahme anahn pwehn wia emen me kin mwekidki  sapwellimen Koht manaman. E sohte mengei en wiahda wekidekla kan, ahpw ei peren laudla oh I esehda ia uhdahn kahrepen mour.”

¹⁴ Reylene, sister men sang Philippines, ahneki ehu kahpwal tohrohr. Mendahki e mi nan padahk mehlel, e kin medemedewehte en kalaudehla eh sukuhl oh ale doadoahk ehu me mwahu. Kedekedeo, eh mehn akadei en papah Siohwa sohla nohn kesempwal ong ih. E nda, “I tepida medewe me mie mehkot me sohla mihmi nan ei mour, mehkot me uhdahn kesempwalsang ei doadoahko.” Reylene wekidala mwomwen eh madamadau oh wiahkihla eh papah Siohwa mehkot me keieu kesempwal nan eh mour. Met e kin likih sapwellimen Siohwa inou me kileldi nan Madiu 6:33, 34 oh nda, “I uhdahn kamehlele me Siohwa pahn ketin apwalih ie!” Ele mie riomw Kristian kan nan omw mwomwohdiso me pil wia duwehte. Ni atail kin kilang ia duwen arail kin kahlemengih Krais, kitail kin men alasang arail mehn kahlemeng mwahu en lelepek.​—1 Kor. 11:1; 2 Des. 3:7.

15, 16. (a) Dahme kitail anahne wia pwehn duwehte Krais? (b) Ia duwen atail kak mweidohng “sapwellimen Krais madamadau” en kamwakid kitail?

¹⁵ Ia duwen atail kak kahlemengih Krais? 1 Korint 2:16 (NW) kawehwehda me kitail anahne ahneki “sapwellimen Krais madamadau.” Rom 15:5 (NW) katamankihong kitail en kakairada “soangen elen madamadauohte me Krais Sises sapwellimanki.” Pwehn duwehte Krais, kitail anahne esehla ia mwomwen sapwellime madamadau, pepehm, oh wiewia ong irair kan. Sises uhdahn ketin kesempwalki eh nanpwungmwahu rehn Koht laudsang mehkoaros. Eri atail duwehte Sises kin kahrehiong kitail en duwehte Siohwa. Ihme kahrehda e uhdahn kesempwal en sukuhlki elen madamadauohte me Sises sapwellimanki.

¹⁶ Ia duwen atail kak wia met? Sapwellime tohnpadahk kan kilang eh ketin wiahda manaman kan, rong eh kin ketin padahkih pokon laud kan, kilang duwen eh wiewia ong soangsoangen aramas koaros, oh pil duwen sapwellimen Siohwa madamadau eh kin kaweid ih. Re nda: “Kiht me sounkadehdepen soahng koaros me e ketin wiahda.” (Wiewia 10:39) Rahnwet, kitail sohte kak kilang Sises. Ahpw kitail naineki pwuhken Rongamwahu ko, me kin sewese kitail en esehla mwahu duwen ih. Ni atail kin wadek oh doudouloale pwuhken Madiu, Mark, Luk, oh Sohn, kitail kin sukuhlki laud duwen sapwellimen Sises madamadau. Met kin sewese kitail en “idawehn oh kahlemengih” ih pwe kitail en kak ahneki “soangen lamalamohte me e sapwellimanki.”​—1 Pit. 2:21; 4:1.

17. Ia duwen atail ahneki sapwellimen Krais madamadau eh pahn sewese kitail?

¹⁷ Ia duwen atail ahneki sapwellimen Krais madamadau eh pahn wia kamwahu ong kitail? Duwehte atail kin kang mwenge mwahu kin kahrehiong paliwaratail en kehlail, atail kin audehkihda atail madamadau sapwellimen Krais madamadau kin kahrehiong atail nanpwungmwahu rehn Koht en kehlail. Ekisekis, kitail kin esehla dahme e pahn ketin wia nan soangen irair koaros. Eri kitail kak wiahda pilipil loalokong kan me pahn kaperenda Koht oh kihong kitail nsenmwakelekel. Ia duwe, ke sou leme me mepwukat wia kahrepe mwahu kei en kahlemengih Kaun Sises Krais?​—Rom 13:14.

18. Dahme ke sukuhlki duwen en wia emen me kin mwekidki sapwellimen Koht manaman?

¹⁸ Iren onop wet pahn sewese kitail en wehwehki ia wehwehn en wia emen me kin mwekidki sapwellimen Koht manaman. Kitail sukuhlki mehn kahlemeng mwahu en irail kan me sapwellimen Koht manaman kin kaweid. Kitail pil sukuhlki me en ahneki “sapwellimen Krais madamadau” kin sewese kitail en ahneki soangen madamadauohte me Siohwa sapwellimanki oh ahneki nanpwungmwahu keren reh. Ahpw pil mie soahng tohto me kitail kak sukuhlki. Karasepe: Ia duwen atail kak ese me atail nanpwungmwahu rehn Koht kehlail? Dahme kitail kak wia pwehn kakehlailihala atail nanpwungmwahu rehn Koht? Oh ia duwen atail nanpwungmwahu rehn Koht kin kamwakid atail mour? Kitail pahn kilang met nan iren onop en mwuhr.