1-2. (a) Me pid sapwellimen Sises kehkehlik me kileldi nan Madiu 28:18-20, pwukoa keieu kesempwal dahieu me mwomwohdisohn Kristian anahne wia? (b) Peidek dah kan me kitail pahn koasoiapene nan iren onop wet?

WAHNPOARON ko ele uhdahn kasikasik dahme pahn wiawi ni arail pokonpene pohn nahna ehu. Mwurin Sises eh ketin iasada, e mahsanihong irail en tuhwong ih wasao. (Mad. 28:16) Mwein ih ahnsowo me “e ketin pwarohng riatail kan me daulih meh 500 ni ahnsoutehkis.” (1 Kor. 15:6) Dahme kahrehda Sises mahsanihong sapwellime tohnpadahk ko en tuhwong ih wasao? Pwehn ketikihong irail kehkehlik ehu. E mahsanih: “Kohwei oh padahkihong aramas en wehi koaros pwe ren wiahla nei tohnpadahk.”​—Wadek Madiu 28:18-20.

² Tohnpadahk ko me rong dahme Sises mahsaniho wiahla kisehn tepin mwomwohdisohn Kristian. Pwukoa keieu kesempwal me mwomwohdiso wet anahne wia iei en sewese kahrehiong aramas tohto en wiahla sapwellimen Krais tohnpadahk. * Rahnwet, mie mwomwohdisohn Kristian tohto nan sampah pwon, oh pwukoa keieu kesempwal en mwomwohdiso pwukat kin duduwehte. Nan iren onop wet, kitail pahn koasoiapene peidek pahieu: Dahme kahrehda doadoahk en katohnpadahk uhdahn kesempwal? Dahme e kin pidada? Kristian koaros anahne iang wia doadoahk en katohnpadahk? Oh dahme kahrehda  kitail anahne kanengamah pwehn wia doadoahk wet?

3. Nin duwen me Sohn 14:6 oh 17:3 kasalehda, dahme kahrehda doadoahk en katohnpadahk uhdahn kesempwal?

³ Dahme kahrehda doadoahk en katohnpadahk uhdahn kesempwal? Pwehki sapwellimen Krais tohnpadahk kan kelehpw me kak wia kompoakepahn Koht. Patehng met, irail kan me kin idawehn Krais kin ahneki mour mwahu ahnsou wet oh ahneki koapworopwor en mour kohkohlahte ni ahnsou kohkohdo. (Wadek Sohn 14:6; 17:3.) Ei, Sises ketikihong kitail pwukoa kesempwal ehu, ahpw kaidehn kitail kelehpw me kin wia doadoahk wet. Wahnpoaron Pohl ntingihedi duwen pein ih oh ekei ienge tohndoadoahk kan: “Kiht iei iengen Koht tohndoadoahk kan.” (1 Kor. 3:9) Met wia pai kaselel ehu me Siohwa oh Krais ketikihong aramas soh unsek kan!

4. Dahme kitail kak sukuhlkihsang dahme wiawihong Ivan oh Matilde?

⁴ Doadoahk en katohnpadahk kak wahdo peren laud. Medewehla dahme wiawihong Ivan oh eh pwoudo, Matilde, nan Colombia. Ira kalohk ong mwahnakapw men me adaneki Davier, me ndaiong ira: “I men wiahda wekidekla kan nan ei mour, ahpw I sohte kak.” Davier wia sounpaker men me kin doadoahngki wini en kasahliel, kamamsakau, oh kin mi rehn eh serepeino, Erika. Ivan nda: “Se tepida mwemweitla reh nan eh kousapw me inenen doh, met wehwehki me se anahne dake warat pwaisikel erein awa tohto nan ahl pwelmatak kan. Mwurin eh tehkada me ahn Davier madamadau oh wiewia kan mwamwahula, Erika tepida iang onop en Paipel.” Kedekedeo, Davier uhdihsang wia sounpaker, doadoahngki wini en kasahliel oh kamamsakau. E pil pwoudikihda Erika. Matilde nda: “Ni ahnsou me Davier oh Erika papidaisla nan pahr 2016, se tamanda dahme Davier kin kalapw nda mahso, ‘I men wekila, ahpw I sohte kak.’ Se sohte kak koledi at men sengiseng.” Kitail kin uhdahn peren laud ni atail sewese aramas akan en wiahla sapwellimen Krais tohnpadahk.

5. Dahme kitail en tepin wia pwehn katohnpadahk?

⁵ Dahme kitail en tepin wia pwehn katohnpadahk iei en “rapahki” irail kan me men esehla duwen Siohwa. (Mad. 10:11) Kitail kin kadehdehda me kitail uhdahn wia Sounkadehdehn Siohwa kei sang ni atail kalohk ong aramas koaros me kitail kin tuhwong. Kitail kin kadehdehda me kitail wia Kristian mehlel kei sang ni atail kin idawehn sapwellimen Krais kehkehlik en kalohk.

6. Dahme kak sewese kitail en pweida mwahu nan atail doadoahk en kalohk?

⁶ Ekei aramas kin uhdahn men esehla padahk mehlel kan en Paipel, ahpw me tohto me kitail tuhwong ele mwomwen sohte katapanki. Ele kitail anahne kangoange irail en kalaudehla arail men ese. Pwehn pweida mwahu nan atail doadoahk en kalohk, kitail anahne kaunopada mwahu. Pilada oaralap kan me pahn kakete kamwakid irail kan me ke pahn tuhwong. Kowe eri koasoanehdi ia duwen omw pahn koasoia duwen oaralapo.

7. Ia duwen omw kak tapiada koasoi rehn emen, oh dahme kahrehda ke leme me e kesempwal en rong oh kasalehda wahu?

⁷ Karasepe, ke kak idek rehn tohnihmwo: “E pahn mwahu ma I kalelapak rehmw ia omw madamadau duwen met? Kahpwal tohto me kitail ahneki rahnwet kin lelohng aramas akan nan sampah pwon. Ke leme kitail anahne koperment ehu nin sampah pwehn kamwahwihala kahpwal pwukat?” Kumwa eri  kak koasoiapene Daniel 2:44. De ke kak idek rehn emen mehn mpomw: “Ke leme ahl dahieu me keieu mwahu en padahkihong seri kan en ahneki tiahk mwahu? I men ese ia omw madamadau ong met.” Kumwa eri koasoiapene Deuderonomi 6:6, 7. Sohte lipilipil oaralap dahieu me ke pilada, medewehla duwen irail kan me pahn rong uhk. Medewehla ia duwen arail pahn paiekihda arail esehla dahme Paipel uhdahn padahngki. Ni omw koasoakoasoiong irail, e kesempwal ken rong irail oh wauneki arail madamadau. Ni ahl wet ke pahn uhdahn wehwehki irail, oh ele re pahn perenki rong uhk.

8. Dahme kahrehda kitail anahne kaukaule pwurehng pwurala rehn emen?

⁸ Mwohn emen eh pilada en onop Paipel, ele ke pahn anahne doadoahngki ahnsou laud oh nantihong pwurehng pwurala reh. Dahme kahrehda? Pwehki aramas akan ele sohte kak koasoiong kitail ni atail pwurehng pwurala rehrail. Oh ke pil anahne pwurupwurehng pwurala lao tohnihmwo pahn men tepida onop Paipel. Tamataman me kisin tuhke ehu kin kekeirda mwahu ni omw kin kaukaule kalamwuri. Duwehte met, ahn emen eh limpoak ong Siohwa oh Krais kin kekeirda ni atail kaukaule koasoiaiong ih duwen Mahsen en Koht.

9-10. Dahme kahrehda kitail kak nda me sounkalohk Kristian koaros kin iang pidada sewese rapahkihda irail kan me ahneki mohngiong mehlel?

⁹ Sounkalohk Kristian koaros kin iang pidada sewese rapahkihda irail kan me ahneki mohngiong mehlel. Kitail kak kapahrekihong doadoahk wet duwehte rapahkihda seri men me salongala. Ni ahl dah? Medewehla duwen dahme wiawihong kisin pwutak men me sounpar siluh ni eh salongala. Mpen aramas 500 iang sewese rapahki ih. Mpen awa 20 mwurin serio eh salongala, emen sounsawas ko diarada  ih nan mwaht en kohn ehu. Sounsawaso sohte men aramas en kapingahki eh diarada pwutako. E nda: “Aramas epwiki kei me sawaspene rapahkihda ih.”

¹⁰ Aramas tohto duwehte serio. Re pehm me re salongala. Sohte arail koapworopwor, eri re anahne emen en sewese irail. (Ep. 2:12) Kitail daulih meh welirar me kin doadoahkpene pwehn diarada aramas pwukat. Ele ke sohte diarada emen me pahn men onop Paipel rehmw. Ahpw, ekei sounkalohk me iang uhk kalohk wasaohte ele diarada emen me men esehla padahk mehlel me dierek nan Mahsen en Koht. Ni riomw Kristian men eh diarada emen me wiahla sapwellimen Krais tohnpadahk, koaros me iang sewese rapahki aramaso pil ahneki kahrepe mwahu en peren.

11. Mehnda ma ke sohte onop Paipel rehn emen, ahl dah teikan me ke kak iang sawas en katohnpadahk?

¹¹ Mehnda ma ni ahnsou wet ke sohte kin onop Paipel rehn emen, ke kak iang sawas en katohnpadahk ni ahl teikan. Karasepe, ke kak kasamwo me kapw kan oh wiahla kompoakparail ni ahnsou me re kohdo ni atail Wasahn Kaudok. Ma ke kasalehda limpoak ni ahl wet, ke kak kamehlelehiong irail me kitail wia Kristian mehlel kei. (Sohn 13:34, 35) Mehnda ma ke kihda pasapeng mwotomwot kan ni mihting kan, ke kak padahkihong me kapw kan en kasalehda ni mehlel arail pwoson ni elen wahu. Ke pil kak iang sounkalohk kapwo kohla kalohk oh sewese ih en doadoahngki iren Paipel kan pwehn padahkih aramas akan. Ni omw wia met, ke pahn padahkihong ih en kahlemengih Krais.​—Luk 10:25-28.

12. Kitail anahne soangen koahiek laud kan pwehn katohnpadahk? Menlau kawehwehda.

¹² Sohte emen rehtail anahne medewe me kitail anahne soangen koahiek laud kan pwehn padahkihong meteikan en wia sapwellimen Sises tohnpadahk. Dahme kahrehda? Medewehla dahme wiawihong Faustina me kin kousoan nan Bolivia. E sohte kak wadawad ni ahnsou me e tepin tuhwong Sounkadehdehn Siohwa kan. Ahnsou wet, e esehla ekis wadawad. Met e papidaislahr oh kin perenki padahkih meteikan. E kin kalapw onop Paipel rehn aramas limmen ehuehu wihk. Mendahki Faustina sohte kak nohn wadawad mwahu duwehte pali laud en nah tohnsukuhl ko, e sewesehier aramas wenemen en papidaisla.​—Luk 10:21.

13. Mehnda ma kitail uhdahn kedirepw, soangen kapai dah kan me kitail kak ahneki ni atail wia doadoahk en katohnpadahk?

¹³ Kristian tohto kin uhdahn kedirepwki pwukoa kesempwal tohto. Ahpw, re kin wiahda ahnsou ong onop Paipel rehn meteikan, oh re uhdahn kin perenki met. Karasepe, mie sister men me adaneki Melanie me kousoan nan Alaska. E wia nohno men me sohte eh pwoud oh e naineki serepein men  me sounpar waluh. E pil kin doadoahk awa 40 nan wihk ehu oh kin sewese apwalih eh pahpao me kohwahki soumwahu en kanser. Melanie kelehpw me wia Sounkadehde men nan eh kousapwo me inenen doh. E kin kapakapki kehl pwehn dadaur pahn ahnsoun kopou oh kohla kalohk pwehki e uhdahn men diarada emen me e kak onop Paipel reh. Kedekedeo e tuhwongada Sara, me uhdahn perenki eh esehda mwaren Koht. Mwurin ahnsoukis, Sara tepida onop Paipel. Melanie nda: “Ni soutik en Nialem kan, I kin uhdahn pwangada, ahpw ngehi oh nei serepeino kin paiekihda at kohla wia onop reh. Se kin perenki wia roporop pwehn rapahkihda pasapengpen ahn Sara peidek ko, oh se uhdahn perenki at kilang eh wiahla kompoakepahn Siohwa.” Ni eimah, Sara dadaur pahn uhwong kan, kohkohsang eh pelien lamalamo, oh papidaisla.

14. (a) Ia duwen doadoahk en katohnpadahk eh duwehte laid? (b) Ia duwen dahme Pohl ntingihedi nan 2 Timoty 4:1, 2 eh kamwakid uhk?

¹⁴ Mehnda ma ke saikinte diarada emen me men wiahla tohnpadahk men, pousehlahte raparapahki. Tamataman me Sises mahsanih me irail kan me kin katohnpadahk duwehte sounlaid kan. Sounlaid kan kin doadoahngkihla awa tohto mwohn arail laidihada mwahmw kan. Re kin kalapw laid ni pwong de ni mensehngie, oh ekei pak re anahne kohla wasa doh. (Luk 5:5) Duwehte met, ekei sounkalohk kan kin doadoahngki awa tohto “lalaid” ni soangsoangen ahnsou oh wasa kan. Dahme kahrehda? Pwe ren kak tuhwong aramas tohto. Irail kan me kin doadoahk laud ni ahl wet  kin kalapw paiekihda arail diarada irail kan me men rong dahme kitail kin padahngki. Ia duwe, ke kak song en kalohk ni ahnsou ehu me ke pahn kak tuhwong aramas akan de ni wasa ehu me ke pahn kak diarada irail?​—Wadek 2 Timoty 4:1, 2.

15. Dahme kahrehda kitail anahne kanengamah ni atail onop Paipel rehn meteikan?

¹⁵ Dahme kahrehda kitail anahne kanengamah ni atail onop Paipel rehn meteikan? Ehu kahrepe iei kitail anahne wia laudsang ihte sewese tohnsukuhlo en esehla oh perenki dahme Paipel padahngki. Kitail anahne sewese tohnsukuhlo en esehla oh poakohng Meno me ketin wiahda Paipel, Siohwa. Oh kitail sohte ihte anahne padahkihong tohnsukuhlo dahme Sises kupwurki sapwellime tohnpadahk kan en wia, kitail pil anahne sewese tohnsukuhlo en esehla ia duwen eh pahn mour nin duwen Kristian mehlel men. Kitail anahne kanengamah oh sewese ih ni eh kin song en kapwaiada kaweid oh ire mehlel kan en Paipel. Ekei kin kak wekidala arail madamadau oh wiewia kan nan sounpwong keite; ekei kin anahne ahnsou laud en wia met.

16. Dahme ke sukuhlkihsang dahme wiawihong Raúl?

¹⁶ Misineri men nan Peru paiekihda eh kin kanengamah. E nda: “I onopkier pwuhk riau rehn nei tohnsukuhl en Paipelo me adaneki Raúl. Ahpw e kin ahnekihte kahpwal laud kan nan eh mour. E kin ahnsou koaros ahneki kahpwal kan nan eh mouren pwopwoud, e kin men peined, oh nah seri kan kin apwalki waunekin ih. E kin kaukaule kohdo ni mihting kan, eri I kin pousehlahte mwemweitla reh pwehn sewese ih oh eh peneineio. Daulih sounpar siluh mwurin ei tuhwong ih, e kakehr papidaisla.”

17. Dahme kitail pahn koasoiapene nan iren onop en mwuhr?

¹⁷ Sises mahsanihong kitail: “Kohwei oh padahkihong aramas en wehi koaros pwe ren wiahla nei tohnpadahk.” Pwehn kapwaiada kehkehlik wet, kitail kin kalapw anahne koasoiong aramas akan me arail madamadau uhdahn weksang atail, iangahki irail kan me sohte arail pelien lamalam de irail kan me ele sohte kamehlele me mie Koht. Nan iren onop en mwuhr, kitail pahn koasoiapene ia duwen atail kak padahkihong aramas pwukat rongamwahwo.