1. Nin duwen me 3 Sohn 3, 4 mahsanih, dahme kin kahrehiong kitail en peren?

KE KAK medewehla uwen peren me wahnpoaron Sohn ahneki ni eh rongada duwen irail kan me e sewese en esehla padahk mehlel ar pousehlahte papah Siohwa ni lelepek? Re ahneki kahpwal tohto, oh Sohn kin doadoahk laud pwehn kakehlakahda pwoson en Kristian lelepek pwukat me e kin wiahkin irail nah seri. Duwehte Sohn, kitail pil kin peren ni pein neitail seri kan, de irail kan me kitail sewese en esehla padahk mehlel, ar inoukihong Siohwa arail mour oh doulahte papah ih.​—Wadek 3 Sohn 3, 4.

2. Ia kahrepen kisinlikou siluh ko me Sohn ntingihedi?

² Nan pahr 98, Sohn ele kin koukousoan nan Episos de limwahn Episos. Ele e keseula wasao mwurin eh pedoisang eh sensel nan dekehn Padmos. Mpen ahnsowo, sapwellimen Siohwa manaman kamwakid ih en ntingihedi kisinlikou siluh. Kahrepen kisinlikou pwukat iei en kamwakid Kristian lelepek kan ren kolokolete arail pwoson Sises oh en pousehlahte weweid ni me mehlelo.

3. Peidek dah kan me kitail pahn sapengala?

³ Nanpwungen wahnpoaron ko, Sohn kelehpw me wie momour ahnsowo. E kin pwunodki dahme sounpadahk likamw kan wiewiahiong mwomwohdiso kan. * (1 Sohn 2:18, 19, 26) Irail pwukat me kesehla oh uhwongada kaudok mehlel nda me re kin ese Koht, ahpw re sohte kin peikiong sapwellimen Siohwa kehkehlik kan. Kitail pahn koasoiapene duwen kaweid me Sohn kihda. Ni atail wia met, kitail pahn sapengala peidek siluh: Ia wehwehn en weweid ni me mehlelo? Dahme kakete kauhkitaildihsang en wia met? Oh ia duwen atail kak sewese emenemen en mihmihte ni me mehlelo?

4. Nin duwen me 1 Sohn 2:3-6 oh 2 Sohn 4, 6 mahsanih, dahme kin pidada atail en weweid ni me mehlelo?

⁴ Pwe kitail en weweid ni me mehlelo, kitail anahne esehla padahk mehlel me dierek nan Mahsen en Koht, Paipel. Patehng met, kitail anahne “kapwaiada [sapwellimen Siohwa] kehkehlik kan,” de kitail en peikiong. (Wadek 1 Sohn 2:3-6; 2 Sohn 4, 6.) Sises ketikihda mehn kahlemeng unsek duwen en peikiong Siohwa. Eri ehu ahl kesempwal me kitail en peikiong Siohwa iei sang ni atail idawehn mwahu sapwellimen Sises mehn kahlemeng.​—Sohn 8:29; 1 Pit. 2:21.

5. Dahme kitail anahne uhdahn kamehlele?

⁵ Pwehn pousehlahte weweid ni me mehlelo, kitail anahne uhdahn kamehlele me Siohwa iei Koht en mehlel, me soahng koaros me e kin ketin mahsanihong kitail nan sapwellime Mahsen, Paipel, kin mehlel. Oh kitail pil anahne kamehlele me Sises iei Mesaiao me inoupe mie. Me tohto rahnwet kin peikasalki me Sises ketin idihdidahr en wia Nanmwarki en Wehin Koht. Sohn koasoia me mie “sounwiding tohto” me kakete pitiehdi irail kan me sohte uhdahn kamehlele padahk mehlel duwen Siohwa oh Sises. (2 Sohn 7-11) Sohn ntingihedi: “Ihs me kin likamw ma kaidehn ih me kin kahmahmki me Sises iei Krais?” (1 Sohn 2:22) Ihte ahl me kitail kak soikala likamw pwukat iei sang ni atail onopki Mahsen en Koht. Ihte ma kitail wia met me kitail pahn esehla Siohwa oh Sises. (Sohn 17:3) Oh kitail pahn uhdahn kamehlele me dahme kitail kamehlelehier uhdahn mehlel.

6. Dahme kakete kauhdi Sounkadehde pwulopwul kan sang arail en weweid ni me mehlelo?

⁶ Kristian koaros anahne kanahieng en dehr mweidohng padahk en aramas akan en pitihiraildi. (1 Sohn 2:26) Kristian pwulopwul kan uhdahn anahne kanahieng ren dehr lelohng keper wet. Alexia, * sister men me sounpar 25 sang France, nda: “Ni ahnsou me I iang sukuhl, I sukuhlki duwen padahk me dene mour pein miehla oh pil padahk teikan en aramas, oh padahk pwukat kapweipweiehda. Ekei pak, I perenki rong padahk pwukat. Ahpw I medewe me e pahn sapwung en pohnsehsehla dahme Paipel kin padahngki oh kamehlele soahng koaros me sounpadahk ko koasoia.” Alexia eri onopki pwuhko Life​—How Did It Get Here? By Evolution or by Creation? Erein wihk keite,  e sohla peikasal. Alexia nda: “I kadehdehiong pein ngehi me Paipel audaudki me mehlelo. Oh I wehwehkihda me en mour pahrekiong kaweid kan nan Paipel pahn kahrehiong ie peren oh meleilei.”

7. Dahme kitail en kanahieng dehr wia, oh dahme kahrehda?

⁷ Kristian koaros, me mah oh me pwulopwul, anahne kanahieng en dehr mwomwehda papah Siohwa oh ni ahnsowohte wiewia me sapwung. Sohn kasalehda me kitail sohte kak weweidki me mehlelo oh ni ahnsowohte momourki mour en tiahk samin. (1 Sohn 1:6) Ma kitail men Siohwa en ketin kupwurperenki kitail, kitail en ahnsou koaros tamataman me E kin ketin mwahngih soahng koaros me kitail kin wia. Met wehwehki me mehnda ma aramas sohte kilang dahme kitail kin wia ni rir, Siohwa kak ketin mwahngih soahng koaros.​—Ipru 4:13.

8. Dahme kitail anahne soikala?

⁸ Kitail anahne soikala madamadau en sampah me pid dihp. Wahnpoaron Sohn ntingihedi: “Ma kitail kin nda, ‘Sohte dipatail,’ kitail kin pitipitih pein kitail.” (1 Sohn 1:8) Ni mwehin Sohn, irail me kesehla oh uhwongada kaudok mehlel nda me aramas kak nsenki wiewia dihp oh pil ni ahnsowohte wia kompoakepahn Koht. Rahnwet, kitail mi nanpwungen aramas akan me ahneki soangen madamadauohte. Me tohto nda me re kamehlele duwen Koht, ahpw re sohte pwungki sapwellimen Siohwa madamadau duwen dihp, ahpw mehlel ma e pidada wia nsenen pwopwoud. Mie soangen wiewiahn nsenen pwopwoud me Siohwa ketin mahsanih me sapwung, ahpw aramas pwukat kin nda me e sohte sapwung en wia soahng pwukat ma re men wia.

9. Ia duwen me pwulopwul kan ar paiekihda ni arail tengedihongete dahme re kamehlele nan Paipel?

⁹ Kristian pwulopwul kan ele kin lelohng kasongosong en ahneki madamadau en iengarail tohnsukuhl de tohndoadoahk kan me pid tiahk samin. Met wiawihong Aleksandar. E nda: “Ekei serepein nan sukuhl kin kasonge  ie en wia nsenen pwopwoud rehrail. Re kin nda me pwehki sohte ahi serepein, eri mwein I mwahuki ohl.” Ma ke kin lelohng soangen kasongosongo, tamataman me ni omw kin tengedihongete dahme ke kamehlele nan Paipel, ke pahn pere wahupomw, omw roson mwahu, omw pepehm kan, oh omw nanpwungmwahu rehn Siohwa. Oh ehuehu ahnsou me ke kin pelianda kasongosong kan, ke pahn mengeikihla wia dahme pwung. Pil tamataman me madamadau sapwung en sampah wet me pid wia nsenen pwopwoud uhdahn tepisang Sehdan. Eri ni omw soikala madamadau en sampah wet, ke kin ‘kalowehdi me suwedo.’​—1 Sohn 2:14.

10. Ia duwen 1 Sohn 1:9 eh sewese kitail en ahneki nsenmwakelekel ni atail papah Siohwa?

¹⁰ Kitail pwungki me Siohwa me sapwellimanki pwuhng en padahkihong kitail ia wiewiahn dihp. Oh kitail kin wia uwen atail kak en dehr wiahda dihp. Ahpw ni atail wiahda dihp, ni kapakap kitail kin wehkohng Siohwa atail sapwung. (Wadek 1 Sohn 1:9.) Oh ma kitail wiahda dihp laud ehu, kitail kin ale sawas sang rehn elder kan me Siohwa ketin idihada en apwalih kitail. (Seims 5:14-16) Ahpw kitail en dehr kin medemedewehte sapwung kan me kitail wiahda mahso. Dahme kahrehda? Pwehki Samatailo me limpoak ketikihda meirong en pweipwei sapahlo en sapwellime Ohlo pwe kitail en kak ale mahkpen dipatail kan. Ni Siohwa eh ketin mahsanih me e pahn ketin mahkohng kitail ma kitail uhdahn koluhla, e pahn uhdahn ketin kapwaiada. Eri sohte mehkot kak ireikitailsang en ahneki nsenmwakelekel ni atail papah Siohwa.​—1 Sohn 2:1, 2, 12; 3:19, 20.

11. Ia duwen atail kak pere atail madamadau sang padahk kan me kak kaluwetala atail pwoson?

¹¹ Kitail anahne soikala padahk kan en irail me kesehla oh uhwongada kaudok mehlel. Sangete tepin mwomwohdiso en Kristian kan, Tepilo kin doadoahngki sounwiding tohto en kaluwetala pwoson en sapwellimen Koht ladu lelepek kan. Eri kitail anahne ese ia  duwen atail en kasawihada wekpeseng en dahme mehlel oh dahme likamw. * Atail imwintihti kan kak doadoahngki Internet de social media pwehn song en kaluwetala atail likih Siohwa oh pil atail limpoak ong riatail Kristian kan. Dehr kamehlele likamw pwukat pwehki e kohsang rehn Sehdan!​—1 Sohn 4:1, 6; Kaud. 12:9.

12. Dahme kahrehda kitail anahne kakehlakahda atail pwoson padahk mehlel me kitail sukuhlkiher?

¹² Pwehn pelianda uhwong kan sang Sehdan, kitail anahne kalaudehla atail likih Sises oh ia duwen Siohwa eh ketin doadoahngki Sises en kapwaiada kupwure. Kitail pil anahne likih irail kante me Siohwa ketin doadoahngki rahnwet pwehn kahluwa sapwellime pwihn. (Mad. 24:45-47) Kitail kin kalaudehla atail likilik sang ni atail kin kaukaule onopki Mahsen en Koht. Eri atail pwoson pahn rasehng tuhke pwoat me kalewe kan leldihla nanpwel wasa loal. Pohl pil nda mehkot me duwehte met ni eh ntinglahng mwomwohdiso en Kolose. E nda: “Nin duwen amwail alehdahr Kaun Krais Sises, kumwail pousehlahte weweid ni amwail miniminiong ih, oh poadidi teng oh kokouda reh oh kehlail ni pwoson.” (Kol. 2:6, 7) Ma kitail doadoahk laud pwehn kakehlakahda atail pwoson, Sehdan oh irail kan me kin utung ih sohte kak kauhkitaildihsang atail en weweid ni me mehlelo.​—2 Sohn 8, 9.

13. Dahme kitail en kasik, oh dahme kahrehda?

¹³ Kitail en kasik me sampah wet pahn kailongki kitail. (1 Sohn 3:13) Sohn katamankihong kitail me “sampah pwon mi pahn manaman en me suwedo.” (1 Sohn 5:19) Ni koasoandi en sampah wet eh kereniongehr imwisekla, ahn Sehdan lingeringer kin lalaudla. (Kaud. 12:12) E kin doadoahngki soangen uhwong kan me sohte nohn sansal, duwehte lidip en tiahk samin de likamw kan me irail me kesehla oh uhwongada kaudok mehlel kin wiahda. E pil pahn doadoahngki kalokolok kan me uhdahn lemei. Sehdan ese me eh ahnsou en kauhdi atail doadoahk en kalohk de kauwehla atail pwoson uhdahn mwotomwot. Eri kitail sohte anahne pwuriamweikihla me atail doadoahk kin keinapwidi nan ekei sahpw. Mendahki met, riatail Kristian kan nan sahpw pwukat kin dadaurete. Irail kin kadehdehda me sohte lipilipil dahme Sehdan kin wiahiong sapwellimen Siohwa aramas akan, kitail kak lelepekte!

14. Ia ehu ahl me kitail kak sewese riatail Kristian kan en mihmihte ni me mehlelo?

¹⁴ Pwehn sewese riatail Kristian kan en mihmihte ni me mehlelo, kitail anahne kasalehda limpoak. (1 Sohn 3:10, 11, 16-18) Kitail anahne poakohng emenemen kaidehn ihte ni ahnsou mwahu ahpw pil ni ahnsou me kahpwal kan kin pwarada. Karasepe, mie emen me ke ese me kompoakepah de emen kiseh me e poakohng mehla oh e anahne sawas de kamweit? De ke rong duwen riatail Kristian kan me lelohng kahpwal laud duwehte melimel de rerrer en sahpw oh anahne sawas en pwurehng kauwada arail Wasahn Kaudok de imwarail kan? Kitail kin kasalehda uwen atail poakohng irail kaidehn ihte sang ni lokaia, ahpw pil sang ni atail wiewia.

15. Nin duwen me 1 Sohn 4:7, 8 mahsanih, dahme kitail anahne wia?

¹⁵ Kitail kin kahlemengih Samatail limpoako nanleng ni atail kin kasalehda limpoak ong emenemen. (Wadek 1 Sohn 4:7, 8.) Ehu ahl kesempwal en kasalehda limpoak iei en mahkpene nanpwungatail. Karasepe, emen kakete kamedekeikitailla ahpw mwuhr pekimahk. Kitail kin kasalehda limpoak ni atail mahkohng ih oh pil manokehla dahme e wiahiong  kitail. (Kol. 3:13) Emen brother me adaneki Aldo lelohng kasongosong wet ni eh rong emen brother me e kin wauneki eh kauwe eh keinek. Aldo nda, “I kin ahnsou koaros kapakapkihong Siohwa en ketin sewese ie en dehr ahneki madamadau sapwung duwen brothero.” Aldo pil wia laudsang met. E koasoanehdi en peki rehn brothero en iangih kalohk. Ni ara kalohkpene, Aldo kawehwehiong ia uwen eh nsensuwedkihla dahme brothero nda. Aldo nda: “Ni brothero eh rong duwen ei nsensuwedkihla dahme e ndao, e pekimahk. Sang ni ngileo, I kak ese uwen eh koluhkihla dahme e ndao. Mwurin mwo, se pwurehng wiahla kompoakepah mwahu kei.”

16-17. Dahme kitail en koasoanehdi teng en wia?

¹⁶ Wahnpoaron Sohn uhdahn poakohng rie Kristian kan oh men irail en ahneki pwoson laud. Eh limpoak oh nsenoh uhdahn sansalda mwahu nan kaweid me e kihda nan nah kisinlikou siluh ko. Ia uwen met eh wia mehn kangoang ong kitail en ese me ohl oh lih pwukat, me duwehte ih, wia me keidi kei me pahn iang Krais kaunda!​—1 Sohn 2:27.

¹⁷ Kitail en kesempwalki kaweid me kitail koasoiapenehier. Kitail en koasoanehdi teng en weweid ni me mehlelo, peikiong Siohwa ni soahng koaros me kitail kin wia. Onopki oh likih sapwellime Mahsen. Kalaudehla omw pwoson Sises. Soikala padahk en aramas akan oh irail me kesehla oh uhwongada kaudok mehlel. Pelianda kasongosong en mwomwehda papah Siohwa oh ni ahnsowohte wiewia dihp. Mour pahrekiong sapwellimen Siohwa koasoandi kan. Oh kitail en sewese riatail Kristian kan en kehlailte sang ni atail kin mahkohng irail me kamedekeikitailla oh pil sewese irail kan me anahne sawas. Eri, mendahki kahpwal kan me kitail ahneki, kitail pahn pousehlahte weweid ni me mehlelo.