1. Ia duwen padahk me wiawi ni mihting tohrohro nan pahr 1935 eh kamwakid pwutak pwulopwul men?

PWUTAK pwulopwulo sounpar 18 ni eh papidaisla nan pahr 1926. Eh pahpa oh nohno wia Tohnsukuhl kan en Paipel, me met adaneki Sounkadehdehn Siohwa kan. Mie neira pwutak silimen oh serepein riemen, me ira apwalihada pwe ren papah Siohwa Koht oh kahlemengih Sises Krais. Duwehte Tohnsukuhl kan en Paipel koaros ni ahnsowo, pwutak pwulopwulo kin iang tungoale pilawao oh waino sounpar koaros ni Sak en Soutik en Kauno. Ahpw, eh koapworopwor ong ahnsou kohkohdo wekila ni ahnsou me e rong padahk kesempwalo me oaralape “Pokon Kalaimwuno.” J. F. Rutherford wia padahko nan pahr 1935 ni mihting tohrohr ehu nan Washington, D.C., U.S.A. Dahme Tohnsukuhl en Paipel kan sukuhlki ni mihting tohrohro?

2. Ire mehlel dahieu me Brother Rutherford kawehwehda nan eh padahko?

² Nan eh padahko, Brother Rutherford kawehwehda duwen irail kan me pahn iang wia kisehn “pokon kalaimwun” me Kaudiahl 7:9 kasalehda. Lao lel ahnsowo, Tohnsukuhl en Paipel kan kin medewe me pokon kalaimwuno iei pwihn en aramas ehu me pahn kohdahla nanleng ahpw arail pwoson tikitiksang ahn me keidi kan. Brother Rutherford doadoahngki iren Paipel kan pwehn kawehwehda me pokon kalaimwuno sohte pilipilda en mour nanleng, ahpw irail iei sapwellimen Krais sihpw teikan *  me pahn pitila nan ‘kahn kamakam kowahlapo’ oh mour kohkohlahte nin sampah. (Kaud. 7:14) Sises ketin inoukihda: “Pil mie nei sihpw teikan me sohte iang mi nan kelen sihpw wet; I anahne pil weiraildo oh re pahn rong ngilei, oh re pahn wiahla pelin sihpw teieu oh sileparail pahn mehtehmen.” (Sohn 10:16) Irail sihpw pwukat iei sapwellimen Siohwa Sounkadehde loalopwoat kan me ahneki koapworopwor en mour kohkohlahte nan Paradais nin sampah. (Mad. 25:31-33, 46) Kitail pahn kilang duwen kawehwe kapw wet eh wekidala mouren sapwellimen Siohwa aramas tohto, iangahki pwutak pwulopwulo me sounpar 18.​—Mel. 97:11; Lep. Pad. 4:18.

3-4. Ni mihting tohrohr en pahr 1935, dahme meh kid kid kei esehda duwen arail koapworopwor, oh dahme kahrehda?

³ E uhdahn kaperen ni mihting tohrohro ahnsou me me wia padahko ndaiong irail kan me iang towehda mihtingo: “Koaros me ahneki koapworopwor en mour kohkohlahte nin sampah kak menlau kesihnenda?” Brother men me iang towehda mihting tohrohro nda me e kilang tohto sang elep en irail me iang towehda mihtingo kesihnenda. Eri Brother Rutherford nda: “Kilang! Pokon kalaimwuno!” Mwurin mwo, koaros me iang towehda mihtingo lopwolopwki ar peren. Irail ko me kesihnenda wehwehkihda me Siohwa sohte ketin pilada irail en mour nanleng. Irail pil esehda me irail sohte keikihdi sapwellimen Koht manaman. Mihting tohrohr en rahno mwuri, Sounkadehde kapw 840 papidaisla, pali laud en irail iei sihpw teikan.

⁴ Mwurin padahko, pwutak pwulopwulo me kitail koasoiapene mwoweo oh meh kid kid kei uhdihsang iang tungoale pilawao oh waino ni Sak en Soutik en Kauno. Me tohto ahneki soangen madamadau duwehte emen brother aktikitik me nda: “Kataman me wiawi nan pahr 1935 iei lahsen ei tungoale pilawao oh nim waino. I ese me Siohwa sohte ketin doadoahngki sapwellime manaman en ketikihong ie koapworopwor en mour nanleng; ahpw, I ahneki koapworopwor en mour nin sampah oh sewese en wiahla paradais ehu. (Rom 8:16, 17; 2 Kor. 1:21, 22) Sangete ahnsowo, aramas tohto iang wiahla pokon kalaimwun oh kin iangih luhwen me keidi kan * doadoahk.

5. Ia sapwellimen Siohwa madamadau ong irail kan me uhdihsang iang tungoale pilawao oh waino ni Katamano?

⁵ Ia duwen Siohwa eh kin ketin kilengwohng irail kan me uhdihsang iang tungoale pilawao oh waino mwurin pahr 1935? Oh ia sapwellimen Siohwa madamadau ong Sounkadehde kan me papidaisla rahnwet me kamehlele me re anahne iang tungoale pilawao oh nim waino ni Sak en Soutik en Kauno ahpw mwuhr esehda me re sohte keikihdi sapwellimen Koht manaman? (1 Kor. 11:28) Ekei kin iang tungoale pilawao oh waino pwehki irail sohte wehwehki duwen arail koapworopwor. Ahpw ma irail kasalehda ni mehlel me irail wiahda sapwung, uhdihsang iang tungoale pilawao oh waino, oh doulahte papah Siohwa ni lelepek, e uhdahn pahn ketin mweidohng irail en iang wia kisehn sihpw teikan. Mendahki irail sohte kin tungoale pilawao oh waino, irail kin iangete towehda Katamano pwehki irail uhdahn kalahnganki dahme Siohwa oh Sises ketin wiahiong irail.

6. Dahme Sises ketin kehkehlingkihong tohnleng ko en wia?

⁶ Pwehki kahn kamakam kowahlapo uhdahn kerendohr, e pahn wia mehn kangoang ong  kitail en koasoiapene dahme Kaudiahl irelaud 7 doula koasoia duwen Kristian keidi kan oh pokon kalaimwun en sihpw teikan. Sises ketin mahsanihong tohnleng ko en kolokol teng ahng pahieu me pahn kauwehla sampah. Irail en dehr mweidohng ahng ko en ipidohng sampah lao Kristian keidi koaros kileldi, me wehwehki me Siohwa ketin mwahngiher me irail lelepek. (Kaud. 7:1-4) Nin duwen ketingpen arail lelepek, sapwellimen Krais me keidi pwukat pahn iang ih wiahla nanmwarki oh samworo kei nanleng. (Kaud. 20:6) Siohwa, Sises, oh tohnleng kan pahn uhdahn peren ni ar kilang meh 144,000 ko ar pahn alehdi ketingparail nanleng.

7. Nan Kaudiahl 7:9, 10, ihs me Sohn kilangada nan kaudiahlo, oh dahme irail wiewia? (Menlau kilang kilel ni kilin Kahn Iroir wet.)

⁷ Mwurin Sohn eh koasoia duwen nanmwarki oh samworo 144,000 ko, e kilangada mehkot kaperen, me iei “pokon kalaimwun ehu” me pitsang Armakedon. Pwihn riau pwukat wekpeseng pwehki ‘pokon kalaimwuno’ tohtohsang meh 144,000 ko, oh kitail sohte uhdahn ese meh depe irail. (Wadek Kaudiahl 7:9, 10.) Irail “likawih likou pwetepwet reirei.” Met kasalehda me irail sohte “saminkihla” ahn Sehdan sampah oh kin kolokolete arail loalopwoat ong Koht oh Krais. (Seims 1:27) Irail ngihl laud ndinda me irail komourlahr pwehki dahme Siohwa oh Sises me wia Sihmpwul en Koht, ketin wiadahr. Oh irail pil kolokol tehn tuhke kei me kasalehda me irail pwungki Sises eh ketin idihdida nin duwen sapwellimen Siohwa Nanmwarki.​—Pil kilang Sohn 12:12, 13.

8. Dahme Kaudiahl 7:11, 12 padahkihong kitail duwen Siohwa, Sises, tohnleng kan, oh irail me keidi kan me iasada?

⁸ Wadek Kaudiahl 7:11, 12. Dahme wiawi ni ahnsou me irail kan me mi nanleng kilangada pokon kalaimwuno? Sohn kilangada me koaros me mi nanleng perenda oh kapinga Koht ni ar kilang pokon kalaimwuno. Sapwellimen Siohwa peneinei nanleng pahn peren ni ar kilang pweidahn kaudiahl wet ni ahnsou me pokon kalaimwuno pitsang kahn kamakam kowahlapo.

9. Nin duwen me Kaudiahl 7:13-15 mahsanih, dahme pokon kalaimwuno wiewia ahnsou wet?

⁹ Wadek Kaudiahl 7:13-15. Sohn ntingihedi me pokon kalaimwuno “kamwakelekidahr arail likou reirei kan oh wiahiong en pwetepwetkihla ntahn Sihmpwulo.” Met wehwehki me kadeikpen loalarail mwakelekel oh irail pwung mwohn silangin Siohwa. (Ais. 1:18) Irail Kristian kei me inoukihda arail mour oh papidaisla, oh kin pwoson sapwellimen Sises meirong oh ahneki nanpwungmwahu rehn Siohwa. (Sohn 3:36; 1 Pit. 3:21) Ihme kahrehda Koht ketin kupwurperenkin irail oh irail kak “papah ih ni rahn oh nipwong” nin sampah. Met, irail kin ngoang oh wia uwen arail kak nan doadoahk en kalohki Wehio oh katohnpadahk pwehki sapwellimen Koht Wehio me keieu kesempwal ong irail.​—Mad. 6:33; 24:14; 28:19, 20.

10. Dahme pokon kalaimwuno kamehlele, oh inou dahieu me irail pahn kilang eh pweida?

¹⁰ Pokon kalaimwuno me pitsang kahn kamakam kowahlapo uhdahn kamehlele me Koht pahn ketin pousehlahte apwalih irail, pwehki Ih “me ketiket nan mwoahlo pahn ketin perekipeseng sapwellime impwalo pohrail.” Inou me sihpw teikan kin kasikasik en pweida pahn wiawi: “[Koht] pahn ketin limwihasang pilen masarail kan koaros, oh mehla solahr pahn wiawi, solahr mwahiei, solahr sengiseng oh solahr medek.”​—Kaud. 21:3, 4.

11-12. (a) Kapai dah kan me Kaudiahl 7:16, 17 mahsanih me pokon kalaimwuno pahn alehdi ni ahnsou kohkohdo? (b) Dahme sihpw teikan kak wia ni Katamano, oh dahme kahrehda?

¹¹ Wadek Kaudiahl 7:16, 17. Ni ahnsou  wet, ekei sapwellimen Siohwa aramas akan kin duhpek pwehki sohte itar neirail mwohni pwehn pwainda kanarail mwenge me re anahne, de pwehki uhpene oh mahwen me kin wiawi nanpwungen aramas akan. Ekei kin selidi pwehki arail pwoson. Ahpw, pokon kalaimwuno uhdahn peren pwehki irail ese me mwurin arail pitsang kasohralahn koasoandi suwed wet, ahnsou koaros kanarail mwenge oh pil kaweid kan sang rehn Siohwa pahn uhdahn tohto. Ni ahnsou me Siohwa pahn ketin kasohrehla ahn Sehdan sampah suwed wet, e pahn ketin pere pokon kalaimwuno sang “karakar” en sapwellime engieng. Mwurin kahn kamakam kowahlapo eh imwisekla, Sises pahn ketin kaweid irail kan me pitla ong “utuhnpihl en mour [soutuk].” Song medewehla: Pokon kalaimwuno ahneki koapworopwor kaselel ehu. Nanpwungen aramas lik lik kei me momour, irail sohte pahn lelohng mehla!​—Sohn 11:26.

¹² Sihpw teikan ahneki koapworopwor kaselel ehu me irail kin kalahnganki ong Siohwa oh Sises! Mendahki Siohwa sohte ketin pilada irail en mour nanleng, e ketin poakohngete irail duwehte eh ketin poakohng me keidi kan. Me keidi kan oh sihpw teikan koaros kak kapinga Koht oh Krais. Ehu ahl me irail kin wia met iei sang ni arail kin iang towehda Sak en Soutik en Kauno.

13-14. Dahme kahrehda koaros en iang towehda Katamanpen pwoulahn Krais?

¹³ Nan sounpar kan mwoweo, emente sang nanpwungen aramas 1,000 me iang towehda Katamano kin iang tungoale pilawao oh waino. Pali laud en mwomwohdiso kan, sohte emen me kin iang tungoale pilawao oh waino ni Katamano. Pali laud en irail kan me kin iang towehda Katamano ahneki koapworopwor ong mour nin sampah. Eri dahme kahrehda irail kin iang towehda Sak en Soutik en Kauno? Kahrepen arail iang towehda kin duwehte kahrepen emen eh kin iang towehda kapwopwoud en kompoakepah men. Irail kin iang towehda kapwopwoudo pwehn kasalehda me irail poakohng oh utung me pwopwoudla ko. Pil duwehte met, irail sihpw teikan kin iang towehda Katamano pwehki irail men kasalehda arail poakohng oh utung Krais oh me keidi kan. Sihpw teikan pil kin iang towehda pwehn kasalehda arail  kalahnganki sapwellimen Sises meirongo me kahrehiong irail en kak mour kohkohlahte nin sampah.

¹⁴ Pil ehu kahrepe kesempwal me sihpw teikan kin iang towehda Katamano iei pwehn peikiong sapwellimen Sises kehkehliko. Ni ahnsou me Sises ketin wiahda tepin Sak en Soutik en Kauno rehn sapwellime wahnpoaron lelepek ko, e mahsanihong irail: “Kumwail en kin wia met ong ni katamanpei.” (1 Kor. 11:23-26) Eri sihpw teikan kin pousehlahte iang towehda Sak en Soutik en Kauno erein ekei me keidi kan ar momourte nin sampah. Oh irail kin luke koaros en iang irail towehda Katamano.

15. Dahme kitail kak wia pwehn kapinga Koht oh Krais ni Katamano?

¹⁵ Ni Katamano, kitail ahneki ahnsou mwahu en kapinga Koht oh Krais ni koul oh kapakap. Oaralap en padahk me pahn wiawi nan pahr wet iei “Kalahnganki Dahme Koht oh Krais Ketin Wiahiong Uhk!” E pahn kalaudehla atail kalahngan ong Siohwa oh Krais. Eri ni ahnsou me brother kan pahn kihseli pilawao oh waino, kitail pahn kak medemedewe dahme mepwukat kin karasaraskihong, me iei, kahlap en Sises oh sapwellime nta. Oh kitail pahn medemedewe limpoak me Siohwa kasalehiong kitail ni eh ketin mweidada sapwellime Ohlo en pwoula pwe kitail en kak ahneki mour. (Mad. 20:28) Koaros me kin poakohng Samatailo nanleng oh Sapwellimeo pahn men iang towehda Katamano.

16. Ni ahl dah kan me me keidi kan oh sihpw teikan duwehpene?

¹⁶ Me keidi kan oh sihpw teikan duwepenehte ni soangen ahl kei. Siohwa sohte kin ketin poakohng ehu pwihn laudsang pwihn teio. Me keidi kan oh sihpw teikan koaros kin kesempwal ong Koht. Sapwellime limpoak ong pwihn riau pwukat kin duwepenehte. Kitail ese met pwehki e ketin pwainkihda me keidi kan oh sihpw teikan uwen pweipwei ehute, me iei mouren sapwellime Ohlo. Wekpeseng en pwihn riau pwukat iei me arail koapworopwor wekpeseng. Ahpw pwihn pwukat koaros anahne kolokolete arail loalopwoat ong Koht oh Krais. (Mel. 31:23) Oh tamataman, Siohwa kin ketikihong emenemen sapwellime manaman nin duwen me emen kin anahne, mehnda ma ih emen me keidi de ih kisehn sihpw teikan.

17. Dahme luhwen me keidi kan kin kasikasik?

¹⁷ Kristian keidi kan sohte ipwidihte ahneki koapworopwor en mour nanleng. Koht me ketikihong irail koapworopwor wet. Irail kin medemedewe duwen arail koapworopworo, kapakapki met, oh kasikasik en alehdi ketingparailo nanleng. Irail sohte ese ia pahn mwomwen paliwararail nanleng. (Pil. 3:20, 21;  1 Sohn 3:2) Ahpw, irail kin kasikasik en tuhwong Siohwa, Sises, tohnleng kan, oh me keidi teikan. Re kin kilikilangwohng ar pahn iang irail kaunda Wehio nanleng.

18. Dahme sihpw teikan kin kasikasik?

¹⁸ Sihpw teikan kin kasikasik mour kohkohlahte nin sampah. Met koapworopwor ehu me aramas koaros ahneki. (Ekl. 3:11) Irail kin kasikasik ahnsowo me irail kak sewese kaparadaisihala sampah pwon. Irail kin kasikasik ahnsowo me irail kak kauwada pein imwarail kan, padokedi arail mwetuwel, oh apwalihada neirail seri kan ni roson unsek. (Ais. 65:21-23) Irail kin kasikasik en seiloakla wasa tohto nin sampah, kilang nahna kan, nanwel kan, nansed kan, oh sukuhlki soahng koaros me Siohwa ketin kapikada. Ahpw me keieu kaperen ong irail iei en ese me arail nanpwungmwahu rehn Siohwa pahn pousehlahte kekehlailla.

19. Ahnsou mwahu dah me emenemen kitail ahneki ni Katamano, oh iahd me Katamano pahn wiawi pahret?

¹⁹ Siohwa ketikihong emenemen sapwellime ladu lelepek kan koapworopwor kaselel ehu ong ahnsou kohkohdo. (Ser. 29:11) Katamanpen pwoulahn Krais kihong emenemen kitail ahnsou mwahu en kapinga Koht oh Krais pwehki dahme ira ketin wiahiong kitail pwe kitail en kak ahneki mour me poatopoat. Katamano iei mihting me keieu kesempwal me Kristian mehlel kan kin wia ehuehu pahr. E pahn wiawi Rahn Kaunop, March 27, 2021 mwurin kihrlahn ketipin. Pahr wet, me tohto kin kousoan wasa me irail ahneki saledek en iang towehda mihting kesempwal wet. Ekei pahn iang towehda mendahki uhwong. Ekei pahn iang towehda Katamano nan imweteng. Eri mwomwohdiso koaros, pwihn koaros, oh emenemen kitail en iang towehda Katamano ni Siohwa, Sises, tohnleng kan, oh me keidi kan me iasada ar kilikilang.