Mehn kadehde kasalehda me Sises ketin wiahla Samworo Lapalap ni ahnsou me e ketin papidaisla nan pahr 29. Ia duwen atail ese duwen met? Ni ahnsou me Sises ketin papidaisla, e ketin kasalehda me e kupwurki meirongkihla eh mour pohn pei sarawio me wia, ni karasaras, “kupwuren” Koht. (Kal. 1:4; Ipru 10:5-10) Pwehki pei sarawi ehu wia mehkot me kesempwal nan tehnpas sarawi, tehnpas sarawi en Koht tepida manaman ni ahnsou me Sises ketin papidaisla. Sapwellimen Siohwa tehnpas sarawio kin wehwehki koasoandi koaros me kahrehiong kitail en kak kaudokiong ih ni ahl pwung pwehki sapwellimen Sises meirongo.​—Mad. 3:16, 17; Ipru 5:4-6.

Sapwellimen Siohwa tehnpas sarawio anahne samworo lapalap men en mi mwo. Kahrehda Siohwa ketin keikihdi Sises “sapwellime manaman oh ketikihong ih kehl.” (Wiewia 10:37, 38; Mark 1:9-11) Eri, ia duwen atail kak uhdahn kamehlele me Sises ketin idihdida nin duwen Samworo Lapalap mwohn eh ketin pwoula oh iasada? Mehn kahlemeng en Aaron oh samworo lapalap kan mwurin ih pahn sewese kitail en sapengala peidek wet.

Kosonnedo me Siohwa ketikihong Moses koasoia me samworo lapalap kante me kak doulongala Wasa Sarawiheo en impwal sarawio oh mwuhr, Wasa Sarawieo en tehnpas sarawio. Kahdeng ehu me katohrepeseng Wasa Sarawio oh Wasa Sarawieo. Samworo Lapalapo kin pedolong daulih kahdengo ihte ni Rahnen Tomwo. (Ipru 9:1-3, 6, 7) Aaron oh irail kan me mwurin ih idihdida nin duwen samworo lapalap kan mwohn arail pedolong daulih kahdengo kohla Wasa Sarawieo. Eri Sises pil kakete ketin idihdidahr nin duwen Samworo Lapalap mwohn eh pwoula oh mwuhr ketilong “pwar kahdengo, me iei kahlepe,” ong mour nanleng. (Ipru 10:20) Ong kahrepe wet, wahnpoaron Pohl koasoia me Sises ketido “nin duwen samworo lapalap” oh eri daulih “ketilong nan impwal me lapalapasang oh unsek sang, . . . me sohte wiawihkihda pehn aramas” oh ketidahla “nanleng.”​—Ipru 9:11, 24.

Iahd me inou lapo manamanla? Ni Sises eh ketidahla nanleng oh toukihda pein eh mour unsek pwehki kitail, e ketin wiahda tepin kahk siluh me pahn kamanamanla inou lap kapwo. Kahk dah kan me pidada met?

Keieu, Sises patohdahla mwohn silangin Siohwa; mwuri, Sises patohwanohng Siohwa pweinen eh meirongo; oh kaimwisekala, Siohwa ketin kupwurki ale ahn Sises meirongo. Lao lel ahnsou me kahk siluh pwukat wiawi, inou lap kapwo saikinte kadoadoahk.

Paipel sohte padahkihong kitail iahd me Siohwa uhdahn ketin kupwurki ale sapwellimen Sises meirongo. Eri, kitail sohte kak uhdahn nda iahd me inou lap kapwo manamanla oh tepida. Oh pil kitail sehse ma Sises ketidahla nanleng rahn eisek mwohn Pendekos. (Wiewia 1:3) Nan ahnsou ehu, erein kisin ahnsou kiso, Sises patohwanohng Siohwa eh mour kesempwalo me Siohwa ketin kupwurki ale. (Ipru 9:12) Kamehlelpen me inou lap kapwo tepida kadoadoahk uhdahn sansal ni Pendekoso. (Wiewia 2:1-4, 32, 33) Ni ahnsowo, inou lap kapwo manamanlahr.

Eri, inou lap kapwo manamanla mwurin Siohwa eh ketin kupwurki ahn Sises meirong kesempwalo oh ketikipene me keidi kan nan inou lapo. E tepida kadoadoahk ni Sises eh ketin wiahla Samworo Lapalap oh papah nin duwen Sounkadokepene pali riau en inou lap kapwo.​—Ipru 7:25; 8:1-3, 6; 9:13-15.