IREN ONOP 1
Irail kan me Kin Peikiong Siohwa Sohte Pahn Luhs Sang Mehkot Mwahu
ATAIL IREN PAHR EN 2022: Irail kan me kin peikiong Siohwa sohte pahn luhs sang mehkot mwahu.—MEL. 34:10.
KOUL 4 ‘Siohwa Iei Silepei’
AUDEPEN ONOP *
Depit medewe me e “sohte pahn luhs sang mehkot mwahu” pil ni ahnsou apwal kan (Menlau kilang parakrap 1-3) *
1. Irair apwal dahieu me Depit lelohng?
DEPIT tangatangasang nanmwarki en Israel, Sohl, me men kemehla ih. Ni Depit eh anahnehda mwenge, e uhdi ni kahnimw en Nop oh peki lopwon en pilawa limau. (1 Sam. 21:1, 3) Mwuhr, ih oh nah ohl ako rukula ni pwoaren paip ehu. (1 Sam. 22:1) Dahme kahrehda Depit lelohng irair wet?
2. Ia duwen Sohl eh kihong ih nan irair keper ehu? (1 Samuel 23:16, 17)
2 Sohl uhdahn peirinki Depit pwehki aramas tohto kin pwungki Depit oh kapingahki eh kin kana nan mahwen tohto. Sohl pil ese me Siohwa ketin soikala ih pwehki e sapeikiong, oh me Siohwa ketin pilada Depit en wia nanmwarki. (Wadek 1 Samuel 23:16, 17.) Ahpw Sohl wiahte nanmwarki en Israel oh e naineki karis en sounpei laud ehu oh me tohto kin utung ih, eri Depit anahne tangasang. Ia duwe, Sohl medewe me e kak kauhdi kupwuren Koht me Depit en wiahla nanmwarki? (Ais. 55:11) Paipel sohte kasalehda met, ahpw kitail kak kamehlele met: Sohl pein kihong ih nan irair keper ehu. Irail kan me kin uhwongada Koht sohte pahn kana!
3. Ia en Depit pepehm mendahki eh kahpwal kan?
3 Depit ohl aktikitik men. E sohte pilada en wiahla nanmwarki en Israel. Siohwa me ketin pilada en wiahla nanmwarki. (1 Sam. 16:1, 12, 13) Sohl uhdahn kailongki Depit. Ahpw Depit sohte kapwukoahki Siohwa keper me e mi loale. Oh e sohte kaulimki eh sohte itar kene mwenge oh anahne rukula nan pwoaren paip ehu. Ahpw, ele ih ahnsowo me e mi nan pwoaren paipo me e ntingihada koul en kaping kaselelo me mahsen pwukat mi loale: Irail kan me kin peikiong Siohwa sohte pahn luhs sang mehkot mwahu.—Mel. 34:10.
4. Peidek dah kan me kitail pahn koasoiapene, oh dahme kahrehda e kesempwal?
4 Rahnwet, pali tohtohn sapwellimen Siohwa ladu kan kin ekei pak sohte itar kanarail mwenge de soahng kan me re anahne pwehn mour. * Met kin wiawi, ahpw mehlel erein soumwahu lusulus en COVID-19. Oh kitail kak kasik me e pahn apwalla ni atail kerenlahng ‘kamakam kowahlapo.’ (Mad. 24:21) Eri e pahn mwahu ong kitail en sapengala peidek pahieu pwukat: Ni ahl dah me Depit “sohte pahn luhs sang mehkot mwahu”? Dahme kahrehda kitail anahne sukuhlki en itarki dahme kitail ahneki? Dahme kahrehda kitail kak likih me Siohwa pahn ketin apwalih kitail? Oh ia duwen atail kak kaunopada ong ahnsou kohkohdo?
“SOLAHR ME I PAHN ANAHNE”
5-6. Ia duwen Melkahka 23:1-6 eh sewese kitail en wehwehki dahme kahrehda Depit koasoia me sapwellimen Koht ladu kan “sohte pahn luhs sang mehkot mwahu”?
5 Ia wehwehn Depit eh nda me sapwellimen Siohwa ladu kan “sohte pahn luhs sang mehkot mwahu”? Ni Depit eh ntingihedi Melkahka 23, e doadoahngki soangen lepin lokaia kohte. Eri melkahkao kak sewese kitail en wehwehki ia wehwehn eh koasoio. (Wadek Melkahka 23:1-6.) Depit tepikihda mahsen pwukat nan melkahkao: “KAUN-O iei silepei; solahr me I pahn anahne.” Nan melkahkao, Depit koasoia soahng kan me uhdahn kesempwal, duwehte soahng kan me Siohwa ketikihong pwehki eh wiahki Siohwa Sounsilepe. Siohwa ketin kahluwa ih “nan ahl me pwung,” oh ni loalopwoat, E kin ketin sewese Depit ni ahnsou mwahu oh suwed kan. Depit wehwehki me eh mour nan sapwellimen Siohwa “mohsen dihpw kaselel” pahn kin miehte eh kahpwal. Ekei pak, e kin mworusala, duwehte e kin alialu “nan rotorot mosul,” oh e pahn mie eh imwintihti kan. Ahpw pwehki Siohwa iei Silepe, Depit “sohte pahn masak mehkot.”
6 Eri iet pasapengpen atail peideko: Ni ahl dah me Depit “sohte pahn luhs sang mehkot mwahu”? E ahneki soahng koaros me e anahne pwehn mihmihte karanih Siohwa. E sohte anahne kepwe tohto pwehn nsenamwahu. Depit itarki dahme Siohwa kin ketikihda. Soahng kan me keieu kesempwal ong ih iei me Siohwa kin ketin katingih oh pere ih.
7. Nin duwen me Luk 21:20-24 mahsanih, kahpwal dah kan me tepin Kristian ko nan Sudia lelohng?
7 Sang en Depit koasoio, kitail kak kilang ia uwen eh kesempwal en dehr wiahki kepwe kan en keieu kesempwal rehtail. Kitail kak uhdahn perenki atail kepwe kan me kitail ahneki, ahpw kitail en dehr wiahkihla mepwukat me keieu kesempwal nan atail mour. Tepin Kristian ko me kin kousoan nan Sudia wehwehkihla ire kesempwal wet. (Wadek Luk 21:20-24.) Sises mahsanih me ahnsou ehu pahn kohdo me “karis en sounpei kan” pahn kapilpene kahnimw en Serusalem. Ni ahnsou me met pahn wiawi, irail anahne “tepida tangalahng nin nahna kan.” Ma irail kohkohsang kahnimwo, irail pahn kak momourte, ahpw irail anahne kohkohsang soahng tohto. Sounpar kei samwalahro, Kahn Iroir koasoiahki met: “Re pwilikihdi arail mwaht akan, imwarail akan, re pil sohte rikada arail kepwe kan sang nan imwarail kan. Pwehki re likih me Siohwa pahn ketin pere oh utung irail, re mwohnekihla arail kaudok ong Siohwa sang mehkoaros me mwomwen kesempwal.”
8. Mehn kasukuhl dah me kitail kak sukuhlkihsang dahme wiawihong tepin Kristian ko nan Sudia?
8 Mehn kasukuhl kesempwal dahieu me kitail kak sukuhlkihsang dahme wiawihong tepin Kristian ko nan Sudia? Kahn Iroiro koasoia: “Ihme pahn mie kasongosong kan mwowe ong iaduwen atail kin kilangwohng kepwe kan; soahng mepwukat me keieu kesempwal, de komouro me pahn kohwong koaros me mih ni pali en Koht me kesempwal sang soahng pwukat? Ehi, atail tang kak wehwehki me kitail pahn lelohng ekei kahpwal akan oh kitail sohla pahn ahneki de naineki soahng koaros me kitail men ahneki de naineki de kitail sohla pahn kak wia soahng kan me kitail men wia. Kitail pahn anahne en onopada en wia dahme konehng, duwehte Kristian kan nan tepin senturi me tangasang Sudia.” *
9. Ia duwen en Pohl kaweido ong mehn Ipru ko eh kangoange iuk?
9 Ke kak medewehla ia uwen eh apwal ong Kristian ko en kohkohsang soahng koaros me re ahneki oh tepida mi ehu wasa tohrohr? Irail anahne pwoson pwehn likih me Siohwa pahn ketin sewesehkin irail soahng kan me re anahne. Ahpw pil mie mehkot me kak sewese irail. Sounpar limau mwohn mehn Rom ko kapilpene Serusalem, wahnpoaron Pohl kihong mehn Ipru ko kaweid kesempwal kei: “Amwail mour en saledeksang limpoak en mwohni, ni amwail kin itarki dahme kumwail ahneki. Pwe e ketin mahsanih: ‘I sohte pahn mweisang uhk oh I sohte pahn keseiukala.’ Eri, kitail en diren eimah oh nda: ‘Siohwa iei sawasepei; I sohte pahn masak. Dahme aramas kak wiahiong ie?’” (Ipru 13:5, 6) E mengei ong irail kan me kapwaiada en Pohl kaweido en itarki soahng kan re ahneki nan wasa me re keseula ie. Irail uhdahn kamehlele me Siohwa pahn ketin apwalihala arail anahn kan. En Pohl koasoio kamehlelehiong kitail me kitail pil kak likih me Siohwa pahn ketikihda dahme kitail anahne.
“KITAIL PAHN KIN ITARKI MEPWUKAT”
10. Mehn kasukuhl dah me Pohl sukuhlki?
10 Pohl kihong Timoty soangen kaweidohte, oh kaweido pil kadoadoahk ong kitail. E ntingihedi: “Eri ma mie kanatail mwenge oh atail likou, kitail pahn kin itarki mepwukat.” (1 Tim. 6:8) Ia duwe, met wehwehki me kitail sohte kak kang mwenge iou, imwaneki ihmw kaselel, de pwainda likou kapw ehuehu ahnsou? Kaidehn ih met me Pohl ndinda. Pohl ndinda me kitail anahne itarki dahme kitail ahneki. (Pil. 4:12) Mehn kasukuhl dah me Pohl sukuhlki? Dahme keieu kesempwal me kitail ahneki iei atail nanpwungmwahu rehn Koht, kaidehn kepwe me kitail ahneki.—Apak. 3:17, 18.
Mehn Israel kan “sohte pahn luhs sang mehkot mwahu” erein arail mi nan sapwtehno sounpar 40. Kitail kak itarki dahme kitail ahneki ahnsou wet? (Menlau kilang parakrap 11) *
11. Dahme kitail sukuhlkihsang dahme Moses ndaiong mehn Israel ko duwen en itarki dahme kitail ahneki?
11 Dahme kitail medewe me kitail anahne ele weksang dahme Siohwa ketin mwahngih me kitail anahne. Medewehla dahme Moses padahkihong mehn Israel ko mwurin arail mihmi nan sapwtehno erein sounpar 40. “KAUN-O, amwail Koht eh ketin kupwuramwahwihkumwaillahr ni mehkoaros me kumwail wiadahr. E ketin apwalih kumwail nindokon amwail seiseiloakseli nan sapwtehno. E ketin ieiang kumwail erein sounpar pahisek, oh kumwail alehdier soahng koaros me kumwail kin anahne.” (Deud. 2:7) Erein sounpar pahiseko, Siohwa ketikihong mehn Israel ko manna pwe ren kang. Arail likou ko—likou kohte me re doadoahngki mwurin arail kohkohsang Isip—sohte meringla. (Deud. 8:3, 4) Mendahki ekei medewe me mepwukat sohte itar, Moses katamankihong mehn Israel ko me re ahneki soahng koaros me re anahne. Siohwa pahn ketin kupwurperenki ma kitail esehla en itarki dahme kitail ahneki. E ketin kupwurki kitail en pil kalahnganki soahng tikitik kan me e ketikihong kitail oh wehwehki me mepwukat wia kisakis kei sang reh.
LIKIH ME SIOHWA PAHN KETIN APWALIH IUK
12. Dahme kasalehda me Depit kin likih Siohwa, kaidehn pein ih?
12 Depit ese me Siohwa kin ketin loalopwoat oh kin apwalih irail kan me kin poakohng ih. Mendahki eh mour mi nan keper ni ahnsou me e ntingihedi Melkahka 34, en Depit pwoson Siohwa uhdahn kehlail kahrehda e uhdahn kamehlele me “sapwellime tohnleng kin sinsile” ih. (Mel. 34:7) Ele Depit kapahrekihong sapwellimen Siohwa tohnlengo sounpei men me mihmiseli nan mohs ehu oh tetehk eh imwintihtio. Depit wia sounpei kommwad men oh Siohwa ketin inoukihda me e pahn wiahla nanmwarki, ahpw Depit sohte likih eh koahiek en doadoahngki nah pahio de kedlahs pwehn kalowehdi imwintihtio. (1 Sam. 16:13; 24:12) Depit likih Koht oh kamehlele me sapwellimen Siohwa tohnlengo pahn ‘kapitala irail kan me kin wauneki Siohwa.’ Ei mehlel, kitail sohte kasik me kitail pahn poadoandoarla ni ahl kapwuriamwei ehu rahnwet. Ahpw kitail ese me koaros me kin likih Siohwa pahn alehdi mour soutuk mehnda ma re mehla ni ahnsou wet.
Nan kahn kamakam kowahlapo, nein Kok en Makok pwihno pahn song en uhwongkitailda nan imwatail kan. Ahpw kitail kak kamehlele me Sises oh sapwellime tohnleng kan pahn tetehk dahme re wiewia oh pahn peikin kitail (Menlau kilang parakrap 13)
13. Ni ahnsou me Kok en Makok pahn uhwongada kitail, dahme kahrehda e pahn mwomwen me sohte doarepatail, ahpw dahme kahrehda kitail en dehr masak? (Menlau kilang kilel ni kilin Kahn Iroir wet.)
13 Ni ahnsou keren, atail likih me Siohwa kak ketin pere kitail pahn lelohng kasongosong. Ni Kok en Makok eh pahn uhwongada sapwellimen Koht aramas akan, ele kitail pahn medewe me irail kak kemeikitailla. Kitail anahne kamehlele me Siohwa kak oh pahn ketin doareikitailla. Ong wehi kan, kitail pahn mwomwen duwehte sihpw men me sohte silepe oh sohte me pahn pere. (Esek. 38:10-12) E sohte pahn mie neitail kepwehn mahwen, oh kitail sohte pahn kaiahnda pwehn mahwen. Wehi kan pahn medewe me e pahn mengei en kaloweikitaildi. Irail sohte ese me sapwellimen Siohwa tohnleng kan onopadahr en peikin kitail. Ahpw kitail ese met pwehki atail pwoson. Wehi kan sohte kin pwoson Koht. Irail pahn uhdahn pwuriamweikihla ni karis en tohnleng kan ar pahn peikin kitail.—Kaud. 19:11, 14, 15.
KAUNOPADA MET ONG AHNSOU KOHKOHDO
14. Dahme kitail kak wia met pwehn kaunopada ong ahnsou kohkohdo?
14 Dahme kitail kak wia met pwehn kaunopada ong ahnsou kohkohdo? Keieu, kitail en dehr medewe me kepwe kan me keieu kesempwal, pwehki ehu rahn kitail pahn kohkohsang mepwukat. Kitail en pil itarki dahme kitail ahneki oh pil perenki me kitail ahneki nanpwungmwahu rehn Siohwa. Uwen laud en atail esehla atail Kohto, ih uwen laud en atail pahn kamehlelehla me e pahn ketin pere kitail ni ahnsou me Kok en Makok pahn uhwongada kitail.
15. Soahng dah kan me wiawihong Depit ni ahnsou me e pwulopwulo?
15 Medewehla dahme pil sewese Depit oh kak sewese kitail en kaunopada ong kahpwal kan. Depit koasoia: “Kumwail pein rapahki ia uwen kalahngan en KAUN-O. Meid pai irail kan me kin diar sileparail pahn kupwure.” (Mel. 34:8) Mahsen pwukat kawehwehda dahme kahrehda Depit ese me e kak koapworopworki sapwellimen Siohwa sawas. Depit kin ahnsou koaros koapworopworki Siohwa, oh eh Kohto kin ahnsou koaros sewese ih. Ni ahnsou me e pwulopwul, Depit anahne peiong kodon en Pilisdiao oh ndaiong: “Rahnwette KAUN-O pahn ketikihong uhk pahn ei manaman.” (1 Sam. 17:46) Mwuhr, Depit kin papah nanmwarki Sohl me kin song en kemehla ih pak tohto. Ahpw Siohwa kin “ketin ieiang Depit.” (1 Sam. 18:12) Pwehki Siohwa ketin ieiang Depit mahso, Depit ese me Siohwa uhdahn pahn ketin sewese nan eh kahpwal kan.
16. Ni ahl dah kan me kitail kak “rapahki” ia uwen kalahngan en Siohwa?
16 Ni atail kalaudehla atail koapworopworki sapwellimen Siohwa kaweid kan ahnsou wet, atail koapworopworki me e pahn ketin doareikitailla ni ahnsou kohkohdo pahn pil laudla. Kitail anahne ahneki pwoson oh likih Siohwa pwehn kak peki rehn atail kaunen doadoahk kan ahnsoun kommoal pwehn kak iang towehda mihting tohrohr kan, de peki en wekidala atail awahn doadoahk pwehn kak iang towehda mihting kan koaros oh kalaudehla atail iang kalohk. Ia duwen ma kaunen doadoahko sohte mweidada atail pekipeko oh sohla atail doadoahk? Ia duwe, kitail pwoson me Siohwa sohte pahn ketin meliehikitailla oh pahn ahnsou koaros ketikihong kitail soahng kan me kitail anahne? (Ipru 13:5) Me tohtohn irail kan me kin kihong pali laud en arail ahnsou ong papah Koht kak koasoiahda soahng kan me wiahiong irail me kasalehda ia duwen Siohwa eh ketin sewese irail ni ahnsou me re keieu anahne. Siohwa kin ketin lelepek.
17. Ia atail iren pahr en 2022, oh dahme kahrehda met konehng?
17 Pwehki Siohwa kin ketin ieiang kitail, sohte kahrepen atail en masak dahme pahn wiawihong kitail ni ahnsou kohkohdo. Atail Kohto pahn ahnsou koaros ketin sewese kitail ma kitail kin ahnsou koaros mwohneki mahs sapwellime Wehi nan atail mour. Pwehn katamankihong kitail anahnepen en kaunopada met ong ahnsou apwal kan me pahn kohdo, oh likih me Siohwa sohte pahn ketin meliehikitailla, Pwihn me Kin Apwalih Mwomwohdiso nan Sampah Pwon piladahr Melkahka 34:10 en wia atail iren pahr en 2022: Irail kan me kin peikiong Siohwa sohte pahn luhs sang mehkot mwahu.
KOUL 38 E Pahn Ketin Kakehlaiukada
^ Atail iren pahr ong 2022 kohsang Melkahka 34:10: ‘Irail kan me kin peikiong Siohwa sohte pahn luhs sang mehkot mwahu.’ Tohto sapwellimen Siohwa ladu lelepek kan nainekihte mwohni tikitik oh kepwe malaulau. Eri dahme kahrehda kitail kak ndahki me irail “sohte pahn luhs sang mehkot mwahu”? Oh ia duwen atail wehwehki iretikitik wet eh kak sewese kitail en kaunopada ong kahpwal kan me pahn kohdo?
^ Menlau kilang “Peidek kan Sang Sounwadawad kan” nan Kahn Iroir en October 1, 2014.
^ Menlau kilang Kahn Iroir en October 1, 1999 pali 26.
