Pahro mwuri, pakair ehu kohda ong tohn Pedel kan me ohpis en Sounkadehdehn Siohwa kan nan Palieir en Aperika anahne sounsawas kan pwehki mie misihn kapw en wiahda pwuhk me irail pwainda. I kilelehdi edeie pwe I men iang, oh I uhdahn perenda ni arail piliehda. Brother silimen sang Pedel en Canada pil iang pilipilda​—Dennis Leech, Bill McLellan, oh Ken Nordin. Ohpiso ndahng kiht me se pahn kohla Palieir en Aperika oh mi mwo ahnsou werei.

I delepwohnih ei nohnou oh nda: “Ino, mie rohng mwahu. I pahn kohla Palieir en Aperika!” Ei nohnou lih nennen men, ahpw e ahneki pwoson laud oh nanpwungmwahu keren rehn Siohwa. E sohte kin kalapw lokolokaia, ahpw I ese me e kin utung ie. Ih oh pahpa sohte kin sapwungki pilipil kan me I wiahda, ahpw ira nsensuwedki ei pahn kohla wasa me uhdahn dohsang ira.

Kiht me pahmeno kohla Pedel en Brooklyn pwehn ale kaiahn erein sounpwong siluh pwehn esehla doadoahngki ehu soangen misihn en wiahda pwuhk. Kiht eri dake sohp kohla Cape Town nan Palieir en Aperika. Ahnsowo I ahpwtehn sounpar 20. Se dake kisa sang Cape Town kohla Johannesburg. Se tepida seiloak ni soutik. Keieun wasa me se uhdi ie iei ni kisin kahnimw kis me adaneki Karoo, me mwomwen sohte towe. Se lel wasao ninsohrahn. Wasao pwelpar, edied, oh karakar. Kiht koaros kilangla likin kisao oh medewe soangen wasa dahieu mwo. Se ekis pwunodki ia duwen at pahn wia at pwuko kan wasao. Ahpw sounpar kan mwuhr, se pahn pwurodo oh kilang me wasao wia wasa mwahu oh meleilei ehu.

Ei doadoahk erein sounpar kei iei en katanga misihn en wiahda pwuhk ehu me adaneki Linotype. Wiepen katanga misihn wet me kapwuriamwei oh ekis apwal. I kin kaunopada kairekdi en mesen nting kan ong wiawihdahn neitail Kahn Iroir oh Awake! Ohpis en wiahda pwuhko kin wiahda makasihn kan ong lokaiahn Aperika tohto kaidehn ihte nan Palieir en Aperika ahpw pil ong sahpw tohto teikan me mi paliepeng en wehio. Se uhdahn perenki at doadoahngki laud misihn kapw wet me kahrehiong kiht en seiloak sang Canada leledo me!

Mwuhr, I doadoahk nan ohpis (Factory Office) me kin apwalih soangsoangen doadoahk kan ong wiahda, kadarpeseng, oh kawehwe pwuhk. Ei mour uhdahn soupisek, kaperen, oh mie katepe.

Nan 1968, I pwoudikihda pioneer sister men me adaneki Laura Bowen me kin kousoan karanih Pedel. E kin iang daip nan ohpis en kawehwe (Translation Office). Ni ahnsou ko, irail kan me ahpwtehn pwopwoudida sohte kak iang mi nan Pedel, eri re kihong kiht sen wia pwukoahn pioneer tohrohr. I ekis pwunodki met, pwehki erein sounpar eisek me I mihmi Pedel, I sohte anahne pwunodki dahme I pahn kang de wasahn kousoan. Eri ia duwen at pahn kak doadoahngki uwen mwohni me pioneer tohrohr kin alehdi pwehn pwainkihda soahng koaros me se anahne? Mahso, emenemen kiht kin ale tala $35 nan sounpwong koaros​—ma se lel at awahn kalohk, pwurala rehn aramas, oh kihla pwuhk ni uwen me se anahne wia. Ih uwen mwohni wet me se kin doadoahngki pwehn pwainki at rent, kanat mwenge, mehn peidaid, oh pil wini oh soahng teikan me se anahne.

Irail kadarkitla en iang sewese pwihn en pioneer tikitik ehu nan kahnimw en Durban me mi nan Sehd en India. Mie mehn India tohto wasao. Tohtohn irail wia kadaudok en tohndoadoahk kan me kohdo Palieir en Aperika pwehn iang doadoahk ni wasahn wiahda suke nan pahr 1875. Met irail kin wia soangen doadoahk teikan, ahpw re kolokolete arail tiahk kan, oh pil wiewiahte soangen mwenge iou kan, duwehte kari. Irail pil kin doadoahngki lokaiahn wai, oh met wia sawas laud ong kiht.

Pioneer tohrohr kan anahne wiahda awa 150 sounpwong koaros nan kalohk, eri ngehi oh Laura koasoanehdi sen wiahda awa 6 nan keieun rahn. Rahno uhdahn karakar. Sohte me se kin pwurala rehrail, oh sohte aht onop en Paipel kan​—ihte kalokalohk ihmw lel ihmw erein awa weneu. Erein ahnsou ehu mwurin at tepida kalohk, I kilangedi ong nei kuloako oh diarada me e ahpwtehn minit 40 me se kalokalohngki! I ahpw medemedewe ia mwomwen at pahn kapwaiada at pwukoahn pioneer tohrohro.

Se mwadang wiahda at koasoandi mwahu. Rahn koaros se kin kaunopada kanat sandwich oh audekihda nait doupen koahpio suhpw de koahpi. Ni ahnsoun kommoal, se kin peidi pahn mwetin tuhke kan wasao, oh ekei pak seri en India ko kin kohdo oh kilikilang kiht. Erein rahn keite, se esehda me mwurin at kalohngki awa ehu de riau, rahno kin mwadang nekla.

Se uhdahn perenki ehukihong aramas kadek ko wasao duwen padahk mehlel en Paipel! Se diarada me mehn India kan kin wauneki oh pil kadek ong aramas, oh re poakohng Koht. Tohto me kin iang pelien lamalam en Hindu kin perenki rong rongamwahwo me se kalohki. Irail kin perenki sukuhlki duwen Siohwa, Sises, Paipel, sampah kapw meleilei ehu ni ahnsou kohkohdo, oh pil koapworopwor ong me melahr kan. Mwurin sounpar ehu, mie aht onop en Paipel meh 20. Rahn koaros, se kin iang mwenge rehn ehu peneinei ko me se kin onop Paipel rehrail. Se kin uhdahn peren.

Mwurin ahnsou kis, se alehdi pil ehu pwukoa tohrohr, iei pwukoahn sounapwalih me kin seiloak. Se pekederla en wia doadoahk wet ni wasa kan ni oaroahr en Sehd en India. Ehuehu wihk, se kin mi rehn ehu peneinei ni at mwemweitla ni mwomwohdisou oh iang sounkalohk kan kalohk oh kangoange irail. Se wiahla kisehn arail peneinei, oh perenki iang neirail seri kan oh neirail mahn akan mwadong. Sounpar riau dower powe. Ohpis en Sounkadehdehn Siohwa kan wasao eri delepwohni kiht ni at sohte kasik. Irail nda: “Se men kumwa en pwurodo Pedel.” I sapengki, “Se uhdahn perenki at mihmi wasaht.” Ahpw se uhdahn perenki wia sohte lipilipil soangen pwukoa dah me re pahn kihong kiht.

Ei pwukoa nan Pedel iei en iang sawas nan palien kalohk (Service Department), wasa me I ahneki pai kaselel en iang brother koahiek tohto doadoahk. Ni ahnsou ko, mwurin sounapwalih me kin seiloak eh mwemweitla ni ehu mwomwohdiso, e kin wiahda ripoht oh kadarala ni ohpis en Sounkadehdehn Siohwa kan. Eri Service Desk pahn wiahda kisinlikou ehu ong mwomwohdisou sang ripoht en sounapwalih me kin seiloako. Kisinlikou pwukat wiawihda pwehn kangoange oh kihda kaweid kan, ma anahn. Sekteri kan kin doadoahk laud pwehn kawehwehda ripoht en sounapwalih me kin seiloak kan sang ni lokaiahn Xhosa, Zulu, oh lokaia teikan ong lokaiahn wai. Irail uhd kawehwehda kisinlikou  kan sang ohpiso sang ni lokaiahn wai ong lokaiahn Aperika teikan. I kin uhdahn kalahnganki doadoahk laud en sounkawehwe kan me pil sewese ie en wehwehki soangen kahpwal kan me riatail Kristian mehn Aperika kan kin lelohng.

Ni ahnsowo, mehn Palieir en Aperika kan kin mi pahn kosonned en katohrohrpeseng aramas me koperment en wasao wiahda. Mie wasa kan me kopermento koasoanehdi ehuehu pwihnen aramas en kousoan ie, kahrehda pwihnen aramas me pohn kilirail weksang meteikan, de re kohsang ehu sahpw tohrohr sohte kak patehng meteikan. Riat Kristian kan me pohn kilirail toantoal kin doadoahngki pein arail lokaia, kalohk ni pein arail lokaia, oh iang mwomwohdiso kan me kin lokaiahki pein arail lokaia.

I sehse mehn Aperika tohto pwehki mwomwohdiso me I iang papah kin ahnsou koaros lokaiahki lokaiahn wai. Ahpw met I ahneki ahnsou mwahu en esehla duwen mehn Aperika kan oh duwen arail tiahk kan. I esehda soangen kahpwal kan me riatail Kristian kan kin lelohng pwehki tiahk oh pelien lamalam en arail wasao. Ia uwen arail kin eimah ni arail nantihong en saledeksang tiahk kan me sohte kin poahsoankihda Paipel, oh pil lelohng uhwong laud sang arail peneinei oh wasahn kousoan pwehki irail sohte men idawehn tiahk en wunahni kan! Nan wasa kan me dohsang kahnimw laud, aramas tohto uhdahn semwehmwe. Me tohto iangete sukuhl erein ahnsou kis, de sohte kin sukuhl, ahpw re kin wauneki Paipel.

I ahneki pwais kaselel en iang sawas nan palien kopwung me pidada saledek en kaudok oh soupoupali. Ei pwoson kin uhdahn laudla ni ei kilang lelepek oh eimah en Sounkadehde pwulopwul kan me imwen sukuhl ko kihsang irail nan sukuhl pwehki re sohte men iang kapakap oh iang koulki arail koulen sarawi kan.

Riatail Kristian ko pil lelohng ehu kahpwal nan ehu sapwen Aperika tikitik ko me mahso adaneki Swaziland. Ni ahnsou me Nanmwarki Sobhuza II mehla, tohn wasao pwon anahne kapwaiada arail tiahk kan en mehla. Ohl akan anahne sihpihla pitenmoangarail, oh lih akan anahne seisei mwotomwot. Riatail Kristian tohto lelohng kalokolok pwehki re sohte iang wia tiahk wet me pidada kaudokiong arail peneinei kan en mahs. Se kin uhdahn perenkihda arail loalopwoatohng Siohwa! Se sukuhlki laud duwen lelepek oh kanengamah sang riat Kristian mehn Aperika kan, oh met kalaudehla at pwoson.

Nan 1981, I pwurala doadoahk nan Printery, oh iang sewese wiahda pwuhk kan doadoahngki computer. Ahnsowo uhdahn kaperen! Doadoahk en wiahda pwuhk kan kin wekiwekla. Emen ohl me kin netiki misihn en wiahda pwuhk (phototypesetter) kihong aht ohpiso ehu soangen misihn wet pwe sen song en doadoahngki ni soh isepe. Met imwikihla at pwainda soangen misihn wet meh limau pwehn wiliandi nait Linotype misihn meh duwau. Se pil pwainda misihn en print kapw ehu. Met se kin wiahda pwuhk tohtohsang mahs!

Computer kan sewese kiht en wiahda wiepe kapw kan ong koasoansoandi en lepin lokaia kan nan pwuhk kan sang ni at doadoahngki MEPS (Multilanguage Electronic Publishing System). Misihn kapw kan kin uhdahn mwahula sang ahnsou me kiht meh pahmeno sang Pedel en Canada seiloakdo Palieir en Aperika! (Ais. 60:17) Ahnsowo kiht koaros pwoudikidahr pioneer sister kei me uhdahn kin poakohng Siohwa. Ngehi oh Bill kin papahte nan Pedel. Ken oh Dennis mieier ara peneinei oh re kin kousoan karanih kiht.

Doadoahk en aht ohpiso wie tohtohla. Sawasepen Paipel kan kin wiawihda ni lokaia tohto, oh kin pekederla nan ohpis en Sounkadehdehn Siohwa kan nan sahpw teikan. Se anahne wiahda pil ehu Pedel. Brother kan wiahda Pedel wet nan wasa kaselel ehu nan palikapi en Johannesburg, oh kasarawi en Pedel wet wiawi nan pahr 1987. E uhdahn wia pai kaselel ehu en iang kisehn kekeirda pwukat oh pil iang Pwihn me Kin Apwalih Ohpis en Sounkadehdehn Siohwa kan en Palieir en Aperika erein sounpar tohto.

Mehkot kapwuriamwei wiawihong kiht nan pahr 2001 ni ahnsou me se alehdi luhk en kohla iang Pwihn me Kin Apwalih Ohpis en Sounkadehdehn Siohwa kan nan Pedel kapw nan Wehin Amerika. Se nsensuwedkihla at pahn mweselsang aht doadoahko oh pil kompoakepaht kan nan Palieir en Aperika, ahpw se uhdahn perenki aht pahn tepida papah nan Pedel en Wehin Amerika.

Se ekis pwunodki at pahn kohkohsang ahn Laura nohno me mahlahr. Se sohte kak sewese ni at pahn mihmi New York, ahpw rien Laura serepein silimeno nda irail pahn sewese oh apwalihki arail nohnou eh anahn kan en roson, mwohni, oh pepehm. Irail nda: “Se sohte kak doadoahngki pali laud en at ahnsou ong papah Siohwa, ahpw ma se apwalih nohno, e pahn sewese kumwa en pousehlahte wia amwa pwukoa.” Se uhdahn kalahnganki irail.

Riei pwutako oh eh pwoudo me kin kousoan Toronto, Canada, pil ahneki soangen madamadauohte ni ara kin apwalih nohno me wialahr liohdi men. Ni ahnsowo, nohno kin kousoan rehra dauliher sounpar 20. Se uhdahn kalahnganki limpoak oh epwel mwahu me ira wiahiong ih lao eh mehla, mwurinte at lella New York. E uhdahn wia pai kaselel ehu en ahneki peneinei kan me kin pilada en wiahda wekidekla kan nan arail mour pwehn sewese pahpa nohno mahlahr kan, me kakete uhdahn apwal ekei pak.

Erein sounpar kei, ei pwukoa nan Pedel en Wehin Amerika iei en doadoahk nan wasahn wiahda pwuhk, me met kepwehn doadoahk kan kapw oh kamengeila doadoahko. Me keren, I kin doadoahk nan ohpis en pwainda kepwe (Purchasing Department). I uhdahn perenki ei iang kisehn Pedel laud wet erein sounpar 20. Met, mpen meh 5,000 me mi nan Pedel wet, oh riatail kan me sohte kin kousoan nan Pedel ahpw kin kohda iang doadoahk, irail mpen meh 2,000.

Sounpar weneisek samwalahro, I sohte pahn medewe me ih wasaht me I pahn mi ie. Laura kin uhdahn sewese ie laud erein sounpar pwukat koaros. Ei mour uhdahn nsenamwahu! Se kin kesempwalki soangsoangen pwais kaselel kan me se alehdi oh pil riat koaros me se kin iang irail doadoahk, iangahki irail kan nan ohpis en Sounkadehdehn Siohwa tohto me se mwemweitla ie pwehn wia at pwukoa kan. Met I dauliher sounpar 80, ei pwukoa kan malaulaula pwehki mieier brother pwulopwul kan me kak apwalih doadoahk pwukat.

Sounmelkahkao ntingihedi: “Meid pai wehi me eh Koht, iei KAUN-O.” (Mel. 33:12) Met uhdahn mehlel! I uhdahn kalahnganki ei kak iang sapwellimen Siohwa aramas akan peren.