1-2. Irair dah kan me sapwellimen Siohwa aramas tohto kin lelohng, oh dahme met kak wiahiong irail?

MEDEWEHLA irair siluh pwukat: Brother pwulopwul men esehda sang eh toahkteo me e ahneki soumwahu laud ehu me pahn kahrehiong ih en luhluwetla. Brother men me sounpar limeisek samwa sohla eh doadoahk oh mendahki eh nannanti laud, e sohte kak diar. Sister mah lelepek men sohla kak wia soahng tohto nan eh papah Siohwa duwehte mahso.

² Ma ke mi nan soangen irair pwukat, ele ke pehm me solahr katepomw. Soangen irair pwukat kak kihsang omw peren, kihsang wahupomw, oh kak kahrehda kahpwal ong omw nanpwungmwahu rehn meteikan.

3. Ia madamadau en Sehdan oh irail kan me kin alasang ih duwen mour en aramas?

³ Sampah wet kin kasalehda ahn Sehdan madamadau ong mouren aramas. Sehdan kin ahnsou koaros wiahki aramas me re sohte kesempwal. Ni lemei, e ndaiong Ihp me Ihp pahn saledekla ma e sapeikiong Koht, mendahki Sehdan uhdahn ese me pweinen sapeikiong Koht iei mehla. Sehdan kin ahnsou koaros kaunda palien pesines, palien politik, oh pelien lamalam kan en sampah wet. Eri e sohte kapwuriamwei me soun pesines, soun palien politik, oh kaunen pelien lamalam tohto kin kasalehda arail sohte wauneki oh nsenohki kesempwalpen mouren aramas oh arail pepehm.

4. Dahme kitail pahn koasoiapene nan iren onop wet?

⁴ Weksang irail, Siohwa kin ketin kupwurki kitail en ese me kitail kesempwal, oh kin ketin sewese kitail ni atail kin lelohng irair kan me kakete kahrehiong kitail en medewe me solahr katepatail. (Mel. 136:23; Rom 12:3) Iren onop wet pahn koasoia ia duwen Siohwa eh kin ketin sewese kitail nan soangen irair pwukat: (1) Ni atail kin ahneki soumwahu, (2) ni ahnsou me apwal en koadoahkihada mwohni me itar, oh (3) ni atail mahla oh pehm me solahr mie katepatail nan sapwellimen Koht doadoahk. Ahpw keieu, kitail  pahn koasoiapene dahme kahrehda kitail kak kamehlele me Siohwa kin ketin kesempwalki emenemen kitail.

5. Dahme kadehdehiong uhk me aramas akan kin kesempwal ong Siohwa?

⁵ Mendahki kitail wiawihdahsang pwelpar, Siohwa kin ketin kesempwalkihte kitail. (Sen. 2:7) Medewehla ekei kahrepe kan me kitail ese me kitail kesempwal ong Siohwa. E ketin kapikada aramas akan ren ahneki koahiek en alasang sapwellime irair kan. (Sen. 1:27) Ni eh ketin wia met, e ketin wiahda aramas en mwahusang soahng koaros me e ketin kapikada nin sampah, oh ketin mweidohng aramas en apwalih sampah oh kaunda mahn akan.​—Mel. 8:4-8.

6. Mehn kadehde dah kan me kitail ahneki me Siohwa kin ketin kesempwalki aramas soh unsek kan?

⁶ Pil mwurin Adam dipada, Siohwa ketin pousehlahte kesempwalki aramas. E uhdahn ketin kesempwalki kitail me kahrehda e ketikihda sapwellime Ohlo me e ketin loalloale, Sises, nin duwen pweinen pweipwei sapahl ehu ong dipatail kan. (1 Sohn 4:9, 10) Pwehki kamwahupen pweinen pweipwei sapahlo, Siohwa pahn ketin kaiasada irail kan me mehla pwehki dipen Adam, “me pwung kan oh me sapwung kan.” (Wiewia 24:15) Sapwellime Mahsen kasalehda me kitail kesempwal ong ih sohte lipilipil ma kitail soumwahu, semwehmwe, de mahla.​—Wiewia 10:34, 35.

7. Kahrepe dah teikan me sapwellimen Siohwa ladu kan ahneki pwehn kamehlele me E kin ketin kesempwalkin irail?

⁷ Pil mie kahrepe teikan me kitail en kamehlele me Siohwa kin ketin kesempwalkin kitail. E ketin kakerenihkitailla reh oh ketin mwahngih mwomwen atail kin mwekidki rongamwahwo. (Sohn 6:44) Ni atail tepida karanihala Siohwa, e pil ketin karanihala kitail. (Seims 4:8) Siohwa pil ketin doadoahngki sapwellime ahnsou oh ketin nantihong kasukuhlih kitail, met kasalehda me kitail kesempwal ong ih. E ketin mwahngih soangen aramas dah kitail ahnsou wet oh soangen aramas dah me kitail kak wiahla. Oh e kin ketin kapwungala kitail pwehki e ketin poakohng kitail. (Lep. Pad. 3:11, 12) Met wia mehn kadehde laud me Siohwa kin ketin kesempwalki kitail!

8. Ia duwen mahsen kan nan Melkahka 18:27-29 eh kamwakid mwomwen atail kin kilangwohng atail kahpwal kan?

⁸ Ekei medewe me Nanmwarki Depit sohla kesempwal, ahpw e ese me Siohwa ketin poakohng ih oh ketin sewese ih. Ahn Depit madamadauo kin kamwakid mwomwen eh kilangwohng eh irairo. (2 Sam. 16:5-7) Ni atail kin nsensuwedla de lelohng kahpwal kan, Siohwa kak ketin sewese kitail en kilangwohng irairo ni madamadau pwung, oh e kak ketin sewese kitail en powehdi soangen kahpwal koaros. (Wadek Melkahka 18:27-29.) Ni Siohwa eh kin ketin sewese kitail, sohte mehkot kak kauhkitaildihsang en papah ih ni peren. (Rom 8:31) Kitail pahn koasoiapene irair siluh pwukat me kitail en keieu tamataman me Siohwa kin ketin poakohng oh kesempwalkin kitail.

9. Ia duwen soumwahu eh kakete kamwakid mwomwen atail kilangwohng pein kitail?

⁹ Soumwahu kak kauwehla atail pepehm kan, kahrehiong kitail en medewe me solahr katepatail ong meteikan. Ele kitail kin namenengki ma meteikan kin tehkada me mie soahng kan me kitail sohla kak wia, de ni atail kin anahne koapworopworki meteikan en sewese kitail. Mehnda ma meteikan pil sehse me kitail soumwahu, ele kitail kin nantihongete en powehdi atail pepehm en namenek pwehki atail solahr kak wia soahng kei me kitail kak wia mahso. Nan soangen irair kansensuwed pwukat, Siohwa kak ketin kangoange kitail. Ia duwen?

10. Nin duwen me Lepin Padahk 12:25 mahsanih, dahme kak sewese kitail ni atail kin soumwahu?

¹⁰ Ni atail kin soumwahu, “lokaia kadek”  kak kangoange kitail. (Wadek Lepin Padahk 12:25.) Nan Paipel, Siohwa ketikihda mahsen kansenamwahu tohto me kin katamankihong kitail me kitail kesempwal ong ih mehnda ma kitail soumwahu. (Mel. 31:19; 41:3) Ma kitail kin wadek oh pil pwurupwurehng wadek iren Paipel pwukat, Siohwa pahn ketin sewese kitail en powehdi pwunod kan me kitail ahneki pwehki atail soumwahu.

11. Ia duwen emen brother eh alehdi sapwellimen Siohwa sawas?

¹¹ Medewehla dahme wiawihong Jorge. Ni eh pwulopwulo, Jorge ahnekihda soumwahu laud me mwadangete susuwedla oh kahrehiong en pehm me solahr katepe. Jorge nda: “I sohte onopada mwahu ong ia duwen ei pahn mwekidki soumwahu wet, de ei pahn namenengki mwomwen soumwahu wet eh kin kahrehiong meteikan en kilang ie. Ei soumwahwo uhdahn suwedla oh I kin medewehla mwomwen ei mour eh pahn wekila. I uhdahn nsensuwedkihla met, oh peki Siohwa ni ngidingid en ketin sewese ie.” Ia duwen Siohwa eh ketin sewese ih? Jorge nda: “Pwehki I apwalki wadek oh medewe soahng kan ahnsou reirei, mie me kangoange ie en wadek ekei iretikitik kan sang nan pwuhken Melkahka me kasalehda me Siohwa kin ketin nsenohki sapwellime ladu kan. I kin pwurupwurehng wadek iretikitik pwukat ehuehu rahn, oh I diarada me ire pwukat uhdahn kansenamwahwihiehla. Kedekedeo, meteikan tepida kilang me I kin mas peren laudsang mahs. Irail pil nda me ei peren kin kangoange irail. I esehda me Siohwa ketin sapengala ei kapakap kan! E ketin sewese ie en wekidala mwomwen ei kin kilangwohng pein ngehi. I tepida medemedewe dahme sapwellime Mahsen mahsanih duwen Eh kin ketin kilangwohng ie mendahki ei soumwahu.”

12. Ma ke kohwahki soumwahu ehu, dahme ke kak wia pwehn alehdi sapwellimen Siohwa sawas?

¹² Ma ke kohwahki soumwahu ehu, kamehlele me Siohwa ketin mwahngih omw irairo. Peki en  ketin seweseiuk pwe ken kak kakairada madamadau pwung duwen omw irairo. Kowe eri rapahki nan Paipel ire kan me Siohwa ketikihda me pahn kansenamwahwihiukala. Medemedewe ire kan me kasalehda ia uwen Siohwa eh kin ketin kesempwalki sapwellime ladu kan. Ni omw wia met, ke pahn kilang me Siohwa kin ketin kadek ong koaros me kin papah ih ni lelepek.​—Mel. 84:11.

13. Ia pepehm en tapwin peneinei men ni ahnsou me sohla eh doadoahk?

¹³ Tapwin peneinei koaros kin men apwalihala anahn en arail peneinei. Ahpw ia duwen ma brother men sohla eh doadoahk, mendahki kaidehn eh sapwung. E kin nannanti en diar pil ehu doadoahk ahpw sohte kak. Nan soangen irair pwukat, e kakete pehm me sohla katepe. Ia duwen eh pahn medemedewe sapwellimen Siohwa inou kan eh kak sewese ih?

14. Dahme kahrehda Siohwa kin ketin kapwaiada sapwellime inou kan?

¹⁴ Siohwa kin ahnsou koaros ketin kapwaiada sapwellime inou kan. (Sos. 21:45; 23:14) E ketin wia met pwehki kahrepe tohto. Ehu kahrepe iei e kin pidada mwareo. Siohwa ketin inoukihda me e pahn ketin apwalih sapwellime ladu loalopwoat kan, oh e ketin kupwurki en kapwaiada inou wet. (Mel. 31:1-3) Patehng met, Siohwa ketin mwahngih me kitail pahn nsensuwedkihla ma e sohte ketin nsenohki irail kan me wia kisehn sapwellime peneinei. E ketin inoukihda en ketikihong kitail dahme kitail anahne pwehn wie momour oh pil dahme kitail anahne pwehn papah ih ni lelepek, oh sohte mehkot pahn kauhdi ih sang eh pahn ketin kapwaiada inou wet!​—Mad. 6:30-33; 24:45.

15. (a) Soangen kahpwal dah me lelohng tepin Kristian ko? (b) Nin duwen me Melkahka 37:18, 19 mahsanih, dahme kitail kak kamehlele?

¹⁵ Ni atail kin tamataman dahme kahrehda  Siohwa ketin kapwaiada sapwellime inou kan, kitail kak kamehlele me e pahn ketin sewese kitail ni ahnsou me apwal en koadoahkihada mwohni me itar. Medewehla mehn kahlemeng en tepin Kristian ko. Ni ahnsou me kalokolok laud wiawi nan arail mwomwohdiso nan Serusalem, “tohnpadahk koaros, likin wahnpoaron ko, ahpw tangpeseng wasa koaros.” (Wiewia 8:1) Medewehla dahme met kak kahrehda. Kahpwal en mwohni. Ele imwen Kristian ko oh arail doadoahk de pesines kan sohla mie. Ahpw Siohwa sohte ketin keseirailla; oh irail pil kolokolete arail peren. (Wiewia 8:4; Ipru 13:5, 6; Seims 1:2, 3) Siohwa ketin sewese irail Kristian lelepek pwukat, oh e pil pahn ketin sewese kitail.​—Wadek Melkahka 37:18, 19.

16. Dahme kak kahrehiong kitail en medewe me atail kaudok ele sohte kesempwal ong Siohwa?

¹⁶ Ni atail mahla, mwein kitail kin tepida pehm me dahme kitail kak patohwanohng Siohwa uhdahn tikitik. Ele soangen pepehm wet kin kapwunode Nanmwarki Depit ni ahnsou me e mahla. (Mel. 71:9) Ia duwen Siohwa eh kak ketin sewese kitail?

17. Dahme kitail kak sukuhlkihsang dahme wiawihong sistero me adaneki Jheri?

¹⁷ Medewehla dahme wiawihong sister men me adaneki Jheri. E alehdi luhk en iang kasukuhl en apwalih oh kamwahwihala ihmw kan me sapwellimen Siohwa pwihn kin doadoahngki, oh kasukuhlo pahn wiawi nan arail Wasahn Kaudoko, ahpw e sohte men iang. E nda: “I mahlahr, ngehi liohdi men, oh sohte ei koahiek me Siohwa kak ketin doadoahngki ong doadoahk wet. Sohte katepei.” Pwohngo mwohn kasukuhlo wiawi, e kapakap oh patohwanohng Siohwa audepen eh mohngiong. Ni eh lella ni Wasahn Kaudoko rahno mwuri, e medemedewehte ma e uhdahn anahne mi mwo. Erein prokramo, emen brother ko me wia padahk kasalehda me koahiek  me keieu kesempwal rehtail iei atail kin perenki Siohwa en ketin kasukuhlih kitail. Jheri tamanda dahme e nda: “I medewe, ‘I ahneki koahiek wet!’ I tepida sengiseng ni ei esehda me Siohwa ketin sapengala ei kapakapo. E ketin kamehlelehiong ie me mihete mehkot kesempwal rehi me I kak wiahda oh me e ketin kupwurperenki padahkih ie!” Ni eh medewehla ahnsowo, Jheri nda: “Ahnsou me I kohla ni kasukuhlo, I ahneki pepehm en saloh, mwoaros, oh pil nsensuwed. Ahpw ni ei pedoisang, I kamehlele me I kak wia doadoahko, I nsenamwahula, oh mie katepei!”

18. Ia duwen Paipel eh kasalehda me Siohwa kin ketin pousehlahte kesempwalki atail kaudok ni atail kin mahla?

¹⁸ Ni atail kin mahla, kitail kak kamehlele me mihete doadoahk me Siohwa ketin kupwurki kitail en wia. (Mel. 92:12-15) Sises ketin padahkihong kitail me sohte lipilipil ia uwen tikitik en atail koahiek de ma kitail medewe me atail nanti sohte itar, Siohwa kin ketin kesempwalki soahng koaros me kitail kak wia nan sapwellime doadoahk. (Luk 21:2-4) Eri medemedewehte dahme ke kak wia. Karasepe, ke kak koasoiaiong meteikan duwen Siohwa, kapakapki riomw Kristian kan, oh kangoange meteikan en kolokolete arail lelepek. Siohwa ketin wiahkin uhk ienge tohndoadoahk, kaidehn pwehki dahme ke kak wiahda, ahpw pwehki omw kin perenki peikiong ih.​—1 Kor. 3:5-9.

19. Dahme Rom 8:38, 39 sewese kitail en kamehlele?

¹⁹ Ia uwen atail kalahnganki me kitail kin kaudokiong Siohwa, Koht emen me uhdahn ketin kesempwalki irail kan me kin papah ih! E ketin kapikada kitail pwe kitail en wia kupwure, oh kaudok mehlel kin kahrehiong atail mour en katapan. (Kaud. 4:11) Mendahki sampah wet ele kin kilangwohng kitail nin duwen aramas soh katepe kei, Siohwa sohte kin ketin wia met. (Ipru 11:16, 38) Ni atail kin nsensuwedla pwehki soumwahu, apwal en koadoahkihada mwohni me itar, de mahla, kitail en tamataman me sohte mehkot kak katohreikitailsang limpoak en Samatailo nanleng.​—Wadek Rom 8:38, 39.