1-2. Dahme kahrehda oh ia duwen Siohwa eh ketin ritingadahng kitail ahl en wiahla kisehn sapwellime peneinei?

SIOHWA ketin luke kitail en wiahla kisehn sapwellime peneinei me kin kaudokiong ih. Met uhdahn wia luhk mwahu ehu! Aramas akan me iang kisehn peneinei wet iei irail kan me inoukidahr arail mour ong Koht oh kin pwoson meirong en pweinen pweipwei sapahl en sapwellime Ohlo. Kitail wia peneinei ehu me kin peren. Atail mour kin katapan ahnsou wet, oh kitail kin peren pwehki kitail ahneki koapworopwor en mour kohkohlahte, sohte lipilipil ma nanleng de nan Paradais nin sampah.

² Siohwa ketin ritingadahng kitail ahl en wiahla kisehn sapwellime peneinei pwehki e uhdahn ketin poakohng kitail. Ahpw pwe en ketin wia met, Siohwa anahne ketin wiahda tounmetei ehu me uhdahn laud. (Sohn 3:16) Koht ketin ‘pwainkinkitailda pweipwei ehu.’ (1 Kor. 6:20) Pwehki pweinen pweipwei sapahlo, Siohwa ketin kahrehiong kitail en kak ahneki nanpwungmwahu keren reh. Kitail ahneki pai kaselel en ekerki Ih me keieu lapalap nanleng oh nin sampah, Samatail. Oh nin duwen me kitail koasoiapene nan iren onop en mwoweo, Siohwa ketin wia Sahm me keieu mwahu.

3. Ni atail medewehla soahng mwahu koaros me Siohwa ketin wiahda, peidek dah kan me ele kitail kin idek? (Menlau pil kilang koakono “ Ia Duwe, Siohwa Kin Ketin Tehk Ie?”)

³ Duwehte emen sounnting en Paipel, ele kitail kin idek: “Dahme I kak meirongkihong KAUN-O dupuk en sapwellime kalahngan ong ie?” (Mel. 116:12) Pasapengo iei me kitail uhdahn sohte kak kapwungohng Samatailo nanleng mehkot. Ahpw sapwellime limpoak kin kahrehiong atail pil men poakohng ih. Wahnpoaron Sohn ntingihedi: “Kitail kin limpoak, pwehki Koht eh tepin limpoak ong kitail.” (1 Sohn 4:19) Ni ahl dah kan me kitail kak kasalehiong Samatailo nanleng me kitail kin poakohng ih?

4. Nin duwen me Seims 4:8 mahsanih, dahme kahrehda kitail en nantihong karanihala Siohwa?

⁴ Siohwa ketin kupwurki kitail en karanihala ih oh kapakapohng ih. (Wadek Seims 4:8.) E ketin kangoange kitail en “poadidiong kapakap” oh e kin ahnsou koaros ketin karonge kitail. (Rom 12:12) E sohte kin ketin nohn kedirepwla de nohn pwangada pwehn karonge kitail. Oh kitail kin rong ih sang ni atail wadek sapwellime Mahsen, Paipel, iangahki sawasepen Paipel kan me kin sewese kitail en wehwehki Paipel. Kitail pil kin rong ih sang ni atail iang towehda mihting en Kristian kan. Duwehte kaukaule koasoakoasoipene ni saledek eh kin sewese seri kan en karanihala arail pahpa nohno, kaukaule kapakapohng Siohwa kin sewese kitail en mihmi karanih ih.

5. Ia duwen atail kak kamwahwihala atail kapakap kan?

⁵ Medewehla ia pahn mwomwen omw kapakap ong Koht. Siohwa ketin kupwurki kitail en kasalehiong ih atail madamadau oh pepehm kan nan kapakap. (Mel. 62:8) Kitail anahne pein idek rehtail peidek wet: ‘Ia duwe, e kin mie wehwehn ei kapakap kan, I kin pwurupwurehng kapwurehiong kapakap kohte, de I kin kasalehda dahme uhdahn mi nan ei mohngiong?’ Ke uhdahn poakohng Siohwa, oh ke men kolokolete omw nanpwungmwahu keren reh pwehn kehlail. Pwehn wia met, ke anahne kaukaule kapakapohng ih. Kasalehiong ih omw pepehm loal kan. Patohwanohng ih dahme ke kin perenki oh dahme ke kin pwunodki. Kamehlele me ke kak peki sapwellime sawas.

6. Dahme kitail anahne wia pwehn mihmi karanih Samatailo nanleng?

⁶ Pwehn mihmi karanih Samatailo nanleng, ahnsou koaros kitail anahne kasalehda kalahnganohng ih. Kitail kin pwungki dahme sounmelkahkao ntingihedi: “Maing KAUN, at Koht, ia uwen tohtohn soahng kapwuriamwei kan me komw ketin wiahiong kiht; sohte emen mie me duwehte komwi! Ia uwen tohtohn koasoandi kan me komw ketin wiahiong kiht! Ma I pahn song en kasalehda koaros​—re uhdahn pahn tohtohsang me I kak kasalehda!” (Mel. 40:5) Kitail kin wia laudsang ihte pehm atail kalahngan; kitail kin kasalehda sang ni atail lokaia oh wiewia kan. Met kin kasalehda me kitail weksang aramas tohto rahnwet. Kitail kin mi nan sampah ehu me aramas akan sohte kin kalahnganki soahng koaros me Koht ketin wiahda ong irail. Ni mehlel, ehu mehn kadehde me kitail momour ni “imwin rahn akan” iei me aramas akan sohte kin kasalehda kalahngan. (2 Tim. 3:1, 2) Kitail sohte men duwehte met!

7. Dahme Siohwa ketin kupwurki kitail en wia, oh dahme kahrehda?

⁷ Pahpa nohno kan sohte men neirail seri kan en akamaipene ahpw irail en nanpwungmwahupene. Pil duwehte, Siohwa ketin kupwurki sapwellime kan koaros en nanpwungmwahupene. Ni mehlel, limpoak me kitail ahneki ong emenemen kin kadehdehda me kitail Kristian mehlel kei. (Sohn 13:35) Kitail kin pwungki dahme sounmelkahkao ntingihedi: “Ia uwen lingan, ia uwen kansenamwahu en sapwellimen Koht aramas akan ar kin miniminpene!” (Mel. 133:1) Ni atail kin poakohng riatail Kristian kan, kitail kin kadehdehiong Siohwa me kitail poakohng ih. (1 Sohn 4:20) Ia uwen eh kansenamwahu en iang kisehn peneinei pirien me kin “kadekpene, poakpene”!​—Ep. 4:32.

8. Nin duwen me 1 Sohn 5:3 mahsanih, kahrepe keieu kesempwal dah me kitail en peikiong Siohwa?

⁸ Siohwa kin ketin kasik seri kan en peikiong arail pahpa nohno kan, oh e pil ketin kasik me kitail en peikiong ih. (Ep. 6:1) E ketin warohng atail peik pwehki ih me Sounkapikpatail, Utupen atail mour, oh e ketin erpit sang pahpa nohno kan koaros. Ahpw kahrepe keieu kesempwal me kitail kin peikiong Siohwa iei pwehki kitail poakohng ih. (Wadek 1 Sohn 5:3.) Mendahki mie kahrepe tohto me kitail anahne peikiong  Siohwa, e sohte kin ketin idingkihong kitail en wia met. Siohwa ketikihong kitail saledek en wiahda pilipil kan, eri e kin ketin kupwurperenkihda ni atail pilada en peikiong ih pwehki kitail poakohng ih.

9-10. Dahme kahrehda e kesempwal en ese sapwellimen Koht koasoandi kan oh peikiong?

⁹ Pahpa nohno kan men neirail seri kan en dehr lelohng keper. Ihme kahrehda irail kin wiahda koasoandi kan me kin pere neirail seri kan. Ni seri kan ar kin peikiong koasoandi pwukat, re kin kasalehda me re likih arail pahpa nohno oh waunekin irail. Eri e uhdahn kesempwal kitail en ese koasoandi kan me kohsang Samatailo nanleng oh peikiong. Ni atail wia met, kitail kin kasalehiong Siohwa me kitail poakohng oh wauneki ih oh met pil wia kamwahupatail. (Ais. 48:17, 18) Weksang met, irail kan me kin soikala Siohwa oh sapwellime koasoandi kan kin imwila pein kamedekihala irail.​—Kal. 6:7, 8.

¹⁰ Ni atail kin mour ni ahl ehu me kin kaperenda Siohwa, met kin pere kitail sang soahng kan me kak kamedekihala paliwaratail oh atail pepehm, de kak kauwehla atail nanpwungmwahu reh. Siohwa ketin mwahngih dahme keieu mwahu ong kitail. Aurora, me kin mi nan Wehin Amerika, nda, “I ese me peikiong Siohwa kin ahnsou koaros imwikihla mour me keieu mwahu.” Met kin ahnsou koaros mehlel. Ia duwen omw paiekihda omw peikiong sapwellimen Siohwa kaweid limpoak kan?

11. Ia duwen kapakap eh kin sewese kitail?

¹¹ Kapakap kin sewese kitail en peik, mehnda ma met kin apwal en kapwaiada. Ekei pak, e kin apwal en peikiong Siohwa pwehki kitail dipan, ahpw ahnsou koaros kitail anahne nantihong  dehr sapeikiong ih. Sounmelkahkao peki ni ngidingid rehn Koht: “Komw . . . ketin kupwurehkin ineng en peikiong komwi.” (Mel. 51:12) Pioneer men me adaneki Denise, nda: “Ma I diarada me e apwal en peikiong ehu kosonned en Siohwa, I kin kapakapki kehl en wia dahme pwung.” Kitail kak kamehlele me Siohwa pahn ahnsou koaros ketin sapengala soangen pekipek duwehte met.​—Luk 11:9-13.

12. Nin duwen me Episos 5:1 mahsanih, dahme kitail anahne wia?

¹² Wadek Episos 5:1. Nin duwen sapwellimen Siohwa “seri kompoak kei,” kitail kin wia uwen atail kak koaros en kahlemengih ih. Kitail kin kahlemengih sapwellime irair kaselel kan sang ni atail kin poakohng, kadekohng, oh mahkohng meteikan. Ni meteikan me sohte kin ese Koht ar kilang atail wiewia mwahu, ele met pahn kamwakid irail en kalaudehla arail sukuhlki duwen ih. (1 Pit. 2:12) Pahpa nohno Kristian kan ahneki kahrepe mwahu en kahlemengih Siohwa sang ni mwomwen arail wiewia ong neirail seri kan. Ni arail wia met, neirail seri kan pahn kakete men pein wiahkihla Samatail limpoako kompoakparail.

13. Dahme kitail anahne wia pwe kitail en eimah?

¹³ Kisin seri men kin pohlki eh pahpao oh kin perenki koasoia duwen ih. Pil duwehte, kitail kin pohlki Samatailo nanleng, Siohwa, oh men meteikan en esehla ih. Nan mohngiongitail, kitail koaros ahneki pepehmohte me Nanmwarki Depit ahneki. E ntingihedi: “I pahn kin suweiki Siohwa.” (Mel. 34:2, NW) Ahpw ia duwen ma kitail kin namenengki koasoia duwen Siohwa? Ia duwen atail kak eimah? Atail eimah  kin laudla ni atail medemedewehte ia uwen atail kak kaperenda Siohwa, oh ia uwen meteikan ar pahn paiekihda arail sukuhlki duwen ih. Siohwa pahn ketikihong kitail eimah me kitail anahne. E ketin sewese Kristian kan ni mwehin wahnpoaron ko en eimah, oh e pil pahn ketin sewese kitail.​—1 Des. 2:2.

14. Kahrepe dah kei me kahrehda e kesempwal en wia doadoahk en katohnpadahk?

¹⁴ Siohwa sohte kin ketin lipilipilki aramas, oh e kin ketin kupwurperenda ni eh mahsanihada atail kin kasalehiong meteikan limpoak, sohte lipilipil wasa me re kohsang ie. (Wiewia 10:34, 35) Ehu ahl me keieu mwahu kitail en kasalehiong meteikan limpoak iei sang ni atail kin ehukihong irail rongamwahwo. (Mad. 28:19, 20) Dahme doadoahk wet kak wiahiong kitail? Irail kan me kin rong kitail kak kamwahwihala arail mour ahnsou wet oh re kak ahneki koapworopwor en mour kohkohlahte nan Paradais.​—1 Tim. 4:16.

15-16. Kahrepe dah kan me kitail ahneki pwehn kin pereperen?

¹⁵ Siohwa kin ketin wia Sahm limpoak men, eri e ketin kupwurki sapwellime peneinei en peren. (Ais. 65:14) Mie kahrepe tohto me kitail en kin pereperen ahnsou wet, mehnda ma ele kitail kin lelohng kahpwal kan. Karasepe, kitail uhdahn kamehlele me Samatailo nanleng uhdahn ketin poakohng kitail. Kitail ahneki loalokong pwung duwen Mahsen en Koht, Paipel. (Ser. 15:16) Oh kitail wia kisehn peneinei tohrohr ehu me kin poakohng Siohwa, poakohng sapwellime kosonned kan, oh poakohng emenemen.​—Mel. 106:4, 5.

¹⁶ Kitail kak kolokolete atail peren pwehki kitail uhdahn koapworopworki me mour pahn mwahula douluhl ni ahnsou kohkohdo. Kitail ese me ni ahnsou keren Siohwa pahn ketikihsang soahng suwed koaros oh e pahn ketin doadoahngki sapwellime Wehio pwehn kaparadaisihala sampah pwon. Kitail pil ahneki koapworopwor kaselel me irail me melahr pahn iasadahng mour oh pwurehng tuhwong irail kan me re kin poakohng. (Sohn 5:28, 29) Ia uwen met eh kaperen! Oh me keieu kesempwal, kitail kin kamehlele me ni ahnsou keren koaros me mi nanleng oh nin sampah pahn patohwanohng Samatailo wahu, kaping, oh kaudok me e ketin warohng sapwellimanki.