PEINAKAPW riemen kapar alu nanialo ni wasahn pesines kan nan Baguio City, Philippines. Ira kilangada ehu neitail deupen pwuhk kadahr ko, ahpw ira sohte alulahng. Helen, emen riatail lih Kristian, kesihnen limwahn deupen pwuhk kadahro oh sirei ong ira. Peinakapw riemeno douluhllahte, ahpw ira mwekidkihda Helen eh sirei ong ira.

Mwuhr, ni ara dake bus kohkohlahng imwarao, ira kilangada lapalahn sain en jw.org likin Wasahn Kaudok en Sounkadehdehn Siohwa kan. Ira tamanda me nting ko duwehte nting kan me mi ni deupen pwuhk kadahro me ira kilangada mwoweo. Ira koaros doudihsang nan buso oh aluhla ni Wasahn Kaudoko. Ira kilang ni ewen kehlo koasoandi en rahn oh kuloak en mihting kan ong mwomwohdiso kan wasao.

Peinakapw riemeno eri kohla iang towehda ehu mihting ko me wiawi mwurin mwo. Ihs me ira kilangada ni ara pedolongala nan Wasahn Kaudoko? Ira kilangada Helen! Ira mwadangete tamanda me ih lih me sirei ong irao. Helen nda, “Ni ara aluhdo rehi, I ekis salohda. I medewe me mie mehkot sapwung I wiahda.” Ahpw peinakapw riemeno kawehwehiong Helen dahme wiawi.

Ira uhdahn perenki ara iang mihtingo oh pil tuhwong oh patehng riatail ko. Ni ara kilang ekei tepida kamwakele wasahn kaudoko mwurin mihting, ira peki ma ira kak iang sawas. Emen peinakapw ko keseusangehr Philippines ong ehu sahpw tohrohr, ahpw emen tepida iang towehda mihting kan oh tepidahr onop Paipel. Ei, mehkot mwahu wiawi pwehki ahn sistero sirei!