SYLVIANA, pioneer men me sounpar 25 nda: “Ni ei kin rong duwen kompoakepahi kan me kohla kalohk wasa kan me anahn laud mie ong pioneer, I kin pil men pehm arail peren. Ahpw I kin perki me I sohte ahneki koahiek en wia met.”

Ke pil kin ahneki soangen pepehmo me Sylviana ahneki? Ke pil men iang kalohk wasa kan me mie anahn laud ong sounkalohk ahpw ke kin peikasalki ma ke pahn kak lel mehn akadei wet? Ma ei, dehr nsensuwed! Pwehki sawas sang rehn Siohwa, riatail Kristian kid kid kei kin pweida ni arail kin powehdi soahng kan me kakete kerempwahla arail pahn kalaudehla arail doadoahk en kalohk. Pwehn diarada ia duwen Siohwa eh ketin sewese irail, kitail pahn koasoiapene duwen Madagascar, kapahieu en deke me keieu laud nan sampah.

Sounpar eisek dower powe, sounkalohk oh pioneer ngoang daulih 70 sang sahpw 11 * kohla pwehn iang kalohk wasao nan Aperika, wasa me aramas tohto kin wauneki Paipel. Sounkalohk kan sang Aperika pil kin men keseula nan deke laud wet pwehn sewese kalohki rongamwahu en Wehio. Kitail pahn kilang dahme wiawihong ekei irail.

Louis oh Perrine, pwopwoud ehu me sounpar 30 samwa, keseula Madagascar sang France. Erein sounpar tohto, ira kin medemedewe duwen ara pahn kalaudehla ara doadoahk en kalohk sang ni ara pahn keseula ehu wasa, ahpw Perrine peikasalki eh pahn keseu. E nda: “I perki kohla wasa me I sehse. I pwunodki ei pahn kohkohsang at peneineio, at mwomwohdiso, imwato me se kin rent, oh wasa koaros me se ahnlahr, pil at koasoandi en ehuehu rahn. Ni mehlel, pein ei pwunod iei kahpwal me keieu laud I anahne powehdi.” Nan pahr 2012, Perrine eri eimahda, oh ih oh eh pwoudo keseula. Ia eh pepehm ong ara pilipilo? “Ni ei medewehla ahnsou ko, I kak nda me e kin uhdahn kakehlakahda at pwoson en kilang Siohwa eh kin ketin sewese kiht.” Louis pil nda, “Nna medewehla, ni tepin Kataman me se iang nan  Madagascar, nait tohnsukuhl en Paipel ehk me iang towehda!”

Dahme kihong ira kehl en mihmihte nan ara doadoahko ni ahnsou me kahpwal kan kin pwarada? Ira kapakap ni ngidingid ong Siohwa oh peki en ketikihong ira kehl pwe ira en dadaurete. (Ais. 12:2) Louis nda: “Se pehm me Siohwa ketin sapengala at kapakap kan oh ketikihong kiht ‘sapwellimen Koht popohl.’ Se kak medemedewehte peren me at doadoahk en kalohk kin wadohng kiht. Kompoakepaht kan sang sapwato kin e-mail oh kadarodo kisinlikou kan pwehn kangoange kiht en dehr uhdi.”​—Pil. 4:6, 7; 2 Kor. 4:7.

Siohwa uhdahn ketin katingih Louis oh Perrine pwehki ara kin dadaurete. Louis nda: “Nan October 2014, se iang Sukuhl en Paipel ong Pwopwoud Kristian kan * nan France. At iang sukuhlo iei kisakis ehu sang rehn Siohwa me se sohte pahn manokehla.” Ni ahnsoun kesepwilo, pwopwoudo perenkihda ara alehdi pwukoa en pwurala Madagascar.

Ni Didier oh Nadine, pwopwoud ehu sang France, ara keseula Madagascar nan pahr 2010, ira sounpar 50 samwa. Didier nda: “Se kin pioneer ni at pwulopwulo, oh mwuhr se nainekihda seri silimen. Ni arail laudla, se medewe ma se kak keseula oh papah nan ehu sahpw tohrohr.” Nadine nda: “Ni ei medewehla ei pahn tohrohrasang seri ko, met kahrehda ien peikasal, ahpw re ndahng kiht: ‘Ma kumwa keseula oh papah wasa kan me anahn laud mie ong sounkalohk, se pahn pohlkin kumwa!’ Arail nda met kangoangei kiht en keseula. Mendahki at mi dohsang nait seri ko, se perenki at kak koasoiong irail ahnsou koaros.”

Ong Didier oh Nadine, en sukuhlki lokaiahn Malagasy uhdahn apwal. Nadine sirei oh nda: “Kaidehn kiht me pwulopwul kei me sounpar 20 samwa.” Ia duwen ara pweida? Keieu, re iang mwomwohdiso me kin doadoahngki lokaiahn France. Mwuhr, ni ara pehm me ira kak kalaudehla ara ahnsou en sukuhlki lokaiahn wasao, ira keseula nan mwomwohdiso ehu me doadoahngki lokaiahn Malagasy. Nadine nda: “Aramas tohto me se tuhwong nan kalohk kin perenki onopki Paipel. Re kin kalapw kalahngankihong kiht at mwemweitla rehrail. Ni tapio, uhdahn I sohte kamehlele dahme wiewiawi ong kiht. I uhdahn perenki pioneer wasaht. Ni ei kin pirida ni menseng kan, I kin ndahng pein ngehi, ‘Uhdahn kaperen​—I pahn kohla kalohk rahnwet!’”

Didier sirei ni eh tamanda ahnsou me e tepida sukuhlki lokaiahn Malagasy. E nda: “I wiewia padahk nan ehu mihting en mwomwohdiso ahpw I sohte wehwehki pasapeng kan sang brother oh sister kan. Ihte me I kak nda iei ‘Kalahngan.’ Mwurin ei kalahngankihong emen sister eh pasapengo, irail kan me mwomwohd mwurin ih tepida oaloahl pwehn padahkihong ie me eh pasapengo sapwung. I mwadangete eker emen brother oh e sapengala ni pwung​—I koapworopworki me e wia met.”

Ni mihting tohrohr me wiawi nan pahr 2005, Thierry oh eh pwoudo, Nadia, kilang kasdohn “Pursue Goals That Honor God.” Kasdo wet me koasoia duwen Timoty sair ara mohngiong oh kalaudehla ara men papah wasa kan me mie anahn laud ong sounkalohki Wehio. Thierry nda: “Ni kaimwiseklahn kasdo ni at wie lopwolopw, I pengla rehn ahi pwoudo oh idek, ‘Wasa dahieu me kita en kohla?’ Ei pwoudo nda me e pil medemedewe soahngohte.” Mwurinte mwo, ira tepida wiahda kahk kan pwehn lel ara mehn akadei. Nadia nda, “Ekisekis, se kamalaulaula at kepwe kan lao at kepwe ko koaros kak audehda kapang pahieu.”

Ira lel Madagascar nan pahr 2006 oh sangete ara tepin lel mwo, ira perenki ara doadoahk en kalohk. Nadia nda: “Aramas akan me se tuhwong kin wadohng kiht peren laud.”

Ahpw mwurin sounpar weneu, pwopwoudo lelohng kahpwal ehu. Ahn Nadia eh nohno, Marie-Madeleine, me mi France, pwupwudihte peho tipw oh moangeo pil ohla. Mwurin pwopwoudo koasoiong toahkteo, ira idek rehn liho ma e men kohla oh kousoanla rehra nan Madagascar. Mendahki liho sounpar 80 ni ahnsowo, e perenkihda ara luke ih. Dahme lih menet lemekihong eh kousoan ehu sahpw tohrohr? E nda: “Ekei pak e kin apwal en wiahda wekidekla kan, ahpw mendahki ei soh itar kan, I pehm me mie katepei nan mwomwohdiso. Oh dahme kin uhdahn kapereniehda iei me at koasoandi en kousoanpene kin kamengeila ira en pousehlahte wia ara doadoahk en kalohk wasaht.”

Riana iei brother men me sounpar 20 samwa. E tikida nan Alaotra Mangoro, wasa pwelmwahu ehu nan palieir en Madagascar. E pweida mwahu nan sukuhl oh men kohla iang sukuhl laud. Ahpw mwurin eh onopki Paipel, e wekidala eh madamadau. E nda: “I nantihong en kanekehla mwadang pwihn kaeisek riau oh inoukihong Siohwa, ‘Ma I pweida nan final exam, I pahn tepida pioneer.’” Mwurin eh kesepwil, Riana kapwaiada eh inowo. E keseula rehn emen brother, ale doadoahk en lepin ahnsou, oh tepida pioneer. E nda, “Pilipil wet iei pilipil me keieu mwahu I wiahda.”

Ahpw kisehn Riana kan sohte wehwehki dahme kahrehda e sohte men rapahki eh doadoahk en mwohni. Riana nda: “Ei pahpao, rien ei pahpa ohlo oh pil emen lih me ei pahpao pahn nohnohki, irail koaros kin kangoange ie en kohla iang sukuhl laud. Ahpw I sohte men uhdihsang pioneer.” Sohte pwand, Riana men kohla papah wasa kan me anahn laud mie ong sounkalohk. Dahme kahrehda e men wia met? E nda: “Sounpirap kei pedolong nan imwato oh pirapahsang ei kepwe tohto. Met kahrehda I en medemedewe dahme Sises mahsanihki duwen en nekidala “paien nanleng.” Ngehi eri koasoanehdi me I pahn nantihong doadoahk laud ong soahng kan me pidada ei nanpwungmwahu rehn Siohwa.” (Mad. 6:19, 20) E keseula ni keieu palieir en sahpwo, wasa me sohte keteu ahnsou werei, me dohki mwail 800 sang wasa me e kousoan ie. Ih wasa me mehn Antandroy kan kin kousoan ie. Ia kahrepen e kohla wasao?

Sounpwong ehu mwohn pirapo wiawi, Riana kin onohnop Paipel rehn ohl en Antandroy riemen. E esehla ekei lokaiahn ara sahpwo oh medewe duwen mehn Antandroy tohto me saikinte rong rongamwahu en Wehio. E nda, “I kapakap ong Siohwa oh peki en ketin sewese ie keseula wasa me kin lokaiahki lokaiahn Tandroy.”

Riana keseula oh mwadangete lelohng kahpwal ehu. E sohte kak diar doadoahk. Emen ohl ndahng ih: “Dahme kahrehda ke keseudo wasaht? Aramas akan wasaht kin kohla wasa me ke kohsang ie pwehn rapahki doadoahk!” Mwurin wihk riau, Riana kohla iang towehda mihting tohrohr ehu. Nah mwohni ko kereniong nek oh e medemedewe dahme e pahn wia. Ni kaimwiseklahn rahn en mihting tohrohro, brother men kihong mehkot nan ahn Riana pwekid en sekido. Dahme e kihlongo iei uwen mwohni ehu me itar ong Riana en pwurala Antandroy oh tepida eh kisin pesines en netiki yogurt. Riana nda: “I kehn Siohwa eh ketin sewese ie ni ahnsou me I keieu anahne. I kakehr pousehla sewese irail kan me saikinte sukuhlki duwen Siohwa!” Pil mie doadoahk tohto nan mwomwohdiso. Riana pil nda: “I alehdi pwukoa en kin wia kapahrek ong wehipokon nan wihk riau koaros. Siohwa ketin doadoahngki sapwellime pwihn pwehn kaiahne ie.” Rahnwet, Riana kin kalkalohkihte rongamwahu en  Wehio ong aramas akan me kin lokaiahki lokaiahn Tandroy me men esehla duwen Siohwa.

Siohwa ketin kamehlelehiong kitail me “mehmen me mi nan sahpwo me pahn peki kapai ehu pahn peki en ale kapai sang rehn Koht loalopwoato.” (Ais. 65:16) Ni atail doadoahk laud en powehdi kahpwal kan pwehn kalaudehla atail doadoahk en kalohk, kitail kin kehn sapwellimen Siohwa kapai kan. Medewehla duwen Sylviana, me kitail koasoia ni tepin oaralap wet. Taman me e perki keseula wasa kan me anahn laud mie ong sounkalohk pwehki e leme me e sohte ahneki koahiek en wia met. Dahme kahrehda? E kawehwehda: “Nehi pali soakoahiek mwotomwotsang nehi pali koahiek ins siluh elep. Eri I kin alu pelingek oh mwadang pwangada.”

Nan pahr 2014, Sylviana iang Sylvie Ann, emen pioneer pwulopwul nan eh mwomwohdiso, keseula nan kisin kousapw kis me mwail 53 sang ara wasao. Mendahki kahpwal kan me e ahneki, dahme Sylviana keieu men wiao pweida, oh ia uwen kaselel en kapai wet! E nda: “Mwurin sounparte ehu ei wia doadoahk en kalohk wasa kapw wet, emen nei tohnsukuhl en Paipel me ede Doratine, papidaisla ni at mihting tohrohro.”

Nin duwen me irail pwukat kasalehda, ni atail kin nantihong en powehdi kahpwal ehu pwe kitail en kalaudehla atail doadoahk en kalohk, kitail kin pein kehn mehlelpen sapwellime Siohwa inou ong sapwellime ladu kan: “I pahn kin kakehlakei kumwail oh sewesei kumwail.” (Ais. 41:10) Pwehki met, atail nanpwungmwahu rehn Siohwa kin laudla. Patehng met, atail kin men toukihda pein kitail, nan sapwatail de ni sahpw teikan, met kin kaunopada kitail ong sapwellimen Koht doadoahk kan me awiawih kitail nan sampah kapwo. Nin duwen me Didier, me kitail koasoia mwoweo, nda, “en papah nan wasa me anahn laud mie wia mehn kaiahn mwahu ehu ong ahnsou kohkohdo!” Ia uwen mwahu ma me tohto me men iang kaiahn wet en tepida ahnsou mwadang!