NI SOHPO eh tangatang kohlong nan kepidau en Belfast Lough, ekei pahsinse kan kesihnen pohn dek en sohpo oh kilang kumwukumw kan en sahpwo me marain en ketipino dakerada nimensengo. Ahnsowo nan sounpwong en May pahr 1910. Ong Charles T. Russell, me kesihnen nanpwungarail, met iei kelimau en eh seiloakla Ireland. Ni Brother Russell eh tangatang kohlong, e kilang lapalahn sohp riapwoat me tohndoadoahk kan wie koadoakoadoahke, ehu adaneki Titanic oh meteio adaneki Olympic. * Keilahsang wasao, tohnsukuhl en Paipel ehk riemen kesikesihnen pohn wapo awiawih eh pahn peidi.

Sounpar 20 samwa mwohn mwo, pwehn rapahkihda ahl me keieu mwahu en kalohkiseli rongamwahwo nan sampah pwon, Brother Russell koasoanehdi en seiloakla wasa kan likin Amerika. Keieun eh seiloak, e kohla Ireland nan July 1891. Pohn sohpo me adaneki City of Chicago, e kilang ketipino eh tepida kihrla ni oaroahr en Queenstown, oh ele e tamanda dahme eh pahpa nohno ndaiong ih duwen wasao, sahpw me re uhdahn kohsang ie. Ni Brother Russell oh ienge ko me iang ih seiloak ar tangatang kohlong oh kilang kahnimw kan oh sahpw kaselelo, irail tepida medewe me wasahn kalohk wet “mwahuwongehr dondol.”

Brother Russell mwemweitla Ireland pak isuh. Aramas akan ar perenki rong ni tepin eh mwemweitla mwo kahrehda meh epwiki kei, ekei pak me kidkid kei, kin kohdo pwehn karonge ih ahnsou me e pwurala wasao. Ni keriaun eh seiloakla wasao, nan May 1903, pakairpen mihting ong wehipokon nan Belfast oh Dublin kin kohda nan doaropwehn nuhs kan wasao. Russell nda me “towe kan uhdahn rong kanahieng” oaralap en padahk me koasoia “Inowo me Sohte Kak Ohla” (“The Oath-Bound Promise”) me pid duwen ahn Eipraam pwoson oh pil kapai kan ong tohnsampah ni ahnsou kohkohdo.

Pwehki aramas tohto men rong padahk mehlel wasao, Russell pwurala Ireland ni kesiluh en eh seiloakla nan sapwen Iurop kan. Ehu nimenseng en April pahr 1908, brother limmen kasamwo ih ni eh doudi pohn wapo nan Belfast. Kapahrek ong wehipokon me oaralap koasoia, “Ohlahn Kaundahn Sehdan” (“The Overthrow of Satan’s Empire”), me pakairda en wiawi ni soutiko, kahrehda aramas mpen meh 300 me men rong oh idek peidek en iang towehda. Emen ohl nanpwungen pokono me uhwongada padahko, alehdi pasapengpen eh peidek kan sang ni Russell eh doadoahngki ni koahiek Pwuhk Sarawi oh sapengala. Nan Dublin, Mr. O’Connor, sekteri en YMCA, me kin uhdahn uhwong, song en kahrehiong irail me daulih 1,000 kei me iang towehda en pil uhwongada Tohnsukuhl en Paipel kan. Dahme wiawi?

Kitail medewehla dahme kakete wiawi ahnsowo. Emen ohl me men diarada padahk mehlel en Paipel koasoanehdi en iang towehda kapahrek ong wehipokon me pakairda nan doaropwehn nuhs The Irish Times. E kereniong sohte kak diarada dewe wasao me inenen direkihla aramas. Ohlo eri rong kanahieng sounkapahreko me moangepwet, alis oh sekidki sekid reirei toantoal ehu. Ni sounkapahreko eh wia eh padahko, e kin alu pohn mwoahlo, lokolokaia oh kamwakid peh ko. Ni keneinei  oh soandi mwahu, e doadoahngki iren Paipel kan oh sewese ohlo me wie rongorong en wehwehkihla padahk mehlel kan en Paipel. Mendahki sohte dipwisou kan duwehte microphone ape, ngilen sounkapahreko kak lella wasa koaros nan ihmw laudo oh kahrehda towe kan en rong kanahieng erein awa ehu elep. Mwuhr, ni ahnsoun peidek oh pasapeng, O’Connor oh ienge kan pelianda sounkapahreko, ahpw sounkapahreko doadoahngki Paipel pwehn utungada padahko. Aramas ako lopwolopwki arail pwungki met. Ni ahnsou me irail ekis meleileidi, ohl me men rongo kohla rehn brother kan oh peki en kalaudehla eh esehla padahk mehlel. Irail kan me kadehde duwen met kasalehda me aramas tohto esehla padahk mehlel ni ahl wet.

Ni kapahieu en eh mwemweitla wasao, Brother Russell mweselsang New York nan May 1909 pohn sohp me adaneki Mauretania. E kahre sounnting men, Brother Huntsinger, pwehki erein ara seiseiloak pohn sehdo, brother menet en kak ntingihedi nan Kahn Iroir dahme Brother Russell koasoia. Kapahrek ong wehipokon me Brother Russell wia nan Belfast kahrehda aramas 450 sang wasao en iang towehda, oh mpen aramas 100 anahne kesihnen pwehki sohte wasahn mwohndi.

Ni kelimau en eh seiloak, me kitail koasoia mwoweo, soangen mwekidohte pil wiawi. Mwurin kapahrek ong wehipokon me wiawi nan Dublin, emen me samanih pelien lamalam, me O’Connor kahrehdo, pil alehdi pasapengpen eh peidek kan sang Pwuhk Sarawi, oh met uhdahn kaperenda irail kan me towehda. Rahno mwuri, sounseiloak riemeno iang sohp marahra ehu kohla Liverpool oh douda pohn sohp ndando me adaneki Lusitania oh seiloakla New York. *

Pakairpen kapahrek ong wehipokon kan pil wiawi erein keweneu oh keisuh en seiloak me Brother Russell wia, nan pahr 1911. Nan sounpwong en April, Tohnsukuhl en Paipel 20 nan Belfast apwalihala aramas 2,000, me rong padahk me oaralape “Mour Mwurin Mehla” (“Hereafter”). O’Connor pil pwarada nan Dublin oh kahre emen kaunen pelien lamalam me ahneki peidek kan, ahpw me iang towehda kan perenki Brother Russell eh doadoahngki Pwuhk Sarawi pwehn sapengala peidek ko. Nan October en sounparohte, Brother Russell pil pwarek kahnimw teikan oh me tohto iang towehda. O’Connor iangahki aramas 100 kei me men kahrehda kahpwal pil song en pwurehng kauwehla mihting me wiawi nan Dublin, ahpw irail kan me towehda mihtingo utungada sounkapahreko.

Mendahki Brother Russell kin tiengla mwowe oh wia kapahrek ong wehipokon ahnsowo, e pohnese me doadoahk wet “sohte kin koapworopworkihte koahiek en emente aramas,” pwehki “doadoahk wet kaidehn ahn aramas, ahpw sapwellimen Koht.” Pakairpen kapahrek ong wehipokon kan​—me mwoweo iei Mihting ong Wehipokon—​kin kihda ahnsou mwahu en kasalehda padahk mehlel kan en Pwuhk Sarawi. Ia imwilahn met? Kapahrek ong wehipokon sewese rongamwahwo en kohpeseng, oh mwomwohdiso kan en miehla nan kahnimw tohto nan Ireland pwon.​—Neitail pwuhk oh dipwisou en mahs kan nan Britain.