1. Dahme kak wiawi ni ekei kin kahrehda siaipene?

NAN sampah rahnwet, aramas tohto kin ahnsou koaros songosong en men mwahusang meteikan oh irail sohte kin nsenohki dahme arail wiewia kan kak wiahiong meteikan. Karasepe, ohlen pesines men ele pahn men pweida mwahu sang pesines teikan oh wia soahng kan me kakete imwila suwed ong meteikan. Sounmwadong men nan mwadang ehu ele pahn kauwehla sounmwadong en pwihn teio pwehn kana nan mwadongo. Tohnsukuhl men ele kin kawaida pasapeng nan des kan pwehn iang sukuhl laud. Nin duwen Kristian kei kitail ese me soangen wiewia wet sapwung; e wia kisehn “wiewiahn uduk.” (Kal. 5:19-21) Ahpw ia duwe, ekei sapwellimen Siohwa ladu kan kakete kahrehda siaipene nan mwomwohdiso ni ar sohte wehwehki me irail wiewia met? Kitail anahne medewe met pwehki ma irail kan nan mwomwohdiso kin songosong en kahrehda siaipene, eri irail sohte pahn miniminpene.

2. Dahme kitail pahn koasoiapene nan iren onop wet?

² Nan iren onop wet, kitail pahn koasoiapene soahng kei me kak kahrehda siaipene nanpwungen riatail Kristian kan. Kitail pahn pil koasoiapene sapwellimen Siohwa ladu kan nan Paipel me sohte kin medewe me re mwahusang meteikan. Keieu, kitail pahn koasoiapene ia duwen atail kak kasawih atail wiewia kan.

3. Peidek dah kan me kitail en idek rehtail?

³ E mwahu en ekei pak kasawih kahrepen atail wiewia kan. Ele kitail kak pein idek rehtail: ‘I kin pohlki ni ei kin medewe me I mwahusang meteikan? I kin doadoahk laud nan mwomwohdiso pwehki I men ien keieu mwahusang meteikan? De I kin doadoahk laud pwe I men kaperenda Siohwa?’ Dahme kahrehda kitail anahne idek peidek pwukat? Tehk dahme Mahsen en Koht kasalehda.

4. Dahme kahrehda kitail en dehr kapahrekiong kitail meteikan, nin duwen me Kalesia 6:3, 4 mahsanih?

⁴ Paipel kin kangoange kitail en dehr kapahrekihong kitail meteikan. (Wadek Kalesia 6:3, 4.) Dahme kahrehda? Ehu kahrepe iei me ma kitail medewe me kitail mwahusang riatail Kristian kan, kitail kak pohnmwahsohla. Ahpw ma kitail medewe me riatail Kristian kan mwahusang kitail, kitail pahn kakete mworuskihla. Sohte lipilipil mehnia, atail madamadau sohte pahn pwung. (Rom 12:3) Sister men me adaneki Katerina, * sang Greece nda: “I kin kapahrekiong pein ngehi meteikan me mwomwen masamwahu, koahiek nan kalohk, oh pil koahiek en wiahda kompoakparail. Pwehki met, I pehm me sohte katepei.” Kitail anahne tamataman me Siohwa kin ketin kakerenihkitailla reh, kaidehn pwehki kitail masamwahu, koahiek en koasoi, de ndand, ahpw pwehki kitail poakohng ih oh men peikiong sapwellime Ohlo.​—Sohn 6:44; 1 Kor. 1:26-31.

5. Dahme ke sukuhlkihsang dahme wiawihong brothero Hyun?

⁵ Pil ehu peidek me kitail kak pein idek rehtail iei, ‘Riei Kristian kan kin wiahkin ie sounwiahda popohl, de I kin kalapw kahrehda akamai?’ Ih met me wiawihong brother men me adaneki Hyun sang Palieir en Korea. E kin medewe me ekei me ahneki pwukoa nan mwomwohdiso kin songosong en siai ong ih. E nda, “I kin kauwei irail oh sapwungki dahme re nda.” Ia imwilahn met? E nda, “Ei wiewiao kahrehda mwomwohdiso sohte kin miniminpene.” Ekei kompoakepahn Hyun ko sewese ih en wehwehki eh kahpwalo. Hyun wiahda wekidekla kan, oh rahnwet e wia elder koahiek men. Ma kitail kilang me kitail kin kahrehda siaipene ah kaidehn wiahda popohl, kitail anahne mwadang wiahda wekidekla.

6. Nin duwen me Kalesia 5:26 mahsanih, irair dah kan me kin kahrehda siaipene?

⁶ Wadek Kalesia 5:26. Irair suwed dah kan me kak kahrehda siaipene? Ehu iei aklapalap. Aramas aklapalap kin roporop. Pil ehu irair suwed iei peirin. Aramas peirin men sohte kin men ahnekihte dahme meteikan ahneki ahpw e pil men kihsang irail. Eri emen me kin peiriniong emen kin uhdahn kailongki ih. Kitail uhdahn men kadohwaneweisang kitail irair suwed pwukat!

7. Karasepe dahieu me kasalehda me aklapalap oh peirin suwed?

⁷ Aklapalap oh peirin kak kapahrekihong pwehl me kasaminehla kahs en sompihr ehu. Sompihro kak pihrda, ahpw pwehlo kak kaponehla paip en kahso kahrehda sompihro en pwupwudi oh ohla mwohnte e sok. Duwehte met, emen ele kak papah Siohwa erein ahnsou ehu, ahpw ma e kin aklapalap oh peirin, e pahn kauwehla ih. (Lep. Pad. 16:18) E pahn uhdihsang papah Siohwa oh pahn  kauwehla ih oh meteikan. Eri ia duwen atail kak perekitailsang aklapalap oh peirin?

8. Ia duwen atail kak pelianda aklapalap?

⁸ Kitail kak pelianda aklapalap sang ni atail medemedewe en wahnpoaron Pohl kaweido ong mehn Pilipai ko: “Kumwail dehr wia mehkot sang ni akamai de aklapalap, ahpw ni aktikitik, kumwail wiahki meteikan lapalapasang kumwail.” (Pil. 2:3) Ma kitail wiahki meteikan lapalapasang kitail, kitail sohte pahn siai ong irail kan me ele ahneki koahiek laudsang kitail. Ahpw kitail pahn perenki me re ahneki koahiek pwukat. Met kin mehlel ma re kin doadoahngki arail koahiek nan sapwellimen Siohwa doadoahk pwehn kapinga ih. Oh ma riatail Kristian koahiek pwukat kin idawehn en Pohl kaweido, irail pahn kak pohnese atail irair mwahu kan. Imwilahn met, kitail koaros pahn wiahda popohl oh miniminpene nan mwomwohdiso.

9. Ia duwen atail kak soikala peiriniong riatail Kristian kan?

⁹ Kitail kak pelianda peirin sang ni atail kakairada aktikitik, me iei en pohnese dahme kitail kak wia de sohte kak wia. Ma kitail aktikitik, kitail sohte pahn song en kasalehda me kitail mwahusang de koahiek sang koaros. Ahpw kitail pahn kilang ia duwen atail kak sukuhl sang irail kan me koahiek sang kitail. Karasepe, ele mie brother men me kin koahiek en wia padahk kan. Ele kitail kak idek reh ia duwen eh kin kaunopada eh padahk kan. Ma sister men mai en kuk, ele kitail kak peki reh dahme kitail kak wia pwe kitail en wiahla soun kuk koahiek men. Oh ma Kristian pwulopwul men sohte mengeiki wiahda kompoakepah, ele e kak peki kaweid sang emen me mengeiki wia met. Ni ahl pwukat kitail kak soikala peirin oh kamwahwihala atail koahiek.

10. Kahpwal dahieu me Kidion lelohng?

¹⁰ Medewehla dahme wiawihong Kidion, sang keinek en Manase, oh ohl kei sang keinek en Epraim. Siohwa ketin sewese Kidion oh nah ohl 300 ko en kana nan mahwen ehu, oh re kakete pohnmwahsohkihda met. Ohl  en Epraim ko kohla rehn Kidion oh akamaiong ih, ahpw re sohte kapinga ih. Irail uhdahn lingeringerda pwehki Kidion sohte luke irail nin tapio en iang mahweniong sapwellimen Siohwa imwintihti ko. Irail uhdahn medemedewehte me aramas akan anahne wauneki arail keineko. Ahpw irail manokehla dahme keieu kesempwalo​—Kidion ahpwtehn kawauwihala mwaren Siohwa oh perehla Sapwellime aramas akan.​—Sounkopwung 8:1.

11. Dahme Kidion ndaiong ohlen Epraim ko?

¹¹ Ni aktikitik, Kidion sapengki ohlen Epraim ko: “Me I wiadahro sohte kak pahrekiong dahme kumwail wiadahro.” Ih eri katamankihong irail ia duwen Siohwa eh ketin kapaiahda irail. Ni ohl ako ar rongada met, irail “sohla lingeringer pah.” (Sounkopwung 8:2, 3) Kidion pilada en aktikitikla pwehn kolokol meleilei nanpwungen sapwellimen Koht aramas akan.

12. Dahme kitail kak sukuhlkihsang mehn kahlemeng en ohl en Epraim ko oh Kidion?

¹² Dahme kitail kak sukuhlkihsang met? Kitail sukuhlkihsang mehn kahlemeng en ohl en Epraim ko me kitail en dehr medemedewehte en alehdi wahu ong pein kitail laudsang atail en kawauwih Siohwa. Nin duwen tapwin peneinei oh elder kan, kitail kak sukuhlki mehn kasukuhl ehu sang Kidion. Ma emen nsensuwedkihla dahme kitail wia, kitail anahne ese dahme kahrehda. Kitail anahne pil kapingahki aramaso soahng mwahwo me e wiahda. Kitail anahne aktikitik pwehn wia met, ahpw mehlel ma aramaso me sapwung. Ahpw e kesempwal en ahneki nanpwungmwahu rehn riatail Kristian kan laudsang en kadehdehda me kitail me pwung.

13. Kahpwal dah me Ana lelohng, oh ia duwen eh powehdi?

¹³ Pil medewehla mehn kahlemeng en Ana. E pwoudkihla ohl en Lipai men me adaneki Elkana, me uhdahn poakohng ih. Ahpw Elkana pil pwoudiki emen lih, Penina. Elkana poakohng Ana laudsang eh poakohng Penina. Ahpw, “Penina me neitik seri, a Ana sohte neitik.” Pwehki met, Penina “kin epwehnki kaloke oh kasarowe” Ana. Ia duwen Ana eh mwekidki met? E uhdahn nsensuwedla! Oh “kin sengiseng oh sohla kin men mwenge.” (1 Sam. 1:2, 6, 7) Ahpw Paipel sohte kasalehda me Ana song en ikih Penina. Ahpw Ana padahkihong Siohwa eh pepehm oh likih me Siohwa pahn ketin sewese ih. En Penina mwekid wekila? Paipel sohte kasalehda. Ahpw kitail ese me Ana pwurehng ahnekihda meleilei. E “nsenamwahulahr.”​—1 Sam. 1:10, 18.

14. Dahme kitail kak sukuhlkihsang mehn kahlemeng en Ana?

¹⁴ Dahme kitail kak sukuhlkihsang mehn kahlemeng en Ana? Ma emen song en siai ong uhk, tamataman me ke kak powehdi irairo. Ke  dehr iang pidada siaipeneo. Dehr dupukohng emen me suwed ahpw song wiahda popohl reh. (Rom 12:17-21) Mehnda ma e sohte wekila, ke pahn kolokolete omw meleilei.

15. Ia duwen Apolos oh Pohl duwehpene?

¹⁵ Met, kitail pahn medewe dahme kitail kak sukuhlki sang mehn kahlemeng en tohnpadahk Apolos oh wahnpoaron Pohl. Ira koaros uhdahn ese duwen Nting Sarawi kan. Me tohto ese ira oh ira wia sounpadahk koahiek kei. Oh ira sewesehier me tohto ren wiahla tohnpadahk kei. Ahpw ira sohte kin siaipene.

16. Soangen aramas dah men Apolos?

¹⁶ Apolos “pwilidak en Aleksandria,” me ni ahnsowo wia wasa ndand ehu me aramas kin kohla sukuhl ie. E uhdahn koahiek en koasoi, oh e “samanihla Nting Sarawi kan.” (Wiewia 18:24) Ni ahnsou me Apolos kin papah nan Korint, ekei Kristian ko nan mwomwohdisou kasalehda me irail perenki ih laudsang brother teiko, iangahki Pohl. (1 Kor. 1:12, 13) Ahpw ia duwe, Apolos kin kahrehda irail en sohte miniminpene? Soh e sohte kin wia met. Ni mehlel, mwurin Apolos kohkohsang Korint, Pohl kangoange ih en pwurala. (1 Kor. 16:12) Ma Apolos kin kahrehda sohte minimin nan mwomwohdiso, Pohl sohte pahn wia met. E sansal me Apolos doadoahngki eh koahiek ni ahl mwahu ehu me iei en kalohki rongamwahwo oh kakehlaka rie Kristian kan. Kitail pil kak kamehlele me Apolos wia ohl aktikitik men. Karasepe, Paipel sohte kasalehda me e nsensuwedla ni ahnsou me Akwila oh Persila “kawehwehiong ni pwung elen Koht.”​—Wiewia 18:24-28.

17. Ia duwen Pohl eh kin kahrehda popohl?

¹⁷ Wahnpoaron Pohl ese duwen doadoahk mwahu kan me Apolos kin wia. Ahpw e sohte  pwunodki me aramas akan pahn medewe me Apolos mwahusang ih. Ni atail wadek dahme Pohl ntingkihlahng mehn Korint ko, kitail kak kilang me e aktikitik oh toupahrek. E sohte kin perenki ni aramas ako kin nda “I kin idawehn Pohl,” ahpw e kin patohwanohng Siohwa Koht oh Sises Krais kaping koaros.​—1 Kor. 3:3-6.

18. Nin duwen me 1 Korint 4:6, 7 mahsanih, dahme kitail sukuhlkihsang mehn kahlemeng en Apolos oh Pohl?

¹⁸ Dahme kitail kak sukuhlkihsang mehn kahlemeng en Apolos oh Pohl? Ele kitail kin doadoahk laud ong Siohwa, oh ele sewese me tohto en kekeirda oh papidaisla. Ahpw kitail wehwehki me met kak pweida ihte pwehki Siohwa ketin sewese kitail. Sang mehn kahlemeng en Apolos oh Pohl, kitail pil sukuhlki me ni atail pwukoa kan nan mwomwohdiso tohtohla, kitail kak kalaudehla wiahda popohl nan mwomwohdiso. Kitail uhdahn kalahnganki ni elder oh sounsawas kan ar kin sewese kitail en miniminpene oh ahneki popohl nanpwungatail. Irail kin wia met pwehki kaweid koaros me re kin kihda kin kohsang nan Paipel. Irail sohte kin medewe me re kesempwal, ahpw re kin sewese koaros nan mwomwohdiso en peikiong Sises oh sapwellime mehn kahlemeng.​—Wadek 1 Korint 4:6, 7.

19. Dahme emenemen kitail kak wia? (Pil kilang kisin koakono “ Dehr Kahrehda Siaipene.”)

¹⁹ Emenemen kitail ahneki koahiek kan me Koht ketikihong kitail. Kitail kin doadoahngki koahiek pwukat “en papahki emenemen.” (1 Pit. 4:10) Ele kitail kin medewe me dahme kitail kin wia sohte uhdahn kesempwal. Ahpw wiewia ehu me kin kahrehda miniminpene mendahki e tikitik, kin duwehte deiad me kolpene lepin likou ehu. Kitail anahne doadoahk laud pwehn kihsang rehtail madamadau en siaipene. Kitail en koasoanehdi teng en wia uwen atail kak koaros pwehn kahrehda popohl oh miniminpene nan mwomwohdiso.​—Ep. 4:3.