1. Ia atail pepehm pwehki sapwellimen Koht limpoak?

WAHNPOARON Sohn ntingihedi: “Koht iei limpoak.” (1 Sohn 4:8) Kitail ese me Koht me ketin kapikada mour. Ahpw iretikitiko sewese kitail en tamataman me limpoak kohsang reh. Siohwa kin ketin poakohng kitail! Sapwellime limpoak kin kahrehiong kitail en peren, nsenamwahu oh sohte perki mehkot.

2. Nin duwen me Madiu 22:37-40 mahsanih, ia kosonned riau ko me keieu kesempwal, oh dahme kahrehda ekei pak e kin apwal en peikiong kosonned keriauo?

² Kristian kan sohte kak pilada ma re pahn kasalehda limpoak de soh. Met kehkehlik ehu. (Wadek Madiu 22:37-40.) Ni atail kin esehla mwahu Siohwa, ele e mengei ong kitail en kin peikiong keieun kosonnedo. Met pwehki Siohwa ketin unsek. E kin ketin nsenohkin kitail oh kadek ong kitail. Ahpw ele kitail kin apwalki peikiong keriaun kosonnedo. Dahme kahrehda? Pwehki riatail Kristian kan me wia mehn mpatail keren kei sohte unsek. Eri ekei pak, arail lokaia de wiewia ong kitail sohte kin kadek. Siohwa ketin mwahngih me e pahn apwal ong kitail en peikiong kosonned wet, eri e ketin doadoahngki ekei me ntingihedi pwuhken Paipel kan pwehn padahkihong kitail dahme kahrehda kitail en limpoakpene oh ia duwen atail kak wia met. Emen sounnting pwukat iei Sohn.​—1 Sohn 3:11, 12.

3. Dahme Sohn pwurupwurehng kasalehda?

³ Nan nah pwuhk ko, Sohn kin pwurupwurehng koasoia me Kristian kan anahne kasalehda limpoak. Nan pwuhko me e ntingihedi duwen mouren Sises, e kin koasoia duwen limpoak pak tohtohsang me sounnting en pwuhken Rongamwahu silimen  teiko ntingihedi. Mwein Sohn kereniong sounpar epwiki ni ahnsou me e ntingihedi nah pwuhken Rongamwahwo oh nah kisinlikou siluh ko. Pwuhken Paipel pwukat padahkihong kitail me limpoak anahne kamwakid soahng koaros me kitail kin wia. (1 Sohn 4:10, 11) Ahpw Sohn anahne ahnsou pwehn sukuhlki met.

4. Sohn kin kasalehda limpoak ong meteikan ahnsou koaros?

⁴ Ni Sohn eh mwahnakapwte, e sohte kin ahnsou koaros kasalehda limpoak. Karasepe, Sises oh sapwellime tohnpadahk ko keid Sameria ni arail seiseiloakla Serusalem. Ehu kahnimw tikitik en Sameria ko sohte kasamwo irail. Dahme Sohn wia? Ih oh rieo Seims peki rehn Sises ma ira kak kamwerehdi kisiniei sang nanleng pwehn kamwomwala tohn wasao pwon! (Luk 9:52-56) Pil ehu ahnsou, Sohn sohte kasalehda limpoak ong ienge wahnpoaron teiko. E mwomwen me ih oh rieo ndaiong inarao en peki rehn Sises en ketikihong ira wasa kesempwal limwah nan Wehio. Ni ahnsou me wahnpoaron teiko esehda dahme Seims oh Sohn wiahda, irail uhdahn lingeringerda! (Mad. 20:20, 21, 24) Ahpw mendahki Sohn wiahda soangen sapwung pwukat koaros, Sises ketin poakohngete ih.​—Sohn 21:7.

5. Dahme kitail pahn koasoiapene nan iren onop wet?

⁵ Nan iren onop wet, kitail pahn koasoiapene ahn Sohn mehn kahlemeng oh soahng kei me e ntingihedi duwen limpoak. Ni atail wia met, kitail pahn sukuhlki ia duwen atail kak kasalehda limpoak ong riatail Kristian kan. Kitail pil pahn sukuhlki ehu ahl kesempwal me tapwin peneinei men kak kasalehda me e poakohng eh peneinei.

6. Ia duwen Siohwa eh ketin kasalehda sapwellime limpoak ong kitail?

⁶ Ele kitail kin kalapw medewe me limpoak iei pepehm ehu me kin sansalda sang atail lokaia kadek ong aramas. Ahpw ma kitail uhdahn poakohng irail, kitail anahne kasalehda met sang ni atail wiewia. (Pil kilang Seims 2:17, 26.) Karasepe, Siohwa kin ketin poakohng kitail. (1 Sohn 4:19) Oh e ketin kasalehda met sang sapwellime mahsen kaselel kan nan Paipel. (Mel. 25:10; Rom 8:38, 39) Ahpw kitail ese me Koht ketin poakohng kitail kaidehn pwehki sang dahme e ketin mahsanihte ahpw pil pwehki sang dahme e ketin wia. Sohn ntingihedi: “Iet duwen limpoak en Koht eh sansalda me pid duwen kitail, me Koht ketin poaronedohng sampah sapwellime Iehros pwe kitail en ale mour pwehki ih.” (1 Sohn 4:9) Siohwa ketin mweidohng sapwellime Ohlo en lokolongki oh pwoukinkitailla. (Sohn 3:16) Eri kitail uhdahn kamehlele me Siohwa ketin poakohng kitail.

7. Dahme Sises ketin wia pwehn kadehdehda sapwellime limpoak ong kitail?

 ⁷ Sises mahsanihong sapwellime tohnpadahk ko me e ketin poakohng irail. (Sohn 13:1; 15:15) E ketin kadehdehda uwen eh poakohng irail oh kitail kaidehn sang dahme e mahsanihte ahpw pil sang dahme e ketin wia. Sises mahsanih: “Sohte emen me ahneki limpoak laudsang met, me emen en tounmeteikihla eh mour pwehki kompoakepah kan.” (Sohn 15:13) Ni atail kin medewehla dahme Siohwa oh Sises ketin wiahda ong kitail, dahme kitail pahn men wia?

8. Dahme 1 Sohn 3:18 mahsanihong kitail en wia?

⁸ Kitail kin kadehdehda me kitail poakohng Siohwa oh Sises sang ni atail kin peikiong ira. (Sohn 14:15; 1 Sohn 5:3) Oh Sises ketin kehkehlingkihong kitail en limpoakpene nanpwungatail. (Sohn 13:34, 35) Kitail anahne ndaiong riatail Kristian kan me kitail poakohng irail, ahpw kitail pil anahne kadehdehda met sang ni atail wiewia. (Wadek 1 Sohn 3:18.) Soahng dah kan me kitail kak wia pwehn kadehdehda me kitail poakohng irail?

9. Ia duwen limpoak eh kamwakid Sohn?

⁹ Sohn kak mihmihte rehn eh pahpao oh koadoahkihada mwohni nan arail pesines en netiki mwahmwo. Ahpw e doadoahngki eh mour sang ahnsowo lao e mehla pwehn sewese meteikan en sukuhlki duwen Siohwa oh Sises. Soangen mouro me e pilada sohte mengei. Kerenlahng imwiseklahn mwehin wahnpoaron ko, ni ahnsou me Sohn mahlahr, e lelohng kalokolok oh pil kalipilipala. (Wiewia 3:1; 4:1-3; 5:18; Kaud. 1:9) Nin doken eh wie sensel pwehki eh kalohki duwen Sises, Sohn kadehdehda me e poakohng meteikan. Karasepe, ni ahnsou me e mi pohn dekehn Padmos, e ntingihedi pwuhken Kaudiahl oh kadaralahng mwomwohdiso kan pwe ren ese dahme “pahn wiawi ni ahnsou keren.” (Kaud. 1:1) Mwuhr, ele mwurin eh lapwada sang Padmos, Sohn ntingihedi nah pwuhken Rongamwahwo duwen Sises oh sapwellime doadoahk en kalohk. E pil ntingihedi kisinlikou siluh pwehn kangoange oh kakehlailih rie Kristian kan. Ia duwen omw kak alasang ahn Sohn tounmetei?

10. Ia duwen omw kak kadehdehda me ke poakohng aramas?

¹⁰ Ke kak kasalehda me ke poakohng aramas akan sang dahme ke pilada en wia nan omw mour. Ahn Sehdan sampah kin men ken medewehte pein kowe oh apwalihte pein uhk, oh song en koadoahkihada mwohni de ndandla. Ahpw Kristian kan nan sampah pwon kin doadoahngki uwen ahnsou me re kak pwe ren kak kalohki rongamwahwo oh sewese aramas akan en karanihala Siohwa. Ekei irail pil kin kihong pali laud en arail ahnsou ong kalohk oh padahk.

11. Ia duwen sounkalohk tohto ar kadehdehda me re kin poakohng Siohwa oh riarail Kristian kan?

¹¹ Kristian tohto kin anahne doadoahk awa 40 nan wihk ehu pwe ren kak apwalih pein irail oh arail peneinei. Mendahki met, irail sounkalohk pwukat kin utung ni lelepek sapwellimen Koht pwihn ni uwen me re kak. Karasepe, ekei kin kak sewese wasa kan me lelohng kahpwal en melimel ape, ekei kak iang kauwada atail wasahn kaudok kan, oh koaros pil kin toukihda sawas en mwohni ong atail doadoahk sampah pwon. Re kin wia mepwukat pwehki re poakohng Koht oh meteikan. Ehuehu wihk, kitail kin kadehdehda atail poakohng riatail Kristian kan sang ni atail kin towehda mihting kan en mwomwohdiso oh iang pasapeng. Mendahki ele kitail kin pwangada, kitail kin kohlahte ni mihting pwukat. Mendahki ele kitail kin saloh, ahpw kitail kin iang pasapeng. Oh mendahki mie pein atail kahpwal kan, kitail  kin kangoange meteikan mwowe de mwurin mihting. (Ipru 10:24, 25) Kitail kin uhdahn kalahnganki doadoahk me riatail Kristian kan kin wia!

12. Ia pil ehu ahl me Sohn kadehdehda me e poakohng rie Kristian kan?

¹² Sohn kadehdehda me e poakohng rie Kristian kan kaidehn sang ni eh kapingahte irail ahpw pil sang ni eh kihong irail kaweid. Karasepe, nan nah kisinlikou ko, Sohn kapingahki rie Kristian ko arail pwoson oh doadoahk mwahu, ahpw e pil kihong irail kaweid laud me pid dihp. (1 Sohn 1:8–2:1, 13, 14) Duwehte met, kitail anahne kapingahki riatail Kristian kan ar doadoahk mwahu kan me re wia. Ahpw ma emen tepida kasalehda madamadau sapwung de wia mehkot me kak kauwehla eh nanpwungmwahu rehn Siohwa, kitail kak kasalehda limpoak sang ni atail ndaiong ih ni kadek dahme e anahne rong. Eimah kin anahn pwehn kihong kompoakepatail men kaweid, ahpw Paipel mahsanih me kompoakepah mehlel kan kin kapwungala emenemen.​—Lep. Pad. 27:17.

13. Dahme kitail en dehr wia?

¹³ Ekei pak, kitail kin kadehdehda me kitail poakohng riatail Kristian kan sang ni dahme kitail sohte kin wia. Karasepe, kitail sohte kin mwadang lingeringerkihda dahme re nda. Medewehla dahme wiawi ni ahnsou me Sises pahn kereniong pwoula. E mahsanih me ma sapwellime tohnpadahk ko sohte tungoale uduk en kahlepeo oh sapwellime ntao, re sohte pahn ahneki mour. (Sohn 6:53-57) Sapwellimen Sises tohnpadahk tohto sohte pwungki dahme e mahsaniho, eri re uhdihsang idawehn ih. Ahpw kompoakepah lelepek kan, duwehte Sohn, mihmihte. Re sohte wehwehki dahme Sises mahsanih, oh ele re pwuriamweikihla. Ahpw kompoakepah lelepek pwukat sohte medewe me dahme e mahsaniho sapwung oh lingeringerkihda. Ahpw re likih ih pwehki re ese me dahme e mahsanih me mehlel. (Sohn 6:60, 66-69) Ia uwen eh kesempwal me kitail en dehr mwadang lingeringerkihda dahme kompoakepatail kan kin nda! Ahpw kitail en mweidohng irail en kawehwehda dahme kitail sohte wehwehki.​—Lep. Pad. 18:13; Ekl. 7:9.

14. Dahme kahrehda kitail en dehr kailongki riatail Kristian kan?

¹⁴ Sohn pil kangoange kitail en dehr kailongki riatail Kristian kan. Ma kitail sohte peikiong kaweid wet, Sehdan kakete kahrehiong kitail en wia dahme e mwahuki. (1 Sohn 2:11; 3:15) Met wiawihong ekei ni kaimwiseklahn mwehin tepin Kristian ko. Ni ahnsowo,  Sehdan wia uwen eh kak pwehn kahrehiong sapwellimen Koht ladu kan en kailokpene oh tohrohrpeseng. Ni ahnsou me Sohn ntingihedi nah kisinlikou ko, ohl kei me song en wia duwehte dahme Sehdan wia wialahr kisehn mwomwohdiso. Karasepe, Diohtrepihs kin kahrehda kahpwal laud nan ehu mwomwohdiso pwehn katohreirailpeseng. (3 Sohn 9, 10) E sohte kin wauneki irail elder kan me pwihn me kin apwalih mwomwohdiso ko kadarodo wasao. E pil song en kausasang nan mwomwohdiso irail kan me kin kasamwo aramas me e kailongki. Met uhdahn suwed! Sehdan kin nannantihte en katohrepeseng sapwellimen Koht aramas akan rahnwet. Kitail en dehr mweidohng kailok en katohreikitailpeseng.

15. Dahme tapwin peneinei men anahne tamataman?

¹⁵ Ehu ahl kesempwal me tapwin peneinei men kin kadehdehda me e poakohng eh peneinei iei sang ni eh kin apwalihekin irail arail anahn kan. (1 Tim. 5:8) Ahpw e anahne tamataman me eh sewese eh peneineio en ahneki nanpwungmwahu rehn Siohwa kin kesempwalsang met. (Mad. 5:3) Medewehla mehn kahlemeng mwahu me Sises ketikihda ong tapwin peneinei kan. Rongamwahu en Sohn padahkihong kitail me ni Sises eh ketiket ni tuhkehn kalokoloko, e ketin medemedewe duwen eh peneineio. Sohn keskesinen limwahn Mery, inen Siseso, wasa me Sises pahn ketin kamakamala. Mendahki Sises mi nan eh weirek laud, e mahsanihong Sohn en apwalih Mery. (Sohn 19:26, 27) Mie rien Sises ohl oh lih kan me pahn uhdahn apwaliheki Mery eh anahn akan, ahpw e mwomwen me saikinte emen rehrail me kin idawehn Sises ni ahnsowo. Eri Sises ketin tehk mwahu me mie me pahn apwalih Mery oh kangoange ih en pousehlahte papah Siohwa.

16. Soangen pwukoa dah kan me Sohn ahneki?

¹⁶ Mie ahn Sohn pwukoa tohto. Ih wahnpoaron men, eri e anahne ngoangki doadoahk en kalohk. Ele e pil pwopwoud, eri e anahne apwalih eh peneinei oh pil sewese irail en ahneki nanpwungmwahu rehn Koht. (1 Kor. 9:5) Ia mehn kasukuhl ong tapwin peneinei kan rahnwet?

17. Dahme kahrehda e kesempwal ong tapwin peneinei men en apwaliheki eh peneineio arail nanpwungmwahu rehn Siohwa?

¹⁷ Brother men me wia tapwin peneinei ele kin ahneki pwukoa kesempwal tohto. Karasepe, e anahne doadoahk laud nan eh wasahn doadoahko pwe kaping en kohwong Siohwa.  (Ep. 6:5, 6; Taitus 2:9, 10) Oh mwein e pil ahneki pwukoa kan nan mwomwohdiso, duwehte en kangoange oh sewese riatail Kristian kan, oh pil tiengla nan doadoahk en kalohk. Ni ahnsowohte, e kesempwal me e kin kaukaule onop Paipel rehn eh pwoudo oh nah seri kan. Re pahn uhdahn kalahnganki soahng koaros me e kin wia pwe irail en ahneki roson mwahu oh peren, oh pwehn sewese irail en pousehlahte papah Siohwa.​—Ep. 5:28, 29; 6:4.

18. Dahme Sohn kamehlele?

¹⁸ Sohn momourki sounpar tohto oh mie soahng tohto me e lelohng. E pil lelohng kahpwal tohto me kakete kaluwetehla eh pwoson. Ahpw e kin ahnsou koaros wia uwen eh kak en peikiong sapwellimen Sises kehkehlik kan, duwehte en poakohng rie Kristian kan. Pwehki met, Sohn uhdahn kamehlele me Siohwa oh Sises ketin poakohng ih, oh ira pahn ketikihong ih kehl pwehn dadaur pahn kahpwal sohte lipilipil. (Sohn 14:15-17; 15:10; 1 Sohn 4:16) Sehdan oh eh sampah sohte kak kauhdi en Sohn eh kin poakohng rie Kristian kan, oh sang eh kin kasalehda met ni eh lokaia oh wiewia.

19. Dahme 1 Sohn 4:7 kangoange kitail en wia, oh dahme kahrehda?

¹⁹ Duwehte Sohn, kitail mihmi nan sampah ehu me mi pahn kaundahn Sehdan me sohte kin poakohng emen. (1 Sohn 3:1, 10) Mendahki Sehdan men kauhkitaildihsang atail poakohng riatail Kristian kan, e sohte kak wia met ihte ma kitail mweidohng ih. Kitail en koasoanehdi teng en poakohng riatail Kristian kan, oh kasalehda met sang ni atail lokaia, oh en kadehdehda met sang ni atail wiewia. Ni atail kin kasalehda soangen limpoak wet, kitail pahn perenki wia kisehn sapwellimen Siohwa peneinei oh atail mour pahn uhdahn kaperen.​—Wadek 1 Sohn 4:7.