NAN ehu wasahn nekidala kepwehn mahs kan me adaneki Bible Lands Museum nan Serusalem, mie lepin takai ehu me nting kei mi powe sang nanpwungen pahr 700 oh 600 mwohn Krais. Lepin takai wet dierek nan pwoahr ehu me aramas kin wiahki sousou me karanih Ipron nan Israel. Lepin nting ko nda: “Yahweh Sabaot en ketin keriahla nein Hagav ohlo, Hagaf.” Ia duwen lepin nting pwukat ar utung Paipel? Lepin nting pwukat kasalehda me aramas akan ni ahnsowo kin ese oh pil doadoahngki rahn koaros mwaren Koht Siohwa, me ntingdi ni nting en Ipru YHWH. Nan pwoahr ko, mie nting teikan me aramas akan me kin kohla rukula de tuhwong meteikan wasao ntingihedi. Re kin ntingihedi ni dihd ko mwaren Koht oh ahd kan ni mwohmw me duwehte mwaren Koht.

Dr. Rachel Nabulsi sang University en Georgia nda me mwar wet YHWH kin kalapw pwarada nan arail nting kan. Met kin padahkihong kitail me mwar wet kesempwal ong mour en mehn Israel oh Suda kan. Met kin utung Paipel pwehki nan Paipel, mwaren Koht ni nting en Ipru YHWH, kin pwarada pak kid kid kei. Mwaren Koht kin kalapw iangete eden aramas akan me kin ntingdi.

Lepin lokaia ko “Yahweh Sabaot,” me nting ni lepin takaio, kin wehwehki “Siohwa kaunen karis en sounpei.” Eri e mwomwen me aramas akan mahso kin kalapw doadoahngki mwaren Koht oh pil lepin lokaia pwukat “Siohwa kaunen karis en sounpei.” Oh e pil kin utung Paipel pwehki Paipel kin doadoahngki lokaia kohte pak 283 nan Palien Paipel ni Lokaiahn Ipru, ahpw mehlel nan pwuhken Aiseia, Seremaia, oh Sekaraia.